Hɔrɔya 18
18
Musa nun a bitan kaye Yetoro
1Musa bitaŋɛ Yetoro, Madiyana sarika lakela, ka a mɔɛ Ala bata min bɛ ma Musa nun a la jama bani Isirayila kaanu ye, ka a fɔla Alatala ka anu labɔɔ Misira duge tɔ ki min na. 2Wo butɔ, Yetoro tagata Musa la muse Sefura jigan, Musa ka min to a kɔma, a ka a nati 3anun Sefura la den kayiren fila. Dɔndɛ tɔgɔ Gɛrɛsɔmu, bayi Musa ka a fɔ le: «Boribaga le mu n na luntan duge tɔ.» 4Doe tɔgɔ le Eliyɛsɛri, wo be a fɔren de: «N baaba la Ala bata n dɛman, a bata n bɔɔ Firauna la faŋɛ da tɔ.»
5Awa, Yetoro nun Musa la muse, anun wo la deŋɛnu tagata Musa dula janfue tɔ a be daakaren ka min na, Ala la kɔnkɛ kɛnna. 6Anu be tagala, a ka kiila kii Musa ma, a ko: «I bitaŋɛ le ka, nde Yetoro, n nun i la muse nun a la deŋɛnu, mɔ keta i dula.» 7Awa, Musa bɔɔta a bitaŋɛ labɛndula, a kimisirinta, a ka a masunbu. Anu ka ɲɔgɔn makende sa, anu naata don tantaa kɔtɔ. 8Alatala ka min bɛ sigi Firauna nun Misira kaanu kɔɛɛ tɔ bani Isirayila kaanu la ko la, ɲagankata min ka anu masɔtɔ kila kunma, anun Alatala ka anu lafulen ki min na, Musa ka wo bɛ ɲamakaran a bitaŋɛ ye.
9Alatala ka ko ɲinma min bɛ ma bani Isirayila kaanu ye, anu lakisi koe la Misira kaanu bolo, wo ka Yetoro sɛɛwa. 10Yetoro ka a fɔ, a ko: «Tantue be Alatala ye, min ka wo lakisi Firauna nun Misira kaanu bolo, min ka Isirayila jama labɔɔ Misira kaanu la nɔɛ kɔtɔ! 11N bata a lɔn kɔtɛ Alatala le kolo batufeŋɛ bɛ ko. Misira kaanu to be nɔya laboela bani Isirayila kaanu ma, a ka a sɛnbɛ yita le Misira kaanu la.» 12Musa bitaŋɛ Yetoro ka sarika bintannɛŋɛ jigan, anun kanunteya sarika, anu ka Ala batu wo la. Harona nun bani Isirayila kayibanu bɛ nata, anu naata bɛn wo sarika dɔmɛ ma, anun Musa bitaŋɛ, Ala ɲala.
Musa la kiiti salanu sɔ koe
13Wo tabantaka, Musa sigita jama makiiti dula. Jama be sɔren Musa ɲakɔtɔ bɔɔla saguma han wura la. 14Musa bitaŋɛ to ka a yen a be min bɛ mala jama ye, a ka a fɔ, a ko: «I be fen de maren yan kɛ jama ye? I dɔrɔn be i majigiren fenna jama bɛ be sɔren i ɲakɔtɔ, bɔɔla saguma han wura la?» 15Musa ka a bitaŋɛ jaabi, a ko: «Jama be kɛnɛ nala n bata Ala la kiite le lamɔɛ koe la. 16Ka anu bata ko do laboe a tɔ mɔgɛ nun a sigiɲɔgɛ tɛma, anu be nala nde le dula. Nde be maren kiiti salá le la anu tɛma, n mɛn ni Ala la yamɔrenu anun a la sariyanu yita anu la.»
17Wo butɔ, Musa bitaŋɛ ka a fɔ a ye, a ko: «I be min maren wo la, wo ma kaɲin. 18I be i yɛtɛ le lakorila kɔfu, anun kɛ jama min be sɔla i kunma, bayi kɛ lɔɛ bili i ye koola. Ile dɔrɔn te nɔ a mala. 19Awa, n kulɛ mɔɛ i ni a bita, n ni malase do dii i ma, Ala mu i dɛmanna! Kɔtɛ, ile ni ma jama faliŋɛ la Ala kɛnna, ile ni koenu doni Ala ɲakɔtɔ. 20A bɛnta le i ni anu kawandi Ala la yamɔrenu nun a la sariyanu la, i ni anu lalɔn anu bɛnta kila min jokkila. Anu bɛnta min mala i mɛn ni wo fɔ anu ye. 21Wo kɔma, i mɛn ni mɔgɔ kendenu masubɛ jama bɛ tɛma minnu be kilanden Alatala la, minnu be maren tɔɲa fɔlanu la, anun minnu bele sɔnden ji sige la kɔtɔ la. I ni wonu ma anu la ɲatonkanu la, ka fɔlɔ mɔgɔ wulu dɔndɔ la kuŋɛ ma, a ni ke mɔgɔ kɛmɛ la kuŋɛ ma, a ni ke mɔgɔ bi loolu la kuŋɛ ma, han a ni taga sigi mɔgɔ tan na kuŋɛ ma. 22Wonu ni kɛnɛ jama makiitila tɛmuɛ bɛ tɔ. Koe minnu bɛlɛ anu ni wonu bɛ nati i bata, koenu minnu ma bɛlɛ, ande ni wonu makiiti anu fan na. Wo butɔ, ka ile nun wonu ka wo kote jigan, i la lɔɛ si sɔnɔya le. 23Ka i ka a ma ɲɔgɔnna, ka a tagata taran, Ala be i yamɔriren wolo yati la, wo butɔ i te kori. Kɛ jama bɛ tugun si nɔ donna le a bata jususa butɔ.»
24Musa ka a bitaŋɛ kulɛ mɔɛ a ka a bita. A ka min fɔ a ye a ka a bɛ ma ɲɔgɔnna le. 25A ka mɔgɔ kendenu masubɛ bani Isirayila kaanu bɛ tɛma, a ka anu sɔ jama kunma, mɔgɔ wulu dɔndɔ la kuŋɛnu, mɔgɔ kɛmɛ la kuŋɛnu, mɔgɔ bi loolu la kuŋɛnu, anun mɔgɔ tan na kuŋɛnu. 26Anu tota jama makiitila tɛmuɛ bɛ tɔ, anu ni kɛnɛ ko bɛlɛŋɛnu natila Musa dula. Koe min bɛ ma bɛlɛ ande be wolo makiitila.
27Wo kɔma, Musa ka a bitaŋɛ boloka, wo saagita a bata jamanɛ tɔ.
Currently Selected:
Hɔrɔya 18: MOG
Highlight
Share
Compare
Copy
Want to have your highlights saved across all your devices? Sign up or sign in
