Apokalipsi 9

Avahwokni mbayka: mbeyevye akatwa hiyapkiska gitkis hiyeg gavitkis kene tananadbe

1Ayteke ner givahwoknivye ahj agighe. Aynewa nah hiyap pahavwi hiyeg gihivak kewa paha warukmabe ku pariye kuwis tuguhe inuriktak amadgat wayk. Ikepka git irakri adahan ig awokepten ini miyokwiye ku pariye yumanene amaksemni.

2Ig ner kene warukmabe woke ini miyokwiye. Ariwntak ini miyokwiye pese sariyan dahawnene ke was wohpiyebe. Ayge nikwe kamuw abutni ka kabutni akiw. Hawkri misanpip awaku ini sariyan.

3Ayteke ka aynsima tanan pahabunevye pesbet abetitak ini sariyan atan amadgat inin. Ikepka gitkis giwahrakis kewa akuwbe.

4Ayteke awnaka gitkis neras tananempu:

— Ka yi muwaka hiyapkis mbeyne arit pamatkaviyene avan, ine arit ahavwi, ine arit nawenyevwi amutribdi akiw. Heneme hiyapkisnay mbeyne gitkisnen hiyeg, gitkis ignesnewa ku pariye yumanene gibekteykis Uhokri gitamka ay gidevakis.

5Igkis tananempu ka isaksaka adahan igkis umah hiyeg, heneme adahannen igkis hiyapkisne mbeyne gitkis. Ayge nikwe igkis hiyapkisnes mbeyne gitkis hiyeg adahan pohowku kayg. Igkis kayahkis akatwa gitkis ku samah akatwa akuw giyakni.

6Avim ini pohowkunene akebi kayg neras hiyeg aharitnes miyakanek, heneme avim ini igkis ka utipninek. Igkis umahkiswekere, heneme miyaka ka danuh gitkisnek.

7Igkis tananviyene kewa kawaybe ku pariye ahegbetnene adahan kerka. Arikna ke suwvregbe kehka karukri wahano ay gitewhakis adahan areketni ku samah igkis matekevyes madikte hiyeg. Gihepkakkis kewa hiyegbe gihepkakkis.

8Gisemnikis kiyabwad ke tinobe gusemnibe. Gaybukis kewa kawokwinebe gaybu.

9Gidukkis awasadukave ke wotbe akakbe sivaribe. Gihanpikis gaman kewa kahosbe ku aysaw egkis kahka gavitkis ka aynsima kaway ku pariye sigisnenes arimkanit kerka.

10Gibkis yak ke akuwbe. Ini gibkis in giwahrakis adahan igkis hiyapkisnes mbeyne gitkis hiyeg abet ini pohowkunene kayg.

11Igkis kakivara pahavwi gikivarakis ku pariye gikumaduketnikis. Igme gikivarakis ig ner ahj ku pariye avuriwne ini miyokwiye ku pariye yumanene amaksemni. Giw Abadoh giwnavrikkis judeyenevwi. Giw Apoliyoh giwnavrikkis gresiyenevwi. Inakni wownavrikwiy “Umehekevutne”.

12Ini pitatye “akayih” adahan mbeyne mpiye. Ayteke ariwnteke ini aytente akiw pitana “akayihvyene” adahan mbeyne hawata amawka in danuh.

Avuguhkun mbayka: suwtat umah ka aynsima hiyegnek

13Ayteke ner givuguhkunpiye ahj agighe. Aynewa nah timap pahat ikuvimnat awna ariwntak mpuse nitusi ini piriyepkewket kehka karukri wahano ku pariye aynene givetun Uhokri.

14In awna git ner avuguhkunpiye ahj ku pariye kuhwekwa agigha. In awna:

— Asa isahkis neras paxnikanene ahj mbeyevyenen ku pariye wanamnave aynte amun egu warik nopsadnano Ewfratis.

15Ayteke nikwe neras paxnikanene ahj isahkiska. Igkis ahegbetepka adahanikwa ini ler, adahanikwa ini hawkri, adahanikwa ini kayg, adahanikwa ini kamukri adahan giwmeptenkis kaba abuskuhwa hiyeg amedgenevwi inin.

16Gisuwtatavukis ka aynsima aduhyamadga kaway. Ekkepka nutuh ku aysaw gikebikis. Igkis pimavut madikawku madikwa milyoh (200.000.000) gikebikis.

17Ayge ig Uhokri hiyapkise nutuh huwewe ku samah gihivakkis neras kane aynsima kaway payak gikakkis neras suwtat ku pariye batebdebdihpiye giduhyamadgakis. Igkis suwtat kadahanyekuye gidukmadgayakis duwweh ke tiketbe, ayewebore ke tipbe kewyo “jasintu”, hawata kuwikwibore ke supbe akiw. Igkisme kaway gitewkis kewa kawokwinebe gitew. Gibiyaptakis pes tiketnenwa akak sariyan akak ini pisukempiye ku pariye bixiwahnene arihri.

18Ini mpenene mbayka, egu tiket akak ini sariyan akak ini pisukempiye ku pariye bixiwahnene arihri ku pariye pes gibiyaptakkis kaway, in umehe kaba abuskuhwa hiyeg amedgenevwi inin.

19Mmanawa igkis kaway gidatnikis ay gibiyrikkis. Hawata akiw ay amun gibkis. In gibkis ke kaybunebe. In katew. Akak ini gibkis atew igkis kaway huwivwihe ka aynsima hiyeg.

Hiyeg ka wageskere gihiyekemnikis

20Neras hiyeg ku pariye aytentene amadga inin ku pariye kane umahka akak ini mbayka, hiyaksa igkis ka miniw ariw gikehnikis mbayka. Igkis ka miniw ariw gikiyathankis wavitye, ariw gikiyathankis ahehpakti batakkarad kehka karukri wahano kuwikwiye, kehka karukri wahano seyno, kehka kuwiwra, kehka tip, kehka ah, ku pariye kane hiyap, kane timap, ine kane wew.

21Hawata akiw igkis ka miniw ariw gihiyekemnikis mbeyevyenen. Igkis gidukweneswa umehnenes giyakikis hiyeg. Igkis gidukweneswa kehnenes ihamwihwaki. Igkis gidukweneswa mahayakemnihwenenes. Igkis gidukweneswa amevwinenes.

Currently Selected:

Apokalipsi 9: pluPB

Highlight

Copy

Compare