Hɔrɔya 23

Misikinɛnu kunma fɔ sariya

1«I kana foniya latagaman mɔgɛ kunma. I kana foniya seede bɔɔ ko tiɲalá dɛman koe la. 2I kana jama jokki ko koron ma koe la. Jama la yeŋɛ mɛn kana a ma, i ni foniya seede bɔɔ, anu tini be sariya sɔsɔla. 3I kana sɔn fondobɔnɛ dɛmanna foniya la kiiti sa dula.

4I tini i jague la ninge yen a be samaren, ka wo ma a la sofale, i be a donila le a ye kisanna. 5I tini i jague la sofale yen kote bata a laboe, yannun i ni a bɔtɛ boe, i be a dɛmanna le a lawuli koe la kisanna.

6I kana kiite laɲɛngɛn i la fondobɔnɛ makiiti dula. 7I ni i matuntun foniya kuma bɛ la. I kana a ma, mɔgɔ tɔɲɛgɛreŋɛ ni faga, i mɛn kana a ma, mɔgɔ telendeŋɛ tugun ni faga. Bayi mɔgɔ min tini wo koe mɔɔle ma, n te diɲa wo tigi ma. 8I kana sɔn ji sige la, bayi ji sige si hakkilima hakkile yɛlɛman de, a ni mɔgɔ telendeŋɛ la kuma yɛlɛman.

9Wo kana boe tumaranke ma, wole yɛtɛ ka tumaranke juse kɛɲa lɔn, bayi wole tugun mata tumaranke le la nun Misira duge tɔ.

Sulen saŋɛ nun sulen lɔ́gɛ́

10I ni i la duge lawali san wɔɔrɔ kɔtɔ, i ni a tɔnɛ sɔtɔ. 11Kɔnɔ a san wɔrɔwilaɲɔgɛ bɛ, i ni bɔɔ ɲɔ, duge ni a sulen. Tɔɔrɔbaganu minnu be wo la jama tɛma, wonu tugun ni anu balue sɔtɔ wo tɔɛ la ɲɔ, burun butɔ subenu tugun ni balu wo la. I be wolo mala i la rɛsɛn sunte nun i la oliwiye sunte tugun tɔ.

12I ni i la wale bɛ ma tele wɔɔrɔ kɔtɔ, kɔnɔ a tele wɔrɔwila luŋɛ i ni i la wale lasɔ wo lun, alako i la ningenu nun i la sofalenu tugun ni anu sulen, i la jondeŋɛnu anun tumarankenu tugun ni nɔ anu nɛ tatɛgɛla.

13Wo ni n na yamɔre bɛ makanta. Wo kana batufeŋɛ yo batu, hali anu tɔgɛ yati kana bɔɔ wo da tɔ.

Bani Isirayila kaanu la salenu

14San dɔndɔ kɔtɔ, wo ni sale ma n na biliya butɔ kunɲama saba.

15A fɔlɛ, wo si Dɛgɛ Lɛbinibɔnɛ sale makanta. Tele wɔrɔwila minnu be masubɛren wo la dɔmɔ tɔnsɛnu mɔ kare la, wo be dɛgɛ lɛbinibɔnɛ le dɔmɔla, iko n ka wo yamɔri ki min na, bayi wo bɔɔta Misira duge tɔ kɛ kare le la. Mɔgɔ yo kana na n batu dula a bolo tɛsɛŋɛ la.

16A filaɲɔgɛ, wo si Sɛnɛ Tɛgɛ sale makanta, wo tini be wo la kifeŋɛ den fɔlɛ bɔɔla wagate min tɔ wo ka min ki wo la sɛnɛ tɔ.

A sabaɲɔgɛ, wo si Wale Tɔnɛ Sɔtɔ sale tugun makanta, sama la baŋɛ la, wo tini ban wo la sɛnɛ wale tɔnɛ ladonna.

17Awa, san dɔndɔ kɔtɔ, kaye bɛ si sɔ le n batu koe la nde Marigi Alatala ɲakɔtɔ kunɲama saba.

18Wo tini be kolofeŋɛ bɔɔla sarika la, wo kana a basan dɛgɛ fɛ lɛbinɛ be min tɔ. Wo kana n na sali sarika sube kɛ́ŋɛ mandi han saguma. 19Wo ni kifeŋɛ den kunfɔlɛ doni nde Alatala wo Marige batu boŋɛ butɔ.

Wo kana baa deŋɛ sube taba a nɛɛnɛ singi je la.

Kanana duge don koe lahire

20Awa, a fɛlɛ, nde be maleka sɔla le wo ɲatɔ, a ni wo kanta kila la, a ni wo doni duge tɔ, n be ka min tabɛnden wo ye. 21Wo ni wo hakkile to a ma, wo ni a kulɛ bita, wo kana murutɛ a ma. A te diɲa wo la tiɲare ma, bayi a be a mala nde len tɔgɛ la. 22Kɔnɔ ka wo ka a kulɛ bita yati, ka wo ka koe bɛ ma iko n ka a fɔ wo ye ki min na, n si ma le wo jaguenu jague la, anun wo kɛlɛlanu kɛlɛla. 23N na maleka tini taga wo ɲatɔ a si wo doni tagala Amɔri kaanu, anun Hɛti kaanu, anun Feresi kaanu, anun Kanana kaanu, anun Hiwi kaanu, anun Jebusi kaanu bata, a ni naa anu bɛ la ko ladufen. 24Wo butɔ, wo kana sujudu anu la kuyenu ye anu batu koe la. Wo kana anu la batue mɔɔle ma de. A ɲan bɛnta le wo ni anu la wo fondo malasɛreŋɛ, anu la kuye bɛ tiɲa feu, wo si anu la kuru sigireŋɛ malasɛreŋɛ bɛ mafara feu. 25Wo ni nde Alatala le batu, wo la Ala. N si barikɛ sa le wo la dɔmɛ nun wo la je tɔ, n ni naa bandiya matuntun wo la. 26Muse bue te tiɲa wo la duge tɔ, a den sɔtɔ bale mɛn te to ɲɔ. N si simaya banba dii le wo ma. 27Nde si a ma wo la ko kilaŋɛ ni to wo jaguenu tɔ, anu tini wo la ko mɔɛ. Wo be tagala ka min na, jama min bɛ be wo duge tɔ, n si wonu hakkile ɲatadon de, wo jague bɛ si bori le wo la. 28N si pirinpiriŋɛnu lasanba le i ɲatɔ, yannun wo ni ke ɲɔ. Wondelen be naala Hiwi kaanu beela, anun Kanana kaanu, anun Hɛti kaanu. 29N te anu bee wo ɲatɔ san dɔndɔ pɛti kɔtɔ, alako duge kana naa mabɔɔ, burun butɔ subenu kana naa siya wo kunma. 30N be anu beela le donden donden wo ɲatɔ, han wo tini siya wagate min tɔ, wo ni sabati duge bɛ tɔ. 31N si wo la naaniŋɛ lakoloya le kabɔɔ Kulunyuma ba dabon sale tɔ, han ba banba tɔ sɔngɔ dɔndɔ, anun bɔɔla Turisinina janfue ma, han a ni taga sigi Efirati kɔɔ banba la a sɔngɛ doe, bayi n si ɲɔ kaanu sa le wo sagoe tɔ, wo ni anu bee wo ɲatɔ. 32Wo nun ɲɔ kaanu kana lahiri yo kiti ɲɔgɔn ye, anun anu la kuyenu. 33Anu kana sabati wo la duge tɔ, alako anu kana naa jule yɛlɛla wo ye, anu ni wo latantan han wo ni anu la kuyenu batu, wo butɔ wo ni junube sɔtɔ n na.»

Currently Selected:

Hɔrɔya 23: MOG

Highlight

Compare

Copy