Matiu 5

Som nae ne tebinichɔɡ wa

(Luk 6:20-23)

1Yeesu aa na nɛnlaa la la, anee o teeh bwejen bɛl dɛ ka so, asɛ o habɔteŋra la baro cheme, 2asɛ wɛɛ baɡ ba waa dɛɛ ŋɔ,

3“Nɛra baa kpɔ ba te dawɛ Korowii

nɛɛ kɛ nyaara la, ba na som,

dɛkalkɛ banee dɛɛ ba Korowii Kora la koobii ɛɛ.

4Nɛra baa dɛ wi taraken la, ba na som,

dɛkalkɛ Korowii ɛɛ larawe ba bwaraa.#Jɔn 16:20-22

5Nɛra baa dɛ pwɛr ba te la, ba na som,

dɛkalkɛ Korowii nyobaɡa la, banee o baɡɛ tɛ.#Yel 37:11

6Nɛra ba sie aa beɡre waa aa toɡra

dɛɛ su Korowii siwi la, ba na som,

dɛkalkɛ Korowii ɛɛ cha baa a ta kɛrɛdɛɛ

bá dɔa ba tetoora.

7Nɛra baa dɛ na nɛra sum la, ba na som,

dɛkalkɛ Korowii ɡee na ba sumii.

8Nɛra ba tea bini aa toa la, ba na som,

dɛkalkɛ banee dɛɛ ba Korowii nae.#Yel 24:4

9Nɛra baa dɛ larawe waa dɛɛ sɔɔh waa nyoa la,

ba na som, dɛkalkɛ Korowii ɛɛ yer ba o biirii.

10Nɛra baa dɛ ɛ waa aa dɛ su Korowii siwi,

nɛra koh a waa dɛɛ ɛɛ ba hɔhɔrɔwa la, ba na som,

dɛkalkɛ banee dɛɛ ba Korowii Kora la koobii ɛɛ.#Jem 1:2; 1Pi 3:14; 4:12-14

11Dɛ nɛra koh teŋa haa teŋɛ n nɛɛ nɔ waa dɛɛ chɛɡre heya, dɛɛ ɛ heyaa hɔhɔrɔwa, dɛɛ teŋe nyosone, dɛ bol musu waa bɛlbwa dɛɛ dawɛ he nɛ aa, he na som. 12Hé ɡel he sie lɛ kohona, dɛkalkɛ he kembɔr kan taeh Korowii be. Gɛɛ ba kpɔ ɛ Korowii keamere baa tɔ sie la.

Yar ne nii waa dɛ chaah wa

(Mak 9:50; Luk 14:34-35)

13He do kɛŋɔ yar aa dɛ kwaa dɔr nɛwɛnyina bwa bini. Dɛ yar aa somɛ kpa aa, ɛrɛɛ baa ba a ɛɛ á do som jaɔ? A ta wejema dɔe bá ɛ kpa. Fuɡaa a den chɛ kɛŋɔ bá fuɡa ta dɛ́ tiɡri a ta.

14He do kɛŋɔ nii waa dɛ chaah bɔr nɛwɛnyina bwa bini. Bwɛjen waa dawɛ deŋɡare doa la aa won sɔh. 15Nomɛlbwa aa kandea choŋi dɛ́ kpɔ kon dɛɛ pi o ta. Kɛ ba dɛ choŋu dɛ́ kpɔ chɔŋɛ kon ta, ásɛ o chaah tɛ nɛra baa lɔ dem bela la bwa. 16Gɛɛ chɛ kɛŋɔ hé chaah tɛ nɛra, ásɛ ba na he wedɛɛɡa ɛɛ, dɛ́ duu he Mɛɛ waa lɔ nyundua la.”#1Pi 2:12

Korowii Mmara la waa baɡla

17Yeesu berɔ ŋɔ, “Hé bɛ dɛɛ lii kɛ n balɔ dɛ́ ba chɔɡ Mosis Mmara la ne waa Korowii keamere la aa chaɡla la. A chɔɡa laa n ba. N balɔ dɛ́ ba ɡel á dɔ mun kɛrɛdɛ. 18Kasinteŋ, nyundua ne harɛ taa lole nɔ, Mmara nɔ bini wejeɡa bɛlbwa aa lee ba, hale dɛ́ ka tel wobɛlbwa jaɡa saŋ. 19Anomanta, naate waa berɛ Mmara la bini onjeɡa bɛlbwa dɛ́ berɛ chaɡle bane ɡe bá ɛ ɡɛ la, waa bɔr dɔe ba Korowii Kora bini. Naate ɡe waa dɛ teŋɛ Mmara la ta, dɛ́ chaɡle bane ɡe baa ɛ ɡɛ la, wɛɛ dɔ nomonsoŋnibɔree Korowii Kora bini. 20Kasinteŋ, n dɛ ŋɔ he be, dɛ he wedɛɛɡa ɛɛ ta Tɔnjerema ne Farisii tena wedɛɛɡa ɛɛ ɡwaalaa, haa won ja Korowii Kora ta ŋwɛnɛ bɛlbwa ta.

Nɛŋkpoa wa

(Luk 12:57-59)

21He noɔ kɛ ba ŋɔ saŋ la tena be ŋɔ, ‘He bɛ nɛn kpo. Nomɛlbwa waa kpo nɛn la, o ɛ wechɔɡa kɛŋɔ bá bol o waa dɛ́ pa bole.’ 22Kɛ taraken, n dɛ ŋɔ he be, nomɛlbwa o baah aa di o dɔŋ nɛɛ la, o ɛ wechɔɡa kɛŋɔ bá bol o waa dɛ́ pa bole. Nomɛlbwa ɡe waa yerɛ o dɔŋ nɛnsala#5:22 Aram tena wobol ta nɛnsalaa baa yerɛ Raca. la chɛ kɛ ó che Juu tena nomonome bwa sie. Ásɛ nomɛlbwa o ɡe aa yerɛ o dɔŋ koŋɡɛne bɛl la, a chɛ kɛ bá tao Bɔnsam nii ta. 23Anomanta, dɛ he kpɔ jam kwaa dɛɛ la ká tɛ Korowii bela baa dɛ fuh kwaa dɛɛ tɛo la, dɛ lii kɛ he ne he dɔŋ bɛl dɔ waane aa, 24ɡel he kwaa la bela, dɛ́ la ka nyin he dɔŋ la hé ne o nyoa ka pɛ mɔɔ he ba kpɔ he kwaa la tɛ Korowii.

25Dɛ he ne he dɔŋ dɔɔ, asɛ o kpɔe dɛɛ kaa kɔɔto aa, larawo hé kwaa he baah. Gɛ laa aa, o dɔɔ tel he ne bela aa, kɔɔto nomoa la ɛɛ kpɔe tɛ prosiri bá ka doe dea. 26Kasinteŋ, dea belaa hɛɛ ba kae ka tel ɡɛ saŋ haa bɔ he kem la bwa, kapɛrɛ ɡba aa wola ka mɔɔ ba lee.”

Jwamane wa

27Yeesu berɔ ŋɔ, “He noɔ kɛ ba fa aa ŋɔa ŋɔ, ‘He bɛ jwamane dɛɛ bɔ.’#Kaa 20:14 28Kɛ taraken n dɛ ŋɔ he be ŋɔ, he naate haa na haah dɛ nyiŋu he pɛla do o nɛɛ la, he bɔ jwamane he bambile bini.#Job 31:1 29Anomanta, dɛ he diɡ siwi ɛɛ ɡeloo he ɛ wechɔɡa aa, fomo ta! He fomo ta kwaraa bɔ kɛ haa kpɔ sibie anɛ kaa Bɔnsam nii ta. 30Dɛ he nɔndiɡ ɛɛ ɡeloo he ɛ wechɔɡa aa, teŋo ta! He teŋo ta kwaraa bɔ kɛ haa kpɔ nɔɔra anɛ kaa Bɔnsam nii ta.

Baa ne haah dɔŋa vɛɛh wa

(Mat 19:9; Mak 10:11-12; Luk 16:18)

31Ba fa ŋɔ nomɛlbwa dɛ ba o haah vɛɛh yaa, ó chwerɛ tɔn tɛo dɛ́ vɛoh.#Mma 24:1 32Kɛ taraken te, n ŋɔ baa bɛlbwa o haah naa wola baala nyine, asɛ o vɛoh la, o di bolchɔɡe, dɛkalkɛ o ɡelɔ haah la bɔ jwamane. Asɛ naate ɡe waa bera ka mo haah la baa vɛoh la, o ɡe bɔ jwamane.”

Korowii nyoa baɡa ne ŋwɛɛra wa

33Anee Yeesu berɛ ŋɔ, “He noɔ kɛ baa ŋɔ saŋ la tena be ŋɔ, ‘He bɛ waa haa baɡɛ nyoa dɛ ŋwɛɛ a ta la ta koni. Hé ɛ waa la tɛ Korowii.’#Mma 23:21 34Kɛ n dɛ ŋɔ he be ŋɔ, he bɛ ŋwɛɛ kwaraa. He bɛ nyundua ŋwɛɛ, dɛkalkɛ Korowii soŋnibɔree.#Aes 66:1-2 35He bɛ harɛ ŋwɛɛ, o natiɡribɔree. He bɛ bwɛjen Jerusalam ŋwɛɛ, Koojen bwɛɛ bela. 36He bɛ he nyu ɡba ŋwɛɛ. Haa won ɡel he nyumpon beŋkpoŋ ɡba to, ɡɛɛ haa wola won ɡel ó bir ɡe. 37Ba dɛ bɔɔre waa dɛ a ɛ kpela aa, sɛh ŋɔ, ‘Ɔɔh,’ dɛ nyosone ɡee yaa, ŋɔ, ‘Ɔɔhɔh.’ He bol waane ja a ta naa, amɔ a te le Bɔnsam be.

Wechɔɡa kem bɔe wa

(Luk 6:29-30)

38He noɔ kɛ ba fa aa ŋɔa ŋɔ, ‘Dɛ nɛn fome he siwi aa, hé ɡe fome o siwi. Dɛ nɛn fome he nyen aa, hé ɡe fome o nyen.’#Kaa 21:24; Lew 24:20 39Kɛ taraken te n ŋɔ, dɛ nomɛl ɛɛ wechɔɡa aa, bɛ wechɔɡa kpɔ bɔɔ kem. Dɛ nomɛlbwa kpaa he diɡ lwɛɛma aa, berɛ ɡal lwɛɛma la ɡe tɛo ó kpaa ja. 40Dɛ nomɛl dɛ nyin kɛ ó kpɔe la kɔɔto, dɛ ka lɛ he batakaare aa, kpɔ he yal ɡe jao. 41Dɛ kpeɡnɛn ɡe dɛ doe ŋɔ hé che o bone ka doo kwansini beŋkpoŋ naa, che ka doo kwansini anɛ. 42Dɛ nomɛl soŋe komɛl aa, kpɔ tɛo. Dɛ nomɛl ɡe ŋɔ o dɛ nyin komɛl dɛ kemaa, kpɔ kemɔ.

Dɔma nyina wa

(Luk 6:27-28, 32-36)

43He noɔ kɛ ba fa aa ŋɔa ŋɔ, ‘Hé nyin he daamanar dɛ́ hah he dɔma.’ 44Kɛ taraken n dɛ ŋɔ he be, hé nyin he dɔma dɛ́ soŋe Korowii dɛɛ tɛɛ ba,#Rom 12:14 45ásɛ nɛra jemɛ kɛ he ɛ he Mɛɛ waa lɔ nyundua la bii, dɛkalkɛ o te ɡelɔ wee lɔ dɛɛ tɛ wechɔɡ-ɛɛra ne nɛndɛɛɡa bwa, dɛ nɛ bwaala ɡe dɛɛ tɛ nɛndɛɛɡa ne wechɔɡ-ɛɛra bwa. 46Dɛ he dɛ nyin nɛra baa dɛ nyin heyaa ɡbo aa, kembɔr besoo hɛɛ ba dɔe le Korowii be nɔ? Toɔ lɛɛra baa ɛ wechɔɡ-ɛɛra ɡba dɛ nyin nɛra baa dɛ nyin ba wa. 47Dɛ he ne he chamene tena ɡbo dɛ bol wa aa, dɛ amee he ɛ ɡwaa he bala ɔ? Hale nɛra baa wola Korowii tomɛ ɡba won ɡɛ ɛɛ! 48A chɛ kɛŋɔ hé we-ɛɛla bwa do kaih, ɡɛ he Mɛɛ waa lɔ nyundua la waa aa do kaih la.”

Currently Selected:

Matiu 5: mzw

Highlight

Copy