Hɔrɔya 26

Hɔrɔma dingira

1«I be hɔrɔma dingira kunma mabutinfeŋɛ fɔlɛ ɲiɲala tasɔgɛ lenpen tan de la, maleka misalenu be minnu ma, gese bululama, a dubalamanɛŋɛ, nun a wulenma la. Mabɔ sɔgɔla kende le be wo mala. 2Wo tasɔgɛ lenpen dɔndɔ la yanya, nɔngɔn mugan nun sagin de mu, a la yajɛ, nɔngɔn naani. Lenpen dɔndɔ kana tanbi dɔndɔ la, a bɛ ni kanya. 3Ale kutanu be labɛnna lenpen loolu loolu le la. 4I ni julu bululama gindigala wo kuta lenpen looluɲɔgɛ dabole la, anun kuta doe lenpen fɔlɛ dabole. 5I be wo julu bi loolu le gindigalala, minnu be kitila wo lenpen banba fɔlɛ dabole tɔ. Wolo be mala wo lenpen banba filaɲɔgɛ tugun dabole ye. Wo jule bɛ be labɛnna ɲɔgɔn fɛ le. 6I be bakkura bi loolu le ɲiɲala sanuɛ la, i ni naa wo lenpen banba fila labɛndeŋɛnu kiti ɲɔgɔn na wo bakkuranu la. Wolo be mala hɔrɔma dingira kunma mabutinfeŋɛ dɔndɔ la.

7I ni lenpen tan nun dɔndɔ sɔgɔ baa te la, a ni ma hɔrɔma dingira kunma mabutinfeŋɛ filaɲɔgɛ le la. 8Wo lenpen dɔndɛ la yanya, nɔngɔn bi saba, a la yajɛ nɔngɔn naani. Wo lenpen tan nun dɔndɛ bɛ ni kanya. 9Lenpen loole be labɛnna a dana le ma, wo lenpen wɔɔrɛ tugun ni labɛn a dana ma. Wo lenpen wɔrɔɲɔgɛ be takatila le a ni lafonti hɔrɔma dingira ɲakɔtɔ kunma. 10Jule bi loolu le be gindigalala wo lenpen banba fɔlɛ dabole la. I ni jule bi loolu gindigala lenpen doe tugun dabole la. 11I ni bakkura bi loolu ɲiɲa taasa la, i ni naa julu sareŋɛnu bakku anu la. I ni wo lenpen banba fila labɛn wonu la, anu ni ma lenpen banba dɔndɔ la. Awa, hɔrɔma dingira kunma mabutinfeŋɛ filaɲɔgɛ le wo la. 12Wo lenpen banba tɔɛ si singan de hɔrɔma dingira kɔma. 13Hɔrɔma dingira sɔngɔ fila tugun, i be kɛ-lɛ mala: nɔngɔn fila minnu be tola, i ni dɔndɛ sa sɔngɛ doe tɔ, i ni dɔndɛ tugun sa sɔngɛ doe tɔ, wo butɔ hɔrɔma dingira bata mabutin a ɲinma la.

14Wo kɔma, i ni hɔrɔma dingira kunma mabutinfeŋɛ sabaɲɔgɛ ɲiɲa saaka kontoŋɛ bole la min be ɲɛgɛnden a wulenma la.

A tɔɛ la, i ni hɔrɔma dingira kunma mabutinfeŋɛ naaniɲɔgɛ ɲiɲa foyi yɛgɛ bole la, i ni naa a lafonti wo doe tugun kunma.

15Awa, hɔrɔma dingira bon koloŋɛ ɲiɲa ɲa le ka: i be kasiya lɔgɛ le farala kebeŋɛnu la, i ni anu lawuli. 16Wo keben dɔndɔ la yanya, nɔngɔn tan de mu, a la yajɛ nɔngɔn dɔndɔ nun a tɛma. 17Keben dɔndɔ yo keben dɔndɔ, a kute tɔ kɛn fila le be a ye minnu be sɔrɔnna. 18I be keben mugan de ɲiɲala hɔrɔma dingira bolo ɲinma ye. 19I be sɔfeŋɛ kaalisinɛŋɛ bi naani le ɲiɲala wo keben mugaŋɛ kɔtɔ ye, keben dɔndɔ yo keben dɔndɔ sɔfen fila, minnu si tabɛn a kɛn filanu ma. 20I be keben mugan de ɲiɲala hɔrɔma dingira bolo mara tugun ye, 21nun anu la sɔfeŋɛ kaalisinɛŋɛ bi naani, keben dɔndɔ yo keben dɔndɔ be sɔla sɔfeŋɛ fila kunma. 22I be keben wɔɔrɔ le ɲiɲala hɔrɔma dingira kɔma sɔngɛ ye, tele jige tɔ. 23A wo daŋɛ tɔ ɲɔ, i be keben dɔndɔ dɔndɔ ɲiɲala le a tunku fila bɛ tɔ, i mɛn ni naa anu sɔ. 24Anu be kitila le bɔɔla kɔtɔ han kunma, ɲɔ anu be kitila kurunda dɔndɔ le la. Wo tunku filanu bɛ mɔɔli dɔndɔ. 25A bɛ labɛndeŋɛ keben sagin, nun anu la sɔfeŋɛ tan nun wɔɔrɔ, keben dɔndɔ yo keben dɔndɔ sɔfeŋɛ fila le mu.

26I be tɛma kitifeŋɛ loolu le ɲiɲala kasiya lɔgɛ la sɔngɔ dɔndɔ kebeŋɛnu ye, 27tɛma kitifeŋɛ loolu sɔngɛ doe tugun ye, loolu a kɔmanɛŋɛ tugun tɛŋɛ. 28Tɛma kitifeŋɛ min be sala a tɛma, wo be tanbila kebeŋɛnu tɛma tekku le, bɔɔla tunke doe ma han tunke doe. 29I be sanuɛ le madonna wo kebeŋɛ nun wo tɛma kitifeŋɛnu bɛ ma, i mɛn be kurundanu ɲiɲala sanuɛ le la, wo tɛma kitifeŋɛnu be donna minnu tɔ. 30I ni hɔrɔma dingira sɔ iko min mɔɔle la ko be fɔren i ye ka kɔnkɛ kunma.

31I be tasɔgɛ kuta le ɲiɲala parawan banba la, maleka misalenu be min ma, gese bululama, a dubalamanɛŋɛ nun a wulenma la. Mabɔ sɔgɔla kende le be a mala. 32I be a bakkula kasiya tuga naani le kunma, sanuɛ be madonden minnu ma, bakkurandeŋɛnu sanunɛŋɛ be minnu ma, wo tuganu be sɔla sɔfeŋɛ naani le kunma, minnu be ɲiɲaren kaalise la. 33I be wo parawan banba bakkula bakkuranu le kɔtɔ. I ni seedeɲɔgɔya kankira sigi wo parawan kɔma, wo parawan de be dula saniyandeŋɛ nun dula saniyandeŋɛ fisamante tɛma tafatanna. 34I ni junubu kafare dataguraŋɛ sa seedeɲɔgɔya kankira da la, dula saniyandeŋɛ fisamante tɔ. 35I ni teebile sigi bolo mara tɔ dula saniyandeŋɛ tɔ parawan banba ɲakɔtɔ, i ni lanpue tugun sigi bolo ɲinma tɔ teebile tabɛŋɛ tɔ.

36I ni tasɔgɛ kuta ɲiɲa parawan do tugun na hɔrɔma dingira dondula ye, min be sɔgɔla gese bululama, a dubalamanɛŋɛ nun a wulenma la. 37I ni kasiya lɔgɛ ɲiɲa tuga loolu la wo parawan ye, i ni naa sanuɛ madon anu ma, nun a la bakkurandeŋɛnu tugun ma. I ni a sɔfeŋɛ loolu ɲiɲa taasa la.»

Currently Selected:

Hɔrɔya 26: MOG

Highlight

Compare

Copy