ಜ್ಞಾನತ್‌ರ ಪಡಿಮ 11
11
1ಮೋಸತ್‌ರ ತಕ್ಕಡಿ ಯೆಹೋವಂಗ್‌ ಅಸಹ್ಯ. ಆಚೇಂಗಿ ನ್ಯಾಯವಾನ ತೂಕ ಅಂವೊಂಗ್‌ ಕುಶಿ.
2ಆಂಗಾರ ಬಪ್ಪಕ ಅವಮಾನ ಬಪ್ಪ. ಆಚೇಂಗಿ ಅಡಕತ್‌ಲ್‌ ಗೇನ ಮಾಡ್‌ವಯಿಂಗಡ ಪಕ್ಕ ಜ್ಞಾನ ಇಪ್ಪ.
3ನೀತಿವಂತಯಿಂಗಡ ಸತ್ಯತ್‌ರ ಗುಣ ಅಯಿಂಗಳ ನಡ್‌ತ್‌ವ. ಆಚೇಂಗಿ ದ್ರೋಹಿಯಡ ಕಪಟತನ ಅಯಿಂಗಳ ನಾಶ ಮಾಡಿರ್ವ.
4ದೇವಡ ಚೆಡಿ ಬಪ್ಪಕ ನೀಡ ಐಶ್ವರ್ಯ ಒಂದಂಗು ಪ್ರಯೋಜನ ಆಪುಲೆ, ಆಚೇಂಗಿ ನೀತಿರ ಬದ್‌ಕ್‌ ಚಾವ್ಯಿಂಜ ಕಾಪಾಡುವ.
5ಸತ್ಯತ್‌ಲ್‌ ನಡ್‌ಪಂವೊಂಡ ನೀತಿ, ಅಂವೊಂಡ ಬಟ್ಟೆನ ಚಾಯಿ ಮಾಡುವ. ಆಚೇಂಗಿ ದುಷ್ಟ, ತಾಂಡ ದುಷ್ಟತನತ್‌ಂಜ ಬುದ್ದ್ ಪೋಪ.
6ಸತ್ಯತ್‌ಲ್‌ ನಡ್‌ಪಯಿಂಗಡ ನೀತಿ ಅಯಿಂಗಳ ಕಾಪಾಡುವ, ಆಚೇಂಗಿ ದ್ರೋಹಿಯಡ ಕೆಟ್ಟ ಆಸೆಯೇ ಅಯಿಂಗಳ ಚಿಕ್ಕ್‌ಚಿಡುವ.
7ದುಷ್ಟ ಚಾವೊಕ, ಅಂವೊಂಡ ನಂಬಿಕೆಯು ನಾಶ ಆಯಿಪೋಪ. ಅಂವೊಂಡ ಶಕ್ತಿರ ಮೇಲೆ ಬೆಚ್ಚ ನಿರೀಕ್ಷೆಯೆಲ್ಲಾ ಒಂದೂ ಇಲ್ಲತೆ ಆಯಿಪೋಪ.
8ನೀತಿವಂತಂವೊ ಇಕ್ಕಟಿಂಜ ಬಚಾವಾಪ, ಆಚೇಂಗಿ ದುಷ್ಟ ಆ ಇಕ್ಕಟ್‌ಲ್‌ ಚಿಕ್ಕಿ ಪೋಪ.
9ದೇವಡ ಮೇಲ ಪೋಡಿಯಿಲ್ಲತಂವೊ ನೆರೆಮನೆಕಾರನ ತಾಂಡ ತಕ್ಕ್‌ಯಿಂಜಲೇ ನಾಶ ಮಾಡಿರುವ, ಆಚೇಂಗಿ ನೀತಿವಂತಂವೊ ಅಂವೊಂಡ ಅರಿವುಯಿಂಜ ತಪ್ಪ್‌ಚಿಡುವ.
10ನೀತಿವಂತಯಿಂಗ ಸುಖವಾಯಿತ್‌ ಇಂಜತೇಂಗಿ ಇಡೀ ಪಟ್ಟಣವೇ ಕೊಂಡಾಟತ್‌ಲ್‌ ಇಪ್ಪ. ಆಚೇಂಗಿ ದುಷ್ಟಂಗ ನಾಶ ಆಯಿ ಪೋಚೇಂಗಿ ಜನ ಕುಶೀಲ್‌ ಕೂತ್‌ ಕೊಡ್‌ಪ.
11ಸತ್ಯವಂತಯಿಂಗಡ ಆಶೀರ್ವಾದ ಪಟ್ಟಣತ್‌ನ ಬಲ್ಯ ಸ್ತಾನಕ್‌ ಕೊಂಡ ಪೋಪ. ಆಚೇಂಗಿ ದುಷ್ಟಂಗಡ ತಕ್ಕ್‌ಯಿಂಜ ಪಟ್ಟಣ ಪಾಳಾಯಿ ಪೋಪ.
12ದಡ್ಡ ನೆರೆಮನೆಕಾರನ ಪರಿಹಾಸ ಮಾಡ್‌ವ, ಆಚೇಂಗಿ ಬುದ್ದಿವುಳ್ಳಂವೊ ತಾಂಡ ಬಾಯಿನ ಅಡಕಿ ಬೆಚ್ಚೊವ.
13ಬೋರೆಯಿಂಗಡ ಮೇಲೆ ಕುತ್ತ ಪರ್‌ಂದಿತ್‌ ತಿರಿಗಿಯಂಡ್‌ ಇಪ್ಪಂವೊ ಗುಟ್ಟ್‌ನ ಬಾಯಿಬುಟ್ಟ್‌ರ್‌ವ. ಆಚೇಂಗಿ ನಂಬಿಕಸ್ತ ವಿಷಯತ್‌ನ ಅಡಕಿ ಬೆಪ್ಪ.
14ಆಲೋಚನೆ ಇಲ್ಲತ ಜಾಗತ್‌ಲ್‌ ಜನ ಬುದ್ದ್‌ಪೋಪ. ಆಚೇಂಗಿ ಆಲೋಚನೆಕಾರಂಗ ದುಂಬ ಇಂಜತೇಂಗಿ ಸೌಕ್ಯತ್‌ ಇಪ್ಪ.
15ಬೋರೆ ಒಬ್ಬಂಡ ಸಾಲಕ್‌ ಜಾಮೀನ್‌ ಕೊಡಪಂವೊ ದುಂಬ ಕಷ್ಟಪಡುವ. ಜಾಮೀನ್‌ ಕೊಡ್‌ಪಕ್‌ ದೂರ ನಿಪ್ಪಂವೊ ಸೌಕ್ಯತ್‌ ಇಪ್ಪ.
16ದಯೆವುಳ್ಳ ಪೊಣ್ಣಾಳ್ ಗೌರವತ್‌ನ ಸಂಪಾದನೆ ಮಾಡಿಯೊವ. ಆಚೇಂಗಿ ಕರುಣೆಯಿಲ್ಲತ ಆಣಾಳುವ ಬರೀ ಐಶ್ವರ್ಯತ್‌ನ ಸಂಪಾದನೆ ಮಾಡುವ.
17ದಯೆವುಳ್ಳ ಮನುಷ್ಯ ತಾಂಡ ಆತ್ಮಕ್‌ ನಲ್ಲದ್‌ ಮಾಡಿಯೊವ. ಆಚೇಂಗಿ ಒರ್‌ ಕ್ರೂರಿ ಅಂವೊಂಡ ತಡಿನ ಅಂವೊನೇ ನೊಂಬಲಪಡ್‌ತಿಯೊವ.
18ಒರ್‌ ದುಷ್ಟಂಡ ಆದಾಯ ಮೋಸವಾಯಿತ್‌ಪ್ಪ. ಆಚೇಂಗಿ ನೀತಿನ ಬಿತ್ತ್‌ವಂವೊ ಯೋಗ್ಯವಾನ ಫಲತ್‌ನ ಪಡೆಯುವ.
19ನೀತಿರ ಬಟ್ಟೆಲ್‌ ನಡ್‌ಪಕ್‌ ಸಿದ್ದವಾಯಿತ್‌ ಇಪ್ಪಂವೊಂಗ್‌ ಜೀವ ಕ್‌ಟ್ಟುವ. ಆಚೇಂಗಿ ಕ್‍ೕಡಾನ ಬಟ್ಟೆಲ್‌ ನಡ್‌ಪಂವೊಂಗ್‌ ಚಾವ್.
20ಯೆಹೋವ ಕಪಟ ಹೃದಯ ಉಳ್ಳಯಿಂಗಳ ಅಸಹ್ಯವಾಯಿತ್‌ ಕಾಂಬ. ಆಚೇಂಗಿ ಸತ್ಯತ್‌ಲ್‌ ನಡ್‌ಪಯಿಂಗಳ ಅಂವೊಂಗ್‌ ಕುಶಿ.
21ದುಷ್ಟ ಜನಕ್‌ ಶಿಕ್ಷೆ ಕಂಡಿತ, ಆಚೇಂಗಿ ನೀತಿವಂತಂವೊಂಡ ಸಂತಾನ ಶಿಕ್ಷೆಯಿಂಜ ಬಚಾವಾಪ.
22ವಿವೇಕ ಇಲ್ಲತೆ ಚಾಯಿ ಉಳ್ಳ ಪೊಣ್ಣಾಳ್, ಪಂದಿರ ಮೂಕ್ಕ್‌ ಇಟ್ಟಿತುಳ್ಳ ಪೊನ್ನ್‌ ಮೂಕೊತ್ತಿಕ್‌ ಸರಿಸಮ.
23ನೀತಿವಂತಯಿಂಗಡ ಆಸೆಯೆಲ್ಲ ನಲ್ಲದೇ ಆಯಿತಿಪ್ಪ, ಆಚೇಂಗಿ ದುಷ್ಟಂಗಡ ನಿರೀಕ್ಷೆ ಬಲ್ಯ ಚೆಡಿರ ದಂಡನೆಕ್‌ ಕೊಂಡಪೋಪ.
24ದಾರಾಳವಾಯಿತ್‌ ಕೊಡ್‌ತಿತ್‌ ಇಂಞು ಐಶ್ವರ್ಯನಾನಂವೊ ಉಂಡ್, ಕೊಡಪಕುಳ್ಳದ್‌ನ ಕೊಡ್‌ಕತೆ ಗರೀಬನಾನಂವೊನು ಉಂಡ್.
25ಉದಾರ ಮನಸ್ಸ್‌ ಉಳ್ಳಂವು ಅಬಿವೃದ್ದಿ ಆಪ. ಬೋರೆಯಯಿಂಗಕ್‌ ಸಹಾಯ ಮಾಡ್‌ವಂವೊಂಗ್, ಸಹಾಯ ಕ್‌ಟ್ಟ್‌ವ.
26ಬೆಲೆ ಜಾಸ್ತಿ ಆಂಡೂಂದ್‌ ಆಹಾರ ದಾನ್ಯತ್‌ನ ಕೆಟ್ಟಿ ಬೆಪ್ಪಂವೊಂಗ್‌ ಜನ ಶಾಪ ಇಡುವ. ಆಚೇಂಗಿ ಅದ್‌ನ ಮಾರ್ವಂವೊಂಗ್‌ ಆಶೀರ್ವಾದ ಕ್‌ಟ್ಟುವ.
27ನಲ್ಲದ್‌ನ ಎಚ್ಚರತ್‌ಲ್‌ ತ್‍ೕಡ್‌ವಂವೊಂಗ್‌ ದಯೆ ಕ್‌ಟ್ಟುವ, ಆಚೇಂಗಿ ಕ್‍ೕಡ್‌ನ ತ್‍ೕಡಿಯಂಡ್‌ ಪೋಪಂವೊಂಗ್‌ ಕ್‍ೕಡೇ ಆಪ.
28ತಾಂಡ ಐಶ್ವರ್ಯತ್‌ನ ನಂಬ್‌ವಂವೊ ಬುದ್ದ್ ಪೋಪ. ಆಚೇಂಗಿ ನೀತಿವಂತಂವೊ ಚಿಗ್‌ರೆಲೆರನೆಕೆ ಬೊಳೆಯುವ.
29ತಾಂಡ ಕುಟುಂಬಕ್‌ ತೊಂದರೆ ಎಡ್‌ತಂಡ್‌ ಬಪ್ಪಂವೊಂಡ ಪಾಲ್‌ಕ್‌ ಕ್‌ಟ್ಟೋದ್‌ ಗಾಳಿಯೇ. ಮೂಡ ಜ್ಞಾನ ಉಳ್ಳಂವೊಂಗ್‌ ಸೇವೆ ಮಾಡುವ.
30ನೀತಿವಂತಂವೊಂಡ ಫಲ ಜೀವ ತಪ್ಪ ಮರ. ಜನಳ ಗೆಲ್ಲುವಂಚೊ ಜ್ಞಾನ ಉಲ್ಳಂವೊ.#11.30 ಜನಳ ಗೆಲ್ಲುವಂಚೊ ಜ್ಞಾನ ಉಲ್ಳಂವೊ. ದುಷ್ಟತನ ಜನಳ ಕೊಂದ್‌ರ್‌ವ
31ಇದಾ! ನೀತಿವಂತಂವೊಂಗ್‌ ಈ ಬೂಮಿಲ್‌ ಅಂವೊಂಡ ಕ್ರಿಯೆಕ್‌ ತಕ್ಕಂತ ಫಲ ಕ್‌ಟ್ಟುವ. ಅನ್ನನಾಚೇಂಗಿ ದುಷ್ಟಂಗು, ಪಾಪಿಕು ದಂಡನೆ ಕ್‌ಟ್ಟೋದ್‌ ಎಚ್ಚಕ್‌ ಕಂಡಿತ.
Currently Selected:
ಜ್ಞಾನತ್‌ರ ಪಡಿಮ 11: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
