ಜ್ಞಾನತ್‌ರ ಪಡಿಮ 30
30
1ಯಾಕೋಬಂಡ ಮೋಂವೊನಾನ ಆಗೂರ ಎಣ್ಣುವ ಒರ್‌ ಮನುಷ್ಯಂಡ ಜ್ಞಾನ ತಕ್ಕ್. ಇಂವೊ ಇಥಿಯೇಲಂಗ್, ಇಥಿಯೇಲಂಗು ಉಕ್ಕಾಲಂಗು ಎಣ್ಣ್‌ನ ಬೋದನೆರ ತಕ್ಕ್.
2ಮನುಷ್ಯಂಗಡಡೆಲ್‌ ನಾನ್‌ ದಡ್ಡ ಮನುಷ್ಯನಾಯಿತುಲ್ಳ. ಮನುಷ್ಯಂಗಕ್‌ ಬೋಂಡಿಯಾನ ಬುದ್ದಿ ನಾಕ್‍ ಇಲ್ಲೆ.
3ನಾನ್‌ ಜ್ಞಾನತ್‌ನ ಪಡ್‌ಚಿತು ಇಲ್ಲೆ, ಪವಿತ್‌ರವಾನ ದೇವಡ ಅರಿವು ನಾಕ್‍ ಕ್‌ಟ್ಟಿತಿಲ್ಲೆ.
4ಪರಲೋಕಕ್‌ ಪೋಯಿತ್‌ ಅಡಿಕ್‌ ಇಳ್‌ಂಜಿತ್‌ ಬಂದಂವೊ ದಾರ್? ಗಾಳಿನ ತಾಂಡ ಕೈಯಿ ಮುಷ್ಟಿಲ್‌ ಅಡಕ್‌ನಂವೊ ದಾರ್? ತಾಂಡ ಉಡ್‌ಪ್‌ಲ್‌ ನೀರ್‌ನ ಮೂಟೆ ಕಟ್ಟ್‌ನಂವೊ ದಾರ್? ಬೂಮಿರ ಗಡಿನಯೆಲ್ಲಾ ಸ್ತಾಪನೆ ಮಾಡ್‌ನಂವೊ ದಾರ್? ಅಂವೊಂಡ ಪೆದ ಎಂತ? ಅಂವೊಂಡ ಮೋಂವೊಂಡ ಪೆದ ಎಂತ? ನೀಕ್‌ ಅದ್‌ ಗೊತ್ತುಂಡೇಮಗಿ ನಾಕ್‍ ಅದನ ಎಣ್ಣ್?
5ದೇವ ಎಣ್ಣುವ ಪ್ರತಿಯೋರ್‌ ತಕ್ಕು ನಂಬಿಕೆಕ್‌ ಯೋಗ್ಯವಾಯಿತ್ತುಂಡ್. ಅಂವೊನ ನಂಬಿತ್‌ ಅಂವೊಂಡ ಪಕ್ಕ ಬಪ್ಪಯಿಂಗಕ್‌ ಅಂವೊ ಪಡೆತಟ್ಟಾಯಿತುಂಡ್.
6ಅಂವೊಂಡ ತಕ್ಕ್‌ಕ್‌ ಒಂದು ಕೂಟಂಡ. ಅನ್ನನೆ ಮಾಡ್‌ಚೇಂಗಿ ಅಂವೊ ನಿನ್ನ ಚೂಕ್‌ಚಿಡುವ ಪಿಂಞ ಪೊಟ್ಟ್‌ಮಾರಿ ಎಣ್ಣಿಯಂಡ್‌ ನಿರೂಪಿಚಿಡುವ.
7ದಂಡ್‌ ಕಾರ್ಯತ್‌ನ ನಾನ್‌ ನೀಡ ಪಕ್ಕ ಬೋಡುವಿ. ನಾನ್‌ ಚಾವಕ್‌ಮಿಂಞ ಅದ್‌ನ ನಾಕಾಯಿತ್‌ ಮಾಡ್.
8ಕಪಟತನತ್‌ನ ಪಿಂಞ ಪೊಟ್ಟ್‌ ತಕ್ಕ್‌ನ ನಾಡಯಿಂಜ ದೂರ ಬೆಯ್ಯಿ. ಗರೀಬತನ ಆಡ್, ಐಶ್ವರ್ಯ ಆಡ್ ನಾಕ್‍ ತರತೆ, ನಾಕ್‍ ಬೋಂಡಿಯಾನ ಆಹಾರತ್‌ನ ಮಾತ್‌ರ ತಾ.
9ಇಲ್ಲತಪೋಚೇಂಗಿ, ನಾಕ್‍ ಜಾಸ್ತಿ ಕ್‍ಟ್ಟಿತ್: ಯೆಹೋವ ದಾರ್‍ೕಂದ್‌ ನಿನ್ನ ತ್‌ಕ್ಕಾರ ಮಾಡುವಿ, ಗರೀಬನಾಚೇಂಗಿ ನಾನ್‌ ಕದ್ದಿತ್‌ ನಾಡ ದೇವನಾನ ನೀಡ ಪೆದಕ್‌ ಅವಮಾನ ಕೊಂಡಬಪ್ಪಿ.
10ಎಜಮಾನಂಡ ಪಕ್ಕ ಅಂವೊಂಡ ಅಡಿಯಾಳ್‌ರ ವಿಷಯತ್‌ ಅಂವೊಂಡ ಕುತ್ತ ಪರಿಯತೆ. ನೀನ್‌ ಎಣ್ಣ್‌ಚೇಂಗಿ ಅಂವೊ ನೀಕ್‌ ಶಾಪ ಇಡುವ. ಆ ಶಾಪತ್‌ರಗೊಂಡ್‌ ನೀನ್‌ ಸಂಕಟ ಪಡುವಿಯ.
11ಅಪ್ಪಂಗ್‌ ಶಾಪ ಇಟ್ಟಿತ್, ಅವ್ವಂಗ್‌ ಆಶೀರ್ವಾದ ಮಾಡತೆ ಉಳ್ಳ ಜನವು ಉಂಡ್.
12ತಂಗಡ ಹೊಲಸನ ಕತ್ತತೆ, ತಾಂಗಳೇ ಶುದ್ದ ಆನಯಿಂಗಾಂದ್‌ ಎಣ್ಣುವಯಿಂಗಳು ಉಂಡ್.
13ಚೊಕ್ಕ್‌ ದುಂಬ್‌ನ ಕಣ್ಣು, ಹಮ್ಮ್‌ಲ್‌ ನೋಟುವ ಇಂಞೊರ್‌ ಜನವು ಉಂಡ್.
14ದೇಶತ್‌ಲ್‌ ಉಳ್ಳ ಗರೀಬಳ ಪಿಂಞ ಮನುಷ್ಯಂಗಡಡೆಲ್‌ ಗತಿಯಿಲ್ಲತಯಿಂಗಳ ಮುಗ್ಗ್‌ವಕ್, ಕತ್ತಿರನೆಕೆ ಉಳ್ಳ ಪಲ್‌ಲ್‌ ಉಳ್ಳಯಿಂಗಳು ಉಂಡ್, ಚಾಕ್ರನೆಕೆ ಉಳ್ಳ ಕೋರೆಪಲ್‌ಲ್‌ ಉಳ್ಳ ಇಂಞೊರ್‌ ತರ ಸಂತಾನವು ಉಂಡ್.
15ಬೋಂಡು, ಬೋಂಡೂಂದ್‌ ಎಣ್ಣುವ ದಂಡ್‌ ಮೋಳಿಯ ಉಂಬ್‌ಳ್‌ಕ್‌ ಉಂಡ್. ತೃಪ್ತಿ ಆಕತ ಮೂಂದ್‌ ಸಂಗತಿ ಉಂಡ್. ಏದ್‌ ಕಾಲಕು ಮದೀಂದ್‌ ಎಣ್ಣತೆ ನಾಲ್‌ ಸಂಗತಿ.
16ಅದ್‌ ಏದ್‌ ಎಣ್ಣ್‌ಚೇಂಗಿ: ಪಾತಾಳ, ಮಕ್ಕಯಿಲ್ಲತ ಪೊಣ್ಣಾಳ್, ನೀರ್‌ಲ್‌ ತೃಪ್ತಿ ಆಕತ ಬೂಮಿ ಪಿಂಞ ಮದೀಂದ್‌ ಎಣ್ಣತ ತಿತ್ತ್.
17ತಾಂಡ ಅಪ್ಪನ ಪರಿಹಾಸ ಮಾಡಿತ್, ಅವ್ವಂಡ ಆಜ್ಞೆನ ಕಡೆಗಟ್ಟ್‌ವಂವೊಂಡ ಕಣ್ಣ್‌ನ ಪೊಳೆರೆಪಕ್ಕ ಉಳ್ಳ ಕಾಕೆಯ ಬಲಿಪ, ಅಡ್‌ಪದ್ದ್‌ರ ಮರಿಯ ತಿಂಬ.
18ನಾಡ ಬುದ್ದಿಕ್‌ ಮೀರ್‌ನ ಮೂಂದ್‌ ಕಾರ್ಯ ಉಂಡ್. ಅಕ್ಕು, ನಾಲ್‌ ಕಾರ್ಯತ್‌ನ ನಾಕ್‍ ಅರ್ಥ ಮಾಡಿಯೊಕಯ್ಯುಲೆ.
19ಅದ್‌ ಏದ್‌ ಎಣ್ಣ್‌ಚೇಂಗಿ: ಬಾನತ್‌ಲ್‌ ಪಾರಿತ್‌ ಪೋಪ ಪದ್ದ್‌ರ ಬಟ್ಟೆ, ಬಂಡೆರ ಮೇಲೆ ಪರ್ಪ ಪಾಂಬ್ರ ಬಟ್ಟೆ, ಮದ್ಯ ಸಮುದ್ರತ್‌ ಪೋಪ ಹಡಗ್‌ರ ಬಟ್ಟೆ ಪಿಂಞ ಒರ್‌ ಬಾಲೆಕಾರ್ತಿರ ಕೂಡೆ ಆಣ್‌ಕ್‌ ಉಳ್ಳ ಪದ್ದತಿ.
20ವ್ಯಬಿಚಾರಿಯಡ ನಡತೆಯು ಇನ್ನನೆ ಉಂಡ್. ಆಕೆ ಉಂಡಿತ್, ತಾಂಡ ಬಾಯಿನ ತ್ಟಿತ್, ನಾನ್‌ ಓರ್‌ ತಪ್ಪು ಮಾಡಿತ್‌ಲ್ಲೆಂದ್‌ ಎಣ್ಣುವ.
21ಮೂಂದ್‌ ಕಾರ್ಯತ್‌ರಗುಂಡ್‌ ಬೂಮಿ ಬೊರ್‌ಂಡ್‌ವ, ಅಕ್ಕು ನಾಲ್‌ ಕಾರ್ಯತ್‌ನ ಬೂಮಿ ಸೈಸುವಕಯ್ಯುಲೆ.
22ಅದ್‌ ಏದ್‌ ಎಣ್ಣ್‌ಚೇಂಗಿ, ಅಡಿಯಾಳ್‌ ರಾಜನಾಪಕ, ಕೆಲ ದುಂಬ್‌ನ ಮೂಡ,
23ಪ್ರೀತಿನ ಕಾಂಗತೆ ಪೊಣ್ಣಾಳ್‌ಕ್‌ ಮಂಗಲ ಆಪದ್‌ ಪಿಂಞ ತಾಂಡ ಯಜಮಾನಿರ ಸ್ತಾನಕ್‌ ಬಪ್ಪ ಪಣಿಕಾರ್ತಿ.
24ಬೂಮಿಲ್‌ ದುಂಬ ಚೆರಿಯದಾಯಿತ್‌ ನಾಲ್‌ ಜೀವಜಂತು ಉಂಡ್. ಆಚೇಂಗಿ ಅವು ದುಂಬ ಜ್ಞಾನವುಳ್ಳದ್.
25ಅದ್‌ ಏದ್‌ ಎಣ್ಣ್‌ಚೇಂಗಿ, ಚೆರಿಯದಾಯಿತ್‌ ಇಂಜತೇಂಗಿಯು ಬೇನಿ ಕಾಲಕಾಯಿತ್‌ ಆಹಾರತ್‌ನ ಕೂಟಿತ್‌ ಬೆಪ್ಪ ಇರ್ಪು.
26ಬಲಯಿಲ್ಲತೆ ಜಂತುವಾಯಿತ್‌ ಇಂಜತೇಂಗಿಯು, ಬಂಡೆ ಕಲ್ಲ್‌ರ ಒಳ್‌ಲ್‌ ತಾಂಡ ಮನೆನ ಮಾಡುವ ಬಂಡೆ ಮೊಲ.
27ರಾಜನಿಲ್ಲತೆ ಪೋಚೇಂಗಿಯು ಗುಂಪ್‌ಗುಂಪಾಯಿತ್‌ ಕ್ರಮತ್‌ ಪೋಪ ಪಚ್ಚೆಪುಕ್ಕ.
28ಪಲ್ಲಿನ#30.28 ಚೀಡ ಕೈಯಿಲ್‌ ಪುಡಿಕೊಲು ಆಚೇಂಗಿಯು ಅವು ರಾಜಂಡ ಅರಮನೇಲು ಪೋಯಿತ್‌ ವಾಸ ಮಾಡುವ.
29ಮೂಂದ್‌ ಪ್ರಾಣಿಯ ಉಂಡ್. ಅವು ನಡ್‌ಪಕ ಅಯಿಂಗಡ ಗರ್ವ ಎದ್ದಿತ್‌ ಕಾಂಬ. ಗರ್ವತ್‌ಲ್‌ ನಡಪ್ಪ ನಾಲ್‌ ಉಂಡ್. ಅದ್‌ ಏದ್‌ ಎಣ್ಣ್‌ಚೇಂಗಿ,
30ಎಲ್ಲಾ ಪ್ರಾಣಿಯಕಿಂಜ ದುಂಬ ಬಲ ಉಳ್ಳದು, ಏದಂಗು ಬೊತ್ತಿತ್‌ ಬೆಂಬರ ತಿರಿತ್‌ ಪೋಕತ ಸಿಂಹ.
31ದುಂಬ ಹೆಮ್ಮೆಯಿಂಜ ನಡ್‌ಪ ತೈರೆ ಕೋಳಿ, ಕೋಬಾಡ್‌ ಪಿಂಞ ದಾರು ತಾಂಡಕೂಡೆ ಎದ್‌ರ್ ನಿಪ್ಪಕಯ್ಯುತ ರಾಜ.
32ನೀನ್‌ ಚೊಕ್ಕ್‌ಲ್‌ ಮೂಡನೆಕೆ ನಡ್‌ಂದಿತ್, ಕ್‍ೕಡ್‌ನ ಯೋಜನೆ ಮಾಡಿಯಂಡುಂಡೇಂಗಿ ನೀಡ ಬಾಯಿನ ಕೈಯಿಂಜ ಮುಚ್ಚ್#30.32 ತಕ್ಕ್ ಪರಿವಾನ ನಿಪ್ಪಿಚ್ಚಿಟ್ಟಿತ್‌ ಗೇನಮಾಡ್‌.
33ಪಾಲ್‌ನ ಕಡ್‌ಂದಿತ್‌ ಬೊಣ್ಣೆ ನೆಯ್ಯಿನ ಮಾಡುವ. ಇಂಞೊಬ್ಬಂಡ ಮೂಕ್‌ನ ಪೊಜ್ಜತ್ತೇಂಗಿ ಚೋರೆ ಬಪ್ಪ. ಅನ್ನನೆ, ಚೆಡಿನ ಬಪ್ಪ್‌ಚಿಟ್ಟತ್ತೇಂಗಿ ಜಗಳತ್‌ನ ಉಂಟ್ ಮಾಡುವ.
Currently Selected:
ಜ್ಞಾನತ್‌ರ ಪಡಿಮ 30: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
