Lewi bɔnsɛnu la sariya 14
14
Bali bolo bandiya la saniyan ɲa
1Alatala kumata Musa ye, a ko: 2«Sariya le kɛ la mɔgɛ la saniyan ɲa la bali bolo bandiya be min ma. Anu tini be wo tigi donila a la saniyan koe la lun min na, 3sarika lakelá ni bɔɔ daaka kɔma la wo bandibaga fɛlɛdula. Ka a bata a lɔn wo tigi bata kendeya wo bande la, 4sarika lakelá ni yamɔre sa, ka a fɔla anu ni konden kende ladagɛreŋɛ fila nati bandibaga ye; anu mɛn ni gara wuleŋɛ nati, anun lɔgɔ bolo lanmanu, lɔgɛ minnu tɔgɔ sɛdiri anun hisopi. 5Sarika lakelá ni yamɔre sa, anu ni konden dɔndɔ kannatɛgɛ lɔndɛ do kunma, tenge tɔ je be min butɔ. 6A ni konden kende jigan, anun sɛdiri lɔgɛ, gara wuleŋɛ, nun hisopi lɔgɛ, a ni anu bɛ lasuwɛ kondeŋɛ base tɔ anu ka min kannatɛgɛ tenge tɔ je kunma min be lɔndɛ butɔ. 7A ni a punpun kunɲama wɔrɔwila wo bandibaga ma, min bɛnta a ni saniyan. Sarika lakelá ni a fɔ, wo mɔgɛ bata ma mɔgɔ saniyandeŋɛ la. Wo kɔma, a si konden kende boloka wula butɔ.
8Min be diren saniyanna, a si a la kutanu ko, a ni a balimate si, a ni a ko je la. Wo butɔ, a si saniyan de. Wo tanbi kɔma a si nɔ donna daaka tɔ. Kɔnɔ a te nɔ donna a la tanta butɔ han tele wɔrɔwila. 9A tele wɔrɔwila luŋɛ a mɛn ni a tasi: a kunsige yo, a da te yo, a ɲa kunka te yo, anun a balimate, a ni anu bɛ si. A mɛn ni a la kutanu ko, a ni a bale ko. Wo butɔ, a si saniyan de. 10A tele sagin luŋɛ, a ni saaka deŋɛ kayima fila jigan, anun saaka muse san dɔndɔ, lanjuru yo bele minnu la. A mɛn ni sugu kolo munge boroŋɛ ɲa dɔndɔ bɔɔ, tule be basanden min fɛ. Sa wo kunma, a ni tule litari tɛma tugun bɔɔ. 11Sarika lakelá ni bandibaga nun a la sarika sɔ nde Alatala ɲakɔtɔ hɔrɔma dingira dondula tɔ. 12Wo saaka den fila tɛma, sarika lakelá ni dɔndɔ jigan, a ni a bɔɔ fan nasaagi sarika la, anun wo litari tɛma tule. A ni wonu lindan nde Alatala ɲala ka a kɛrɛkɛrɛ n ɲɛ. 13A ni wo saaka kannatɛgɛ dula saniyandeŋɛ tɔ, junubu kafari sarika nun sarika bintannɛŋɛ be kɛnɛ kannatɛgɛla ka min na. Kɛ fan nasaagi sarika be mala sarika lakelá le tɛŋɛ la, iko junubu kafari sarika. Sarika le mu a la min be saniyanden han a tanbita a tɔ. 14Sarika lakelá ni fan nasaagi sarika base do jigan, a ni a sa bandibaga bolo ɲinma tole kɔtɔ, anun a bolo ɲinma kunkuruba, anun a bolo ɲinma kɛn solin kunkuruba ma. 15Sarika lakelá mɛn ni do jigan wo tule litari tɛma la, a ni a sa a bolo mara bole tɔ. 16A ni a bolo ɲinma bolo soliŋɛ lajigi tule kɔtɔ, a ka min sa nun a bolo mara bole butɔ, a ni a lasulen nde Alatala ɲala kunɲama wɔrɔwila. 17Tule min tota sarika lakelá bolo butɔ, a ni do sa bandibaga bolo ɲinma tole kɔtɔ ma, anun a bolo ɲinma kunkuruba nun a kɛn solin kunkuruba bolo ɲinma ma, a ka fan nasaagi base sa ka min na nun. 18Tulu tɔɛ min tota sarika lakelá bolo butɔ, a ni wo sa bandibaga kuŋɛ ma. Awa, sarika lakelá be wo bandibaga kunsarala nde Alatala ɲala ɲɔgɔnna le. 19Wo kɔma, sarika lakelá ni naa junubu kafari sarika bɔɔ, a ni bandibaga kunsara a la saniyanbaliya la. Wo tanbi kɔma, a ni wo sarika bintannɛŋɛ kannatɛgɛ. 20A ni sarika bintannɛŋɛ nun sugu kolo tugureŋɛ bɔɔ sarika la, sarika bintandula kunma. A ni bandibaga kunsara, alako a ni saniyan.
21Ka bandibaga mu fondobɔnɛ le la, fɛrɛ bele a bolo wo sarika la ko la, a ni saaka den dɔndɔ pɛti bɔɔ fan nasaagi sarika la, min si lindan nde Alatala ɲala, a ni ma bandibaga ye kunsara la. A mɛn ni sugu kolo munge borondeŋɛ ɲa dɔndɔ pɛti jigan, tule be basanden min fɛ, anun tule litari tɛma. 22A mɛn ni legetere den fila jigan, ka wo ma gabu fila. Dɔndɔ ni ma junubu kafari sarika la, doe sarika bintannɛŋɛ. 23Tele sagin luŋɛ, a ni wo sarikanu nati sarika lakelá dula hɔrɔma dingira dondula tɔ nde Alatala ɲala, alako a ni saniyan. 24Sarika lakelá ni saaka nun tule litari tɛma jigan min be mala fan nasaagi sarika la, a ni anu lindan nde Alatala ɲala ka a kɛrɛkɛrɛ n ɲɛ. 25A ni wo saaka kannatɛgɛ fan nasaagi sarika la. A ni a base do jigan, a ni wo sa bandibaga bolo ɲinma tole kɔtɔ ma, anun a bolo ɲinma kunkuruba ma, anun a kɛn solin kunkuruba bolo ɲinma ma. 26A ni tule do bɔn a yɛtɛ bolo mara bole butɔ. 27A ni wo tule lasulen kunɲama wɔrɔwila a bolo ɲinma bolo soliŋɛ la nde Alatala ɲala. 28Tule min be a bolo butɔ, a ni wo donden jigan, a ni a sa bandibaga bolo ɲinma tole kɔtɔ ma, anun a bolo ɲinma kunkuruba ma, anun a kɛn solin kunkuruba bolo ɲinma ma, a ka fan nasaagi sarika base sa ka min na nun. 29Tulu tɔɛ min tota sarika lakelá bolo butɔ, a ni a sa wo bandibaga kuŋɛ ma. Awa, sarika lakelá be wo bandibaga kunsarala nde Alatala ɲala ɲɔgɔnna le. 30Wo kɔma, bandibaga fondobɔnɛ ka konden fila min nati nun, a mata gabue la ba, a mata legetere la ba, sarika lakelá ni naa wonu bɔɔ. 31A ni dɔndɔ bɔɔ junubu kafari sarika la. Wo kɔma, a be sugu kolo tugureŋɛ sarika jiganna, anun konden tɔɛ, a ni wo bɔɔ sarika bintannɛŋɛ la. Sarika lakelá be bandibaga kunsarala nde Alatala ɲala ɲɔgɔnna le. 32Sariya le wo la malasaniyaŋɛ la ko la kaye ye bali bolo bandiya be min na, fɛrɛ bele min bolo a saniyan koe la.»
Bandiya koroŋɛ tɔnkuma yen koe bon koloŋɛ ma
33Alatala kumata Musa nun Harona ye, a ko: 34«Wo tini don Kanana duge tɔ, n be min diila wo ma to dula la, ka a taranta, n ka a lagiri bandiya koroŋɛ do yenta wo la boŋɛ koloŋɛ do ma, wo fɔlɔta a tɔnkuma yenna donden donden, 35bon tige ni taga a fɔ sarika lakelá ye, a ko: ‹N bata bandiya koroŋɛ do yen n na bon koloŋɛ ma.› 36Sarika lakelá si yamɔre sa, anu ni feŋɛ bɛ labɔɔ boŋɛ butɔ yannun a ni taga bandiya koroŋɛ fɛlɛdula, alako feŋɛ minnu be boŋɛ butɔ anu kana ma fondo saniyanbale la. Wo tini ban mala, sarika lakelá ni taga wo boŋɛ fɛlɛdula.
37Sarika lakelá ni wo bandiya fɛlɛ. Ka bandiya kɛɲa yanba kutannama le, ka wo ma a wulenma, ka a mɛn bata ma iko bon koloŋɛ be soela ki min na, 38sarika lakelá ni bɔɔ boŋɛ butɔ, a ni boŋɛ latɔn don koe la tele wɔrɔwila kɔtɔ. 39Tele wɔrɔwila luŋɛ sarika lakelá mɛn ni tasaagi ɲɔ. Ka a taranta bandiya bata tagaman kan do bon koloŋɛnu ma, 40sarika lakelá ni yamɔre sa, bandiya be ka min na, anu ni ɲɔ kurenu bɔɔ, anu ni anu lafili saa kɔma dula saniyanbale tɔ. 41Anu ni bon koloŋɛ butɔ kan bɛ makosi. Wo bangu kosireŋɛ ni lafili saa kɔma dula saniyanbale tɔ. 42Kuru donu ni sa wo doenu faliŋɛ la, bon koloŋɛ ni furugu a nama la.
43Bon kosi koe ba, a furugu koe ba, a ni ma a nama la ba, wo wale bɛ tanbi kɔma, ka bandiya koroŋɛ mɛn donta boŋɛ tɔ, 44sarika lakelá mɛn ni saagi ɲɔ fɛlɛla. Ka bandiya bata tagaman boŋɛ butɔ, awa bandiya koroŋɛ le mu min te nɔ bɔɔla bitugun, a be maren fondo saniyanbale le la. 45Wo boŋɛ ká laboe, a kurenu, a lɔgɛnu nun a furugu bangue bɛ ni lafili saa kɔma dula saniyanbale tɔ. 46Fanni wo boŋɛ be balanden, min yo donta a butɔ, wo tigi tugun si ma mɔgɔ saniyanbale la han wura la. 47Min yo sata wo boŋɛ butɔ, ka wo ma a ka dɔmɛ dɔmɔ ɲɔ, a bɛnta a ni a la kutanu ko.
48Kɔnɔ wo boŋɛ ɲiɲa tanbi kɔma, ka a taranta sarika lakelá bata saagi wo boŋɛ butɔ, a ka a yen bandiya bele tagamanden boŋɛ butɔ, a ni a fɔ, wo boŋɛ bata saniyan, bandiya bata ban ɲɔ. 49Wo bon tige ni saniyaŋɛ lakamali sarika bɔɔ koe la. A ni konden fila jigan, anun gara wuleŋɛ, anun lɔgɔ bolo lanmanu, lɔgɛ minnu tɔgɔ sɛdiri anun hisopi. 50Sarika lakelá ni konden dɔndɔ kannatɛgɛ lɔndɛ do kunma tenge tɔ je be min butɔ. 51A ni sɛdiri lɔgɛ nun hisopi lɔgɛ nun gara wuleŋɛ, anun konden kende lasuwɛ konden base tɔ, anu ka min kannatɛgɛ nun, anun tenge tɔ je. A ni a punpun boŋɛ ma kunɲama wɔrɔwila. 52A be boŋɛ lasaniyanna ɲɔgɔnna le konden base la anun tenge tɔ je nun sɛdiri lɔgɛ nun hisopi lɔgɛ nun gara wuleŋɛ la. 53A ni konden kende boloka saa kɔma wula butɔ. Wolo be a mala, wo boŋɛ la ko koroŋɛ ni ban, a ni saniyan.
54Awa, sariya le wo la bandiya koroŋɛnu la ko tɔ, minnu be bɔɔla mɔgɛ bale ma, 55kutanu ma, boŋɛnu ma: 56bandiya minnu be yitila, minnu be bulala, anun minnu be beeyala. 57Wolo si a ma, wo si nɔ fondo saniyandeŋɛ tɛtɛgɛbɔɛ lɔnna, anun a saniyanbale. Sariya le wo la wo bandiya koroŋɛ la ko tɔ.»
Currently Selected:
Lewi bɔnsɛnu la sariya 14: MOG
Highlight
Share
Compare
Copy
Want to have your highlights saved across all your devices? Sign up or sign in
