Hɔrɔya 35
35
Sulen lɔ́gɛ́
1Musa ka bani Isirayila kaanu bɛ madɛn, a ka a fɔ anu ye, a ko: «Alatala be wo mɔ yamɔriren kɛ-lɛ la: 2Wo be walila le tele wɔɔrɔ, a tele wɔrɔwila luŋɛ wo ni wo sulen. Lɔgɔ masubɛreŋɛ le mu wo la Alatala ye. Ka mɔgɔ yo walita wo lɔ́gɛ́ tɔ, wo tigi bɛnta le a ni faga. 3Wo te ta yo labita wo la boŋɛnu butɔ wo lun.»
Bani Isirayila kaanu la bolo makafuenu
4Musa mɛn takumata bani Isirayila kaanu ye, a ko: «Alatala be wo mɔ yamɔriren kɛ-lɛ la: 5wo wo bolo makafu Alatala ye. Hanige beeyareŋɛ be min bɛ ye, wo tigi ni bolo makafue bɔɔ Alatala ye sanuɛ la, anun kaalise anun taasa, 6anun gese bululama, a dubalamanɛŋɛ nun a wulenma, tasɔgɔ kuta gese anun baa te gese, 7saaka kontoŋɛ bolenu minnu be ɲɛgɛnden a wulenma la, anun foyi yɛgɛ bolenu, anun kasiya lɔgɛ, 8anun lanpu tɔ tule, nun labundɛ min be basanden tule fɛ min be lawalila mɔgɔ yita koe la Ala la, anun fondo kuɲɛ diyama min be basanden sorayi fɛ min si bintan, 9anun Oniki kuru wuleŋɛ anun kuru sɔn bɛlɛŋɛ donu, sarika lakelá banba la doroki kunmanɛŋɛ bolobɔnɛ nun a la jusukun mabutinfeŋɛ la yangufeŋɛnu.
10Bolo laɲɛɲilá ɲinma min bɛ be wo tɛma, anu ni na kɛ wale ma, Alatala bata wo yamɔri min na, wolo be tabɛnden: 11Hɔrɔma dingira kunma mabutinfeŋɛnu han a kun faga, a la bakkuranu, a la kebeŋɛnu, a la lɔgɔ kayanmanu, a la tuganu nun anu sɔfeŋɛnu, 12seedeɲɔgɔya kankira nun a la lɔgɔ kayanmanu, a dataguraŋɛ nun a la parawan banba min be a ɲamadogonna, 13teebile nun a la lɔgɔ kayanmanu, a la miraŋɛnu bɛ, anun a la dɛgɛnu minnu be Alatala tabɛŋɛ tɔ, 14lanpu sigifeŋɛ anun a la miraŋɛnu, anun a lanpuenu anun tule min be sala anu butɔ, 15sorayi saniyandeŋɛ bintandula nun a la lɔgɔ kayanmanu, tulu saniyandeŋɛ min si mɔgɛ yita Ala la anun fondo kuɲɛ diyama min be basanden sorayi fɛ min si bintan, anun parawan min be bakkula hɔrɔma dingira dondula la, 16sarika bintandula, a la tangalaŋɛ taasanɛŋɛ, a la lɔgɔ kayanmanu anun a la miraŋɛnu bɛ, ji madɛnfeŋɛ nun a sigifeŋɛ, 17tatta la kuta tasɔgɔnɛŋɛnu, a la tuganu anun anu sɔfeŋɛnu, anun parawan min be bakkula tatta dondula tɔ, 18hɔrɔma dingira la bakkurandeŋɛnu minnu be banbanna duge tɔ, anun tatta tɛŋɛnu nun anu la julenu, 19donfen masubɛreŋɛnu wali koe la hɔrɔma dingira butɔ, wolo be tabɛnden: Harona sarika lakelá la donfen saniyandeŋɛnu, anun a la den kayireŋɛnu tɛŋɛnu alako anu ni sarika lakela wale ma a ye.»
20Musa la kuma bandeŋɛ, bani Isirayila jama bɛ bɔɔta a kɛnna anu tagata anu bata. 21Min bɛ sɔnta, anu mɛn mata fonisire la, wonu nata anu la bolo makafuenu nati Alatala ye, anu be minnu bɔɔren bɛndula boŋɛ sɔ koe la, a la walifeŋɛ bɛ ɲiɲa koe la anun donfen saniyandeŋɛnu kara koe la. 22Min bɛ be maren fonisire la, kayi ba, musu ba, wonu bɛ nata le anu ka yangufeŋɛ sanunɛŋɛnu nati, iko tololadeŋɛnu, kurundanu, fayida fondo sanunɛŋɛ mɔɔle bɛ, anu ka a dantɛgɛ Alatala ye biliya la. 23Gese bululama, a dubalama nun a wulenma, anun tasɔgɔ kuta gese, anun baa te gese anun saaka kontoŋɛ bole min be ɲɛgɛnden a wulenma la, anun foyi yɛgɛ bole be minnu bolo, wonu ka anu nati. 24Min bɛ ka kaalise nun taasa bɔɔ bolo makafue la, anu ka wonu nati Alatala ye. Kasiya lɔgɛ be minnu tugun bolo, wonu tugun ka a nati, alako wale ni nɔ mala. 25Muse min bɛ kusan kuta sɔgɔla, anu ka a sɔgɔ anu bole la, anu ni wo kuta sɔgɔreŋɛnu nati, kuta bululama, a dubalamanɛŋɛ nun a wulenma, anun tasɔgɔ kuta. 26Muse min bɛ be sɔnden, anu mɛn kusan kuta sɔgɛ la a ɲinma la, anu ka baa te sɔgɔ kuta la. 27Mansa minnu tugun be wo jama tɛma, wonu tugun ka Oniki kuru wuleŋɛ nati, anun kuru sɔn bɛlɛŋɛ donu, minnu si ma doroki kunmanɛŋɛ bolobɔnɛ nun jusukun mabutinfeŋɛ la yangufeŋɛnu la. 28Anu ka fondo kuɲɛ diyamanu tugun nati anun lanpu tɔ tule, anun tulu saniyandeŋɛ min si mɔgɛ yita Ala la anun fondo kuɲɛ diyama min be basanden sorayi fɛ min si bintan. 29Bani Isirayila kaanu minnu bɛ fonisireta, musu nun kayi, wonu ka anu la bolo makafuenu nati le Alatala ye, a ka Musa yamɔri wale min ma koe la.
Besaleli nun Oholiyabi don koe wale tɔ
30Wo kɔma, Musa ka a fɔ bani Isirayila kaanu ye, a ko: «Wo ka a lɔn Alatala bata Uri la den Besaleli masubɛ, Huru mamareŋɛ, Juda bɔnsɛ. 31Alatala bata hakkili ɲinma dii a ma, fondo lɔn koe la anun bolo lawali koe la, alako a ni nɔ wali siyama mala: 32a ni nɔ wale mirala, a ni sanuɛ lawali, anun kaalise nun taasa, 33a ni nɔ kuru sɔn bɛlɛŋɛ malasɛla, alako a ni kun a safeŋɛ butɔ, a ni nɔ lɔgɛ malasɛla, fayida a ni nɔ wale mɔɔle bɛ mala. 34Ala mɛn ka a degen mɔgɔ lakaran ɲa la, ale nun Ayisamaki la den Oholiyabi, Dan bɔnsɛ. 35Ala bata a ma anu ni nɔ fondo malasɛ bɛ mala a ɲinma la, anun kuta masɔgɔ koe, sa tasɔgɛ gese sɔgɔ koe kunma, gese bululama, a dubalamanɛŋɛ nun a wulenma, anun baa te sɔgɔ koe kuta la, fayida anu ni nɔ wale mɔɔle bɛ mirala anu ni a ma.»
Currently Selected:
Hɔrɔya 35: MOG
Highlight
Share
Compare
Copy
Want to have your highlights saved across all your devices? Sign up or sign in
