Hɔrɔya 19

Ala la fan nabɔɛ Musa ma Turisinina kɔnkɛ tɔ

1Bani Isirayila kaanu la bɔɛ kari saba tanbi kɔma Misira duge tɔ, wo lun yati le anu keta Turisinina janfue tɔ. 2Wo ka a taran, anu bata bɔɔ Refidimi. Anu la kereŋɛ kɔtɛ Turisinina janfue tɔ, anu tagata madɛn ɲɔ. Anu to madɛnta ɲɔ kɔnkɛ tabɛŋɛ tɔ, 3Musa yɛlɛta kɔnkɛ la a be tagala Ala ma. Alatala ka a kele kɔnkɛ kun tɛma a ka a fɔ a ye, a ko: «I be kɛ-lɛ fɔla bani Isirayila kaanu ye, i be a lakela Yaguba bɔnsɛ ma, i ko: 4‹Wole yati bata a yen nde Ala ka min ma Misira kaanu la. Wo mɛn bata a yen, n ka wo jigan mɔɔle min na iko sinbin banba be a la deŋɛnu jiganna a gabataŋɛnu kunma ki min na, n ka wo madon n na. 5Kɔtɛ, ka wo ka n kulɛ bita, ka wo mɛn telenta n na lahire kuma butɔ, n ka min nakoti wo nun nde tɛma, wo si naa ma le n na jama masubɛreŋɛ la, dunuya mɔgɛnu bɛ tɛma, hali nde le to tɛŋɛ mu dunuya bɛ la. 6Wole be mala n na jama saniyandeŋɛ le la, n na sarika lakela jama.› Awa, i be wo kumanu le fɔla bani Isirayila kaanu ye.»

7Wo butɔ, Musa jigita, a ka jama kayibanu kele, a ka wo kumanu bɛ lake anu ma iko Alatala ka a yamɔri ki min na. 8Jama bɛ hakkile labɛndeŋɛ ka a jaabi, anu ko: «Alatala be min bɛ fɔla, mɔ si a ma le.» Musa yɛlɛta, tagala jama la jaabire lakedula Alatala ma.

9Alatala ka a fɔ Musa ye, a ko: «I tolomasɔ, n si na le i dula luuture dibireŋɛ butɔ, alako n tini be kumala i ye, jama ni n kulɛ mɔɛ, anu mɛn ni lannanteya sa i ma tɛmuɛ bɛ tɔ.»

Wo kɔma, Musa ka jama la jaabire lake Alatala ma. 10Alatala mɛn ka a fɔ Musa ye, a ko: «Saagi jama dula, i ni anu lasaniyan bi nun sinan; anu ni anu la kutanu tugun ko. 11Anu ni anu tabɛn yannun sinankɔ, bayi wo lun, nde Alatala si naa jigi le Turisinina kɔnkɛ kunma, jama bɛ ɲala. 12Wo butɔ, i ni naaniŋɛ sa jama ye kɔnkɛ lamiliŋɛ bɛ tɔ, i ni naa a fɔ anu ye: ‹Wo ni wo yɛtɛ mɛnni yɛlɛ koe la kɔnkɛ kunma, hali kɔnkɛ dabole wo kana a maga, bayi min yo ka kɔnkɛ maga wo tigi be fagala le yati!› 13Bolo yo kana ke wo tigi ma, fɔ wo ni a mabun, ka wo ma, wo ni a masɔgɔ kalanu la. A mata dalifeŋɛ la ba, a mata mɔgɛ la ba, kɔnɔ a bɛnta a ni faga. Ka saaka bina kulɛ nata naa bɔɔ, mɔgɛ donu le si yɛlɛ kɔnkɛ kunma.»

14Awa, Musa jigita bɔɔla kɔnkɛ tɔ, a tagata jama dula, a ka anu lasaniyan, anu mɛn ka anu la kutanu ko. 15A ka a fɔ jama ye, a ko: «Wo ni wo tabɛn kɛ tele saba butɔ, wo mɛn kana maga wo la musenu la.»

16A tele saba luŋɛ ɲɔ to kɛnɛta, balamantaŋɛ jigita, banta malumaluta, luuture bilima ka kɔnkɛ kuŋɛ mabutin. Bina kulɛ bɔɔta sɛnbɛ banba la. Jama min be daaka tɔ, anu bɛ bakkuta sɛrɛnna, anu kilanta. 17Musa ka jama labɔɔ daaka tɔ tagala Ala labɛndula. Anu tagata sɔ kɔnkɛ kɔtɔ. 18Wo ka a taran, siise bata tugu Turisinina kɔnkɛ bɛ la, bayi Alatala bata jigi ta tɛma ɲɔ; wo ta siise be yɛlɛla iko furu siise, kɔnkɛ be sɛrɛnna sɛnbɛ la. 19Bina kulɛ be tagala koloyala le tun. Musa tini kuma, Alatala be a jaabila balamantaŋɛ kulɛ le tɔ.

20Alatala to jigita Turisinina kɔnkɛ kun tɛma, a ka Musa kele. Musa yɛlɛta ɲɔ. 21Alatala ka a fɔ Musa ye, a ko: «Jigi i ni jama lasii, anu kana wuruntun nde Alatala yen koe la de, ka wo ma, a siyama si faga anu tɔ. 22Hali sarika lakelanu minnu si anu madon n na, anu ni anu yɛtɛ lasaniyan, ka wo ma, n si anu jihadi le.» 23Musa ka Alatala jaabi, a ko: «Jama ɲan te nɔ yɛlɛla Turisinina kɔnkɛ kunma, bayi i bata mɔ lalɔn nun ka a fɔla mɔ ni naaniŋɛnu sa kɔnkɛ lamiliŋɛ tɔ, wo ni ma mɔ ye tana la.» 24Wo kɔma, Alatala ka a fɔ a ye, a ko: «I mɛn ká tajigi, wo kɔma ile nun Harona ni yɛlɛ. Kɔnɔ sarika lakelanu nun jama kana wuruntun yɛlɛ koe la nde Alatala mafanna, ka wo ma, n si anu jihadi le.» 25Musa jigita jama dula a ka wo kuma lasaagi anu ma.

Currently Selected:

Hɔrɔya 19: MOG

Highlight

Compare

Copy