Sawmus 108
108
Uhokri matakasanek uvetunyavuwiy wotwiy
1Kiyavwiye Uhokri, nah kuwis ahegbete nuhiyekemni adahan nah paksene piw. Nah ka miniw niw.
2Nah hawata tesne nagigni hebek akak egu lira adahan kabeyhene piw. Nah kannikasakere kamuw hawkanawa akak nuvanuh!
3Kiyavwiye Uhokri, nah kabayhapnek aynte gibetkis hiyegviyenevwi. Nah kabayhapnek aynte gibetkis nawenyevwi hiyeg.
4Mmanawa pamnihra ayesri danuh tahan inurikut, inme pikiytani ayesri hawata danuh tahan abetit ukuhne.
5Kiyavwiye Uhokri, hiyapkisnaba pidatni aynte inurik hawata pikiytani muwapuw amadga hawkri.
6Uya amnih usuh akak pidatni. Kaytwanaba uviryepkawni kahadbe usuh pibetkivu isahptaw.
7Kibeyne, aytontak ariwntak givin, ig Kiyavwiye Uhokri kuwis ikakse wotwiy ku wixwiy matakavenek uvetunyavuwiy. Ig awna: “Ku aysaw nah matakisenek yivetunyavu yit, nah ibekhenek ini paytwempu Sikeh akak ini waxri asababan Sukote yivuwiw yis nuhiyegavu.
8Ini waxri Jiliyadi nah hiyapni kewotbe in kuwis nudahan, inme Manases hawata. Inme Efrayh humawnek ke iyutibe nudahan. Judá humawnek kewa nusugabe adahan nukumadukan.
9Heneme Moabi aseneweke nutuh kewa nubesinabe adahan sukuhkugewne; avititme Edoh nah padaknek nukaswatni adahan areketni ku nah ka amavigkis. Aysawnemenek nah paknek amin ku samah nah matekise ignes filistewyenevwi ta yit.” Henewatbaki giwn.
10 Kibeyne, Kiyavwiye Uhokri, pisnewa matakasanek wotuh inere paytwempu kiyaranene akak ayahri. Pisnewa huwithannek atere avitit Edoh, nah gikakkis nusuwtatavu.
11 Heneme ku akak inin usuh kote matakigkiste. In keh nah pukuhpaw aynesa. Mmah pis kuwis miniwvima wowhu? Mmah pis ka atakma wew gihaptikis usuwtatavu akiw?
12 Kiyavwiye, ayavanaba usuh ker gitivutkis uvetunyavu, mmanawa gayavankis hiyeg amedgenevwi inin, in ka ariknawnama.
13Ka sam. Ig Kiyavwiye Uhokri paraknek abet uhawkanwiy, ig matakasanek uvetunyavuwiy wotwiy. Igwa sibuhavevgikisnek udahanwiy.
Currently Selected:
Sawmus 108: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
