Matiu 3

Jɔn waa dɛ sɔ nɛra Korowii nee wa

(Mak 1:1-8; Luk 3:1-18; Jɔn 1:19-28)

1A ɡɛ saŋ la, dɛ baa bɛl waa dɛ sɔ nɛra Korowii nee baa yerɔ Jɔn ba Juda harɛ pua hɛŋle ɡbo harɛ la ta, dɛ baa bol Korowii Waa ŋɔ, 2“Hé charɛ he liire le he wechɔɡa ta, dɛkalkɛ Korowii Kora pu heyaa tonɛ.” 3Jɔn nɔ waa Korowii keame Aesaya faa bol la. O ŋɔ,

“Nomɛl dɛ bol waa takpeɡ ne pua hɛŋle ɡbo harɛ ta

dɛ ŋɔ, nɛ́ra ɡel ba we-ɛɛla toɡre,

dɛ́ kpɔ ba te dɛɛ kpa ba Dɔɔ bala.”#Aes 40:3

4Gɛ Jɔn nɔ, nyoɡma pona nee ba sɔh o yal, asɛ o kpɔ ol tɔn ɛ kiriso dɛɛ vɔwɛ o chara. O kondikwaa ɡee tontombɛ ne tooh. 5Dɛ nɛra le Jerusalam ne Juda harɛ ta bobɛlbwa, ne bwɛɛre aa lɔ Jɔɔdan Moo la nyoa bwa dɛɛ ba o be. 6Ba bol ba wechɔɡa chaɡlo waa, dɛ o sɔ ba Korowii nee moo la ta.

7Jɔn aa naa kɛ Farisii ne Saduki tena ɡe warɔ dɛɛ ba o be ó sɔ ba Korowii nee la, o ŋɔ ba be ŋɔ, “Nɛnchɔɡa kɛŋɔ domkpuli bii baa do nii kpɔɡ ta asɛ a le dɛ chwa dɛɛ kaa la! Umee ŋɔ he be ŋɔ hɛɛ wonoo chwa le Korowii bandia ta nɔ? 8Hɛ́ɛ ɛ waa aa dɛ chaɡle kɛŋɔ he charɛ he liire le he wechɔɡa ta. 9He bɛ dɛɛ lii kɛŋɔ haa ɛ Abraham naanar la ɡbo ɛɛ wonoo ɡel he chwa Korowii bandia la. Kasinteŋ, Korowii ɛɛ wonoo ɡel bwea nɔ beɡre Abraham naanar.#Jɔn 8:33, 37 10He do kɛŋɔ daa. Daa bɛlbwa waa wola nɔndɛɛɡa nɔnɛ la, baa teŋoo ta dɛ́ fuuh. Gɛɛ Korowii ɡe ɡɔɔ o kpanfɛ nɛra baa wola ba liire charɛ la nɛɛ dɛɛ ba ba teŋna ta, dɛ́ kpɔ ba do nii ta bá fuh.

11N te, nee n kpɔ dɛɛ sɔ heyaa Korowii nee dɛ chaɡle kɛ he charɛ he liire le wechɔɡa ta. Kɛ naate waa ba n habɔɔ la te, wɛɛ kpɔ Korowii Domadɛɛɡe ne niinii sɔ heya. O ɡwaa mɛ. Maa o napaa tee kwaraa dɔ.#Weɛ 1:5 12O do kɛŋɔ paa waa cheɡɛ o pɛla ta, dɛ kpɔ o te dɛɛ ba mea pala. Wɛɛ palɛ a bwaa kɛrɛdɛ ken, ásɛ dɛ pa ka do dɔndɔŋ bini cheɡ. Kɛ a pɛɡa la te, wɛɛ kpɔ nii aa wola dime bwaa fuah.”

Yeesu Korowii nee sɔe wa

(Mak 1:9-11; Luk 3:21-22)

13Gɛ saŋee Yeesu le Galilia harɛ dɛ ba Jɔɔdan Moo la nyoa Jɔn be ŋɔ ó sɔɔ Korowii ne. 14Dɛ Jɔn fe dɛ nyin vɛɛh, dɛ ŋɔ, “Menee chɛ kɛŋɔ ń ba he be hé sɔ mɛ Korowii ne, ɡɛɛ he ba n be naa?”

15Anee Yeesu ŋɔ, “Taraken nɔ te, sɔ mɛ. He sɔ mɛ naa, ɡɛɛ yaa ba wona ɛ wedɛɛɡa aa dɛ su Korowii siwi la bwa.” Asɛ mɔɔ Jɔn sɛh dɛ sɔɔ nee la.

16Waa sɔɔ Korowii nee la tonɛ la, Yeesu le nee la ta dɛ ba che baŋ. Nyundua pilo, asɛ o na Korowii Domadɛɛɡe o do kɛŋɔ borɔnoma ken dɛ ba so o nɛ.#Aes 11:2-3 17Asɛ taa bɛl le nyundua ŋɔ, “N bie maa dɛ nyinu o wa ɛɛ su n siwii nɔ.”

Currently Selected:

Matiu 3: mzw

Highlight

Copy