ಜ್ಞಾನತ್‌ರ ಪಡಿಮ 28
28
1ದಾರು ಓಡಿಚಿಡತೆ ಪೋಚೇಂಗಿಯು ದುಷ್ಟ ಓಡಿ ಪೋಪ. ಆಚೇಂಗಿ ನೀತಿವಂತಯಿಂಗ ಸಿಂಹತ್‌ರನೆಕೆ ದೈರ್ಯತ್‌ಲ್‌ ಇಪ್ಪ.
2ಒರ್‌ ದೇಶತ್‌ ಜನ ದಂಗೆ ಎದ್ದಂಡೇ ಉಂಡೇಂಗಿ ದುಂಬ ಅದಿಪತಿಯ ಬದಲಾಯಂಡೇ ಇಪ್ಪ. ಆಚೇಂಗಿ ಬುದ್ದಿಯು ವಿವೇಕವು ಉಳ್ಳ ಅದಿಪತಿರಗುಂಡ್‌ ದೇಶ ಸ್ತಿರವಾಯಿತ್‌ ಇಪ್ಪ.
3ಗರೀಬ ಜನಳ ಹಿಂಸೆಪಡ್‌ತುವ ಗರೀಬ, ಬೊಳೆನ ನಾಶಮಾಡಿತ್‌ ಅಡಿಚಂಡ್‌ ಪೋಪ ಮಳೆರನೆಕೆ ಇಪ್ಪ.
4ದೇವಡ ಕಾನೂನ್ನ ಕೈ ಬುಡುವಂವೊ ದುಷ್ಟಂಗಳ ಕೊಂಡಾಡುವ. ಆಚೇಂಗಿ ದೇವಡ ಕಾನೂನ್‌ಕ್‌ ತಗ್ಗಿತ್‌ ನಡ್‌ಪಯಿಂಗ ಅಯಿಂಗಡಕೂಡೆ ಪೋರಾಡುವ.
5ದುಷ್ಟ ಜನ ನ್ಯಾಯತ್‌ನ ಅರ್ಥ ಮಾಡಿಯೊಲೆ. ಆಚೇಂಗಿ ಯೆಹೋವನ ತ್‍ೕಡ್‌ವಯಿಂಗ ಎಲ್ಲಾನ ಅರ್ಥ ಮಾಡಿಯೊವ.
6ಕ್‍ೕಡ್‌ ಬಟ್ಟೆಲ್‌ ನಡ್‌ಂದಿತ್‌ ಐಶ್ವರ್ಯವಂತನಾಯಿತ್‌ ಇಪ್ಪಕಿಂಜಿ, ಸತ್ಯತ್‌ ನಡ್‌ಂದಿತ್‌ ಗರಿಬನಾಯಿತ್‌ ಇಪ್ಪದೇ ಮೇಲ್.
7ದೇವಡ ನ್ಯಾಯಪ್ರಮಾಣಕ್‌ ತಗ್ಗಿತ್‌ ನಡ್‌ಪಂವೊ ವಿವೇಕ ಉಳ್ಳ ಪುತ್‌ರ. ಹೊಟ್ಟೆಬಾಕೆಂಡ ಸಹವಾಸ ಬೆಪ್ಪಂವೊ ತಾಂಡ ಅಪ್ಪನ ಅವಮಾನ ಪಡ್‌ತುವ.
8ಅನ್ಯಾಯ ಬಡ್ಡಿ ಪಿಂಞ ಆದಾಯತ್‌ಂಜ ತಾಂಡ ಆಸ್ತಿನ ಜಾಸ್ತಿ ಮಾಡುವಂವೊ, ಗರೀಬಂಗಕ್‌ ದಯೆ ಕಾಟ್‌ವವೊಂಗಾಯಿತ್‌ ಅದ್‌ನ ಕೂಟಿತ್‌ ಬೆಪ್ಪ.
9ದೇವಡ ನ್ಯಾಯಪ್ರಮಾಣಕ್‌ ಕೆಮಿ ಕೊಡ್‌ಕತಂವೊಂಡ ಪ್ರಾರ್ಥನೆ ದೇವಂಗ್‌ ಅಸಹ್ಯವಾನದ್.
10ಸತ್ಯವಂತಯಿಂಗಳ ಬಟ್ಟೆತಪ್ಪಿಪೋಪನೆಕೆ ನಡ್‌ತ್‌ವಂವೊ ತಾನ್‌ ತೋಡ್‌ನ ಕುಂಡ್‌ಕ್‌ ತಾನೇ ಬುದ್ದ್ ಪೋಪ. ಆಚೇಂಗಿ ಸತ್ಯವಂತಯಿಂಗ ನಲ್ಲದ್‌ನ ಬಾದ್ಯತೆಯಾಯಿತ್‌ ಪಡೆಯುವ.
11ಐಶ್ವರ್ಯವಂತ, ತಾಂಡ ದೃಷ್ಟಿಲ್‌ ತಾನೇ ಬುದ್ದಿವಂತಂವೋಂದ್‌ ಗೇನ ಮಾಡುವ. ಆಚೇಂಗಿ ಬುದ್ದಿ ಉಳ್ಳ ಗರೀಬ ಅಂವೊನ ಪರೀಕ್ಷೆ ಮಾಡುವ#28.11 ಐಶ್ವರ್ಯವಂತವಕಿಂಞ ಗೊತ್ತುಳ್ಳಂವೊನಾಯಿತಿಪ್ಪ .
12ನೀತಿವಂತಯಿಂಗ ಕುಶೀಲ್‌ ಇಪ್ಪಕ, ಬಲ್ಯ ಕೊಂಡಾಟ ಇಪ್ಪ. ಆಚೇಂಗಿ ದುಷ್ಟ ಜನ ಬಲ್ಯ ಸ್ತಾನಕ್‌ ಪೋಪಕ ಜನ ಒಳ್‌ಚೊವ.
13ತಾಂಡ ಪಾಪತ್‌ನ ಮುಚ್ಚ್‌ವಂವೊ ಚಾಯಾಪುಲೆ. ಆಚೇಂಗಿ ತಾಂಡ ಪಾಪತ್‌ನ ಅರಿಕೆ ಮಾಡಿತ್ ಅದ್‌ನ ಬುಡುವಂವೊಂಗ್‌ ಕರುಣೆ ಕ್‌ಟ್ಟುವ.
14ದೇವಡ ಮಿಂಞತ್‌ ಎಕ್ಕಾಲು ಪೋಡಿಚಿಡುವಂವೊ ಆಶೀರ್ವಾದ ಪಡ್‌ಂದಂವೊ#28.14 ತಪ್ಪ್‌ ಮಾಡುವಕ್‌ ಬೋಡಿಯುಳ್ಳಂವೊ ಆಶೀರ್ವಾದ ಪಡಂತಂವೊ. ಆಚೇಂಗಿ ತಾಂಡ ಹೃದಯತ್‌ನ ಕಠಿಣಪಡ್‌ತ್‌ವಂವೊ ಕ್‍ೕಡ್‌ಕ್‌ ಚಿಕ್ಕಿ ಬೂವ.
15ಗರೀಬ ಜನಳ, ಆಳುವ ದುಷ್ಟ ಅದಿಪತಿ, ಕೂತ್‌ಡ್‌ವ ಸಿಂಹತ್‌ರನೆಕೆಯು ಪುಡಿಚಿತ್‌ ಪಿಂಬ ಕರಡಿರನೆಕೆಯು ಇಪ್ಪ.
16ವಿವೇಕಯಿಲ್ಲತ ಅದಿಪತಿ ಬಲ್ಯ ಹಿಂಸೆಗಾರ. ಅನ್ಯಾಯತ್‌ಲ್‌ ಸಂಪಾದನೆ ಮಾಡುವಕ್‌ ಆಸೆಪಡತ ಅದಿಪತಿ ದುಂಬ ಕಾಲ ಬದ್‌ಕ್‌ವ.
17ತಾನ್‌ ಕೊಲೆಮಾಡ್‌ನ ಅಪರಾದಕಾಯಿತ್‌ ಒಬ್ಬ ಕುಂಡ್‌ಕ್‌ ಓಡಿಪೋಪ. ಅಂವೊಂಗ್‌ ಸಹಾಯ ಮಾಡತಿ.
18ಸತ್ಯತ್‌ಲ್‌ ನಡ್‌ಪಂವೊ ಸೌಕ್ಯತ್‌ ಇಪ್ಪ. ಕಪಟತನತ್‌ಲ್‌ ದಂಡ್‌ ಬಟ್ಟೆಲ್‌ ನಡ್‌ಪಂವೊ, ಅದ್‌ಂಡ ಒರ್‌ ಬಟ್ಟೆಲ್‌ ಬುದ್ದ್ ಪೋಪ.
19ತಾಂಡ ಬೇಲ್‌ಲ್‌ ಕಷ್ಟಪಟ್ಟಿತ್‌ ನಯಿಪಂವೊಂಗ್‌ ಬೋಂಡಿಯಚ್ಚಕ್‌ ಆಹಾರ ಇಪ್ಪ. ಆಚೇಂಗಿ ಪ್ರಯೋಜನ ಇಲ್ಲತ ಕಾರ್ಯತ್‌ಲ್‌ ನೇರತ್‌ನ ಕಳೆಯುವಂವೊ ಗರೀಬತನತ್‌ ದುಂಬಿತ್‌ಪ್ಪ
20ನಂಬಿಗಸ್ತಂಗ್‌ ಬಲ್ಯ ಆಶೀರ್ವಾದ ಕ್‌ಟ್ಟುವ. ಐಶ್ವರ್ಯವಂತನಾಪಕ್‌ ಆತುರಪಡ್‌ವಂವೊಂಗ್‌ ಕಂಡಿತವಾಯಿತ್‌ ತಂಡನೆ ಕ್‌ಟ್ಟುವ.
21ಪಕ್ಷಪಾತ ನಲ್ಲದಿಲ್ಲೆ. ಅನ್ನನೆ ಮಾಡ್‌ವಂವೊ ಒರ್‌ ತುಂಡ್‌ ಒಟ್ಟಿಕಾಯಿತ್‌ ತಪ್ಪ್‌ ಮಾಡುವ.
22ಜೀಣೆ ಬುದ್ದಿ ಉಳ್ಳಂವೊ ಐಶ್ವರ್ಯವಂತನಾಪಕ್‌ ಆತುರ ಪಡುವ. ಆಚೇಂಗಿ ಅಂವೊ ಬೆರಿಯ ಗರೀಬನಾಪಾಂದ್‌ ಅಂವೊಂಗ್‌ ಗೊತ್ತಿಲ್ಲೆ.
23ತಾಂಡ ನಾವ್ಯಿಂಜ ಕೊಚ್ಚ್‌ ತಕ್ಕ್‌ ಪರಿಯುವಂವೊಕಿಂಜಿ, ಚೂಕ್‌ಚಿಡುವಂವೊನ ಕಡೇಲ್‌ ಕೊಂಡಾಡುವ.
24ತಾಂಡ ಅಪ್ಪವ್ವಂಡ ಕೈಯಿಂಜ ಲೂಟಿ ಮಾಡಿತ್, ಅದ್‌ ತಪ್ಪಾಲ್ಲಾಂದ್‌ ಎಣ್ಣುವ ಮನುಷ್ಯ ನಾಶ ಮಾಡ್‌ವಂವೊಂಗ್‌ ಕೂಟಾಳಿಯಾಯಿತ್‌ ಉಂಡ್.
25ಅತಿ ಆಸೆ ಉಳ್ಳಂವೊ ಜಗಳತ್‌ನ ಸುರುಮಾಡುವ. ಆಚೇಂಗಿ ಯೆಹೋವಂಡ ಮೇಲೆ ನಂಬಿಕೆ ಬೆಪ್ಪಂವೊ ಅಬಿವೃದ್ದಿ ಪೊಂದುವ.
26ತಾಂಡ ಹೃದಯತ್‌ನ ನಂಬುವಂವೊ ಮೂಡ. ಆಚೇಂಗಿ ಜ್ಞಾನತ್‌ರ ಬಟ್ಟೆಲ್‌ ನಡ್‌ಪಂಪವೊ ಸೌಕ್ಯತ್‌ ಇಪ್ಪ.
27ಗರೀಬಂಗಕ್‌ ಕೊಡ್‌ಪಂವೊಂಗ್‌ ಒರ್‌ ಕೊರತೆಯೂ ಇಪ್ಪುಲೆ. ಆಚೇಂಗಿ ಗರೀಬಂಗಕ್‌ ತಾಂಡ ಕಣ್ಣ್‌ನ ಮುಚ್ಚ್‌ವಂವೊಂಗ್‌ ದುಂಬ ಶಾಪ ಕ್‌ಟ್ಟುವ.
28ದುಷ್ಟ ಜನ ಬಲ್ಯ ಸ್ತಾನಕ್‌ ಪೋಪಕ ಜನ ಒಳ್‌ಚೊವ. ಆಚೇಂಗಿ ಅಯಿಂಗ ನಾಶ ಆಪಕ ನೀತಿವಂತಯಿಂಗ ದುಂಬುವ.
Currently Selected:
ಜ್ಞಾನತ್‌ರ ಪಡಿಮ 28: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
