ಜ್ಞಾನತ್‌ರ ಪಡಿಮ 29
29
1ಒಬ್ಬಂಗ್‌ ದುಂಬಕುರಿ ಎಚ್ಚರ ಮಾಡಿತೂ ಅಂವೊ ತನ್ನ ಕಠಿಣ ಮಾಡಿಯಂಡತೇಂಗಿ ಸಹಾಯಯಿಲ್ಲತೆ ಒಮ್ಮಕೆ ನಾಶ ಆಯಿಪೋಪ.
2ನೀತಿವಂತಯಿಂಗ ಜಾಸ್ತಿ ಆಪಕ ಜನ ಕುಶೀಲ್‌ ಇಪ್ಪ. ದುಷ್ಟನಾನಂವೊ ಆಳ್‌ವಕ ಜನ ಸಂಕಟ ಪಡುವ.
3ಜ್ಞಾನತ್‌ನ ಪ್ರೀತಿ ಮಾಡುವಂವೊ ತಾಂಡ ಅಪ್ಪನ ಕುಶಿಪಡ್‌ತುವ. ಆಚೇಂಗಿ ವೇಶಿಯಡಕೂಡೆ ಸಹವಾಸ ಉಳ್ಳಂವೊ ತಾಂಡ ಆಸ್ತಿನ ನಾಶ ಮಾಡಿರುವ.
4ನ್ಯಾಯವಾಯಿತ್‌ ಆಳುವ ರಾಜ ದೇಶತ್‌ನ ಸ್ತಿರಪಡ್‌ತುವ. ಆಚೇಂಗಿ ಲಂಚ ಎಡ್‌ಪಕ್‌ ಕುಶಿಪಡುವಂವೊ ಅದ್‌ನ ನಾಶ ಮಾಡಿರುವ.
5ಒಬ್ಬಂಗ್‌ ಕೊಚ್ಚಿ ತಕ್ಕ್‌ ಪರಿಯುವಂವೊ, ಅಂವೊಂಡ ಕಾಲ್ಕೇ ಬಲೆನ ಬಿರ್ಚಂಡುಂಡ್.
6ದುಷ್ಟಂಗ ಅಯಿಂಗಡ ಪಾಪತಿಂಜಲೇ ಚಿಕ್ಕಿಯೊವ. ಆಚೇಂಗಿ ನೀತಿವಂತಂವೊ ಕುಶೀಲ್‌ ಪಾಡುವ.
7ನೀತಿವಂತಂವೊ ಗರೀಬಂಡ ನ್ಯಾಯತ್‌ನ ಎಚ್ಚರ ಎಡ್‌ತಿತ್‌ ಅರ್‌ಂಜೊವ. ಆಚೇಂಗಿ ದುಷ್ಟ ಅದ್‌ನ ಅರ್‌ಂಜೊಕ್‌ ಕುಶಿಪಡುಲೆ.
8ಪರಿಹಾಸ ಮಾಡ್‌ವಯಿಂಗ ಪಟ್ಟಣತ್‌ಲ್‌ ತಿತ್ತ್‌ ಕತ್ತಿಚಿಡುವ. ಆಚೇಂಗಿ ಜ್ಞಾನ ಉಳ್ಳಯಿಂಗ ಚೆಡಿರ ಜ್ವಾಲೆನ ಆರಿಚಿಡುವ.
9ಜ್ಞಾನಿಯಾನಂವೊ ಮೂಡಂಡ ಕೂಡೆ ವಾದ ಮಾಡ್‌ವಕ, ಕೂತ್‌ಟ್ಟತೇಂಗಿಯು, ತೆಳಿಚೆತೇಂಗಿಯು ಅಂವೊಂಗ್‌ ಸಮಾದಾನಯಿಲ್ಲೆ.
10ಕೊಲೆಗಾರಂಗ ಸತ್ಯತ್‌ಲ್‌ ನಡ್‌ಪಯಿಂಗಳ ದ್ವೇಷ ಮಾಡುವ. ಆಚೇಂಗಿ ನೀತಿವಂತಯಿಂಗ ಅಂವೊಂಡ ಜೀವತ್‌ನ ಕಾಪಾಡುವ.
11ಮೂಡ ತಾಂಡ ಚೆಡಿನೆಲ್ಲ ಕಾಟಿಯೊವ. ಆಚೇಂಗಿ ಜ್ಞಾನವುಳ್ಳಂವೊ ತಾಂಡ ಚೆಡಿನ ತಾಳ್ಮೆಲ್‌ ಅಡಕಿ ಬೆಪ್ಪ.
12ಅದಿಪತಿಯಾನಂವೊ ಪೊಟ್ಟ್‌ ತಕ್ಕ್‌ಕ್‌ ಕೆಮಿ ಕೊಡ್‌ತತೇಂಗಿ ಅಂವೊಂಡ ಅದಿಕಾರಿಯೆಲ್ಲ ದುಷ್ಟಂಗಳಾಪ.
13ಇದ್‌ ಗರೀಬಂಗು ಹಿಂಸೆಪಡ್‌ತ್‌ವಂವೊಂಗು ಒಂದೇ ಆಯಿತುಂಡ್. ಅಯಿಂಗಡ ದಂಡಾಳ್‌ರ ಕಣ್ಣ್‌ಕ್ ಬೊಳಿ ಕೊಡ್‌ತಂವೊ ಯೆಹೋವನೇ.
14ಗರೀಬಂಗಳ ನ್ಯಾಯವಾಯಿತ್‌ ವಿಚಾರ ಮಾಡುವ ರಾಜಂಡ ಸಿಂಹಾಸನ ಕಾಲಕಾಲಕು ಸ್ತಿರವಾಯಿತ್‌ ಇಪ್ಪ.
15ಕೋಲ್‌ ಪಿಂಞ ಚೂಕ್ತಕ್ಕ್‌ ಮಕ್ಕಕ್‌ ಜ್ಞಾನತ್‌ನ ತಪ್ಪ. ತಾನ್‌ ಕುಶಿಪಟ್ಟನೆಕೆ ಬುಟ್ಟ ಕುಂಞಿ ತಾಂಡ ಅವ್ವಂಗ್‌ ಞಾಣಕ್‍ೕಡ್‌ನ ಬಪ್ಪ್‌ಚಿಡುವ.
16ದುಷ್ಟಂಗ ಆಳ್‌ವಕ ಪಾಪವು ಜಾಸ್ತಿ ಆಪ. ಆಚೇಂಗಿ ನೀತಿವಂತಯಿಂಗ ಅಯಿಂಗ ಬುದ್ದ್‌ಪೋಪದ್‌ನ ಕಾಂಬ.
17ನೀಡ ಮೋಂವೊಂಗ್‌ ಶಿಕ್ಷೆ ಕೊಡ್, ಅಂವೊ ನಿನ್ನ ಸಮಾದಾನ ಪಡ್‌ತುವ, ನೀಡ ಆತ್ಮಕ್‌ ಸಂತೋಶತ್‌ನ ಉಂಟ್ ಮಾಡುವ.
18ಪ್ರವಾದನೆ ಇಲ್ಲತ ಜಾಗತ್‌ಲ್‌ ಜನ ನಾಶ ಆಯಿ ಪೋಪ. ಆಚೇಂಗಿ ನ್ಯಾಯಪ್ರಮಾಣಕ್‌ ತಗ್ಗಿತ್‌ ನಡ್‌ಪಂವೊ ಆಶೀರ್ವಾದ ಪಡ್‌ಂದಂವೊ.
19ಒರ್‌ ಗುಲಾಮಂಗ್‌ ಬರೀ ತಕ್ಕ್‌ಲ್‌ ಎಣ್ಣ್‌ಚೇಂಗಿ ಅಂವೊ ಪಾಠ ಪಡಿಪುಲೆ. ಅಂವೊ ನೀಡ ತಕ್ಕ್‌ನ ಅರ್ಥ ಮಾಡಿಯಂಡತೇಂಗಿಯು, ಅದ್‌ನ ನಡತೆಲ್‌ ಕಾಟುಲೆ.
20ದುಡ್‌ಕಿತ್‌ ತಕ್ಕ್‌ ಪರಿಯುವಂವೊನ ನೀನ್‌ ಕಂಡಿತುಳ್ಳಿಯ? ಅನ್ನನೆ ಉಳ್ಳ ಮನುಷ್ಯಕಿಂಜಿ ಮೂಡಂಡ ಮೇಲೆ ನಂಬಿಕೆ ಇಡಲು.
21ಒಬ್ಬ ತಾಂಡ ಗುಲಾಮನ ಚುಮ್ಮಿಯಿಂಜಲೇ ದುಂಬ ಕೊದೀಲ್‌ ಚಾಕ್‌ಚೇಂಗಿ, ಕಡೇಕ್‌ ಅಂವೊ ನೀಡ ಮೋಂವೊನಾಕೊಂಡೂಂದ್‌ ನೀಕ್‌ ಎದ್‌ರ್ ನಿಪ್ಪ.
22ಮುಂಜೆಡಿ ಉಳ್ಳಂವೊ ಜಗಳತ್‌ನ ಉಂಟ್‌ಮಾಡುವ. ದುಂಬ ಚೆಡಿ ಉಳ್ಳಂವೊ ದುಂಬ ಪಾಪ ಮಾಡುವ.
23ಮನುಷ್ಯಂಡ ಆಂಗಾರ ಅಂವೊನ ತಗ್ಗ್‌ಚಿಡುವ. ಆಚೇಂಗಿ ಮನಸ್ಸ್‌ ತಗ್ಗಿತ್‌ ಉಳ್ಳಂವೊಂಗ್‌ ಗೌರವ ಕ್‌ಟ್ಟುವ.
24ಕಳ್ಳಂಡಕೂಡೆ ಪಾಲ್ದಾರನಾಯಿತ್‌ ಇಪ್ಪಂವೊ ತಾಂಗ್ತಾನೇ ಶತ್‌ರು ಆಪ. ಅಂವೊ ನ್ಯಾಯಾಸಬೆಲ್‌ ಸತ್ಯ ಎಣ್ಣ್‌ಚೇಂಗಿ ದಂಡನೆ ಕ್‌ಟ್ಟುವ. ಎಣ್ಣತೆ ಪೋಚೇಂಗಿ ದೇವ ಅಂವೊಂಗ್‌ ಶಾಪ ಕೊಡ್‌ಪ.
25ಮನುಷ್ಯಂಗಕ್‌ ಬೊತ್ತ್‌ವದ್‌ ಬಲ್ಯ ಕೆಣಿ, ಆಚೇಂಗಿ ಯೆಹೋವಂಡ ಮೇಲೆ ನಂಬಿಕೆ ಇಡ್‌ವಂವೊ ಸೌಕ್ಯತ್‌ ಇಪ್ಪ.
26ದುಂಬ ಜನ ಅದಿಪತಿರ ದಯೆ ಕ್‌ಟ್ಟ್‌ವಕ್‌ ಪೇಚಾಡುವ. ಆಚೇಂಗಿಯು ಒಬ್ಬೊಬ್ಬಂಡ ನ್ಯಾಯವು ಯೆಹೋವಂಡಿಂಜಲೇ ಕ್‌ಟ್ಟುವ.
27ನೀತಿವಂತಂವೊ ದುಷ್ಟನ ಅಸಹ್ಯವಾಯಿತ್‌ ಕಾಂಬ. ದುಷ್ಟ ಸತ್ಯವಂತಂವೊನ ಅಸಹ್ಯವಾಯಿತ್‌ ಕಾಂಬ.
Currently Selected:
ಜ್ಞಾನತ್‌ರ ಪಡಿಮ 29: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
