ಎಫೆಸ 3
3
ಯೆಹೂದ್ಯಂಗ ಅಲ್ಲತಯಿಂಗಕ್ ಪೌಲ
1ಇದ್ಂಗಾಯಿತ್ ಪೌಲನಾನ ನಾನ್, ಯೆಹೂದ್ಯಂಗಲ್ಲತಯಿಂಗಳಾನ ನಿಂಗಳಗುಂಡ್, ಕ್ರಿಸ್ತ ಯೇಸುಕಾಯಿತ್ ಕೈದಿಯಾಯಿತ್ ಉಳ್ಳ. 2ಯೆಹೂದ್ಯಂಗಲ್ಲತ ನಿಂಗಕ್ ದೇವಡ ಸುದ್ದಿನ ಅರಿಚಿಡುವಕುಳ್ಳ ಜವಾಬ್ದಾರಿನ ನಾಡ ಮೇಲೆ ದೇವ ಕೃಪೆಯಾಯಿತ್ ದಾನಮಾಡ್ಚೀಂದ್ ನಿಂಗ ನೇರಾಯಿತು ಕ್ೕಟಿತುಳ್ಳಿರ. 3ಅದ್ ಎಂತ ಎಣ್ಣ್ಚೇಂಗಿ, ಯೆಹೂದ್ಯಂಗ ಅಲ್ಲತಯಿಂಗಕ್ ದೇವ ಬೆಚ್ಚಿತುಳ್ಳ ಗುಟ್ಟ್ನ ನಾನ್ ಗೊತ್ತಾಪನೆಕೆ ಕಾಂಬ್ಚಿಟ್ಟತ್. ಇದ್ಂಡ ವಿಷಯತ್ನ ನಾನ್ ಮಿಂಞಲೇ ಚೆನ್ನ ಒಳ್ದಿತುಂಡ್. 4ಅದ್ನ ನಿಂಗ ಓದ್ವಕ, ನಾಕ್ ಕ್ರಿಸ್ತಂಡ ಗುಟ್ಟ್ರ ವಿಷಯತ್ ಎಚ್ಚಕ್ ಗೊತ್ತುಂಡ್ೕಂದ್ ನಿಂಗಕ್ ಗೊತ್ತಾಪ. 5ಆ ಗುಟ್ಟ್ನ ಇಕ್ಕ ಅಂವೊಂಡ ಪವಿತ್ರವಾನ ಅಪೊಸ್ತಲಂಗಕು ಪ್ರವಾದಿಯಂಗಕು ಪವಿತ್ರಾತ್ಮನಗುಂಡ್ ಅರಿಚಿಟ್ಟನೆಕೆ, ಇದ್ಂಗ್ ಮಿಂಞ ಇಂಜಯಿಂಗಕ್ ಈ ವಿಷಯತ್ನ ಎಣ್ಣಿತ್ಂಜಿತ್ಲ್ಲೆ. 6ಆ ಗುಟ್ಟ್ ಎಂತ ಎಣ್ಣ್ಚೇಂಗಿ, ದೇವಡ ನಲ್ಲ ಸುದ್ದಿರಗುಂಡ್, ಯೆಹೂದ್ಯಂಗಲ್ಲತ ಬೋರೆ ಜನ ಯೆಹೂದ್ಯಂಗಡ ಕೂಡೆ ಬಾದ್ಯಕಾರಂಗಳಾಯಿತ್, ಒರೇ ತಡೀರ ಬಾಗತ್ರನೆಕೆ ಕ್ರಿಸ್ತ ಯೇಸುರ ವಾಗ್ದಾನಕ್ ಪಾಲ್ದಾರಂಗಳಾಯಿತ್ ಇರಂಡು ಎಣ್ಣ್ವದೇ.
7ದೇವಡ ಬಲ್ಯ ಶಕ್ತಿರಗುಂಡ್ ಅಂವೊ ನಾಕ್ ದಾನಮಾಡ್ನ ವರತ್ರ ಕೃಪೇರಗುಂಡ್ ದೇವಡ ಈ ನಲ್ಲ ಸುದ್ದಿಕ್ ನಾನ್ ಸೇವಕನಾಯಿತ್ ಆನ. 8ದೇವಡ ಮಕ್ಕಡಲ್ಲಿ ಎಲ್ಲಾಡಕಿಂಜ ಚೆರಿಯಂವೊನಾನ ನಾಕ್, ಕ್ರಿಸ್ತಂಡ ಲೆಕ್ಕ ಮಾಡ್ವಕ್ ಕಯ್ಯತಚ್ಚಕ್ ಉಳ್ಳ ಐಶ್ವರ್ಯತ್ನ ಯೆಹೂದ್ಯಂಗಲ್ಲತ ಜನಕ್ ಅರಿಚಿಡುವಕುಳ್ಳ ಈ ಕೃಪೆ ನಾಕ್ ಕ್ಟ್ಟ್ಚಿ. 9ಎಲ್ಲಾನ ಸೃಷ್ಟಿ ಮಾಡ್ನ ದೇವ, ಆದಿಯಿಂಜಲೆ ಮುಚ್ಚಿ ಬೆಚ್ಚಿತ್ಂಜ ಈ ಗುಟ್ಟ್ನ, ಎಲ್ಲಾರ್ಕು ಅರಿಚಿಡ್ವಕ್ ನನ್ನ ಗೊತ್ತ್ ಮಾಡ್ಚಿ. 10ಆನಗುಂಡ್, ಸಬೆರ ಮೂಲಕ ಅಂವೊಂಡ ನಾನಾತರ ಜ್ಞಾನತ್ನ ಇಕ್ಕ ಎಲ್ಲಾ ಅದಿಪತಿಯಂಗಕು, ಪರಲೋಕತ್ಲ್ ಉಳ್ಳ ಎಲ್ಲಾ ಅದಿಕಾರಕು ಗೊತ್ತಾಪನೆಕೆ ಮಾಡ್ಚಿ. 11ಇದ್ನ ಇಕ್ಕ ಅಂವೊ ಅಂವೊಂಡ ನಿತ್ಯ ತೀರ್ಮಾನತ್ರ ಪ್ರಕಾರ ನಂಗಡ ಒಡೆಯನಾನ ಕ್ರಿಸ್ತ ಯೇಸುರ ಮೂಲಕ ಪೂರ್ತಿ ಮಾಡ್ಚಿ.
12ಅಂವೊಂಡಲ್ಲಿ ಪಿಂಞ ಅಂವೊಂಡ ಮೇಲೆ ಉಳ್ಳ ನಂಬಿಕೇರ ಮೂಲಕ, ನಂಗಕ್ ದೈರ್ಯವು, ಏದ್ ಪೋಡಿಯು ಇಲ್ಲತ ದೇವಡ ಪ್ರಸನ್ನಕ್ ಬಪ್ಪಕುಳ್ಳ ಬಾಗ್ಯವು ಕ್ಟ್ಟ್ಚಿ. 13ಆನಗುಂಡ್, ನಿಂಗಡಗುಂಡ್ ನಾನ್ ಅನುಬವಿಚಿಡುವ ಹಿಂಸೆಕಾಯಿತ್ ನಿಂಗ ತಳ್ಂದ್ ಪೋಕತೆ ಇರಂಡೂಂದ್ ನಾನ್ ನಿಂಗಳ ಬೋಡುವಿ. ಇದೆಲ್ಲ ನಿಂಗಡ ನಲ್ಲದ್ಕಾಯಿತೇ ಆಯಂಡುಂಡ್.
ಕ್ರಿಸ್ತಂಡ ಪ್ರೀತಿ
14ಈ ಕಾರಣಕಾಯಿತ್, ನಾನ್ ಪರಲೋಕತ್ಲ್ ಪಿಂಞ ಬೂಲೋಕತ್ಲ್ ಉಳ್ಳ ಎಲ್ಲಾ ಕುಟುಂಬಕ್ ಪೆದ ಕ್ಟ್ಟುವಕ್ ಕಾರಣವಾಯಿತುಳ್ಳ, 15ನಂಗಡ ದೇವನಾನ ಅಪ್ಪಂಡ#3.15 ಚೆನ್ನ ಮೂಲ ಪ್ರತಿಲ್ ಒಡೆಯನಾನ ಯೇಸು ಕ್ರಿಸ್ತಂಡ ಅಪ್ಪಂಡಂದ್ ಉಂಡ್. ಮಿಂಞತ್ ಮೊಣಕಾಲಿಟ್ಟಿತ್ ಇನ್ನನೆ ಪ್ರಾರ್ಥನೆ ಮಾಡ್ವಿ. 16ನಿಂಗ ಅಂವೊಂಡ ಪವಿತ್ರಾತ್ಮತ್ರ ಶಕ್ತಿರ ಮೂಲಕ ನಿಂಗಡ ಒಳ್ಲ್ ಉಳ್ಳ ಮನುಷ್ಯಂಡಲ್ಲಿ ಅಂವೊಂಡ ಮಹಿಮೇರ ಐಶ್ವರ್ಯತ್ರಗುಂಡ್ ನಿಂಗ ಬಲಪಡಂಡೂಂದು, 17ನಂಬಿಕೇರ ಮೂಲಕ ಕ್ರಿಸ್ತ ನಿಂಗಡ ಹೃದಯತ್ಲ್ ವಾಸಮಾಡಂಡೂಂದು ಪ್ರಾರ್ಥನೆ ಮಾಡ್ವಿ. ನಿಂಗ ಪ್ರೀತಿಲ್ ಬೇರೂರಿತ್, ಸ್ತಿರವಾಯಿತ್ ನಿಕ್ಕಂಡೂಂದು, 18ಎಲ್ಲಾ ದೇವಡ ಮಕ್ಕಡ ಕೂಡೆ ಕ್ರಿಸ್ತಂಡ ಪ್ರೀತಿರ ಅಗಲ, ನೀಳ, ಉದ್ದ ಪಿಂಞ ಆಳತ್ನ ಗೊತ್ತ್ ಮಾಡಿತ್, 19ಮನುಷ್ಯಂಗಡ ಬುದ್ದಿಕ್ ಅರ್ಥ ಆಕತ ಆ ಪ್ರೀತಿನ ಗೊತ್ತಾಪಕುಳ್ಳ ಶಕ್ತಿ ಪಡ್ಂದಯಿಂಗಳಾಯಿತ್ ಇರಂಡೂಂದ್ ಪಿಂಞ ದೇವ ಅಂವೊಂಡ ಪರಿಪೂರ್ನತ್ರನೆಕೆ ನಿಂಗಳ ದುಂಬ್ಚಿಡಂಡೂಂದ್ ಪ್ರಾರ್ಥನೆ ಮಾಡ್ವಿ.
20ಇಕ್ಕ, ನಂಗಡಲ್ಲಿ ಬಲ್ಯ ಶಕ್ತಿಲ್ ಕ್ರಿಯೆ ಮಾಡಿಯಂಡ್, ನಂಗ ಬೋಡ್ವಕು ಗೇನಮಾಡ್ವಕು ಜಾಸ್ತಿಯಾಯಿತ್ ದುಂಬ ಮಾಡ್ವಕ್ ಶಕ್ತಿವಂತನಾನ ಅಂವೊಂಗ್, 21ಸಬೇಲ್ ಕ್ರಿಸ್ತ ಯೇಸುರ ಮೂಲಕ ಎಕ್ಕಲೂ ಪರಂಬರೆ ಪರಂಬರೆಯಾಯಿತ್ ಮಹಿಮೆ ಆಡ್. ಆಮೆನ್.
Currently Selected:
ಎಫೆಸ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
