ಎಫೆಸ 4
4
ಸಬೆರ ಐಕ್ಯ
1ಆನಗುಂಡ್, ದೇವ ನಿಂಗಳ ಕಾಕ್ನನೆಕೆ, ನಿಂಗ ಅದ್ಂಗ್ ಯೋಗ್ಯವಾನ ಬದ್ಕ್ನ ಬಾಳಡೂಂದ್ ಒಡೆಯಂಗಾಯಿತ್ ಕೈದಿಯಾಯಿತ್ ಉಳ್ಳ ನಾನ್, ನಿಂಗಳ ಬೋಡುವಿ. 2ಎಲ್ಲಾ ತಾಳ್ಮೆಲ್, ಶಾಂತಿಲ್, ಪೊರುಮೇಲ್, ಪ್ರೀತಿನಗುಂಡ್ ಒಬ್ಬನ ಒಬ್ಬ ಸಹಿಸಿಯಂಡ್ ಇರಿ. 3ಪವಿತ್ರಾತ್ಮತ್ರ ಐಕ್ಯತ್ನ ಕಾಪಾಡ್ವಕ್ ಸಮಾದಾನತ್ಲ್ ಒಂದಾಯಿತ್ ಇಂಜಂಡ್ ಎಚ್ಚರತ್ಲ್ ಇರಿ. 4ಒರೇ ನಿರೀಕ್ಷೆಕಾಯಿತ್ ದೇವ ನಿಂಗಳ ಕಾಕಿತ್ ಕೂಟ್ನನೆಕೆ, ಒರೇ ತಡಿಯು, ಒರೇ ಪವಿತ್ರಾತ್ಮವು ಉಂಡ್. 5ಒರೇ ಒಡೆಯನು, ಒರೇ ನಂಬಿಕೆಯು, ಒರೇ ದೀಕ್ಷಾಸ್ನಾನವು, 6ಎಲ್ಲಾರ್ಕು ಒರೇ ದೇವನಾನ ಅಪ್ಪನು ಉಂಡ್; ಅಂವೊ ಎಲ್ಲಾಡ ಮೇಲೆಯು, ಎಲ್ಲಾಡ ಮೂಲಕವು, ಎಲ್ಲಾಡಲ್ಲಿಯು ವಾಸ ಮಾಡಿಯಂಡ್ ಉಂಡ್. 7ಆಚೇಂಗಿ, ಕ್ರಿಸ್ತಂಡ ದಾನತ್ರ ಅಳ್ತೆರ ಪ್ರಕಾರ ನಂಗ ಒಬ್ಬೊಬ್ಬಂಗು ವರವಾಯಿತ್ ಅಂವೊಂಡ ಕೃಪೇನ ಕೊಡ್ತಿತುಂಡ್. 8ಅದ್ಂಗೇ ದೇವಡ ವಾಕ್ಯತ್ಲ್:
ಅಂವೊ ಪರಲೋಕಕ್ ಪತ್ತ್ವಕ,
ಅಂವೊಂಡ ಕೂಡೆ ದುಂಬ ಕೈದಿಯಳ ಕೈದಿಯಾಯಿತ್ ಕಾಕಿಯಂಡ್ ಪೋಯಿತ್,
ಮನುಷ್ಯಂಗಕ್ ವರತ್ನ ತಂದತ್ೕಂದ್ ಎಣ್ಣಿತುಂಡ್.#4.8 ದೇವಡ ಪಾಟ್ 68.18
9ಅಂವೊ ಪರಲೋಕಕ್ ಪತ್ತ್ಚೀಂದ್ ಎಣ್ಣುವಕ, ಅದ್ಂಗ್ ಮಿಂಞ ಅಂವೊ ಬೂಮಿರ ಅಡಿಕ್ ಇಳಿಂಜ್ತ್ೕಂದ್ ಅರ್ಥ ಆಪ ಅಲ್ಲ? 10ಅನ್ನನೆ ಇಳಿಂಜಂವೊನೇ, ಎಲ್ಲಾನ ದುಂಬ್ಚಿಡ್ವನೆಕೆ, ಎಲ್ಲಾ ಬಾನಕು ಕೊಡಿಲ್ ಉಳ್ಳ ಪರಲೋಕಕ್ ಪತ್ತ್ನಂವೊನಾಯಿತು ಉಂಡ್. 11ಅನ್ನನೆ ಅಂವೊ ಚೆನ್ನ ಜನಳ ಅಪೊಸ್ತಲಂಗಳಾಯಿತ್, ಚೆನ್ನ ಜನಳ ಪ್ರವಾದಿಯಂಗಳಾಯಿತ್, ಚೆನ್ನ ಜನಳ ದೇವಡ ನಲ್ಲ ಸುದ್ದಿ ಅರಿಚಿಡುವಯಿಂಗಳಾಯಿತ್, ಚೆನ್ನ ಜನಳ ಸಬೇನ ನಡ್ತ್ವಯಿಂಗಳಾಯಿತ್ ಪಿಂಞ ಚೆನ್ನ ಜನಳ ದೇವಡ ವಾಕ್ಯತ್ನ ಬೋದನೆ ಮಾಡ್ವಯಿಂಗಳಾಯಿತ್ ನೇಮಿಚಿಟ್ಟತ್. 12ಈಂಗಡಗುಂಡ್, ದೇವಡ ಮಕ್ಕ ಬೊಳ್ಂದಿತ್ ಅಂವೊಂಡ ಸೇವೇರ ಜವಾಬ್ದಾರಿನ ಮಾಡ್ವಕಾಯಿತು, ಪಿಂಞ ಅಂವೊಂಡ ತಡಿಯಾನ ಸಬೇನ ಕೆಟ್ಟ್ವಕಾಯಿತು ಮಾಡ್ಚಿ. 13ಅಕ್ಕ, ನಂಗ ಎಲ್ಲಾರು ದೇವಡ ಮೋಂವೊಂಡ ಮೇಲೆ ಇಟ್ಟಿತುಳ್ಳ ನಂಬಿಕೇಲ್ ಪಿಂಞ ಬುದ್ದಿಲ್ ಒಂದಾಯಿತ್, ಕ್ರಿಸ್ತಂಡ ಪೂರ್ತಿ ಅಳ್ತೆಕ್ ಬೊಳ್ಂದಿತ್ ಪೂರ್ತಿ ಮನುಷ್ಯಂಗಳಾಯಿತ್ ಬೊಳಿವಕಯ್ಯು.
14ನಂಗ ಇಂಞು ಮಿಂಞಕ್ ಕುಂಞಿಯರನೆಕೆ ಇಕ್ಕತೆ, ಮನುಷ್ಯಂಗಡ ಕಪಟ ಪಿಂಞ ವಂಚನೆ ಮಾಡ್ವ ತಂತ್ರವುಳ್ಳ ಬೋದನೆಯಾನ, ನಾನಾತರ ಗಾಳಿರಗುಂಡ್ ಅಲ್ಲಾಡಿಯಂಡಿಪ್ಪ, ಅಲೆರನೆಕೆ ಅಪ್ಪರ ಇಪ್ಪರ ಪೋಯಂಡಿಪ್ಪಯಿಂಗಳಾಯಿತ್ ಇರತಿ. 15ಅದ್ಂಡ ಬದ್ಲ್, ಪ್ರೀತಿಲ್ ಸತ್ಯತ್ನ ಪುಡ್ಚಂಡ್, ಮಂಡೆಯಾಯಿತುಳ್ಳ ಕ್ರಿಸ್ತಂಡಲ್ಲಿ ಎಲ್ಲಾ ವಿಷಯತ್ಲು, ನಂಗ ಬೊಳ್ಂದಂಡ್ ಇಪ್ಪಯಿಂಗಳಾಯಿತ್ ಇರಂಡು. 16ಅಂವೊನಗುಂಡ್, ತಡಿ ಪೂರ್ತಿಯು, ತಡೀನ ಒಂದಾಯಿತ್ ಪುಡ್ಚಿತಿಪ್ಪಕ್ ಸಹಾಯ ಮಾಡ್ವ ಅದ್ಂಡ ಯರ್ಚಿ ಕಂಡವು ಒಂದಾಯಿತ್ ಕೂಡಿತ್, ಓರೋರ್ ಬಾಗವು, ಅದ್ಂಗದ್ಂಗ್ ತಕ್ಕ ಅಳ್ತೆಲ್ ಕೆಲಸತ್ನ ಮಾಡ್ವಕ, ಪ್ರೀತಿನಗುಂಡ್ ತಡಿ ಬೊಳ್ಂದಿತ್ ಅದ್ಂಡದ್ಂಡ ಕೆಲಸತ್ನ ಮಾಡ್ವ.
ಬೊಳಿರ ಮಕ್ಕಳಾಯಿತ್ ಬದ್ಕಂಡು
17ಆನಗುಂಡ್, ಒಡೆಯಂಡಲ್ಲಿ ನಾನ್ ನಿಂಗಕ್ ಸಾಕ್ಷಿಯಾಯಿತ್ ಎಚ್ಚರ ಮಾಡಿತ್ ಎಣ್ಣುವದ್ ಎಂತ ಎಣ್ಣ್ಚೇಂಗಿ, ಯೆಹೂದ್ಯಂಗಲ್ಲತ ಬೋರೆ ಜನ ಪ್ರಯೋಜನ ಇಲ್ಲತ ಗೇನತ್ಲ್ ಬದ್ಕ್ವನೆಕೆ ನಿಂಗ ಇಂಞು ಮಿಂಞಕ್ ಬದ್ಕಂಡ. 18ಅಯಿಂಗಡ ಮನಸ್ಸ್ ಇರ್ಟಾಯಿತ್ ಉಂಡ್, ಅಯಿಂಗಡ ಹೃದಯತ್ನ ಅಯಿಂಗ ಕಠಿಣ ಮಾಡಿತುಳ್ಳಗುಂಡ್ ಅಯಿಂಗಡ ಮನಸ್ಸ್ಕ್ ಒಂದು ಅರ್ಥ ಆಕತನೆಕೆ, ದೇವಡ ಜೀವಕ್ ಅನ್ಯರಾಯಿತ್ ಉಂಡ್. 19ಸೊಯ ತಪ್ಪಿತ್, ಎಲ್ಲಾ ಅಶುದ್ದ ಕ್ರಿಯೇನ ಕುಶೀಲ್ ಮಾಡಿಯಂಡಿಪ್ಪಕಾಯಿತ್, ಲೈಂಗಿಕ ಪಾಪಕ್ ಅಯಿಂಗಳ ಅಯಿಂಗ ಒಪ್ಪ್ಚಿಟ್ಟಯಿಂಗಾಳಾಯಿತುಂಡ್.
20ಆಚೇಂಗಿ, ನಿಂಗ ಕ್ರಿಸ್ತನ ಇನ್ನನೆ ಪಡಿಚಿತ್ಲ್ಲೆ. 21ಯೇಸುರಲ್ಲಿ ಉಳ್ಳ ಸತ್ಯತ್ರನೆಕೆ, ನಿಂಗ ಅಂವೊಂಡಲ್ಲಿ ಕ್ೕಟಿತ್ ಅಂವೊನಗಂಡ್ ಬೋದನೆನ ನೇರಾಯಿತು ಪಡ್ಂದಿತುಳ್ಳಿರ. 22ಆನಗುಂಡ್, ಪಂಡತ ಬದ್ಕ್ರ, ಇಚ್ಛೆಯಿಂಜ ನಿಂಗಳ ಪಾಳ್ ಮಾಡ್ವ ಪಳೆಯ ಮನುಷ್ಯನ ಉತ್ತಿತ್ ಕಳೆಯುವಿರ. 23ನಿಂಗಡ ಮನಸ್ಸ್ಲ್, ಪುದಿಯ ಆತ್ಮತ್ರಗುಂಡ್ ಬದ್ಲಾನಯಿಂಗಳಾಯಿತ್, 24ನೇರಾನ ನೀತಿಲು, ಪವಿತ್ರತ್ಲು, ದೇವಡ ರೂಪತ್ರನೆಕೆ ಸೃಷ್ಟಿ ಮಾಡ್ನ ಪುದಿಯ ಮನುಷ್ಯನ ಇಟ್ಟೊಳಿ. 25ಪಿಂಞ, ನಂಗ ಒಬ್ಬೊಬ್ಬಂಗಳು ಒರೇ ತಡೀರ ಬಾಗವಾಯಿತ್ ಉಳ್ಳಾಂಗ್, ಪೊಟ್ಟ್ ಪರಿವಾನ ಬುಟ್ಟಿತ್, ಒಬ್ಬೊಬ್ಬಂಡ ಕೂಡೆ ಸತ್ಯ ಪರಿಯುವಯಿಂಗಳಾಯಿತ್ ಇರಿ. 26ನಿಂಗಕ್ ಚೆಡಿ ಬಾತೇಂಗಿಯು, ಪಾಪ ಮಾಡತೆ ಇರಿ; ಸೂರ್ಯ ಮುಳುವಕ್ ಮಿಂಞಲೇ ನಿಂಗಡ ಚೆಡಿ ತಣ್ಂಜ್ ಪೋಡ್.#4.26 ದೇವಡ ಪಾಟ್ 4.4 27ಸೈತಾನಂಗ್ ಬಟ್ಟೆ ಕೊಡ್ಕತಿ. 28ಕಳ್ಳತನ ಮಾಡ್ವಯಿಂಗ ಇಂಞು ಮಿಂಞಕ್ ಕಕ್ಕತೆ, ತಾಂಡ ಕೈಯಿನಗುಂಡ್ ನಲ್ಲ ಕೆಲಸ ಮಾಡಿತ್, ಬೋಂಡಿಯಾನಯಿಂಗಕ್ ಕೊಡ್ಕಂಡು. 29ಏದ್ ಒರ್ ಕೆಟ್ಟ ತಕ್ಕು ನಿಂಗಡ ಬಾಯಿಂಜ ಬಪ್ಪಕ್ಕಾಗ. ದೇವಡ ಮೇಲೆ ಬಕ್ತಿ ಬಪ್ಪನೆಕೆ ಬೋರೆಯಿಂಗಳ ಚಾಯಿ ಬೊಳಿಯುವಕುಳ್ಳ ತಕ್ಕ್ ಉಂಡೇಂಗಿ, ಆ ತಕ್ಕ್ ಕ್ೕಪಯಿಂಗಕ್ ಪ್ರಯೋಜನ ಆಪನೆಕೆ ಪರಿವಿರ. 30ವಿಮೋಚನ ಕ್ಟ್ಟ್ವ ನಾಳ್ಕಾಯಿತ್, ನಿಂಗಕ್ ಮುದ್ರೆ ಇಟ್ಟಿತ್ತುಳ್ಳ ದೇವಡ ಪವಿತ್ರಾತ್ಮನ ದುಃಖಪಡ್ತತಿ. 31ಎಲ್ಲಾ ಕೈಪ್ತನ, ಬೈಗಳ, ಚೆಡಿ, ಜೋರ್ ಮಾಡ್ವದ್, ಕೆಟ್ಟ ತಕ್ಕ್ ಪಿಂಞ ಎಲ್ಲಾ ಕೆಟ್ಟ ಗುಣವು ನಿಂಗಳ ಬುಟ್ಟಿತ್ ಪೋಡ್. 32ಒಬ್ಬಂಡ ಮೇಲೆ ಒಬ್ಬ ದಯೆ ಕಾಟಿತ್, ಕರುಣೆ ಉಳ್ಳಯಿಂಗಳಾಯಿತ್, ಕ್ರಿಸ್ತಂಡ ಮೂಲಕ ದೇವ ನಿಂಗಕ್ ಮನ್ನಿಚಿಟ್ಟನೆಕೆ, ನಿಂಗಳು ಒಬ್ಬಂಗ್ ಒಬ್ಬ ಮನ್ನಿಚಿಡಿ.
Currently Selected:
ಎಫೆಸ 4: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
