Sawmus 139

139

Uhokri ay nukakuh takunipti avanenekwa

1Kiyavwiye Uhokri, pis hiyak madikte ku pariye ay abet nuhiyekemni. Pivegi paduk ta avitit nuyakni adahan hiyepne madikte ku pariye ay abet nuhiyekemni.

2Pis hiyap madikte ku pariye nukehni. Pis hiyap ku aysaw nah batahkiswa. Pis hiyap ku aysaw nah kannikaw. Hiyawa nah piyawakad piw, heneme pis hiyak ku pariye ay abet nuhiyekemni.

3Pis hiyak ku kit nah wew. Pis hiyak ku kiney nah himak. Pis hiyak madikte nukehni.

4Avit nah awna, ayipa pis kuwis hiyak ku pariye nah awnakere, Kiyavwiye.

5Pis muwapuw nanwa. Pisnewa ay navitkig. Piswata ay nuharavrik. Pis sarayh piwak nuvitit.

6Pis wakaymnisan mpiynevevye, ku samah pis hiyakun kabayntiwa. Nah ka ik adahan nah pukuhpin.

7Kitkama nah uti iwetrit ku kiney pitip ka hiyavun? Kitkama nah bisik piw?

8Hiyawa nah wagehe inurikute, aygewata pis. Hiyawa nah haritmin aynte amun miyaravye giwetrikis, aygewata pis.

9Hiyawa nah amere tahan ku kitak kamuw pes, hiyawa nah misakwa aynte pakwa parahwokwa,

10aygewata pis adahan nuhwitenten akak piwak, adahan nukamaxten ay piwaku.

11Hiyawa nah pukuhpaw, nah awna: “Inin amisnavye ayamun giw Kiyavwiye Uhokri. Kuwewanek inin puwivaka wageswe tiyegem adahan mpithene nah giw Kiyavwiye Uhokri.” Bawa ka henema in humaw.

12Amisnavye pit in ka amisnavyema. Tiyegem kabutenne pit hawata ke puwivakbe. Kabutniki akak amisnavye in hehpekuye ta pit.

13Mmanawa pisnewa ku pariye kehe nuvituh pahavwite. Pisnewa humawasevun avim ini ku aysaw nah aynete gutunrik nnaguh.

14Nah kabayhap awaku ku samah pis ka pikiytanisima. Madikte pannu in barewyekuye. Ini nah kuwis hiyak abet nuhiyekemni.

15Minikwak pis hiyapni ku aysaw nuvituh humaw, ku aysaw nah hamehbetaki pawtak aynte gutunrik nnaguh, ayge nah aymuhwe yuma hiyeg ahiyekten mmahpa naymuhweven.

16Avit nuvituh humaw pahavwite hiyeg, ayipa pis hiyavun. Avit nah amadga wayk, ayipa pis kuwis hiyak ku samah nayivwi ay. In ke wotbe pis kuwis tamekwinbe ayvekuye amadga pikagtan.

17Kiyavwiye, nah ka aynsima batek ku samah pis avanenekwa ivegminenene pihiyekemni numinuh. Nah ka ik adahan nah pukuhni aysawvut.

18Awaku in ka aynsima. In ke wotbe nah pukuhnebe kayh, nahme ka hiya nivukuhka madiktema. Hiyawa nah pukuhni ku samah numawkan, heneme in ka madikti.

19Kiyavwiye, ka aynsima nah aharit adahan pis pisenwa gikakkis hiyeg mbayavye gihiyekemnikis. Hawata adahan neras umehekevutnevwi ayguhwa aytakihan nuwntak.

20Mmanawa igkis suguh pihiyekemni abetvi hiyeg. Igkis mbayha piw.

21Kiyavwiye Uhokri, nah ka batek aynesnima gikakkis neras hiyeg ku pariye kane batek pikak! Nah ka amava gihiyekemnikis neras ku pariye suguhnap.

22Nah ka batek gikakkis aynesnima. Avititakwa nuyakni nah ka batek gikakkis. Mmanawa ku pariye hiyeg pivetunyavu hawata igkis nuvetunyavuwata.

23Kiyavwiye Uhokri, ivegbetanaba nuhiyekemni ba in kabay pit! Uya hikekun adahan hiyepne ba nuhiyekemni inyewatma avigkutavrik ku samah pimawkan.

24Iwasanaba nudahan nuhiyekemni ba mbeyevye hiyakemniki ayge nibet ku pariye ik adahan keh nah miniw piw. Hawata uya amnih huwithan avigkuw ini kibeyne hiyakemniki ku pariye kane madikti.

Currently Selected:

Sawmus 139: pluPB

Highlight

Copy