Lewi bɔnsɛnu la sariya 4
4
Junubu kafare sarika
1Alatala mɛn kumata Musa ye a ko: 2«A fɔ bani Isirayila kaanu ye, ka a taranta mɔgɔ do bata nde Alatala la yamɔri do sɔsɔ, a ka junube ma, kɔnɔ a ma a ma teunteya la, a ni sariya min jokki, wolo mu ka.
3Ka a taranta sarika lakelá banba le tagata n na yamɔre do sɔsɔ, wo mata jama ye junube la, a bɛnta a ni tuura bɔɔ sarika la nde Alatala ye, lanjuru yo bele min na, alako wo ni ma junubu kafare sarika la a ye. 4A ni tuura nati hɔrɔma dingira. A ni a bole sa a kun tɛma hɔrɔma dingira dondula kɔma tatta butɔ, nde Alatala ɲala. Wo kɔma, a ni a kannatɛgɛ nde Alatala ɲala. 5Sarika lakelá banba ni wo tuura base do doni hɔrɔma dingira tanta butɔ, 6a ni a bolo soliŋɛ lajigi wo base tɔ, a ni a lasulen kunɲama wɔrɔwila parawan banba ɲakɔtɔ min be bakkuren dula saniyandeŋɛ tɔ nde Alatala ɲakɔtɔ. 7Sarika lakelá ni base do sa binanu ma minnu be sorayi saniyandeŋɛ bintandula tunku naanɛ ma, min be ɲɔ nde Alatala ɲakɔtɔ. A ni bɔɔ base tɔɛ fɛ, a ni naa wo bɛ bɔn sarika bintandula lanbaŋɛ tɔ, sarika bintannɛŋɛ be kɛnɛ bɔɔla ka min na, hɔrɔma dingira dondula ɲakɔtɔ. 8A ni kɛ́ŋɛ bɛ bɔɔ tuura tɔ min be maren junubu kafari sarika la, kɛ́ŋɛ min be teteke ma, anun kɛ́ŋɛ min bɛ be a mabutinden, 9a kɔkele fila, nun kɛ́ŋɛ min be anu ma, anun laare min be juse mabutinden. 10A ni wo ma iko kanunteya sarika be mala ki min na. Sarika lakelá ni wonu bintan wo sarika bintandula kunma. 11Kɔnɔ tuura bole, a sube, a kuŋɛ, a kɛŋɛnu, a jaaɲɛ, 12anun a tɔɛ bɛ min be tola, wonu ni layanfaya daaka la, dula kɛrɛkɛrɛreŋɛ tɔ, ta buguta be lafilila ka min na, a ni bintan ta la ɲɔ la, wo ta buguta kunma.
13Ka a taranta Isirayila jama bɛ le mu min tantanta, anu ka nde Ala la yamɔri do sɔsɔ, kɔnɔ wo koe bele lɔnden tantaŋɛ la, wo mata anu ye junube la. 14Ka anu nata lɔn sɔtɔ wo ma tɛmuɛ min tɔ, awa jama ni tuura nati hɔrɔma dingira dondula kɔma tatta butɔ, ka naa a bɔɔ sarika la nde Alatala ye, a ni ma junubu kafari sarika la anu ye. 15Jama kayibanu ni anu bole sa tuura kun tɛma, anu ni a kannatɛgɛ nde Alatala ɲala. 16Sarika lakelá banba ni wo tuura base do jigan, a ni don a fɛ n na hɔrɔma dingira butɔ, 17a ni a bolo soliŋɛ lajigi wo base tɔ, a ni a lasulen kunɲama wɔrɔwila parawan banba ɲakɔtɔ min be bakkuren dula saniyandeŋɛ tɔ nde Alatala ɲakɔtɔ. 18Sarika lakelá ni base do sa binanu ma minnu be sorayi saniyandeŋɛ bintandula tunku naanɛ ma, min be nde Alatala ɲakɔtɔ n na hɔrɔma dingira butɔ ɲɔ. A ni bɔɔ base tɔɛ fɛ, a ni naa wo bɛ bɔn sarika bintandula lanbaŋɛ tɔ, sarika bintannɛŋɛ be kɛnɛ bɔɔla ka min na, Ala la hɔrɔma dingira dondula ɲakɔtɔ. 19A ni kɛ́ŋɛ bɛ bɔɔ tuura tɔ, a ni wo kɛ́ŋɛ bintan sarika bintandula kunma. 20A ni kɛ tuura bɔɔ sarika la iko min be bɔɔla a tɛn junubu kafari sarika la. Anu bɔɔ ɲa bɛ dɔndɔ. Wo butɔ, sarika lakelá be sarika bɔɔla le min si anu kunka, alako anu la junube ni kafari. 21A ni naa wo tuura fagareŋɛ sube doni jama la daaka kɔma, a ni a bintan iko tuura doe be bintanna ki min na. Wo be mala junubu kafari sarika le la jama ye.
22Ka a taranta kuntigi do le mu min bata nde a Marige Alatala la yamɔre do sɔsɔ, kɔnɔ a bele wo koe lɔnden tantaŋɛ la, wo mata a ye junube la. 23Ka a nata lɔn sɔtɔ a ma tɛmuɛ min tɔ, a ni sikule bɔɔ sarika la, lanjuru yo bele min na. 24A ni a bole sa sikule kun tɛma, a ni a kannatɛgɛ nde Alatala ɲa la, sarika bintannɛŋɛnu be kɛnɛ kannatɛgɛla ka min na. Junubu kafare sarika le mu. 25Sarika lakelá ni a bolo soliŋɛ lajigi wo base tɔ min be bɔɔren junube la ko la, a ni do sa binanu ma minnu be sarika bintandula tunku naanɛ ye, sarika be bintanna min kunma. Base min be toren, a ni naa wo bɛ bɔn sarika bintandula lanbaŋɛ tɔ, sarika bintannɛŋɛ be kɛnɛ bɔɔla ka min na. 26A ni kɛ́ŋɛ bɛ bintan wo sarika bintandula kunma, iko kanunteya sarika be mala ki min na. Wo butɔ sarika lakelá be sarika bɔɔla le min si wo kuntige kunka, alako a la junube ni kafari.
27Ka a taranta mɔgɔ do gbɛtɛ le mu min ka nde a Marige Alatala la yamɔre do sɔsɔ, kɔnɔ a bele wo koe lɔnden tantaŋɛ la, wo mata a ye junube la. 28Ka a nata lɔn sɔtɔ wo ma tɛmuɛ min tɔ, a si baa muse bɔɔ sarika la, lanjuru yo bele min na, a la junube la ko la. 29A ni a bole sa wo junubu kafari sarika kun tɛma, a ni a kannatɛgɛ sarika bintannɛŋɛnu be kɛnɛ kannatɛgɛla ka min na. 30Sarika lakelá ni a bolo soliŋɛ lajigi wo base tɔ min be bɔɔren junube la ko la, a ni do sa binanu ma minnu be sarika bintandula tunku naanɛ ye, sarika be kɛnɛ bintanna min kunma. Base min be toren, a ni naa wo bɛ bɔn sarika bintandula lanbaŋɛ tɔ. 31A ni kɛ́ŋɛ bɛ bɔɔ baa tɔ, iko kanunteya sarika be mala ki min na, a ni wo bintan sarika bintandula kunma, a ni ma kuɲɛ diyama la nde Alatala ye. Wo butɔ, sarika lakelá be sarika bɔɔla le mɔgɛ ye min si a kunka, alako a la junube ni kafari.
32Ka a be saaka bɔɔla junubu kafari sarika la, fɔ a ni ma saaka muse le la lanjuru yo bele min na. 33A ni a bole sa wo junubu kafari sarika kun tɛma, a ni a kannatɛgɛ sarika bintannɛŋɛnu be kɛnɛ kannatɛgɛla ka min na. 34Sarika lakelá ni a bolo soliŋɛ lajigi wo base tɔ min be bɔɔren junube la ko la, a ni do sa binanu ma minnu be sarika bintandula tunku naanɛ ye, sarika be kɛnɛ bintanna min kunma. Base min be toren, a ni naa wo bɛ bɔn sarika bintandula lanbaŋɛ tɔ. 35A ni kɛ́ŋɛ bɛ bɔɔ saaka tɔ, iko kanunteya sarika be mala ki min na, a ni wo bintan sarika doenu kunma minnu be kɛnɛ bintanna sarika bintandula kunma. Wo butɔ sarika lakelá be sarika bɔɔla le mɔgɛ ye min si a kunka, alako a la junube ni kafari.»
Currently Selected:
Lewi bɔnsɛnu la sariya 4: MOG
Highlight
Share
Compare
Copy
Want to have your highlights saved across all your devices? Sign up or sign in
