Jabura 119
119
Sɛɛwa koe Ala la sariya la ko tɔ
1Hɛra be mɔgɛnu ye kɔnɔ bele minnu tagamanɲa la,
minnu be tagamanna Alatala la sariya la.
2Hɛra be mɔgɛnu ye, minnu be mɛnnila Ala la seedeɲɔgɔya kumanu ma,
minnu be a ɲinila anu juse bɛ la.
3Anu mɛn te ko koroŋɛ ma,
anu be tagamanna Ala la kila le la.
4Alatala, i be diren min ye, i bata wo yamɔrenu sa,
alako mɔ ni wonu labatu a ɲinma la.
5A sɔgɔ be n na, n na kilanu ni nɔ matelenna a ɲinma la,
alako n ni nɔ i la ko manɛŋɛnu labatula.
6N tini n ɲa sɔ i la yamɔrenu bɛ la,
n te naa malu.
7N si i matɔgɔ le n juse beeyareŋɛ la
ka to i la kuma makiitiren telendeŋɛnu la ko karanna.
8N be diren i la ko manɛŋɛnu labatula.
Yandi, i kana n aɲɛ dɔndɛ la!
9Kamareŋɛ be a la kila lasaniyanna kama le?
A ni i la kuma labatu.
10N be i ɲinila n juse bɛ le la.
I kana n to n ni bɔɔ i la yamɔrenu kɔma!
11N be i la kuma fɔreŋɛ mandila le n juse tɔ,
alako n kana junubu sɔtɔ i la.
12Mamatɔgɛ be i ye, ile Alatala!
N nakaran i la ko manɛŋɛnu la.
13I ka i la kuma makiitireŋɛ minnu fɔ,
n be wonu bɛ matɛngɛla le.
14N be sɛɛwaren de i la seedeɲɔgɔya kumanu jokki koe la,
iko n tini bannaya bɛ sɔtɔ.
15I be diren koe minnu ye, n be tola n hakkile latagala wonu le ma;
n be n ɲa sɔren i la kilanu le la.
16N bata i la ko manɛŋɛnu ma n na sɛɛwa feŋɛ la,
n te ɲina i la kumanu la.
17Ko ɲinma ma nde i la jondeŋɛ ye alako n ni kisi,
n ni i la kuma labatu!
18N ɲanu laka n ni anu sɔ
ko makaabɛreŋɛnu la minnu be i la sariya tɔ.
19N mu luntaŋɛ le la kɛ duge tɔ,
i kana i la yamɔrenu dogon n na.
20Wagate bɛ n nɛ be lakɛtɛnden
i la kuma makiitireŋɛnu lɔn koe sɔgɛ la.
21I be fan nakoloyala dankareŋɛnu lasogila,
minnu bata anu yɛtɛ lasama i la yamɔrenu ma.
22Maluya nun fɛɛya bɔɔ n kunma,
bayi n be mɛnniren i la seedeɲɔgɔya kumanu ma.
23Mansanu sigita kiyoki anu ni n makuma,
nde i la jondeŋɛ, n be n hakkili latagala i la ko manɛŋɛnu le ma.
24N na sɛɛwa mu i la seedeɲɔgɔya kumanu le la,
n nasilá le mu anu la.
25N nɛ sareŋɛ fɛlɛ duge tɔ ba, a be buguta le tɔ!
N nakisi iko i be a lahiriren n ɲɛ ki min na!
26N be n tagamanɲanu masifɛla, i be n jaabila.
N nakaran i la ko manɛŋɛnu la!
27I sagona koe fahamuɛ dii n ma,
alako n ni kɛnɛ n hakkile latagala i la wali makaabɛreŋɛnu ma!
28N nɛ be dila tɔɔrɛ la;
n nawuli iko i be a lahiriren n ɲɛ ki min na.
29Mamafu kila layanfaya n na,
i ni hinnɛ n na, i ni n sɔ i la sariya kila ma!
30N be lannanteya kila le masubɛren,
n be sɔren i la kuma makiitireŋɛnu le kɔma.
31N bata kiti i la seedeɲɔgɔya kumanu la;
Alatala, i kana n ma mɔgɔ malureŋɛ la!
32N be sɔɔbɛ tagamaŋɛ mala i la yamɔre kila le tɔ,
bayi i si n nɛ lafulen de.
33Alatala, n nakaran i la ko manɛŋɛnu la kila le la,
n ni a jokki han a daŋɛ tɔ.
34Hakkili ɲinma dii n ma, n ni nɔ i la sariya mandila,
n mɛn ni nɔ a labatula n juse bɛ la!
35N natagaman i la yamɔri kilanu la,
wo tagamaŋɛ le di n ɲɛ.
36Yannun i ni n juse ɲamatelen bannaya ma,
n juse ɲamatelen i la seedeɲɔgɔya kumanu le ma.
37N ɲanu bɔɔ fufafu koenu la,
i ni n nakisi ka n natagaman i la kila kunma!
38I la lahire lakamali nde i la jondeŋɛ ye,
min mu i ɲalakilannanu tɛŋɛ la!
39N nakisi mɔgɛnu la maluya ma n be kilanden min na,
bayi i la kuma makiitireŋɛnu le kaɲin.
40Min sɔgɔ be n na, n ni sɔ i sagona koe kɔma.
A to n ni balu i la teleŋɛ butɔ!
41Alatala, a to i la fonisireya ni na n ma,
anun i la kise, iko i be a lahiriren n ɲɛ ki min na!
42Wo wagate, n si nɔ le n nanilá jaabila,
bayi nde be laaren i la kuma la.
43I kana tɔɲa kuma bɔɔ n da tɔ dɔndɛ la,
bayi n be n yili toren i la kiiti kumanu ma.
44N si i la sariya kumanu labatu le wagate bɛ,
lun go lun han kudai.
45N si tagaman de n nafulendeŋɛ la,
bayi n be i sagona koe le ɲinila.
46N si i la seedeɲɔgɔya kumanu la ko fɔ le mansanu ye,
n mɛn te naa to maluya butɔ.
47I la yamɔrenu be mala n na sɛɛwa feŋɛnu le la,
anu di n ɲɛ.
48N be n bolenu lafontila i la yamɔrenu le mafanna, anu di n ɲɛ.
N si to n hakkile latagala i la ko manɛŋɛnu ma.
49I kana ɲina kumanu la i ka minnu fɔ i la jondeŋɛ ye,
i ka a ma n yili ni to minnu ma.
50Ka n be tɔɔrɛ tɔ, fen min be n juse sala, wolo mu ka:
i la lahire be n balula le.
51Fan nakoloyalanu be n mayola han;
kɔnɔ n te bɔɔ i la sariya kila ma.
52Alatala, n be i la kiitenu talɔnden i be minnu saren bɔɔla hau,
wolo be n juse saren.
53N juse be yɛlɛren mɔgɔ koroŋɛnu la ko la
minnu be i la sariya bolokaren.
54I la yamɔrenu be matɛngɛren de n na beetenu tɔ,
n be maren luntaŋɛ la fɔgɛ tɔ ka min na.
55Alatala, n si i tɔgɛ la ko talɔn de hali sue tɔ,
n ni n hakkile to i la sariyanu ma.
56Koe min be taakuren n na, wolo mu ka:
n ni mɛnni i sagoe ma koe ma.
57Alatala, i la kuma labatu koe,
wolo mu n tɛŋɛ la.
58N be i mataranna le n juse bɛ la,
hinnɛ n na, iko i be a lahiriren n ɲɛ ki min na!
59N bata n mira n tagamanɲa la:
n ko n ni n na tagamaŋɛ kun sɔ i la seedeɲɔgɔya kumanu le la.
60N be teriyala le, n te dugundi
i la yamɔrenu labatu koe la.
61Mɔgɔ koroŋɛnu la julu yɛlɛreŋɛnu be n namilinden;
kɔnɔ n te ɲina i la sariya la.
62N ni wuli su tɛma alako n ni i tantu
i la kuma makiitiren telendeŋɛnu la ko la.
63Minnu bɛ be kilanden i la, n tagamanɲɔgɛ mu wonu le la,
anun minnu be i sagona koe labaturen.
64Ee Alatala, i la fonisireya bata dunuya lafa,
n nakaran i la ko manɛŋɛnu la!
65Alatala, i be ko ɲinma mala nde i la jondeŋɛ ye,
iko i be a lahiriren n ɲɛ ki min na nun!
66N nakaran ko ɲinma la anun ko lɔŋɛ la,
bayi n be lannanteya saren i la yamɔrenu ma.
67Yannun n ni nagasi, wo ka a taran de n bata bɔɔ i la kila kɔma nun;
kɔnɔ kɔtɛ n be i kulɛ labaturen.
68I kaɲin, i be ko ɲinma mala;
n nakaran i la ko manɛŋɛnu la.
69Fan nakoloyalanu be foniya kote sala n kunma;
nde kan be mɛnniren i sagona koe le ma n juse bɛ la.
70Anu hakkile be toren de iko dɔni nun je, fenfen te don a la;
nde kan, i la sariyanu be maren n na sɛɛwa le la.
71N na nagase bata ma n ɲɛ ko ɲinma la,
bayi wolo ka a ma n ka i la ko manɛŋɛnu degen.
72Sariya min be fatanden i da la, wo fisa nde ye
sanuɛ nun kaalise wulu dɔndɔ ko.
73I bolenu le be n daren, anu mɛn ka n mabɛlɛya.
I ni hakkili ɲinma dii n ma, alako n ni nɔ i la yamɔrenu degenna!
74I ɲalakilannanu tini n yen, anu be sɛɛwala le,
bayi n be n yige saren i la kumanu le ma.
75Alatala, n bata a lɔn, i la kiitenu telenta;
i ka n nagasi i la kanunteya le la.
76Yandi, i la fonisireya ni ma n masabarilá la n na tɔɔrɛ butɔ,
iko i be a lahiriren ki min na nde i la jondeŋɛ ye!
77I ni kinikini n ma alako n ni kisi,
bayi i la sariya le mu n na sɛɛwa koe la.
78Maluya ni fan nakoloyalanu mabutin,
minnu be n nasɛɛyala tɔɲɛgɛ butɔ.
Nde kan, n be n hakkile latagala i sagona koe ma.
79I ɲalakilannanu bɛ ni saagi n ma,
anun minnu ka i la seedeɲɔgɔya kumanu lɔn.
80Kɔnɔ kana to n juse tɔ i la ko manɛŋɛnu ma koe la,
alako maluya kana dusu n kunma!
81I la dɛmare sɔgɛ be n nɛ la han;
n yili be i la kuma le ma.
82N ɲanu bata kori i la lahiri kuma ɲini koe la i ka min na ko fɔ n ɲɛ;
n ko: «I be jusu sa diila n ma muntuma le?»
83Bayi n kun be latiɲaren iko luule min bata mɛ siise la;
kɔnɔ n te ɲina i la ko manɛŋɛnu la.
84Nde i la jondeŋɛ la simaya be tagala han san jelu?
Minnu be kitiren n na, i be anu makiitila wagati miniman de?
85Fan nakoloyalanu be dinkanu soela n ɲatɔ,
wo dun bele bɛnden i la sariya ma.
86I la yamɔrenu bɛ mu lannanteya le la.
Anu be kitiren n na tɔɲɛgɛ le kunma; n dɛman!
87A banba ma to anu ni n na ko dan,
kɔnɔ nde ma i sagona koenu boloka.
88I la fonisireya to kolo, i ni n nakisi,
alako i ka seedeɲɔgɔya kumanu minnu fɔ, n ni anu labatu.
89Ee Alatala, i la kuma be sabatiren saŋɛ tɔ kudai.
90I la kuma dɔndɔ tigiya, a be ɲɔ bɔɔla bɔnsɔ ma han bɔnsɔ.
I bata duge mabanban a bata sabati.
91I la kuma makiitireŋɛnu le be koenu lasabatiren bi,
a bɛ be i sagoe le tɔ.
92Ka i la sariya bele maren n sɛɛwa koe le la nun,
n be bɔnɔla le nun nagase butɔ.
93N te ɲina i sagona koenu la feu,
bayi i be n tola balue tɔ wonu la ko la.
94Ile le tan mu n na, n nakisi!
N juse be i sagona koenu le kɔma.
95Ko koron malanu be n kɔnɔnden anu ni n nasama;
kɔnɔ nde hakkili be sɔren i la seedeɲɔgɔya kumanu le ma.
96N be a yenden ko kamalireŋɛ bɛ si ban de,
kɔnɔ i la yamɔre kan dan bele.
97I la sariya di n ɲɛ!
N be n hakkile latagala a ma tele muru.
98I la yamɔrenu be n kuŋɛ tɔ kudai,
anu be n mala hakkili tige le la ka tanbi n jaguenu la.
99N bata hakkilimaya sɔtɔ n karamɔgɔnu bɛ ko,
bayi nde be n hakkile latagala i la seedeɲɔgɔya kumanu le ma.
100Nde hakkile kaɲin kayibanu ko,
bayi n be mɛnniren i sagona koenu le ma.
101N be n kɛŋɛ layanfayaren de kila koroŋɛ bɛ la,
alako n ni i la kuma labatu.
102N te n matuntun i la kuma makiitireŋɛnu la,
bayi ile le be n nakaranden.
103I la kumanu di n nɛgɛraŋɛ ye
tanbi koe kumɛ la n da tɔ.
104I la sariyanu le ka hakkili ɲinma dii n ma,
n mɛn ka mamafue bɛ kɔn.
105I la kuma mu lanpue le la n kɛn kɔtɔ,
kɛnɛ le mu min be n na kila lamalanna.
106N bata n kali, n si n na lahire lakamali le,
n ko n si n hakkili to le i la kuma makiitiren telendeŋɛnu ma.
107Alatala, n be nagasiren koola,
i ni n to balue tɔ iko i be a lahiriren n ɲɛ ki min na nun.
108Ee Alatala, n na mamatɔgɛ minnu be yɛlɛren i ma, anu labita n ɲɛ,
i ni n nakaran i la kuma makiitireŋɛnu la.
109N nɛ be faga da le tɔ wagati bɛ;
kɔnɔ, n te ɲina i la sariya la.
110Ko koron malanu be jule yɛlɛren n ɲɛ,
kɔnɔ n bele n yɛtɛ lasamaren n ni bɔɔ i sagona koenu kɔma.
111I la seedeɲɔgɔya kumanu be maren nde ye abada kɛɛ le la,
anu be maren n juse lasɛɛwa feŋɛ le la.
112N be i la ko manɛŋɛnu latagaman koe le saren n juse tɔ,
n ni anu lakamali han kudai.
113N be filankafuenu kɔnden,
kɔnɔ i la sariya kan di n ɲɛ.
114N taaku dula mu ile le la, anun n natangalá;
n be n yili toren i la kuma ma.
115Wo matuntun n na, wole ko koron malanu,
alako ka n si nɔ n na Ala la yamɔrenu labatula.
116N kɔtɔ sɔ iko i be a lahiriren n ɲɛ ki min na, alako n ni kisi,
i mɛn kana n yigitɛgɛ.
117I ni sɛnbɛnteya dii n ma alako n ni kisi,
n ni nɔ n hakkile tola i la ko manɛŋɛnu ma.
118I be mɔgɛnu bɛ latuntunna le minnu be anu yɛtɛ lasamala i la ko manɛŋɛnu ma.
Bayi, anu la mɔgɔ majuguya koe sɔdula yo bele.
119I be ko koron malanu bɛ banna le kɛ dunuya iko nɛgɛ boee.
Wolo mu i la seedeɲɔgɔya kumanu be diyaren n ɲɛ.
120N bali tenu wulita kilaŋɛ la i ɲala;
n mɛn be hanmɛren i la kuma makiitireŋɛnu la.
121N be tɔɲa nun teleŋɛ le mala;
i kana n to mɔgɛnu bolo minnu be boela n ma.
122I ni sɔ nde i la jondeŋɛ dɛman koe la, ka ko ɲinma lagiri n ɲɛ.
I kana a to fan nakoloyalanu ni boe n ma.
123N ɲanu bata kori, i la kise sɔgɔ to be n na;
i ka teleŋɛ min na ko fɔ nun, wo tugun sɔgɔ be n na.
124I la fonisireya to kolo, i ni i la jondeŋɛ dɛman;
i mɛn ni n nakaran i la ko manɛŋɛnu la.
125I la jondeŋɛ le mu n na; hakkili ɲinma dii n ma,
alako n ni i la seedeɲɔgɔya kumanu lɔn.
126Alatala, koe ma wagate le mu i ye ka,
bayi anu be i la sariya sɔsɔla.
127Wo bɛ butɔ, i la yamɔrenu le di nde ye fisa sanuɛ ko,
hali sanu ɲinma.
128Wolo mu i sagona koe bɛ be toren n ɲɛ iko tɔɲa kila telendeŋɛ;
n be mamafu kila bɛ kɔnden de.
129I la seedeɲɔgɔya kumanu mu ko makaabɛreŋɛnu le la,
wolo mu n be kitiren anu labatu koe la.
130I la kuma be kila le lakɛnɛla mɔgɛ ye.
A si hakkile dii lɔnnibalenu ma.
131I la yamɔrenu sɔgɔ be n na han,
wolo mu n be n da lakala anu sɔgɔ bɔɔ koe la.
132I firifiri n ma, i ni hinnɛ n na,
iko a dagɛren ki min na mɔgɛnu ye, i tɔgɛ di minnu ye.
133N kɛŋɛ labɛlɛya i la kuma fɔreŋɛ sabu la;
i kana sɔn telenbaliya yo ni nɔ sɔtɔ n ma.
134N nabɔɔ mɔgɛnu la nanbara tɔ,
alako n ni nɔ i sagona koenu labatula.
135I ɲakɔtɔ lahenti nde i la jondeŋɛ ye,
i mɛn ni n nakaran i la ko manɛŋɛnu la.
136N bata di han n ɲa je bata woyi,
bayi anu bele i la sariya labaturen.
137Alatala, i telenta,
i la kuma makiitireŋɛnu tugun telenta.
138I be i la seedeɲɔgɔya kumanu fɔren teleŋɛ
nun lannanteya banba le la.
139N jaguenu be ɲinala i la kumanu la,
wolo mu i la ko hanmɛ be n da boboren.
140I la kuma tini kɔrɔsi, tɔɲa le tun be bɔɔla a tɔ,
i la kuma di nde i la jondeŋɛ ye.
141Mɔgɛnu be n dɔgɔyala, anu be n fɛɛyala;
kɔnɔ n bele ɲinaren i sagona koenu la.
142I la teleŋɛ mu abada teleŋɛ le la;
i la sariya mu tɔɲa le la.
143Jusu makasa nun jusu bɔɛ bata ke n ma,
kɔnɔ, i la yamɔrenu le mu n na sɛɛwa koe la.
144I la seedeɲɔgɔya kumanu be telenden de abada;
hakkili ɲinma dii n ma, alako n ni kisi.
145Alatala, n be n da ladila i la n juse bɛ la.
N jaabi, alako n ni nɔ mɛnnila i la ko manɛŋɛnu ma.
146N be n da ladila i la;
n nakisi, alako n ni nɔ i la seedeɲɔgɔya kumanu labatula.
147Yannun ɲɔlakɛnɛ ni ke, n be n kulɛ labɔɔla le i ma;
n ni n yili to i la kumanu ma.
148Yannun sue ni ban, nde bata n ɲanu laka,
n be n hakkile latagala i la lahire le ma.
149Alatala, i la fonisireya to kolo, i ni i tolomasɔ n kulɛ la;
n nakisi i to be dariren kiiti ɲinma le sala.
150Minnu be ko masogindeŋɛnu jokkiren, wonu be anu madonna n na;
anu be anu matuntunna i la sariya la.
151Ee Alatala, i sutu n na!
I la yamɔrenu bɛ be maren tɔɲa le la.
152Bɔɔla bima n ka a lɔn i la seedeɲɔgɔya kumanu la ko tɔ
ka a fɔla i be anu mabanbanden de.
153N na tɔɔrɛ fɛlɛ i ni n nafulen,
bayi n bele ɲinaren i la sariya la.
154N kunma kɛlɛ ma, i ni n kunka;
n nakisi iko i be a lahiriren n ɲɛ ki min na.
155Kise be yanfayaren de mɔgɔ koroŋɛnu la,
bayi anu bele i la ko manɛŋɛnu ɲinila.
156Ee Alatala, i la kinikinɛ kolo,
n nakisi i to be dariren kiiti ɲinma le sala.
157N jague minnu be kitiren n na, wonu siyata,
kɔnɔ n te bɔɔ i la seedeɲɔgɔya kumanu kɔma.
158Janfantenu minnu bele i la kuma labaturen,
wonu yen koe be sɛɛyaren n ɲɛ.
159Alatala, i ni a lɔn i sagona koenu di n ɲɛ;
i la fonisireya to kolo, i ni n nakisi.
160I la kuma bɛ mu tɔɲa le la, kabɔɔ a fɔlɛ han a la baŋɛ;
i la kuma makiitiren telendeŋɛnu bɛ mu abada le la.
161Mansanu be n ɲagankatala kun yo bele min na;
kɔnɔ fenfen te n juse sɛrɛn fɔ i la kuma.
162N be sɛɛwaren i la kuma la,
iko min bata tɔnɔ banba sɔtɔ kɛlɛ tɔ.
163N be mamafue kɔnden, a ma di n ɲɛ;
i la sariya le di n ɲɛ.
164N be i matɔgɔla tele dɔndɔ kɔtɔ kunɲama wɔrɔwila,
i la kuma makiitiren telendeŋɛnu la ko la.
165Jususa siyama be mɔgɛnu ye minnu be i la sariya kanuren,
fenfen te sa anu ɲatɔ min si a ma anu ni boe.
166Ee Alatala, n be n hakkile sɔren i la kise le ma!
N mɛn be i la yamɔrenu mala.
167N be i la seedeɲɔgɔya kumanu labaturen,
anu mɛn di n ɲɛ koola.
168N be i sagona koenu nun i la seedeɲɔgɔya kumanu labaturen,
bayi n tagamanɲa bɛ be saren i ɲakɔtɔ le.
169Alatala, n na mamade ni taga han a ni ke i ma!
Hakkili ɲinma dii n ma iko i be a lahiriren n ɲɛ ki min na.
170N na fanmade ni taga han a ni ke i ɲakɔtɔ.
N nafulen iko i be a lahiriren n ɲɛ ki min na.
171I matɔgɔ koe ni woyi n da tɔ,
bayi i be n nakaranna i la ko manɛŋɛnu la.
172N da ni i la kumanu fɔ beete tɔ,
bayi i la yamɔrenu bɛ be telenden.
173I ni na n dɛman,
bayi n be i sagona koenu le masubɛren.
174Ee, Alatala, i la kise sɔgɛ be n na!
I la sariya le be maren n na sɛɛwa koe la.
175I ni n nɛɛ to kisiren, alako n ni i matɔgɔ!
I la kuma makiitireŋɛnu tugun ni n dɛman.
176N be samaren iko saaka labolokareŋɛ.
Wo butɔ, i ni nde i la jondeŋɛ ɲini,
bayi n bele ɲinaren i la yamɔrenu la.
Currently Selected:
Jabura 119: MOG
Highlight
Share
Compare
Copy
Want to have your highlights saved across all your devices? Sign up or sign in
