Wepila 14

Pebie ne nɛra kaɡboŋa lafa fifraanaarɛ dɛ banaarɛ la wa

1Belaa n nyiŋi dɛ na Pebie la cheɡa Saayɔn Bwejen doa. Asɛ nɛra kaɡboŋa lafa fifraanaarɛ dɛ banaarɛ baa chwerɛ o ne o Mɛɛ la sɔna ba tili ta la che o be.#Wep 7:3 2Asɛ n no ɡbɔɡa nyundua kɛŋɔ chuubu aa dɛ si ken, a berɛ do kɛŋɔ bwaala aa kɔra kohona la. Dɛ o dɛ si kɛŋɔ baa dɛ lɔ janjela la. 3Nɛra la cheɡɛ Korowii kookara ne hweera kwaa anaarɛ la ne nomonome la be dɛɛ ɡo yelfale bɛl, nomɛlbwa aa wola won hweli yel la, nemenɛ nɛra kaɡboŋa lafa fifraanaarɛ dɛ banaarɛ Korowii aa lɛɛ ba harɛ nɔ ta nɛra bwa bini la ɡbo. 4Gɛ nɛra nɔ do kɛŋɔ baala baa wola haah jemɛ, dɛkalkɛŋɔ ba lawɛ ba te dɛ do kaih. Ba dɛ teŋɛ Pebie la nɛɛ bobɛlbwa waa dɛ la. Banee nɛnloɡla Korowii aa lɛɛ ba nɛra waa dɛ ba ba lɛɛ la bwa bini, dɛ́ kpɔ ba tɛ o te ne Pebie la. 5Ba ta nyosone teŋe bwa. Wechɔɡa bɛlbwa ɡe toole ba nɛ.

Nyundua toroma batoro bane wa

6Belaa n na nyundua torome bɛl waa ira kpɔ nyundua, dɛ kpoŋe Amanesoma aa wola tonɛ bwa, dɛ kpɔ dɛɛ la ka bol wobol te bɛlbwa nɛra baa lɔ harɛ nɔ ta bobɛlbwa be. 7O kpɔ takpeɡ dɛ ŋɔ, “Hɛ́ɛ ɔmɛ Korowii dɛ́ɛ tɛo jirima, dɛkalkɛŋɔ tɔpere la telo kɛŋɔ ó bol nomɛlbwa waa dɛ́ pa bole. Hɛ́ɛ duu Korowii waa ta nyundua ne harɛ, ne mpo ne neerare bwa aa lɔ harɛ ta la.”

8Nyundua torome nɛɛte ɡe iro teŋɛ onɔ la nɛɛ dɛ ŋɔ, “O paɡrɔ! O paɡrɔ! Babelɔn bwɛjen la waa ɡela pɛlchɔɡa ne wedoŋa dɛɛ harɛ nɔ ta bwa nɛra kɛŋɔ sen asɛ ba waa fuh Korowii baah la paɡrɔ.”#Aes 21:9

9Toorote ɡe iro teŋɛ banɛ la nɛɛ dɛ kpɔ takpeɡ dɛ ŋɔ, “Dɛ nomɛlbwa sɛoh dɛɛ tomɛ olchɔɡe la ne o chaa la baa mao la, dɛ ɡel ba doo nso o tile ta kɛɛ o nɔn ta naa, 10onee dɛɛ ba Korowii danana nee a nyoa aa kpeɡa kohona kɛŋɔ sen baa wola komɛlbwa a ta pule la nyɔe.#Jer 25:15 Wɛɛ na hɔhɔrɔwa kɛrɛdɛɛ jebɔrɔwe ninlao ta, nyundua toroma ne Pebie la sie, 11ásɛ chuu le bela baa dɛ na hɔhɔrɔwa la dɛɛ kaa nyundua saŋ bɛlbwa. Nɛra baa dɛ tomɛ olchɔɡe la ne kon la baa mao la, ne nɛra baa kpɔ o sɔn do ba nso la, baa hɔhɔrɔwa la taa le bwa, dɛ́ɛ na waa chɔɔ ne jwaana.” 12Anɔ dɛ baɡle kɛ a chɛ kɛ Korowii nɛra ba wa aa toɡra dɛ teŋɛ o waa ta dɛɛ yarada Yeesu la lawɛ bambile dɛ́ che kiŋkiŋ.

13N berɔ no taa bɛl nyundua o ŋɔ, “Chwerɛ waa nɔ. Le fini dɛɛ kaa, nɛra baa yarada ya Dɔɔ la dɛ kpɔ ba te tɛo la, dɛ ba sewaa, ba na som.”

Korowii Domadɛɛɡe la bolɔ ŋɔ, “Kpelaa, ba onɔ. Ba lee ba ba koeh ta. Ba sɔndɛɛɡe ɛɛ teŋɛ ba nɛɛ kaa.”

Kwaa aa lɔ harɛ nɔ ta koma wa

14Asɛ n nyiŋi dɛ na bampoŋ bɛl, nomɛl so o ta kɛŋɔ nɛn, dɛ pi suuɡaswɛm kooɡbɛrɛ, dɛ kpoŋe kerenyɛɡ. 15Anee nyundua torome bɛl le Korowii Dea bini, dɛ kpɔ takpeɡ ŋɔ onɔ la waa soɡe bam ta la be ŋɔ, “Kpɔ he kere la dɛ́ komɛ. Kwaa koma saŋ telo. Harɛ ta kondikwaa beɔ ne koma.”#Joe 3:13 16Asɛ onɔ la waa soɡe bam ta la ta o kere la, dɛ komɛ kwaa aa lɔ harɛ ta la.

17Nyundua torome bɛl ɡe le Korowii Dea waa lɔ nyundua la bini, dɛ ɡe kpoŋe kerenyɛɡ. 18Bɛl ɡe waa dɔ nii kpeɡri le konsɔɔhsoma fuih bɔr, dɛ kpɔ takpeɡ ŋɔ kerenyɛɡ te la be ŋɔ, “Kpɔ he kerenyɛɡ la, dɛ́ chaa harɛ ta daa baa kpɔ a nɔna dɛɛ ɛ sen la nɔna. A beɔ!” 19Asɛ o ta o kerenyɛɡ la harɛ ta dɛ chaa a nɔna, dɛ pa do kon ba yon pa nɔna la do dɛɛ sa a ta a nee le dɛɛ do o bini la. A ɡɛ kon la cheɡɔ tɛ Korowii bandia. 20Nɔna baa sa a ta la cheɡɔ tɛ harɛ nɔ ta nɛra. Bwɛjen la daharaa ba sa ba nɛ, ba chal palɛ kaa kɛ kwansini lafraanɛ, a luŋri ɡe tel naɡale anɛ.#Aes 63:3

Currently Selected:

Wepila 14: mzw

Highlight

Copy

Compare