Apokalipsi 6

Kagta tegebwihka akka ku pariye nehmnikuhpiye aysawnemenek

1Ayteke nah sarayh nuvegi, nah hiyap ner Muwtohyan hakuhe ini pitatye asabuketni ariwntak ini ntewnehkernene makaksaki. Ayge nah timap pahavwi gaytakkis neras paxniknene hiyeg dehetniyevwi ig awna akak gihawna ke digidgiyebe. Giwn:

— Ba ayta.

Kaway seyne arakak gidahan pahavwi nehmnikuhpiye ku pariye ikawvari ku ignewa Cristo

2Tes 2.3; 1Jo 2.18; Ap 13.1, 17.7

2Nah sarayh nuvegi, nah hiyap ayge pahavwi kaway seyne. Pahavwi hiyeg bat ayge giduhyamadga kaway. Ig hiyuh akak gimedga. Ig ikepka git gisuwvren adahan areketni ku samah ig matekevye madikte hiyeg. Ayteke ig tivik muwapuw adahan ig matekbetevye hiyeg gihawkankis. Ayge ig matekevgikis.

Kaway duwweh arakak adahan kerka nehmnikuhpiye

3Ayteke ner Muwtohyan hakuhe avek ini makaksaki. Ayge nah timap giveynivye hiyeg dehetniye awna. Giwn:

— Ba ayta.

4Ayteke nikwe pahavwiwa kaway pes akiw. Ig kaway duwweh. Ig hawata tivik muwapuw. Pahavwi hiyeg bete ayge giduhyamadga. Ig ikepka git gidatni adahan ig pisenwevye akak pasamraki amadgatak inin kahadbe hiyeg igkisweke umehekbet pawtak. Ig hawata ikepka git pahamku giwana nopsadnano.

Kaway puhiye arakak adahan mihetniki nehmnikuhpiye

5Ayteke ner Muwtohyan hakuhe amamnabun ini makaksaki. Ayge nah timap gimamnampiye hiyeg dehetniye awna. Giwn:

— Ba ayta.

Nah sarayh nuvegi, nah hiyap ayge pahavwi kaway puhiye. Pahavwi hiyeg bat ayge giduhyamadga kaway. Ig kahentenwok akak gahehten.

6Ayteke nah timap pahat ikuvimnat. Ke nutuhbe in pes gibetitakkis neras paxniknene hiyeg dehetniyevwi. In awna:

— Pohowa ahehtet fahin adahan pahay hawkri annivwit atiwni. Hawata mpanmowa ahehtet kuwak adahan pahay hawkri annivwit atiwni. Heneme diluy akak win adukwenewa atiwni.

Kaway wasewnevye arakak adahan miyaka nehmnikuhpiye

7Ayteke ner Muwtohyan hakuhe avaxnikevye ini makaksaki. Ayge nah timap givaxnikanpiye hiyeg dehetniye awna. Giwn:

— Ba ayta.

8Nah sarayh nuvegi, nah hiyap ayge pahavwi kaway wasewnevye. Pahavwi hiyeg bat ayge giduhyamadga kaway. Ig kewye “Miyaka”. Pahavwi makeke gihavu butte akiw. Ig ner arakak adahan miyaravye giwetrikis. Ikepka gitkis gawaygikis adahan igkis umahkiswiyes abusku hawkri nitusi hiyeg akak kerka, akak mativwa, akak karayt, akak axtig.

Uhokri gihiyegavu umahavepkanek givatra Uhokri

9Ayteke ner Muwtohyan hakuhe avahwokni ini makaksaki. Ayge nah hiyap paha kakanhewket. Ayge avetun egu kakanhewket nah hiyap gitipkis hiyeg ku pariye kuwisnene umahavepka avatra ku samah igkis ekkenes Uhokri giwn, avatra ku samah igkis kabivwiyes adahan igkis kinetihwa gimin Kiyavwiye Jesus.

10Igkis hiyeg awna git Uhokri akak madikte giwakemnikis. Giwnkis:

— Kiyavwiye, pisnewa igyewa Ukivara. Pisnewa barewvitye. Aysawneki pis diyuhkisnek umiguh gitkis neras hiyeg amedgenevwi hawkri ku pariye wowmeptenvu?

Henewatbaki igkis hiyeg awna.

11Ayteke mpuse gaytakkis ikepka gitkis gisimsakis seyne. Ayteke pahavwi kaytwa giwnkis:

— Kiyaknihwanabay adahan aynesa hawkri akiw, he ku aysaw yikebyuvwi gibukvig Uhokri nawenyevwi akiw buttiyevwi akiw igkis umahavepkanek hawata ke yisbe. Mmanawa gihawkanavrikkis kaba danuh adahan igkis hawata umahavepka ku samah Uhokri ikiswanaw gidahankis.

Uhokri katiwnisanek gitaraksankis gitkis hiyeg amedgenevwi inin

12Ayteke nah hiyap ner Muwtohyan hakuhe avuguhkunpiye ini makaksaki. Aynewa wayk segke akak nihawna. Avim ini kamuw misanpip, in wageswe pohe ke kamisbe kehka akak sak puhiye. Kayg wageswe duwweh ke migatbe.

13Madikte warukmebdi amadga en tuguhe waykborit ke ah ariwbe amayuy sassahka avit mayg kihawniye.

14En mehwe ke wotbe in minahminepkabe, ke kagtabe in tagebwihpika akiw. Madikte waxribdi imuwadnene akak madikte kewgihribdi in ayguhwebdi adukwenitak.

15Avim ini madikte ikivaratviyenvwi amedgenevwi inin gikakkis madikte kumadukanevwi, madikte suwtat gikivarakis, madikte hiyeg igisavye, madikte hiyeg detyevwi, madikte nawenyevwi hiyeg ku pariye ibuktivyene, gikakkis hiyeg ku pariye kane ibuktivyenema, igkis madikte ayemwebdi ariku nopsadmin miyokbetavye. Hawata igkis ayemwebdi anaviw tip aynte avit waxribdi imuwadnene.

16Igkis kabimanave arit waxribdi imuwadnene akak arit tip nopsadmin: — Uya tuguh uvitit! Ayam usuh giw ner ku pariye betnene amadga gevwi kiyatyo kahadbe ig ka hiyap usuh. Mpitha usuh ariw gidagoni ner Muwtohyan. 17Mmanawa kuwis danuh ahawnavrik adahan igkis pisenwevye akak inin hawkri akak madikte gidagonikis. Yuma hiyeg ik adahan bisik giwkis.

Currently Selected:

Apokalipsi 6: pluPB

Highlight

Copy

Compare