ಜ್ಞಾನತ್‌ರ ಪಡಿಮ 10
10
ಸೊಲೊಮೋನಂಡ ಜ್ಞಾನತ್‌ರ ಪಡಿಮ
1ಜ್ಞಾನವುಳ್ಳ ಮೋಂವೊ ಅಪ್ಪನ ಕುಶಿಪಡ್‌ತುವ; ಆಚೇಂಗಿ ಮೂಡತನ ಉಳ್ಳಂವೊ ಅವ್ವನ ದುಃಖ ಪಡ್‌ತ್‌ವ.
2ಅನ್ಯಾಯತ್‌ರ ಬಟ್ಟೆಲ್‌ ಪಡ್‌ಂದ ಐಶ್ವರ್ಯ ಒಂದಂಗು ಪ್ರಯೋಜನ ಆಪುಲೆ. ಆಚೇಂಗಿ ನೀತಿರ ಬದ್‌ಕ್‌ ಚಾವ್ಯಿಂಜ ನಿನ್ನ ಕಾಪಾಡುವ.
3ಯೆಹೋವ ನೀತಿವಂತಂವೊನ ಪಟ್ಟಣಿ ಇಪ್ಪಕ್‌ ಬುಡುಲೆ. ಆಚೇಂಗಿ ದುಷ್ಟ ಜನಕ್‌ ಬೋಂಡಿಯಾನದ್‌ನ ತಪ್ಪುಲೆ.
4ಸೋಮಾರಿತನತ್‌ಲ್‌ ಕೆಲಸ ಮಾಡವಂವೊ ಬಡವನಾಪ. ಆಚೇಂಗಿ ಕಷ್ಟಪಟ್ಟಿತ್‌ ಕೆಲಸ ಮಾಡ್‌ವಂವೊ ಐಶ್ವರ್ಯವಂತನಾಪ.
5ಕೊಯಿಪಣಿ ಕಾಲತ್‌ ಬೊಳೆನ ಕೂಟಿ ಬೆಪ್ಪಂವೊ ಬುದ್ದಿ ಉಳ್ಳ್ ಮೋಂವೊ. ಆಚೇಂಗಿ ಕೊಯಿಪಣಿರ ಕಾಲತ್‌ ವರಿಯಂಡಿಪ್ಪಂವೊ ಅವಮಾನತ್‌ನ ಕೊಂಡ ಬಪ್ಪ ಮೋಂವೊನಾಯಿತ್‌ಪ್ಪ.
6ನೀತಿವಂತಂವೊಂಡ ಮಂಡೆರ ಮೇಲೆ ಆಶೀರ್ವಾದ ಇಪ್ಪ, ಆಚೇಂಗಿ ಹಿಂಸೆ, ದುಷ್ಟಂಡ ಬಾಯಿನ ಅಡಕ್‌ವ.
7ನೀತಿವಂತಂವೊಂಡ ಪೆದ ಕ್‍ೕಳಿ ಪೋಯಿತ್‌ ದುಂಬ ಕಾಲಕ್‌ ಇಪ್ಪ. ಆಚೇಂಗಿ ದುಷ್ಟಂಡ ಪೆದತ್‌ನ ಬೆರಿಯ ಮರ್‌ಂದರ್ವ.
8ಹೃದಯತ್‌ಲ್‌ ಜ್ಞಾನ ಉಳ್ಳಂವೊ, ಆಜ್ಞೆನ ಸ್ವೀಕಾರ ಮಾಡಿಯೊವ, ಆಚೇಂಗಿ ಹರಟೆ ತಕ್ಕ್‌ ಪರಿಯುವ ಮೂಡಂಗ ಅಂವೊನ ನಾಶ ಮಾಡಿಯೊವ.
9ಸತ್ಯತ್‌ಲ್‌ ನಡ್‌ಪಂವೊ ಪೋಡಿಯಿಲ್ಲತೆ ನಡ್‌ಪ. ಆಚೇಂಗಿ ಕಪಟಿಯಂಗಡ ಬಟ್ಟೆಲ್‌ ನಡ್‌ಪಂವೊ ಚಿಕ್ಕಿಪೋಪ.
10ಸತ್ಯನ ಒಳ್‌ಪ್‌ಚಿಡುವಂವೊ ತೊಂದರೆನ ಉಂಟ್ ಮಾಡುವ. ದೈರ್ಯತ್‌ಲ್‌ ಚೂಕ್‌ಚಿಡ್‌ವೊಂವೊ ಸಮಾದಾನತ್‌ನ ಕೊಂಡ ಬಪ್ಪ.#10.10 ಆಚೇಂಗಿ ಹರಟೆ ತಕ್ಕ್‌ ಪರಿಯುವ ಮೂಡ ಅಂವೊನ ನಾಶ ಮಾಡಿಯೊವ.
11ನೀತಿವಂತಂವೊಂಡ ಬಾಯಿ ಜೀವತ್‌ರ ಬುಗ್ಗೆ ಆಯಿತಿಪ್ಪ. ಆಚೇಂಗಿ ಹಿಂಸೆ, ದುಷ್ಟಂಡ ಬಾಯಿನ ಅಡಕ್‌ವ.
12ದ್ವೇಷ ವಿರೋದತ್‌ನ ಉಂಟ್‌ಮಾಡುವ. ಆಚೇಂಗಿ ಪ್ರೀತಿ ಎಲ್ಲಾ ಪಾಪತ್‌ನ ಮನ್ನಿಚಿಡುವ.
13ವಿವೇಕ ಉಳ್ಳಂವೊಂಡ ಬಾಯಿಯಿಂಜ ಬಪ್ಪ ತಕ್ಕ್‌ ಜ್ಞಾನ ಉಳ್ಳದಾಯಿತ್‌ಪ್ಪ. ಆಚೇಂಗಿ ಬುದ್ದಿ ಇಲ್ಲತಂವೊಂಡ ಬೆನ್ನ್‌ಕ್ ಪೊಯ್ಯಿತ್‌ ಕ್‌ಟ್ಟುವದೇ ಸೆರಿ.
14ಜ್ಞಾನಿಯ ಅರಿವುನ ಕೂಟಿ ಬೆಚ್ಚೊವ. ಆಚೇಂಗಿ ಮೂಡಂಡ ತಕ್ಕ್‌ ಅಂವೊಂಗ್‌ ನಾಶತ್‌ನ ಕೊಂಡ್‌ ಬಪ್ಪ.
15ಪಣಕಾರಂಡ ಐಶ್ವರ್ಯ ಅಂವೊಂಗ್‌ ಬಲವಾನ ಕೋಟೆ. ಆಚೇಂಗಿ ಗರೀಬಂಡ ಬಡತನ ಅಂವೊನ ನಾಶ ಮಾಡುವ.
16ನೀತಿವಂತಂವೊಂಡ ನಯಿಪ್ ಜೀವತ್‌ನೂ, ದುಷ್ಟಂಡ ಆದಾಯ ಪಾಪತ್‌ನೂ ಉಂಟ್ ಮಾಡ್‌ವ.
17ಬುದ್ದಿ ತಕ್ಕ್‌ನ ಸ್ವೀಕಾರ ಮಾಡ್‌ವಯಿಂಗ ಜೀವತ್‌ರ ಬಟ್ಟೆಲ್‌ ಪೋಪ. ಆಚೇಂಗಿ ಎಚ್ಚರ ತಕ್ಕ್‌ನ ತ್‌ಕ್ಕಾರ ಮಾಡ್‌ವಂವೊ ಬಟ್ಟೆ ತಪ್ಪಿ ಪೋಪ.
18ದ್ವೇಷತ್‌ನ ಒಳ್‌ಪ್‌ಚಿಡ್‌ವಂವೊ ಪೊಟ್ಟ್‌ಮಾರಿ. ಕುತ್ತ ಪರಂದಂಡ್‌ ನಡಪ್ಪಂವೊ ಮೂಡ.
19ದುಂಬ ತಕ್ಕ್‌ ಪರಿಯುವಂವೊ ಪಾಪಕ್‌ ಚಿಕ್ಕಿಪೋಪ. ಆಚೇಂಗಿ ತಾಂಡ ಬಾಯಿನ ಅಡಕ್‌ವಂವೊ ಬುದ್ದಿವಂತಂವೊ.
20ನೀತಿವಂತಂವೊಂಡ ತಕ್ಕ್‌ ಶುದ್ದ ಬೊಳ್ಳಿರನೆಕೆ ಇಪ್ಪ. ಆಚೇಂಗಿ ದುಷ್ಟಂಡ ಆಲೋಚನೆಕ್‌ ಚೆನ್ನಂಗು ಬೆಲೆ ಇಪ್ಪುಲೆ.
21ನೀತಿವಂತಂವೊಂಡ ತಕ್ಕ್‌ ದುಂಬ ಜನತ್‌ನ ಉಂಬ್‌ಚಿಡುವ. ಆಚೇಂಗಿ ಮೂಡಂಗ, ದಡ್ಡತನತ್‌ಂಜ ನಾಶ ಆಯಿ ಪೋಪ.
22ಯೆಹೋವಂಡ ಆಶೀರ್ವಾದ ಐಶ್ವರ್ಯತ್‌ನ ತಪ್ಪ. ಅದ್‌ಂಡ ಕೂಡೆ ಅಂವೊ ನೊಂಬಲತ್‌ನ ಕೂಟುಲೆ#10.22 ಈ ವಾಕ್ಯಕ್‌ ಈ ಅರ್ಥನು ಆಪ: ಕಷ್ಟಪಟ್ಟಿತ್‌ ನಯಿಚತೇಂಗಿಯು ನೀಕ್‌ ಐಷ್ವರ್ಯ ಕ್‌ಟ್ಟುಲೆ, ಆಚೇಂಗಿ, ಯೆಹೋವಂಡ ಆಶೀರ್ವಾದ ಮಾತ್‌ರ ನೀಕ್‌ ಐಷ್ವರ್ಯತ್‌ನ ತಪ್ಪ. .
23ಕ್‍ೕಡ್‌ ಮಾಡ್‌ವದ್‌ ಮೂಡಂಗ್‌ ಕುಶಿ ತಪ್ಪ. ಆಚೇಂಗಿ ಜ್ಞಾನ ಬುದ್ದಿವಂತಂವೊಂಗ್‌ ಸುಕತ್‌ನ ತಪ್ಪ.
24ದುಷ್ಟ ಪೋಡಿಚಿಡುವ ಕಾರ್ಯ ಅಂವೊಂಗ್‌ ಆಪ. ಆಚೇಂಗಿ ನೀತಿವಂತಂವೊ ಇಷ್ಟಪಡುವ ಕಾರ್ಯ ಅಂವೊಂಗ್‌ ನೆರವೇರುವ.
25ಬಿರ್‌ಗಾಳಿ ಬಪ್ಪಕ, ದುಷ್ಟೆ ನಾಶ ಆಯಿಪೋಪ, ಆಚೇಂಗಿ ನೀತಿವಂತ ದೃಡವಾನ ಅಡಿಪಾಯ ಆಯಿತ್‌ ಇಪ್ಪ.
26ಪಲ್ಲ್‌ಕ್‌ ಪುಳಿನೀರು, ಕಣ್ಣ್‌ಕ್ ಪೊಗೆಯು ಎನ್ನೆನೆ ಇಪ್ಪೊ ಅನ್ನನೆ ಸೋಮಾರಿಯು ಅಂವೊಂಗ್‌ ಪಣಿ ಕೊಡ್‌ತಂವೊಂಗ್‌ ಇಪ್ಪ.
27ಯೆಹೋವಂಗ್‌ ಬೊತ್ತಿತ್‌ ನಡ್‌ಪಯಿಂಗ ದುಂಬ ಕಾಲ ಬದ್‌ಕುವ. ಆಚೇಂಗಿ ದುಷ್ಟಂಗಡ ಬದ್‌ಕ್‌ರ ಕಾಲ ಕಮ್ಮಿ ಆಪ.
28ನೀತಿವಂತಂಯಿಂಗಡ ನಿರೀಕ್ಷೆ ಕುಶಿ ತಪ್ಪ. ದುಷ್ಟಂಗಡ ನಿರೀಕ್ಷೆ ನಾಶ ಆಯಿ ಪೋಪ.
29ಯೆಹೋವಂಡ ಬಟ್ಟೆ ಸತ್ಯತ್‌ ನಡ್‌ಪಯಿಂಗಕ್‌ ಕೋಟೆ. ಆಚೇಂಗಿ ಕ್‍ೕಡ್‌ ಮಾಡುವಯಿಂಗಕ್‌ ನಾಶ.
30ನೀತಿವಂತಂವೊನ ಅನ್‌ಕ್‌ವಕ್‌ ಕೈಯುಲೆ. ದುಷ್ಟೆ ಬೂಮಿಲ್‌ ನೆಲೆನಿಪ್ಪುಲೆ.
31ನೀತಿವಂತಂವೊ ಜ್ಞಾನತ್‌ರ ತಕ್ಕ್‌ನ ಪರಿಯುವ. ಕಪಟಿಯಂಡ ನಾವ್‌ನ ಕೆತ್ತಿರ್ವ.
32ನೀತಿವಂತಂಯಿಂಗ ನಲ್ಲದ್‌ನೆ ತಕ್ಕ್‌ ಪರಿಯುವ. ಆಚೇಂಗಿ ದುಷ್ಟಂಗಡ ತಕ್ಕ್‌ ಕಪಟವಾನದ್.
Currently Selected:
ಜ್ಞಾನತ್‌ರ ಪಡಿಮ 10: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
