1 Tesalonisenses 5
5
Jesus ayta adahan pisenwevye akak inin hawkri
Mt 24.29; Mk 13.26; Lk 21.25; 2Ped 3.10
1Nukebyuvwi, yis ka muwaka adahan usuh kinetihwa amin ku kabet ini hawkri nehmnikuhpiye danuh. Ine yis kawnata muwaka usuh kinetihwa amin ku kavim in danuh.
2Mmanawa yis kuwis hiyakni kabayntiwa ku yuma hiyeg nihiyekten. Ig Ukivarawiy gihawkanavrik adahan ig pisenwevye akak inin hawkri in danuh pahaye adahan ke pahavwi amepyebe ig danuh ku aysaw hiyeg ka wahapnigma.
3Avim ini ku samah hiyeg awnenete: “Madikte wew kabay, yuma kiyimanema” nikwenewa pahaye adahan mbeyne danuh gitkis, ke pahavu tinobe eg kayah gukamkayh pahaye adahan. Ayge avim ini yuma bisiket gidahankis.
Misakwanabay ahegbet avit Jesus gidawnhan
Mt 24.42; Lk 12.35, 21.34; 2Ped 3.11
4Yisme nukebyuvwi, yis ka kema ignesma. Yihiyekemni ka abetma amisnavye. Yis hiyakemun. Ku aysaw ini hawkri danuh pahaye adahan ke amepyebe, in ka wadisasay.
5Mmanawa yis madikte gidahan Kiyavwiye Uhokri. Yihiyekemni ke wotbe in kabutennebe, ke puwivwakbe. Yihiyekemni ka abetma amisnavye, in ka misanapnema kema tiyegemma adahan yis ka hiyak ku pariye hiyakemniki inyewatnene.
6Nikwe misakwanay ahegbet avanenekwa gavit Kiyavwiye Jesus gidawnhan. Nawenyevwi hiyeg ignes ke hiyegbe ku pariye himekweknenebe. Igkis ka aminama ariknawnema. Wixwiyme amawka wixwiy avuriw.
7Tiyegem hiyeg ka avuriw. Ignes himekbetnes. Igkis uwkihwenes.
8Wixwiyme uhiyekemniwiy ka misanapnema kema tiyegemma. Wixwiy uhiyekemniwiy kabutennene ke puwivwakbe. Amawka ku wixwiy avuriw uhiyekemniwiy kabayntiwa. Nah akkite yit abektey adahan ini. Awayg ku pariye suwtat ig kawihminaw akak sivari gidukmadga adahan gimaptenten giwkis givetunyavu. Ayge nikwe givetunyavu ka hiya gisamanak. Wixwiyme, wixwiy ka kawihminaw akak sivarima. Wixwiy kawihminaw akak ukamaxwanwiy givitit Kiyavwiye Jesus. Wixwiy kawihminaw akak Kiyavwiye Uhokri gamnihra. Ayge nikwe uvetunyavuwiy wavityempu ka hiya usamanakwiy adahan ig paraksa mbayka avitit uyakniwiy. Hawata akiw ig suwtat wew akak gisuwvren sivari. Wixwiyme ku aysaw wavitye idiswiye gihiyekemni abetit uhiyekemniwiy, wixwiy wiwhwa niw, mmanawa wixwiy ivegnenekwa givitit Kiyavwiye Jesus adahan ig keh wixwiy isahptaw niw. 9Kibeyne, ig Kiyavwiye Uhokri kaniyvewiy ka adahanma wixwiy ivukepka arimkanit biyukwiki avatra utaraksanwiy heneme ig kaniyvewiy adahan wixwiy isahptaw ariw biyukwiki givitimpi Ukivarawiy Jesus Cristo.
10Ig Kiyavwiye Jesus umahkiswe udukwenavrikwiy kahadbe wixwiy aymuhwa gimun adahan avanenekwa. Ku wixwiy miyarap, ku kawk ku wixwiy kote miyate avim ini ku aysaw ig danuh, ka sam. Wixwiy madikte aymuhwenekuye gimun Ukivarawiy adahan avanenekwa.
11Nikwe aydhaknay pawtak akak inakni iwit. Wagahkisaknay pawtak hawata ku samah yis inpawa keh.
Kiyathanay hiyeg ku pariye kannivwiye gidahan Uhokri
1Ko 9.6; Gal 6.6; 1Tim 5.17
12Nukebyuvwi, usuh aya yit adahan yis kiyatha neras ku pariye kannivwiye gidahan Kiyavwiye Uhokri ayge yibet, neras ku pariye Kiyavwiye Uhokri iki yit adahan yiwewkisten adahan ikene yihiyekemni.
13Kiyathanigkis kabayntiwa awaku ku samah igkis kannivwi yidahan. Bateknay gikakkis. Watekbetanabay yihiyekemni ayge yibet pawtak.
Wewnabay kehnene Uhokri gibetki
Jo 15.9; Ef 4.1; Kol 1.10; 1Tes 4.1; 1Ped 2.12
14Nukebyuvwi, usuh aya yit adahan yis iki gihiyekemnikis hiyeg ku pariye mabivwavye kannivwi adahan givitkis. Ikinay gawaygikis hiyeg ku pariye dunihpiye giyaknikis. Wagahkisnay hiyeg ku pariye aynesniyene gikamaxwankis. Kiyaknihwanay gikakkis madikte hiyeg.
15Avuriwnabay yihiyekemni adahan yis ka diyuhkis mbayka akakwatama mbayka. Heneme avanenekwa mpiksawnay keh kabayka yisweke pawtak hawata gikakkis madikte hiyeg.
16Bateknabay avanenekwa.
17Piriyepkawnabay avanenekwa.
18Kabayhanabay Kiyavwiye Uhokri avanenekwa abet madikte ku pariye danuh yit. Henewa ig Kiyavwiye Uhokri gimawkan adahan yis amavin. Adahanikwa ini ig keh yis pahavwiwa gikak Cristo Jesus.
19Ka yi muwaka mpithebdih gihawkan Kiyavwiye Uhokri Gitip.
20Ka yi muwaka miyatha iwit ku pariye pes giwntak Kiyavwiye Uhokrimuwaka adahan yis ikin waditnevyenen.
21Heneme ivegminanay yihiyekemni amin madikte giwnkis neras ku pariye ikaw ku Kiyavwiye Uhokri Gitip awnene ay givitkis adahan yis hiyepne baki in giwntakwatma Kiyavwiye Uhokri. Kamaxwanay avitit inakni ku pariye kibeyne.
22Ka yi muwaka daxtasaw arit aynesnima mbayka.
Kiyavwiye Uhokri barewvithawiy
23Ig Kiyavwiye Uhokri ig atiwkekne kariswehwaki. Igwa keh yis barewvitnek pahavwite. Ig avuriwyinek pahavwite, yitip payak akak yihiyekemni yivit. Ig avuriwyi kahadbe yis yumahwa yitaraksan aynesnima giwtrik avim ini ku aysaw Ukivarawiy Jesus Cristo gidawnhan.
24Ku pariye Kiyavwiye Uhokri gikaksan wotwiy in ka mpiya henentima. Ig kaniy wixwiy adahan wixwiy humaw barewvityevwi. Ayge nikwe igwa barewvithawiy ariw madikte uvathawniwiy.
Usuh awahkis kabayka yimin
25Nukebyuvwi, piriyepkawnay udahan hawata.
26Aytnihnay madikte ukebyuvwiy udahan akak inyewa batekka.
27Nah aya yit giwavrik Kiyavwiye Uhokri adahan yis ivegboha inin kagta gidahankis madikte ukebyuvwiy.
28Ukivarawiy Jesus Cristo gabay yikaknek.
Currently Selected:
1 Tesalonisenses 5: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
