Sawmus 109
109
Giviryepkawni pahavwi awayg haraksaki
1Kiyavwiye Uhokri, pis ku pariye avanenekwa nah kabayhap, uya amnihun. Ka ba misakwa tinwonama hene.
2Neras mbayavye gikakkis wasaymavye igkis ka aynsima mbeyhe nuwhu. Igkis awna wasaymkanenwa numinuh.
3Igkis awna iwit mbeyevye numinuh. Hawata igkis kavetunsan yuma kavatrenesima.
4Hiyawa nah mpiksaw akka nubetki gikakkis, igkisme ka hiyavun kabayntiwatma. Heneme nah nudukwenewa piriyepkewnene gidahankis.
5Igkis katiwnih kabayka akak mbayka. Inme batekka igkis katiwnih akak gamiyhankis.
6Kiyavwiye Uhokri, hiyapkisnaba git nuvetunya ini mbeyne ku pariye ig hiyapkisne nutuh. Kaniynaba pahavwi hiyaptigi kane wadityema adahan gihiyvetni ner nuvetunya hawata adahan pahavwi gaytakkis givetunyavu atak atere kamiyevgi akak wasaymkanenwa gibetitkis hiyeg.
7Ku aysaw hiyaptigi gihiyvetninek, isaksa ig ikakanek ku ig kataraksanye. Ku ig piriyepkaw pit, ka ba timap giviryepkawni, hiyapni kewotbe in taraksakibe pit.
8 Keh ig hiyeke ku ig ka kis dahwa amadga inin. Amawka ku pahavwiwa akiw kannikaw giwenyan adahan kannivwiye gidukwenavrik.
9 Keh ig hiyeke ku ig ka wages gihiyekemni nikwe gikamkayuvwi humawnek migenavye. Hawata gihayo humawnek madankuno.
10Nikwe gikamkayuvwi misakwanek yumanene givinkis. Hawata igkis misakwanek makehpene gimanakis. Mmanawa igkis ivukavepkanek arikutak givinkis ku kiney igkis misakwa.
11Ayge nikwe madikte ku pariye ig nuvetunya kadahan in iwepkanek giw ke adahanbe katiwnihne gimatiwnihni. Hawata nawenyevwi hiyeg misekwenek akak ku pariye ig ute akak gimaviswan.
12 Hawata yuma pahavwinama hiyeg kibeynenek gikak mmanawa ig ka kibeynema gikakkis. Igkis kawnata avuriwkere gidahan gikamkayuvwi migenavye.
13 Keh ig hiyeke ku madikte gihiwhivwi miyarapnek kibehtenwa. Hawata giwkis miyehavepkanek kibehtenwa.
14Heneme ig Uhokri ka miyeh gitaraksan gukak ginag hawata gitaraksan gikakkis gihawkrivwi.
15Henewatbaki, ig Kiyavwiye Uhokri kiye ini gitaraksan gukakis adahan avanenekwa.
16Ig ner awayg ka ivegminati gihiyekemni adahan kehne kabayka, heneme ig harakse ig umehe ner tuwatviye, ner madiptivye, hawata ner tukuhkare.
17Ig gibetki ibiytahak; nikwe gibiytahanwa tuguhenek givitit! Ig ka amnihkere hiyeg. Kuri nikwe yuma hiyeg amnihkerevginek.
18Git ibiytahaki ka mahikonama kewa ig kawihminawnebe akak kamis, kewa ig higepnebe un, kewa ig axnebe iyti.
19Kuri nikwe gibiytahanwa tuguhnek givitit, ig ka ikwa adahan wiwhminaw niw.
20Henewatbaki in danuh gitkis neras nuvetunyavu ku pariye ibiytahan.
21Heneme, nahme, Kiyavwiye nuwohkiga, uya ayavan ku samah pikaksan nutuh. Wiwhun akak ini pamnihra hawata akak ini pabay.
22Nah madiptivye, nah yumanene nuwaygi. Nah kabahte ka ik adahan amava inin katiwvitka avit nuyakni.
23Nah kewa amisnavyebe menwempiye ku aysaw kamuw uguhpiye hawkri. Naymuhwan padakun piyawakad kewa pahavwi tananbe padaka.
24Mpiynevevye nah maxhaw, nubow sagka hawata nuvituh madikempi awaku keviki.
25Ku aysaw nawenyevwi hiyeg hiyavun, igkis mahivwihun. Hawata igkis miyathan. Igkis sasah gitewkis.
26Paraknaba abet nuhawkan, Kiyavwiye Uhokri Dehetniye, nuwohkiga! Uya amnihun akak ini pibetki nukakuh.
27Adahan nuvetunyavu hiyak ku pisnewa amnihun.
28Ka sam igkis ibiytahan, pisme sarayhnek kabayka nuvitit. Ku igkis haraksevunnek, igkis ka hiya nusamanaknek, nahme pibuk, nah misakwanek bateke numinuh.
29Aysawnemenek nuvetunyavu hiyapnek ka aynsima mbeyne, hawata maraki awastigkisnek kewa kamisbe.
30Akak madikte nukuvimna ahawna, nahme kabayhanek nuwohkiga Kiyavwiye Uhokriye Dehetniye. Nah kabayhignek abet givahdukawnikis hiyegviyenevwi.
31Mmanawa ig mpithamni hiyeg ku pariye yumanene gawaygikis. Ig wiwhpigkis giwakutakkis neras ku pariye hiyapkisne mbeyne git.
Currently Selected:
Sawmus 109: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
