Lewi bɔnsɛnu la sariya 13
13
Bali bolo bandiya la ko sariya
1Alatala kumata Musa nun Harona ye, a ko: 2«Ka mɔgɛ bali bole kan do beeyata, ka wo ma a ni yiti, ka wo ma a ni ma tɛlɛ la, wo ni wo tigi doni sarika lakelá Harona dula, ka wo ma a la deŋɛ do dula. 3Bandiya min be a bale ma, sarika lakelá ni ɲɔ fɛlɛ. Ka a balimate bata beeya wo tɛlɛ dula, ka a mɛn be toren sarika lakelá ye, tɛlɛ bata luggɛ bali bole kɔtɔ, awa bandiya koroŋɛ le mu a la. Sarika lakelá ni kuma fɔ ka a fɔla wo tigi bata ma saniyanbale la. 4Kɔnɔ ka a taranta, dula beeyareŋɛ le mu a la, kɔnɔ a be toren sarika lakelá ye, tɛlɛ ma luggɛ, balimate mɛn ma beeya, awa sarika lakelá si bandibaga yamɔri a ni to tele wɔrɔwila kɔtɔ a dɔrɔn. 5A tele wɔrɔwila luŋɛ, sarika lakelá mɛn ni a fɛlɛ. Ka a taranta bandiya bata lasɔ, a ma tanbi dula gbɛtɛ, awa a ni bandibaga yamɔri a ni to tele wɔrɔwila mɛn kɔtɔ a dɔrɔn. 6A tele wɔrɔwila luŋɛ, sarika lakelá mɛn ni a fɛlɛ a kunɲama filaɲɔgɛ. Ka a be toren sarika lakelá ye tɛlɛ bata fɔlɔ fisayala, a mɛn ma tanbi dula gbɛtɛ, awa sarika lakelá ni kuma fɔ ka a fɔla, wo tigi bata saniyan. Bande le mu min ma koron. Wo mɔgɛ ni a la kutanu ko, a ni ma mɔgɔ saniyandeŋɛ la. 7Kɔnɔ sarika lakelá la wo kuma fɔɛ tanbi kɔma ko ale mɔgɛ bata saniyan, ka a bandiya mɛn naata saagi a la, a mɛn bata yirindi dula gbɛtɛ, awa bandibaga mɛn ni taga a yita sarika lakelá la. 8Sarika lakelá mɛn ni a fɛlɛ. Ka a taranta bandiya bata yirindi yati, sarika lakelá ni a fɔ ka a fɔla, wo tigi bata ma saniyanbale la, bali bole bande koroŋɛ le be a la.
9Awa, wo bandiya koroŋɛ, ka a bata to mɔgɔ yo min bole ma, anu si wo tigi doni sarika lakelá dula. 10A ni a fɛlɛ. Ka mɔgɛ bole kan do yitita, a beeyata, a balimate tugun bata beeya, yite ni bula, sube ni bɔɔ kɛnɛ ma, 11awa bandiya koroŋɛ le be a bole ma, min te dandan. Sarika lakelá ni a fɔ, wo tigi bata ma mɔgɔ saniyanbale la. Hali a ma to bitugun a dɔrɔn sarika lakelá mɛn ni a fɛlɛ. A bata ban mala mɔgɔ saniyanbale la. 12Sarika lakelá ni a taran, wo tɛlɛ koroŋɛ min be bandibaga bale ma nun, a bata fɔlɔ yirindila a bale dula bɛ ma, ka bɔɔ a kuŋɛ tɔ han a kɛŋɛnu tɔ, a bale bɛ bata tamputampu, 13awa, ka sarika lakelá ka a fɛlɛ a ɲinma la, a ka a taran, a be ɲɔgɔnna le, a ni naa a fɔ, wo tigi bata saniyan, bayi tɛlɛ bɛ bata bɔɛ fɔlɔ. A bata saniyan. 14Kɔnɔ ka a taranta, bandiya bulata, sube yenta kɛnɛ ma, wo tigi mɛn bata saagi mala mɔgɔ saniyanbale la. 15Sarika lakelá tini wo bandiya bulareŋɛ yen, anun sube min be kɛnɛ ma, wo butɔ a ni a fɔ wo tigi bata ma saniyanbale la. Bandiya koroŋɛ le mu wo la. 16Ka subu bulareŋɛ nata bɔɔ, a kɛɲa masarata a beema la, awa bandibaga si taga sarika lakelá dula. 17A ni a fɛlɛ. Ka bandiya kɛɲa bata masara yati a beema la, sarika lakelá ni kuma fɔ ka a fɔla, bandibaga bata saniyan.
18Ka yite bɔɔta mɔgɛ ma, a nata kendeya, 19kɔnɔ ɲɔ bole nata beeya, ka wo ma a ni wulen, wo tigi ni taga a yita sarika lakelá la. 20Bandiya min be a bale ma, sarika lakelá ni ɲɔ fɛlɛ. Ka a be toren a ye, ɲɔ bata soe han a ni ke sube ma, wo dula balimate mɛn bata beeya, awa sarika lakelá ni a fɔ, wo tigi bata ma mɔgɔ saniyanbale la. Bandiya koroŋɛ le mu a la min be bɔɔren yite dula. 21Ka a taranta sarika lakelá ma balimate beema yen, tɛlɛ tugun ma soe a ni ke sube ma, a ma beeya koola, sarika lakelá ni bandibaga yamɔri a ni to a dɔrɔn han tele wɔrɔwila kɔtɔ. 22Wo tanbi kɔma, ka a tagata taran bandiya bata tanbi dula gbɛtɛ, sarika lakelá ni a fɔ, aa bandiya be wo tigi bale bole ma, wo mɔgɛ tigi bata ma saniyanbale la. 23Kɔnɔ ka a taranta bandiya ma tagaman a bale ma, a tota wo kan dɔndɛ tɔ, yite tɛlɛ pate le mu. Sarika lakelá ni a fɔ, wo tigi mu mɔgɔ saniyandeŋɛ le la.
24Ka mɔgɛ bale bata bintan ta la, a bole nata bɔɔ, a bata beeya, ka wo ma a bata ma a wulenmalama la, 25sarika lakelá ni ɲɔ fɛlɛ. Ka bandibaga bale ka min bintanta, ka ɲɔ te be beeyaren, ɲɔ mɛn bata luggɛ bali bole kɔtɔ, awa bandiya koroŋɛ le mu, min bata bɔɔ bale ma ka min bole be bintanden nun. Sarika lakelá ni a fɔ, wo tigi bata ma mɔgɔ saniyanbale la, bayi bandiya koroŋɛ le mu. 26Kɔnɔ ka sarika lakelá ma te beema yen bandiya dula, tɛlɛ tugun ma luggɛ, a bali bole bele beeyaaren koola, awa sarika lakelá ni wo tigi yamɔri a ni to tele wɔrɔwila kɔtɔ a dɔrɔn. 27A tele wɔrɔwila luŋɛ, sarika lakelá mɛn ni a fɛlɛ. Ka bandiya bata tanbi dula gbɛtɛ tɔ a bale ma, sarika lakelá ni a fɔ, wo tigi bata ma mɔgɔ saniyanbale la, bandiya koroŋɛ le mu. 28Kɔnɔ ka bandiya ma masara, a bele tanbiren dula gbɛtɛ tɔ a bale ma, a ma beeya iko a fɔlɛ, a be fatanden wo bolo bintandeŋɛ le la. Sarika lakelá ni a fɔ, wo tigi mu mɔgɔ saniyandeŋɛ le la. Bayi bintaŋɛ la tɛlɛ pate le mu.
29Ka bandiya tota kaye kuŋɛ tɔ, ka wo ma muse, ka wo ma anu da kɔtɔ, 30sarika lakelá ni wo bandiya fɛlɛ. Ka a be toren a ye, tɛlɛ bata luggɛ bali bole kɔtɔ, ka balimate kɛɲa bata masara, a mɛn bata dɔgɔya, sarika lakelá ni a fɔ, wo tigi bata ma mɔgɔ saniyanbale la. Bandiya koroŋɛ le mu min bata to a kuŋɛ tɔ, ka wo ma a da kɔtɔ. 31Ka a taranta sarika lakelá ka a yen tɛlɛ ma luggɛ bali bole kɔtɔ, balimate finma bele, a ni bandibaga yamɔri a ni to a dɔrɔn tele wɔrɔwila kɔtɔ. 32Sarika lakelá ni wo bandiya fɛlɛ tele wɔrɔwila luŋɛ. Ka bandiya ma tanbi dula gbɛtɛ, ka wo dula balimate ma beeya, ka tɛlɛ ma luggɛ bali bole kɔtɔ, 33wo tigi ni a kuŋɛ nun a bɔɔra te si, a ni a bɔɔ a la tɛlɛ la. Sarika lakelá mɛn ni bandibaga yamɔri a ni to a dɔrɔn han tele wɔrɔwila. 34Sarika lakelá ni wo bandiya fɛlɛ tele wɔrɔwila luŋɛ. Ka a ma tanbi dula gbɛtɛ, a ma luggɛ bali bole kɔtɔ, sarika lakelá ni a fɔ, wo tigi mu mɔgɔ saniyandeŋɛ le la. A bɛnta a ni a la kutanu ko, a ni saniyan. 35Kɔnɔ sarika lakelá la wo kuma fɔɛ tanbi kɔma ko ale mɔgɛ bata saniyan, ka bandiya mɛn naata saagi a la, a mɛn bata yirindi dula gbɛtɛ, 36sarika lakelá mɛn ni a fɛlɛ. Ka bandiya bata yirindi yati, hali sarika lakelá ma a fɛlɛ ka balimate kɛɲa bata masara. Wo tigi bata ma mɔgɔ saniyanbale la. 37Kɔnɔ ka a be toren sarika lakelá ye, wo bandiya bata lasɔ, balimate finma do bata bɔɔ, wo be a fɔren de, tɛlɛ bata kendeya. Wo tigi mu mɔgɔ saniyandeŋɛ le la. Sarika lakelá ni a fɔ wo tigi ye, mɔgɔ saniyandeŋɛ le mu a la.
38Ka a taranta kaye, ka wo ma muse, a bole kan donu be politiren anu bata beeya, 39sarika lakelá ni ɲɔ fɛlɛ. Ka ɲɔ bele beeyaaren koola, awa kasi mɔɔli do tun de mu, wo tigi be saniyanden.
40Ka kaye do kunsige bata fɔlɔ banna, wo ma koron. Wo tigi bata saniyan. 41Ka kaye kunsige bata fɔlɔ banna a tindɛ mafanna tun de, a ma koron. Wo tigi bata saniyan. 42Kɔnɔ ka kunsige be ka min na nun, ɲɔ beeyata, ka wo ma a wulenta, bandiya koroŋɛ le mu a la. 43Sarika lakelá ni ɲɔ fɛlɛ. Ka a taranta wo bandiya min be bɔɔren a kuŋɛ tɔ, ka a yitita, ka a bata beeya, ka wo ma ka a bata wulen iko bali bolo bandiya koroŋɛ be ki min na, 44awa wo tigi mu bandibaga le la, a mu saniyanbale le la. Sarika lakelá ni a fɔ, wo tigi bata ma mɔgɔ saniyanbale la. Bandiya be a kuŋɛ le tɔ.
45Awa, wo bali bolo bandiya koroŋɛ mɔɔle yo be min na, wo tigi ni to kuta farareŋɛ donna suunɛ la, a ni a kunsige laboloka, a ni a da te mabutin, a ni sɔnkɛ layɛlɛ, a ni a fɔ: ‹Saniyanbale! saniyanbale!› 46Fanni wo bandiya koroŋɛ be a ma, wo bɛ a si to saniyanbaliya tɔ. Fɔ a ni to a dɔrɔn daaka kɔma.»
Bandiya koroŋɛ tɔnkuma yen koe kuta ma
47«Wo bandiya koroŋɛ mɔɔle si nɔ tola kuta ma min be ɲiɲaren kolofen te la, ka wo ma gesepute la. 48A mɛn si nɔ tola fondo sɔgɔreŋɛ ma min be ɲiɲaren kolofen te la, ka wo ma gesepute la. A mɛn si nɔ tola fondo ma min be ɲiɲaren kolofeŋɛ bole la. 49Ka wo bandiya tɔnkuma mata a yanba kutannama la, ka wo ma a bata wulen kuta ma, ka wo ma bole ma, ka wo ma fondo sɔgɔreŋɛ ma (a ɲiɲaren kolofen te la ba, ka wo ma gesepute la ba), awa bandiya koroŋɛ le mu wo la. A ni a yita sarika lakelá la, a ni ɲɔ fɛlɛ. 50Wo bandiya be feŋɛ min ma, a ni a tefi, a ni naa a mandi kan do a ni to a dɔrɔn tele wɔrɔwila kɔtɔ. 51A tele wɔrɔwila luŋɛ, sarika lakelá mɛn ni a fɛlɛ. Ka wo bandiya bata siya wo kuta ma, ka wo ma wo fondo sɔgɔreŋɛ ma, ka wo ma wo bole ma, awa bandiya koroŋɛ le mu min te dandan. A bata ma fondo saniyanbale la. 52Sarika lakelá ni wo fondonu bɛ bintan ta la, wo bandiya be fondonu min ma: kuta min be ɲiɲaren kolofen te la, kuta min be ɲiɲaren gesepute la, kuta sɔgɔreŋɛ, ka wo ma bole; a ni wo bɛ bintan ta la. 53Kɔnɔ ka sarika lakelá ka a fɛlɛ, wo bandiya bele siyaren wo fondonu ma, 54sarika lakelá si yamɔre sa wo fondo ni ko je la, a ni sa a dɔrɔn han tele wɔrɔwila iko a fɔlɛ. 55Wo kɔma, sarika lakelá mɛn ni wo fondo koreŋɛ tafɛlɛ. Ka bandiya kɛɲa ma masara, hali a ma tanbi dula gbɛtɛ ma, awa wo be maren fondo saniyanbale le la. A bɛ ni bintan ta la, hali ka bandiya be a sɔngɔ dɔndɔ tun de ma. 56Kɔnɔ ka a taranta, sarika lakelá bata a yen, hali a to bata ko nun, a kan do kɛɲa bata masara kɛɲa do tugun na, awa a be wo dula tun de tɛgɛla kuta la, ka wo ma bole la. 57Kɔnɔ ka a tagata taran bandiya be kuta min ma nun, ka a mɛn be yenna wo kuta ma, ka wo ma wo fondo sɔgɔreŋɛ ma, ka wo ma wo bole ma, awa bandiya koroŋɛ le mu, fɔ wo fondo ni bintan ta la. 58Kɔnɔ ka a taranta je bata bandiya bɔɔ kuta ma, ka wo ma kuta sɔgɔreŋɛ ma, ka wo ma bole ma, bandiya koron ma. Awa anu ni a ko mɛn, jɔnɔn a ni saniyan.»
59Sariya le wo la bandiya koroŋɛ la ko tɔ min be tola kuta do ma min be ɲiɲaren kolofen te la, ka wo ma gesepute la, anun kuta sɔgɔreŋɛ la, anun bole do ma. Wo sariya sabu la, sarika lakelá si nɔ kunma fɔla, ka fondo bata saniyan, ka wo ma a ma saniyan.
Currently Selected:
Lewi bɔnsɛnu la sariya 13: MOG
Highlight
Share
Compare
Copy
Want to have your highlights saved across all your devices? Sign up or sign in
