Jabura 12
12
Alatala la kuma telenbalenu la ko tɔ
1Dauda la beete do le ka min be donden beeti bɔɔlanu la kuntige bolo. Beete le mu min be bɔɔla anun kɔra julu kolo sagiŋɛ la.
2Alatala, i ni dɛmare ma,
lannanteya bele bitugun,
tɔɲa fɔlanu bata ban duge kunma.
3Bɛ be ɲɔgɔn tɔɲɛgɛla.
Kuma diyama be anu da tɔ,
kɔnɔ anu juse tɔ, filankafuya kuma le be fɔla.
4Anu be kuma diyama fɔla anu da min na, Alatala ni wo balan,
anu nɛŋɛ ni wasunteya kuma banba fɔ koe dan.
5Anu ka a fɔ, «Mɔ sɛnbɛ kolo kuma dula.
Mɔ da mu mɔ yɛtɛ tɛŋɛ le la.
Ɲɔmɔ si nɔ sɔtɔ mɔ ma?»
6Alatala ko: «Anu be tɔɔrɔbaganu majuguyala ki min na,
anun fugarenu nuunu kulɛ min be bɔɔla anu da tɔ,
wolo be n nawulila kɔtɛ,
n ni anu lakisi mɔgɛnu ma, minnu be anu ɲagankatala.»
7Alatala la kumanu mu kuma saniyandeŋɛ le la,
iko kaalise min be lakunɛnden sigi wɔrɔwila,
a boee bɛ bata ban bɔɔla a tɔ.
8Ee Alatala, i ni tɔɔrɔbaganu kanta,
i ni mɔ lakisi kɛ mɔgɔ koroŋɛnu ma kudai.
9Kɛ wagate, ko koron malá banba bata siya adamadeŋɛnu tɛma,
ko koron malanu be tagamanna dula bɛ tɔ.
Currently Selected:
Jabura 12: MOG
Highlight
Copy
Compare
Share
Want to have your highlights saved across all your devices? Sign up or sign in
