Hɔrɔya 36

1Besaleli yo, Oholiyabi yo anun bolo laɲɛɲilá ɲinma, Alatala bata ko do lɔn hakkile dii minnu ma, hakkili ɲinma, anu ni nɔ hɔrɔma dingira wale bɛ mala, wonu ka wale da bita iko Alatala ka Musa yamɔri ki min na.

2Musa ka Besaleli nun Oholiyabi kele, anun bolo laɲɛɲilá ɲinma bɛ, Alatala ka hakkili ɲinma dii minnu ma, minnu bɛ sɔnta wale bitala. 3Anu ka bolo makafuenu jigan Musa bolo, bani Isirayila kaanu ka minnu bɔɔ hɔrɔma dingira sɔ koe la. Wo ka a taran, saguma yo saguma, mɔgɛnu mɛn ni kɛnɛ bolo makafuenu natila anu hanige beeyareŋɛ la Musa bata. 4Wo butɔ, bolo laɲɛɲilá ɲinma minnu bɛ be kɛ hɔrɔma dingira wale tɔ, anu bɛ ka wo wale lasɔ anu nata dɔndɔ dɔndɔ. 5Anu naata a fɔ Musa ye, anu ko: «Jama be feŋɛnu minnu natila, a siyata, a bɛ te nɔ donna kɛ hɔrɔma dingira wale tɔ, Alatala ka min yamɔre sa a ni ma.» 6Awa, Musa ka yamɔre sa, anu ni kɛ yamɔre latagaman daaka bɛ tɔ, a ko: «Kayi ba, musu ba, bɛ ká bolo makafue nati koe dan, wo be min bɔɔla hɔrɔma dingira sɔ koe la. Kɛ si bɛn de ka!» Wo butɔ, jama ka bolo makafue nati koe dan. 7Bolo makafuenu minnu bɔɔta, wonu bata kun wale ma koe la han a tɔɛ ni to.

Hɔrɔma dingira kan donu ɲiɲa koe

8Bolo laɲɛɲilá ɲinma min bɛ be wale mala, anu ka hɔrɔma dingira kunma mabutinfeŋɛ fɔlɛ ɲiɲa tasɔgɔ kuta lenpen tan de la, a bululama, a dubalamanɛŋɛ nun a wulenma. Maleka misalenu be anu ma. 9Wo tasɔgɛ lenpen dɔndɔ la yanya, nɔngɔn mugan nun sagin, a la yajɛ, nɔngɔn naani. Lenpen dɔndɔ ma tanbi dɔndɔ la, a bɛ kanyata. 10Anu ka kutanu labɛn lenpen loolu loolu le la. 11Anu ka julu bululama gindigala le, minnu kitita wo kuta lenpen looluɲɔgɛ dabole la. Wolo mata wo kuta doe tugun lenpen fɔlɛ dabole ye. 12Anu ka wo julu bi loolu le gindigala, minnu kitita wo lenpen banba fɔlɛ dabole tɔ. Wolo mata wo lenpen banba filaɲɔgɛ tugun dabole ye. Wo jule bɛ labɛnta ɲɔgɔn fɛ le. 13Anu ka bakkura bi loolu le ɲiɲa sanuɛ la, anu ka wo lenpen banba fila labɛndeŋɛnu le kiti ɲɔgɔn na wo bakkuranu la. Wolo mata hɔrɔma dingira kunma mabutinfeŋɛ fɔlɛ la.

14Anu ka lenpen tan nun dɔndɔ le sɔgɔ baa te la, a mata hɔrɔma dingira kunma mabutinfeŋɛ filaɲɔgɛ le la. 15Wo lenpen dɔndɔ la yanya nɔngɔn bi saba, a la yajɛ nɔngɔn naani. Wo lenpen tan nun dɔndɛ bɛ kanyata le. 16Anu ka wo lenpen loole labɛn a dana le ma, wo wɔɔrɛ tugun nabɛnta le a dana ma. 17Anu ka julu bi loolu le gindigala wo lenpen banba fɔlɛ dabole la. Anu ka jule bi loolu tugun gindigala lenpen banba doe tugun dabole la. 18Anu ka bakkura bi loolu le ɲiɲa taasa la, alako anu da bolenu ni labɛn, anu ni ma lenpen banba dɔndɔ la.

19Anu ka kunma mabutinfeŋɛ sabaɲɔgɛ ɲiɲa saaka kontoŋɛ bole la, min be ɲɛgɛnden a wulenma la.

A tɔɛ la, anu ka kunma mabutinfeŋɛ naaniɲɔgɛ ɲiɲa foyi yɛgɛ bole la, min si lafonti wo doe tugun kunma.

20Anu ka kasiya lɔgɛ fara kebeŋɛnu la hɔrɔma dingira ye, minnu si lawuli. 21Wo keben dɔndɔ la yanya mu nɔngɔn tan de la, a la yajɛ nɔngɔn dɔndɔ nun a tɛma. 22Keben dɔndɔ yo keben dɔndɔ, kɛn fila le tota a kute tɔ minnu be sɔrɔnna. 23Anu ka keben mugan de ɲiɲa hɔrɔma dingira bolo ɲinma ye. 24Anu ka sɔfeŋɛ kaalisinɛŋɛ bi naani le ɲiɲa wo keben mugaŋɛ kɔtɔ ye, keben dɔndɔ yo keben dɔndɔ sɔfen fila, minnu si tabɛn a kɛn filanu ma. 25Anu ka keben mugan de ɲiɲa hɔrɔma dingira bolo mara tugun ye, 26anun anu la sɔfeŋɛ kaalisinɛŋɛ bi naani, keben dɔndɔ yo keben dɔndɔ sɔfen fila. 27Anu ka keben wɔɔrɔ le ɲiɲa hɔrɔma dingira kɔma sɔngɛ ye, tele jige tɔ. 28Anu ka keben dɔndɔ dɔndɔ ɲiɲa a tunku fila bɛ tɔ kɔma sɔngɛ la. 29Anu be kitila le bɔɔla kɔtɔ han kunma, ɲɔ anu ni kiti kurunda dɔndɔ la a ɲinma la. Wo tunku fila bɛ ni ma mɔɔli dɔndɔ. 30A bɛ labɛndeŋɛ keben sagin, anun anu la sɔfeŋɛ tan nun wɔɔrɔ, keben dɔndɔ yo keben dɔndɔ sɔfen fila le mu.

31Anu ka tɛma kitifeŋɛ loolu le ɲiɲa kasiya lɔgɛ la, sɔngɔ dɔndɔ kebeŋɛnu ye, 32tɛma kitifeŋɛ loolu sɔngɛ doe tugun ye, a kɔmanɛŋɛ tugun tɛŋɛ loolu. 33Anu ka tɛma kitifeŋɛ ɲiɲa min be sala a tɛma, a be naala tanbila kebeŋɛnu tɛma le tekku, bɔɔla tunke doe ma han tunke doe tɔ. 34Anu ka sanuɛ le madon wo kebeŋɛ bɛ ma, anun wo tɛma kitifeŋɛnu bɛ ma, anu mɛn ka kurunda ɲiɲa sanuɛ la, wo tɛma kitifeŋɛnu si don minnu tɔ.

35Anu ka tasɔgɛ kuta ɲiɲa parawan banba la, maleka misalenu be a ma, gese bululama, a dubalamanɛŋɛ nun a wulenma la. A mata bolo laɲɛɲilá la wali ɲinma le la. 36Anu ka tuga naani ɲiɲa a ye kasiya lɔgɛ la, anu ka sanuɛ madon anu ma, nun anu la bakkurandeŋɛ sanunɛŋɛnu. Anu ka sɔfeŋɛ naani ɲiɲa anu ye kaalise la.

37Anu ka tasɔgɛ kuta ɲiɲa parawan do tugun na min si bakku hɔrɔma dingira dondula ye, a be sɔgɔren gese bululama, a dubalamanɛŋɛ nun a wulenma la. 38Anu ka tuga loolu ɲiɲa wo parawan ye nun anu la bakkurandeŋɛnu, anu naata sanuɛ madon tuga kuŋɛnu nun lɔgɔ kayanmanu ma. A sɔfeŋɛ loole ɲiɲata taasa le la.

Currently Selected:

Hɔrɔya 36: MOG

Highlight

Compare

Copy