Sawmus 107
107
Kabayka, patahwaki, mbeyne, wageska uhiyekemni, kabayka akiw
1Kabayhanay Kiyavwiye Uhokri, mmanawa ig kibeyne, hawata awaku gabay dahwa adahan avanenekwa.
2Kabayhanay Kiyavwiye madikte yis ku pariye ig amnihe. Mmanawa ig wiwhpewiy giwakutakkis uvetunyavuwiy.
3Hawata ig kehe wixwiy diyuhe avititak nawenyewa waxriviyene, aytontak tiwrikaptak akak aytontak mekavriktak, aytontak uvitkigtak akak aytontak wahamavriktak adahan wixwiy ayta misakwa atan avit uwaxigwiy akiw.
4 Minikwak gaytakkis gihiyegavu igkis biyuke aynte amatmadga. Igkis ka uti paytwempu adahan igkis misekwenes.
5Avim ini igkis mativwebdi. Igkis arabyubdi un. Igkis biyukse madikte gikamaxwankis.
6Abet giwakemnikis igkis amnihswebdi git Kiyavwiye Uhokri Dehetniye avititak giyaknikis, igme hiyapni hene, ig wiwhpigkis ariw giwakemnikis.
7Ig waxwevgikis avigkuw ahin waditye arimkanit paha paytwempu ku kiney ik adahan igkis misakwa.
8 Nukebyuvwi, amawka igkis kabayha Kiyavwiye Uhokri adahan ini gamnihra hawata adahan ini barewye annut ku pariye ig kehe gidahankis.
9Mmanawa ig gibetki iki un gitkis arabyuvyevwi hawata ig iki kibeyne axka gitkis ku pariye mativwevyevwi. Henewatbaki ig!
10Gaytakkisme gihiyegavu igkis misakwa akak giwakemnikis aynte abet miyaka amisnavye, igkis wanaminave akak xen sivari.
11Mmanawa igkis ka ihpa Kiyavwiye Uhokri inurikyene gikumadukan. Igkis tukuhe gikannuhakni.
12Igkis madikte mabipdip awaku gannivwikis awiyni; gaytakkis tuguhe, yuma hiyeg gayavetnikis.
13Abet ini giwakemnikis igkis amnihswebdi git Kiyavwiye Uhokri avititak giyaknikis, igme wiwhpigkis ariw ini giwakemnikis.
14Ig wiwhpigkis ariw ini miyaka amisnavye hawata ig matisbete ini xen sivari ku pariye giwankamnitenkis.
15Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewyevwi ku pariye ig kehe gidahankis.
16Mmanawa ignewa hakuhbeta parakseket alapota. Hawata ignewa matis xen kehka akak sivari. Henewatbaki ig keh!
17Gaytakkisme gihiyegavu akiw igkis kakahribdi awaku givathawnikis. Hawata igkis hiyap mbeyne awaku amebyemni gihiyekemnikis.
18Avim ini igkis asenbet gimanakis, igkis kaba miyarap.
19Abet ini giwakemnikis igkis amnihswebdi git Kiyavwiye Uhokri avititak giyaknikis, igme hiyapni hene ig wiwhpigkis ariw ini giwakemnikis.
20Akak giwnnenwa ig makniwevgikis hawata ig kannikasevgikis ariw miyaka.
21 Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewyevwi ku pariye ig kehe gidahankis.
22Amawka igkis kabayha Kiyavwiye Uhokri kuri akak kakanhawka hawata akak avatman adahan batekka. Hawata adahan igkis akka madikte ku pariye gikehni. Henewatbaki!
23Gaytakkisme gihiyegavu igkis tivikbetwikis parahwokwat amadgew nawiy adahan kannivwiyes awvre adahan givitkis amadgew parahwokwa.
24Igkis hiyap ku pariye Kiyavwiye Uhokri gikehni barewye arikna, hawata igkis hiyap gidatni ku pariye ig hiyapkise ayge amadga parahwokwa.
25Pahaye adahan ig kihawne kamaygviye. Kamaygviyeme kavusa uvuvuk kihaw hawata in kannikase paraw.
26In padak ginawyakis ta inut, ayteke in isahkis egu nawiy, eg huwis ta ahakwat un. Abet ini mbeyne, igkisme hiyeg ka hiyak ku pariye igkis keh akiw.
27Igkis wew kewa hiyeg uwkayehbe amadga nawiy awaku paraw. Hawata madikte gannukis adahan huwithawka in ka ayavigkis ariknawnama.
28Abet ini giwakemnikis igkis amnihswenes git Kiyavwiye Uhokri avititak giyaknikis, igme hiyapni hene ig wiwhpigkis ariw ini giwakemnikis.
29Ig kariswehse kamaygviye gidahankis hawata inme paraw tinwohew.
30Igkis hiyapni hene igkis bateke giminkis awaku paraw tinwohew. Hene Kiyavwiye Uhokri waxwevgikis kabayntiwa arimkanit ini minehweket ku kit gimawkankis.
31 Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewye ku pariye ig kehe gidahankis. Henewatbaki!
32 Nukebyuvwi, ig Kiyavwiye Uhokri ka gikiytanisima. Akkanay gikiytani ku aysaw hiyeg pahadguhwa; kabayhanay Kiyavwiye Uhokri abetnewa givahdukawnikis ikivaratviyenevwi.
33Ig Kiyavwiye Uhokri ka gannusima. Ig kannu wages warik arapuwe kewa amatapbe. Hawata ig kannu makarase un ariwtyak madikte akiw.
34Ig ik adahan keh waxri kibeyne wageswe waxri pambetye awaku givathawnikis neras ku pariye misekwenevwi ay nivit.
35Hawata akiw ig kannu keh amatap wageswa mahakwa. Hawata ig kannu keh waxri aravwiye humaw un ariwtyak.
36Ig Kiyavwiye Uhokri ka gabaysima. Ig isakse hiyeg mativavye misakwa avit kibeyne waxri. Igkisme keh paha paytwempu, igkis misakwa nivit.
37Igkis keh giwasrakis. Igkis mutuhavepni akak uvavu akat. Ayge nikwe igkis kadahan ka aynsima uva ariw.
38 Kibeyne, ig Kiyavwiye Uhokri iki ka aynsima kabayka gitkis gihiyegavu. Ig keh igkis kakamkayh ka aynsima. Ig ka isaksa givigkis pak madik.
39 Heneme Kiyavwiye Uhokri ig barewvitye. Nikwe ku ig hiyap gihiyegavu tiviknene patehwenene giwtrik, ig isaksa igkis matakaka gavitkis givetunyavukis adahan igkisme hiyapkiska mbeyne gitkis. Nikwe igkisme kayah ka aynsima mbeyne hawata arewhaka gitkis.
40Ayteke ig Kiyavwiye Uhokri hiyapni hene, ig ekke gitkis neras givetunyavukis ku pariyevahki gikumaduketnikis, ku ka kis akiw adahan ignes hiyapkis mbeyne gitkis. Nikwe igme wewkiswigkis arimkanit biyukwiki, ayge igkisme he wewnemempikis, igkis ka hiyap gihinakis.
41Heneme neras gihiyegavu ku pariye wages gihiyekemnikis ku pariye tuwatasewviye gitivut Uhokri, ignes wiwhka ariw ini gihiyvankis ku pariye tuwatasewviye gitivut Uhokri, ignes wiwhka ariw ini gihiyvankis mbeyne. Hawata ig keh gikamkayuvwikis kibihwa kewa muwtohyanbe.
42Hiyeg ku pariye kibeynevwi igkis hiyap ku samah Kiyavwiye Uhokri barewbetha gihiyekemniks, nikwe igkis bateke giminkis, heneme hiyeg ku pariye mbayavye gihiyekemniks, ignes ka ik adahan awna pahatnama iwit givetun.
43Amawka hiyeg ku pariye hiyekemniyevwi ivegminanekuye gihiyekemnikis amin ini ku samah Uhokri gikehni udahanwiy. Amawka igkis battukawnekuye pukuhpa ini Kiyavwiye Uhokri gamnihra gikakkis gihiyegavu.
Currently Selected:
Sawmus 107: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
