Matiu 4

Gɛ Bɔnsam aa daah Yeesu na

(Mak 1:12-13; Luk 4:1-13)

1Belaa Korowii Domadɛɛɡe la kpɔ Yeesu kaa pua hɛŋle ɡbo harɛ ta, ásɛ Bɔnsam daahno na.#Hib 2:18 2Dɛ Yeesu vɔwɛ nyoa tɔpebire fifraanaarɛ. Dɛ lɔr dɛ kpoo. 3Anee Bɔnsam ba o be dɛ ba ŋɔ o be ŋɔ, “Dɛ henee Korowii Bie la kpela aa, ɡel bwea nɔ berɛ paanoo hé di.”

4Anee Yeesu chaŋe ŋɔ, “Korowii Tɔn baɡlɔ ŋɔ, ‘Kondikwaa ɡbo laa dɛɛ tɛ nɛn mkpa. Waa Korowii aa dɛ bol la bwa ɡe dɛ tɛ nɛn mkpa.’ ”#Mma 8:3

5Anee Bɔnsam kpɔɔ kaa Korowii Bwɛjen Jerusalam la ta, dɛ kpɔɔ ka cheɡ Korowii Dea la nyundujaɡla, 6asɛ dɛ ŋɔ o be ŋɔ, “Dɛ henee Korowii Bie la kpela aa, che bonɔ dɛ́ jah le harɛ, dɛkalkɛ Korowii Tɔn baɡlɔ ŋɔ,

‘Korowii ɛɛ ɡeloo o nyundua toroma

ɛɛ nyiŋi he nɛɛ kɛrɛdɛ. Baa lawɛɛ

haa wola nakpala kwaraa lɔ.’ ”#Yel 91:11

7Anee Yeesu chaŋo ŋɔ, “Korowii Tɔn ɡe baɡlɔ ŋɔ, ‘Bɛ N Naa Korowii daah na.’ ”#Mma 6:16

8Asɛ Bɔnsam berɛ kpɔɔ ka chɔŋɛ bobɛl waa do kɛŋɔ bwejen bɛl doa, dɛ baɡlo harɛ nɔ ta bela bwa kora dii aa lole, ne kondɔɔh ne konjena aa lɔ o ta bwa ɡale o sie ta, 9dɛ ŋɔ o be ŋɔ, “Dɛ he ɡuŋ mɛ harɛ dɛ duu mɛ naa, mɛɛ kpɔ kwaa haa naa nɔ bwaa tɛɛ.”

10Anee Yeesu kɔro ŋɔ, “Le n jwɛɛh kaa, Bɔnsam! Korowii Tɔn baɡlɔ ŋɔ, ‘Dɛɛ duu N Naa Korowii dɛɛ tomɛ o ɡbo.’ ”#Mma 6:13

11Anee Bɔnsam ɡelo dɛ kaa, asɛ nyundua toroma ba chao.

Yeesu toma mun pae Galilia harɛ ta

(Mak 1:14-15; Luk 4:14-15)

12Gɛ saŋ Yeesu aa noa kɛ ba lawɛ Jɔn do dea la, o berɔ kaa Galilia harɛ ta.#Mat 14:3 13O la Nasarɛt, kɛ o ta bela soɡe, dɛ berɛ ka so bwɛɛ bɛl waa lɔ Galilia Moo la nyoa, dɛ do Sebulon ne Naftale harɛ ta baa yerɔ Kapeeneɔm la ta. 14Gɛ waa nɔɔ ɡela Korowii keame Aesaya waa o fa aa bola la ɛ kasinteŋ. O bolɔ ŋɔ,

15“Nɛra baa lɔ Sebulon ne Naftale harɛre

aa lɔ Jɔɔdan Moo la baŋ, dɛ́ kpɔ kaa

mpo nyoa bela la, Galilia harɛ ta bela nɛra

baa wola Juu tena aa wara

dɛ koo Juu tena bini la.#Aes 9:1-2

16Nɛra ba fa aa do kɛŋɔ nɛra baa soɡe biro ta,

berɔ na nii bɛl o chaah tɛ ba bwa.

Gɛ nɛra nɔ ba wechɔɡa aa ɡela

ba do seo lɔɡa, kɛ nɛra baa soɡe biro ta la,

ba na nii bɛl o chaah kohona tɛ ba bwa.”

17Gɛ saŋ laanee Yeesu pa mun bol waa dɛɛ chaɡle nɛra ŋɔ, “Hé charɛ he liire le he wechɔɡa ta, dɛkalkɛ Korowii Kora la pu heyaa tonɛ.”

Gɛ Yeesu aa kpɔ o loɡla habɔteŋra

(Mak 1:16-20; Luk 5:1-11)

18Yeesu aa dɛ valɛ Galilia Moo la nyoa la, o na baala banɛ baa dɛ ɛ nee toma dɛɛ ta asau. Baala banɛ laanee Seemɔn baa dɛ yerɔ Pita la ne o nime Andriu.#Jɔn 1:40-42 19Anee Yeesu ŋɔ ba be ŋɔ, “Hé ɡel he pɛŋa la nyina dɛ́ ba teŋɛ n nɛ, ásɛ n baɡle heyaa ɡɛ baa nyin nɛra baa tɛ Korowii.” 20Buɡ la ta, ba den ɡel ba asauri la bela, dɛ kpɔ teŋɛ o nɛ.

21Waa dɛ kaa sie la, o berɔ ka na Sebedii bii banɛ, Jems ne o nime Jɔn, dɛ ba ne ba mɛɛ lɔ ɡbera bini dɛɛ tɔɔɡe ba asauri, asɛ Yeesu yer ba. 22Buɡ la ta, ba den ɡel ba mɛɛ ne ɡbera la bela, dɛ kpɔ teŋɛ Yeesu nɛ.

Gɛ Yeesu aa chah weela tena

(Luk 6:17-19)

23Yeesu ɡaaɡe Galilia harɛ ta bobɛlbwa, dɛ jo cheremi deene bini, dɛɛ chaɡle nɛra Korowii Kora la Amanesoma wa, dɛɛ chah nɛra baa dɛ we weela bwa soo siwi. 24O waa perɛ Siiria harɛ bobɛlbwa, anomanta, bela tena kpɔ ba weela tena baa dɛ we weela bwa soo siwi dɛ ba o be. Banɔ la kwaa aa dɛ ir ba nɛ, ne banɔ la baa dɛ we ɡbuŋɡbuŋri, ne banɔ la ba nɔɔra ne ba nakpale aa serewa bwaa ba kpɔ ba Yeesu be o chaah ba. 25Dɛ nɛnlaa tenten le Galilia harɛ ne bwɛɛre fi baa dɛ yera Dekapɔles la, ne Jerusalam, ne Juda harɛ, ne Jɔɔdan Moo baŋ bwɛɛre bwa ta, dɛ kpɔ teŋɛ Yeesu nɛ.

Currently Selected:

Matiu 4: mzw

Highlight

Copy