Hɔrɔya 12
12
Malatanga Saya Maleka ma sale
1Wo tɛmuɛ le, Alatala ka a fɔ Musa nun Harona ye Misira duge tɔ, a ko: 2«Kɛ kare min mu ka, kɛ-lɛ be mala wo ye kari fɔlɛ la, ale le mu wo ye saŋɛ kari fɔlɛ la. 3Wo kuma bani Isirayila kaanu bɛ ye, wo ni a fɔ: Kɛ kare tele tan luŋɛ, denbaya tigi yo denbaya tigi ni saaka kontoŋɛ ka wo ma sikule jigan, bon dɔndɔ kolofen dɔndɔ. 4Ka denbaya min dɔgɔ kolofen dɔndɔ ban koe la, ale denbaya nun a sigiɲɔgɛ si madɛn, min na boŋɛ sutu a tɛŋɛ la anu kɔnte ni kamali kolofen dɔndɔ dɔmɔ koe la. Wo butɔ, kolofen dɔndɔ le be jiganna min si nɔ a bɛ bɔɔla. 5A ni ma wo ye kolofen kayima le la min bata san dɔndɔ bɔɔ, lanjuru yo bele a la. A si nɔ mala saaka kontoŋɛ la, ka wo ma baa sikule. 6Wo be a mandila le han kɛ kare tele tan nun naani luŋɛ. Wo luŋɛ bani Isirayila jama bɛ si a la kolofeŋɛ kannatɛgɛ le. Anu be a fagala tele la dula nun fitiri tɛma le. 7Anu be a dɔmɔla boŋɛ min tɔ, anu si a base do jigan ka a madon wo boŋɛ bonda firɛmuɛ kunma anun a fɛfɛnu ma. 8A sube ni bintan ta la, a be dɔmɔla wo sue tɔ le. Anu be a dɔmɔla dɛgɛ lɛbinibɔnɛ nun yanba kutaŋɛ kunama le fɛ. 9Wo te a dɔmɔ a mɔbale la de, a te taba je tugun na. A kuŋɛ nun a kɛŋɛnu, a nun bu butɔ feŋɛ bɛ, wonu bɛ be bintanna ta le la. 10Wo te fenfen to han saguma, ka min tɔɛ tota saguma, wo be wo lafilila ta le tɔ a ni keremun. 11Wo be a dɔmɔla le wo be wo la doroki banba tɛ kitiren, wo la samata be wo kɛŋɛ tɔ, wo la tungare be bitaren wo bole la. Wo be a dɔmɔla le teriya la. Malatanga Saya Maleka ma sale le mu. Wo be a mala nde Alatala la biliya le butɔ. 12N si naa Misira duge takuntu le wo sue tɔ. N si Misira den fɔlɛ bɛ faga le, ka bɔɔ mɔgɛnu ma han kolofeŋɛnu n si a bɛ la den fɔlɛ faga le. N si naa jihade sa le Misira batufeŋɛ bɛ ma anu be minnu baturen iko Ala. Nde le mu Alatala la. 13Base be naala mala tɔnkuma le la wo ye boŋɛnu ma wo be tola ka min na. N tini base yen ka min na, n be tanbila le ɲɔ kunma, kasara yo te ke wo ma n be Misira duge jihadila wagate min tɔ. 14Wo lɔ́gɛ́ be mala wo ye matalɔŋɛ le la. Wo ni a ma sali lɔ́gɛ́ la nde Alatala la biliya butɔ. Wo nun wo bɔnsɛ bɛ be kɛnɛ kɛ sale mala le iko nde Alatala be min yamɔre saren abada.
15Tele wɔrɔwila butɔ, wo ni dɛgɛ lɛbinibɔnɛ dɔmɔ. A dan fɔlɛ lɔ́gɛ́ yati, wo si lɛbinɛ labɔɔ le wo la boŋɛnu tɔ kisanna. Mɔgɔ min yo ka dɛgɛ lɛbini tige dɔmɔ bɔɔla a dan fɔlɛ ma, han a ni taga ke a tele wɔrɔwila luŋɛ ma, wo tigi si labɔɔ le bani Isirayila jama ɲaama. 16A lɔgɔ fɔlɛ, wo si naa madɛn nde Alatala la biliya butɔ. A tele wɔrɔwila luŋɛ, wo mɛn be madɛnna nde Alatala le la biliya butɔ. Wali yo te ma wo lɔgɔ fila kɔtɔ, fɔ wo be dɔmɛ min pɛti ɲiɲala mɔgɛnu ye.
17Wo si kɛ Dɛgɛ Lɛbinibɔnɛ sale makanta, bayi n ka wo la jama labɔɔ Misira duge tɔ wo lɔ́gɛ́ yati le tɔ. Wo wo lɔ́gɛ́ makanta, wo bɔnsɛnu ni kɛnɛ wo mala tɛmuɛ bɛ tɔ. 18Kari fɔlɛ tele tan nun naaniɲɔgɛ, wura la, wo be dɛgɛ lɛbinibɔnɛ dɔmɔla han a tele mugan nun dɔndɔ luŋɛ wura la. 19Lɛbinɛ kana to wo la boŋɛnu tɔ han tele wɔrɔwila, bayi ka mɔgɔ yo ka dɛgɛ lɛbini tige dɔmɔ, a mata luntaŋɛ le la ba, a mata bani Isirayila kaa le la ba, ale tigi be labɔɔla le bani Isirayila jama ɲaama. 20Awa, ka wo tota dula yo tɔ, wo kana dɛgɛ lɛbini tige dɔmɔ de, wo be dɛgɛ lɛbinibɔnɛ le dɔmɔla.»
Sale tabɛn koe
21Wo kɔma, Musa ka bani Isirayila kayibanu bɛ kele, a ka a fɔ anu ye, a ko: «Wo taga wo ni kolofen lanma jigan wo la denbayanu ye, wo ni a kannatɛgɛ sali dɔmɛ la, malatanga sale Saya Maleka ma. 22Wo kɔma, wo ni hisopi boliŋɛnu lakitireŋɛ jigan, wo ni a lajigi base tɔ min be fɛ tɔ, wo ni naa base madon bonda firɛmuɛ kunma nun a fɛfɛnu ma. Dodo kana bɔɔ wo tɛma a la boŋɛ tɔ, han saguma. 23Alatala si naa Misira takuntu jihadi ma koe la. A tini base yen min na firɛmuɛ kunma anun a fɛfɛnu tɔ, a si tantun de wo boŋɛ dondula kunma. A te sɔn Saya Maleka ni don wo la boŋɛnu tɔ jihadi ma koe la.
24Wo wo sale makanta, a ni ma yamɔre la wo nun wo la deŋɛnu ye kudai. 25Alatala be duge min diila wo ma, iko a ka a fɔ ki min na, ka wo tagata don ɲɔ lun min na, awa wo be kɛnɛ kɛ sale makantala le. 26Ka wo la deŋɛnu tagata wo maɲininka: ‹Wo be kɛ sale mala fenna?›, 27wo si anu jaabi: ‹Malatanga sale Saya Maleka ma, a sarika le mu Alatala la biliya butɔ, bayi a tantunta bani Isirayila kaanu la boŋɛnu kunma Misira, a to be Misira kaanu fagala wagate min tɔ, a ka mɔ la denbayanu kan nakisi.› »
Jama kimisirinta, anu ka Alatala batu. 28Bani Isirayila kaanu tagata wo bɛ ma iko Alatala ka Musa nun Harona yamɔri ki min na. Anu ka a ma ɲɔgɔnna le.
Jihadi tanɲɔgɛ: den fɔlɛnu faga koe
29Su tɛma, Alatala ka den fɔlɛnu bɛ faga Misira duge tɔ, ka bɔɔ Firauna Misira mansa la den fɔlɛ ma min be naala sigila nun a la tintiŋɛ tɔ han gelemanɛnu minnu be geele tɔ, wonu la den fɔlɛnu ma han ka ke kolofeŋɛ den fɔlɛ bɛ ma. 30Firauna wulita sue tɔ, a nun a la walilanu bɛ, anun Misira kaanu bɛ. Sɔnkɛ belebele yɛlɛta Misira, bayi bon dɔndɔ ma to, faga ma ma ka min na. 31Wo sue yati tɔ, Firauna ka Musa nun Harona kele, a ka a fɔ anu ye: «Wo wuli wo nun bani Isirayila kaa bɛ, wo ni bɔɔ n na jama tɛma, wo ni taga Alatala batu iko wo ka a fɔ ki min na. 32Wo ni kolofeŋɛnu tugun jigan, a lanma nun a banba, iko wo ka a fɔ ki min na, wo taga! Wo mɛn ni duba nde tugun ye.»
33A be toren Misira kaanu ye anu bɛ be fagala le, wolo mu ande tugun ka bani Isirayila jama lagbataa bɔɔ koe la anu la duge tɔ teriya la. 34Bani Isirayila jama ka dɛgɛ lamulandeŋɛ jigan yannun a ni yɛlɛ, anu ka anu la dɛgɛ buntenfeŋɛnu mamɔntɔmɔntɔ anu la kutanu tɔ, anu ka anu sa anu gabakunkuŋɛnu kunma. 35Bani Isirayila kaanu ka a ma iko Musa ka a fɔ anu ye ki min na, anu ka Misira kaanu táran fondo kaalisinɛŋɛnu nun sanunɛŋɛnu la, anun kutanu. 36Alatala ka a ma, Misira kaanu hinnɛta bani Isirayila kaanu la. Bani Isirayila kaanu ka wo fondonu bosi ɲɔgɔnna le Misira kaanu bolo.
Bani Isirayila kaanu la bɔɛ Misira duge tɔ
37Wo lun, bani Isirayila kaanu fayida kayi mɔgɔ wulu kɛmɛ wɔɔrɔ bɔɔta anu kɛŋɛ la Ramisɛsi saa tɔ, tagala Sukoti saa tɔ. Anu la denbayanu bele wo kɔnte ɲaama. 38Kolofeŋɛ siyama be anu bolo, a lanma nun a banba. Mɔgɔ majigandeŋɛ ɲatiri, wonu tugun ka anu jokki. 39Anu ka dɛgɛ lɛbinibɔnɛ lamulandeŋɛ yɛlɛbale min nati anu fɛ bɔɔla Misira, anu ka a bintan. Bayi anu be beeren de Misira, sɔ yo bele anu ye. Anu mɛn ma nɔ fenfen ɲiɲala anu yɛtɛ ye fanda la.
40Wo ka a taran, bani Isirayila kaanu bata san kɛmɛ naani san bi saba ma Misira. 41Wo san kɛmɛ naani san bi saba banta lun min na, wo lun yati le Alatala la jama bɛ bɔɔta Misira duge tɔ, a kurun kurun kɛɲa ma. 42Wo sue tɔ, Alatala ka bani Isirayila kaanu kanta, alako a ni anu labɔɔ Misira duge tɔ. Wolo mu, san yo san, a be wajibiyaren bani Isirayila kaa bɛ yɛlɛman yo yɛlɛman anu ni kɛ sue makanta Alatala la biliya butɔ.
Sale makanta koe sariya donu
43Alatala ka a fɔ Musa nun Harona ye, a ko: «Malatanga sale Saya Maleka ma, a sariya donu le ka:
Luntan yo te kɛ sale kolofeŋɛ sube dɔmɔ.
44I ni joŋɛnu bɛ sunna wo ka minnu sɔtɔ nafule la, wolo mu ande tugun si nɔ a dɔmɔla.
45Tanbi luntaŋɛ nun walila sɔndiila tugun te a dɔmɔ.
46A be dɔmɔla boŋɛ butɔ le, wo kana a sube doni boŋɛ kɔma.
A kole hali dɔndɔ te kuntu.
47Bani Isirayila jama mamadɛŋɛ bɛ ni Malatanga Saya Maleka ma Sale makanta a ɲinma la.
48Ka luntaŋɛ do be i bata, a be diren Malatanga sale Saya Maleka ma mala Alatala la biliya butɔ, fɔ kaye min bɛ be a la boŋɛ tɔ, a bɛ ni sunna. Wo kɔma, a si to iko saatigenu, a mɛn si nɔ le wo sale mala. Kɔnɔ min bele sunnaren, wo yan te a dɔmɔ.
49Saatige yo, luntaŋɛ yo min be sabatiren wo bata, wo sariya dɔndɛ le be anu bɛ ye.»
50Bani Isirayila kaa bɛ ka a ma iko Alatala ka Musa nun Harona yamɔri ki min na. Anu ka a ma ɲɔgɔnna le. 51Wo luŋɛ yati le Alatala ka bani Isirayila kaanu labɔɔ Misira duge tɔ, a kurun kurun kɛɲa ma.
Currently Selected:
Hɔrɔya 12: MOG
Highlight
Share
Compare
Copy
Want to have your highlights saved across all your devices? Sign up or sign in
