Hɔrɔya 22
22
1«Ka min yo ka kankante taran a be kankaya tɔ sue tɔ, wo tigi tini a botege han a ka a faga, wo nii bɔɔ kote te sigi wo tigi kunma. 2Kɔnɔ ka tele tɔ le, a nii bɔɔ kote si sigi le wo tigi kunma.
Kankante be kankayafeŋɛnu sɔŋɛ lasaagila le. Ka a taranta fondo bele a bolo, a yɛtɛ le be mayitala a ni ma joŋɛ la kankayafeŋɛnu faliŋɛ la. 3Ka a tagata taran, kankante be kolofeŋɛ min kankaren, ninge le ba, sofale le ba, saaka le ba, baa le ba, ka anu yenta yati kankante bolo, anu be baluren, a be anu ɲɔgɔn fila fila le diila anu faliŋɛ la.
Bolofeŋɛnu la ko sariyanu
4Ka min be a la kolofeŋɛnu daɲinila a be anu bolokaren han anu ni don a mɔgɔɲɔgɛ la sɛnɛ la ka wo ma a la sunte la, wo tigi be wo tiɲare bere sɔŋɛ diila a la sɛnɛtɔfeŋɛ wolo ɲinma ka wo ma a la sunte wolofeŋɛ ɲinma le la.
5Min tini ta sa, ka ta tanbita a bolo, a ka dula ɲakureŋɛ bintan, a tagata doe la sɛnɛtɔfeŋɛ kitenu bintan, ka wo ma a tɔnsɔ mɔreŋɛnu, ka wo ma min be bɔɔren kila, awa min be wo ta saren ale len be wo feŋɛnu bɛ sɔŋɛ diila.
6Mɔgɔ do tini nafule taaku a mɔgɔɲɔgɛ la, ka wo ma a bolofeŋɛ do, a ni a mandi a ye, ka wo kankata a la boŋɛ tɔ, ka kankante bitata, ale wo kankante be wo kankayafeŋɛ ɲɔgɔn fila fila le lasaagila a faliŋɛ la. 7Ka kankante ma yen, bon tige si sɔ le Ala ye, a ni a kali ka a fɔla a ma wo bolofeŋɛnu mafu, anu ka minnu taaku a la. 8Ko mafue mɔɔle bɛ, a mata ninge la, a mata sofale la, a mata saaka la, a mata donfeŋɛ la, a mata fenfen na min bata sama, ka a bata ma bɛlɛya la mɔgɔ fila tɛma, anu ká taga anu lakali Ala la. Ala tini kiite latiɲa min na, lɔɛ le be sala wo tigi ma, a be wo fondo ɲɔgɔn fila fila le lasaagila doe ma.
9Mɔgɛ tini sofale taaku mɔgɛ la, ka wo ma ninge, ka wo ma saaka, ka wo ma kolofeŋɛ mɔɔli do, ka a fagata, ka wo ma a mabaata, ka wo ma a kankata, mɔgɔ yo ma a yen, 10yɛtɛ lakale le be mala Alatala tɔgɛ la wo mɔgɔ fila tɛma: kolofeŋɛ be taakuren min na, wo si a kali le Alatala la, ka a fɔla ale ma a filaɲɔgɛ la taakufeŋɛ mafu. Wo kɔma fondo tige ni diɲa a ma, hali doe ma fenfen don a bolo a la kolofeŋɛ faliŋɛ la. 11Kɔnɔ ka wo kolofeŋɛ be kankaren a bata le yati, a be a faliŋɛ le donna a tige bolo. 12Ka burun butɔ sube do bata a fara, a ni wo binde yita a tige la seedeɲɔgɔya la, wo tɛmuɛ, a te a faliŋɛ dii.
13Min tini kolofeŋɛ do singa a filaɲɔgɛ ma, a mabaata, ka wo ma a fagata a tige kɔma, a singalá si a faliŋɛ dii le nɛti. 14Kɔnɔ ka a tige ɲala le, a faliŋɛ te dii ma. Ka a taranta a be hɛriren de, a hɛri sɔŋɛ wolo be donna a tige bolo, wo si bɛn de.
Sariya donu
15Min tini den musereŋɛ majuguya, kayi ma bɔɔ min na ko la betunna, a ka ko tiɲa a ma, tekku le a bɛnta a ni a la kote sigi, a mɛn ni naa a jigan muse la. 16Ka a baaba ma sɔn a diila a ma feu, a be nafule le diila min si bɛn den musereŋɛ la kote ma.
17Muse min be suubagaya mala, wo be a fagala le.
18Mɔgɔ yo tini sa kolofeŋɛ fɛ, wo be a fagala le.
19Mɔgɔ yo kana sarika bɔɔ batufeŋɛ do gbɛtɛ ye fɔ Alatala dɔrɔn ye, ka wo ma wo tigi be halagila le.
20Wo kana tumaranke mafu, wo mɛn kana boe a ma, bayi wole tugun mata tumaranke le la nun Misira duge tɔ.
21Wo kana boe furuɲa muse nun aliyatimɛ ma. 22I tini boe wonu ma feu, ka anu ka anu kulɛ labɔɔ n ma sɛnbɛ la, n si anu diri kulɛ lamɔɛ le yati. 23N si dumɛn de wo ma, n si wo faga gali kɛlɛ tɔ, wo la musenu ni ma furuɲa muse la, wo la deŋɛnu tugun ni ma aliyatimɛnu la.
24Ka wo tagata nafule dɔntɔ mɔgɔ do ye n na jama tɔ, min mu tɔɔrɔbaga la wo bolo, wo kana a bita iko dɔntɔ bolokala donu, wo kana tɔnɔ yo ɲini a kunma.
25Mɔgɔ do tini a la doroke sigi i ma sɛɛkɛ la, i ni a lasaagi a ma yannun tele ni dula, 26bayi wo dɔndɛ pɛti le be a bolo, wo doroke le be a bale suturaren. A ɲan si naa sue latanbi miniman fɛ? Ka a ka a kulɛ labɔɔ n ma sɛnbɛ la, n si a lamɔɛ le, bayi n si kinikini.
27Wo kana nde Ala lasɔtɔ, wo mɛn kana wo la mansa tugun danka n be min toren wo kunma.
28I kana yaamɛ n mafanna lasanba koe la i la sɛnɛtɔfeŋɛ kun fɔlɛ tɔ anun suntu butɔ lɔgɛ wolo fɔlɛ tɔ.
I si i la den kayiren fɔlɛ kɛrɛkɛrɛ nde ye. 29I si i la kolofen banbanu anun a lanmanu la den fɔlɛ tugun bɛ dii le n ma. I ni a to a nɛɛnɛ kɔma tele wɔrɔwila, a tele sagin luŋɛ i si naa a dii n ma sarika la.
30Wo si ma n ɲɛ mɔgɔ saniyandeŋɛ la. Wolo mu wo kana subu jifɛreŋɛ dɔmɔ burun butɔ subenu ka min faga ɲagama butɔ, wo si a lafili wulenu ye.»
Currently Selected:
Hɔrɔya 22: MOG
Highlight
Share
Compare
Copy
Want to have your highlights saved across all your devices? Sign up or sign in
