Jabura 118
118
Ala matɔgɔ beete Ala ɲalakilanná jama bɛ ɲala
1Wo Alatala matɔgɔ, bayi a kaɲin,
dan bele a la fonisireya la!
2Bani Isirayila ni a fɔ, a la fonisireya dan bele!
3Harona bɔnsɛ ni a fɔ, a la fonisireya dan bele!
4Alatala ɲalakilanná bɛ ni a fɔ, a la fonisireya dan bele!
5N na jusu makasa butɔ, n ka n kulɛ labɔɔ Alatala ma,
a ka n jaabi, a ka n to dula yiriwareŋɛ tɔ.
6Alatala be nde le ye, n te kilan fenfen na.
Mɔgɛnu si nɔ fen mala nde la?
7Alatala le mu n dɛmanná la,
n si n ɲa lajigi le n kɔnnɛlanu ma.
8Tangare ɲini koe Alatala la, wolo fisa
yannun i ni i kuŋɛ taaku mɔgɛ la.
9Tangare ɲini koe Alatala la, wolo fisa
yannun i ni i kuŋɛ taaku sɔdula tigenu la.
10Jamanɛ bɛ le be n namilinden nun n kɛlɛ koe la,
kɔnɔ, Alatala tɔgɛ la, n ka anu jihadi le.
11Anu be n namilinden, anu be n fɛfɛ bɛ tɔ nun,
kɔnɔ Alatala tɔgɛ la, n ka anu jihadi le.
12Anu be n namilinden nun iko kumukolenu,
kɔnɔ anu banta le iko bin bala be bintanna ki min na.
N ka anu jihadi Alatala tɔgɛ le la.
13Ee, i ka n natuntun de yati i ni n naboe,
kɔnɔ, Alatala ka n dɛman.
14N sɛnbɛ mu Alatala le la,
n mɛn be ale len na ko beete bɔɔla.
A bata ma n nakisilá la.
15Sɛɛwa nun kunnawule sɔnkɛ be yɛlɛla telenbaganu la fɔgɛnu tɔ,
Alatala bata wali a sɛnbɛ la!
16Alatala ka sɛnbɛ fisamante sɔtɔ a bolo ɲinma la,
Alatala ka nɔɛ ma a bolo ɲinma la.
17Wo butɔ, n te faga,
n si kisi le n ni naa Alatala la walenu masifɛ.
18Tɔɲa le, Alatala ka n matelen,
kɔnɔ a ma n to faga da tɔ.
19Wo ni teleŋɛ bondanu laka n ɲɛ,
n ni don, n ni Alatala matɔgɔ.
20Alatala la bonda le mu kɛ la,
mɔgɔ telendeŋɛnu be donna min na.
21N si i matɔgɔ le, bayi i bata n jaabi,
i bata ma n nakisilá la.
22Bon sɔlanu ka kure min aɲɛ,
wolo be maren boŋɛ sangantinmɛ la.
23Wo be fatanden Alatala le la,
a mu kabanako le la mɔ ye.
24Alatala ka kɛ luŋɛ le da.
Awa bi, mɔ ni to mamaŋaga nun ɲagaliŋɛ butɔ.
25Alatala, yandi, i ni mɔ lakisi!
Alatala, yandi, sɔnɔya ma mɔ ye!
26Barikɛ be mɔgɛ ye, min be nala Alatala tɔgɛ la.
Mɔ be dubala wo bɛ ye bɔɔla Alatala batu boŋɛ tɔ.
27Alatala le mu Ala la, a ka banta lakɛnɛ mɔ ye.
Kolofeŋɛ min be bɔɔla sarika la kɛ sale tɔ,
wo ni a kiti julu kole la
sarika bintandula tunku naanɛ binanu la.
28N na Ala le mu i la, n si i matɔgɔ le.
N na Ala, n si i la ko mayɛlɛ le.
29Wo Alatala matɔgɔ, bayi a kaɲin,
a la fonisireya dan bele.
Currently Selected:
Jabura 118: MOG
Highlight
Share
Compare
Copy
Want to have your highlights saved across all your devices? Sign up or sign in
