Apokalipsi 10

Pahat inetit ayamkiska nutuh

1Ayteke nah hiyap pahavwiwa ahj detye akiw ig muhuk ayta inuriktak. Ig kasimsavu akak ukuhne. Paha tuwesegu ay aranwa gitew. Gihepka ka amuwyisima ke kamuwbe. Gibagwan kadawe ke tiketbe akadwey.

2Ig sumuh pahak kagta nopsesa in wok ay giwaku. Ig danuh atan, ig sibuh gikugku kihehavriktak tahan ahakwat parahwokwa. Inme gikugku patuwenavriktak ig sibuh tahan avitit waxri.

3Ayteke ig kabiman akak gihawna ke kawokwinebe gibiman ahawna. Pisenwa gibiman, ntewnehker akebi digidgiye digihwa akak nihawna. In awna iwit.

4Ku aysaw in digidgiye matiswe, nah ahegbetew adahan nah tamekwiye giwnkis. Heneme nah timap pahat ikuvimnat awna nutuh inuriktak. In awna:

— Ayamnite inakni giwnkis ini ntewnehkernene digidgiye. Ka ba tamakni amadgat pikagtan.

Nopsesa kagta axkiska nutuh adahan nah hiyak kabayntiwa ku pariye nehmnikuhpiye

5Ayteke ig ner ahj ku pariye nah hiyap tabirnene ahakwevi parahwokwa hawata avit waxri, ig tareke giwak kihehavriktak han inut.

6Ig awna:

— Nah awna kuri giwavrik Uhokri ku pariye dehetniye adahan avanenekwa, ku pariye kehe en akak madikte inurikya, ku pariye kehe waxri akak madikte amadgaya wayk, ku pariye kehe parahwokwa akak madikte ahakwaya un. Nah awna, kuri ahawkanavrik ka ayivwihwa adahan madikte ini biyukap. 7Ku aysaw ig ntewnehkervye ahj agighanek, ayge nikwe madikte ku pariye Uhokri ikiswanaw adahan ini hawkri in makisupnek. In ku pariye minikwak hiyeg kotenene hiyakte, kuri metakwa in kahayak ku samah ig ekke gitkis gibukvig gawnavevu. Henewatbaki ig ahj detye awna.

8Ayteke ini pahat ikuvimnat ku pariye kuwisnene nah timap in awna inuriktak nukakuh akiw. In awna:

— Ataknaba iwi ini kagta ku pariye woknene ay giwaku ner ahj ku pariye tabirnene ay parahwokwa hawata ay avit waxri.

9Nah timapni hene, nah atere git ner ahj. Nah ayep git ini nopsesnene kagta tagebwihmnihka. Igme kaytwa nuwnuh:

— Ahah. Iwepni. Axwin. Kuwewanek in wageswanek tiviye ay pitunrik. Ka sam. Ay pibiyrik in kiterenek ke ahayakbe anunu.

10Nah timapni hene, nah ameve ini nopsesnene kagta giwakutak. Nah axwin. Henewa, in kitere ay nubiyrik ke ahayakbe anunu. Heneme, ku aysaw nah dakerepni, in wageswe ka ativinisima ay nutunrik.

11Pisenwa awnaka nutuh:

— Amawka kuwewanek pis kinetihwa pahaynewata akiw amin ku pariye nehmnikuhpiye gitkis ka aynsima hiyegviyenevwi, gitkis arakembetnene gihivakkis, gitkis arakembetnene giwnavrikkis hawata gitkis hiyegviyene gikivarakis kane aynsima.

Currently Selected:

Apokalipsi 10: pluPB

Highlight

Copy

Compare