Lewi bɔnsɛnu la sariya 3
3
Kanunteya sarika
1«Ka mɔgɛ be diren kolofen banba bɔɔla kanunteya sarika la nde Alatala ye, a mata kolofen kayima la ba, a mata a musuma la ba, fɔ a ni ma kolofeŋɛ le la lanjuru yo bele min na. 2A ni wo kolofeŋɛ nati hɔrɔma dingira. A ni a bole sa a kun tɛma hɔrɔma dingira dondula kɔma tatta butɔ. Wo kɔma, a ni a kannatɛgɛ. Harona la deŋɛnu sarika lakelanu, anu ni wo kolofeŋɛ base wussɛ sarika bintandula sɔngɔnu ma. 3Kanunteya sarika butɔ, min ni bɔɔ sarika la a ni bintan ta tɔ nde Alatala ɲala, wolo mu ka: a kɛ́ŋɛ min be tetekenu ma, anun min bɛ be a mabutinden, 4anun a kɔkele fila, anun kɛ́ŋɛ min be anu ma, anun laare min be a juse mabutinden. 5Harona la deŋɛnu ni wo bɛ bintan sarika bintandula kunma, ka a sa sarika bintannɛŋɛ kunma, min tugun be kɛnɛ bintanna ɲɔ. Ta ni wo bɛ bintan. A bata ma sarika bintandeŋɛ la, min kuɲɛ di nde Alatala ye.
6Ka mɔgɛ be diren saaka ka wo ma baa le bɔɔla kanunteya sarika la Alatala ye, a mata a kayima la ba, a mata a musuma la ba, lanjuru yo kana to a la. 7Ka a be saaka le bɔɔla sarika la, a ni wo nati nde Alatala ye, 8a ni a bole sa a kun tɛma Ala la hɔrɔma dingira dondula kɔma tatta butɔ. Wo kɔma, a ni a kannatɛgɛ. Harona la deŋɛnu sarika lakelanu ni wo kolofeŋɛ base wussɛ sarika bintandula sɔngɔnu ma. 9Kɛ kanunteya sarika butɔ, min ni bɔɔ sarika la a ni bintan ta tɔ nde Alatala ɲala, wolo mu ka: a fɔɲɛ binde bɛ, a kɛ́ŋɛ min be tetekenu ma, anun min bɛ be a mabutinden, 10anun a kɔkele fila, anun kɛ́ŋɛ min be anu ma, anun laare min be a juse ma. 11Sarika lakelá do ni wo bintan sarika bintandula kunma. Ta ni wo bɛ bintan. A bata ma dɔmɔrifeŋɛ la min be kela nde Alatala ma sarika la.
12Ka mɔgɛ be baa le bɔɔla sarika la, a ni wo nati nde Alatala ye, 13a ni a bole sa a kun tɛma, Ala la hɔrɔma dingira dondula kɔma tatta butɔ. Wo kɔma, a ni a kannatɛgɛ. Harona la deŋɛnu sarika lakelanu ni wo kolofeŋɛ base wussɛ sarika bintandula sɔngɔnu ma. 14Kɛ kanunteya sarika butɔ, min ni bɔɔ sarika la a ni bintan nde Alatala ye, wolo mu ka: a kɛ́ŋɛ min be tetekenu ma, anun min bɛ be a mabutinden, 15a kɔkele fila, anun kɛ́ŋɛ min be anu ma, anun laare min be a juse ma. 16Sarika lakelá do ni wo bintan sarika bintandula kunma. Ta ni wo bɛ bintan. A bata ma dɔmɔrifeŋɛ la min be kela nde Alatala ma sarika la, a kuɲɛ di n ɲɛ. Wo sarika bɛ butɔ, kɛ́ŋɛ mu nde Alatala le tɛŋɛ la.
17Wo nun wo bɔnsɛ, mɔgɔ yo kana sube kɛ́ŋɛ dɔmɔ, mɔgɔ yo kana sube base min. Wo sabatita kan do kan, wo bata ma yamɔre la min te tiɲa abada.»
Currently Selected:
Lewi bɔnsɛnu la sariya 3: MOG
Highlight
Share
Compare
Copy
Want to have your highlights saved across all your devices? Sign up or sign in
