Lewi Dea Tena 18

Kii aa lɔ nɛn kɛɛ ol lawa dɛ chɔ wa

1Korowii berɔ ŋɔ Mosis be ŋɔ, 2ó bol Israel tena la be ŋɔ, “Menee Korowii haa dɛ tom mɛ la. 3He bɛ ɛ kɛŋɔ Ijipt tena he fa aa soɡe ba bini la, ne Keenan tena maa dɛ kaa he ne ba bini nɔ. He bɛ ba we-ɛɛla la kpɔ. 4Hé nyiŋi kɛrɛdɛ dɛɛ teŋɛ me Mmarare ne waa maa dɛ do heyaa bwa ta. Men Korowiirii bola. 5Hɛɛ teŋɛ me Mmarare ne waa maa dɛ do heyaa a ta la bwa ta. Nomɛlbwa waa dɛɛ teŋɛ waa aa lɔ Mmara la bwa ta la, wɛɛ dɔ mkpaa le Mmara la ta teŋa ta. Men Korowiirii bola.#Luk 10:28

6Nomɛlbwa, dɛ baa kɛɛ haahnee yoo, o ta chɛ kɛ o ne o lole tenten ka chɔ baa ne haah. Men Korowiirii bola.

7Bɛ he nya lawɛ ka chɔ dɛ do he mɛɛ sihiih. O ɛ he nya, anomanta, a ta chɛ kɛ he lawɔ chɔ.

8Bɛ he mɛɛ haah lawɛ chɔ. A ba ɡɛ naa, dɛ duure bɛlbwa toole he ne he mɛɛ baah ta.

9Dɛ́ɛ berɛ he nime kɛɛ nahaah lawa ka chɔ. Dɛ he mɛɛ, kɛɛ nya bie ɡboo ba pɛ lolɛ he ne on dembeŋkpoŋ ta kɛɛ dɛ bobɛlee ba lolɔ kwaraa noo.

10Dɛ́ɛ berɛ he bibaa bihaah kɛɛ he bihaah ɡe bihaah lawɛ chɔ. A ɛ sihihwa dɛ tɛɛ.

11A ta chɛ kɛ he lawɛ he mɛɛ haah bihaah waa ɛ he mɛɛ bie ka chɔ. He ne o bwa pɛ mɛɛ o ɛ he nimambie.

12Bɛ he nyaana lawɛ chɔ. O ɛ he mɛɛ lole tenten.

13Dɛ́ɛ berɛ he nyawee kɛɛ nyajen lawa ka chɔ. He nya lole tentenee.

14Bɛ he mɛnjen kɛɛ mɛnwee haah lawɛ chɔ. A ɛ sihihwaa tɛ he mɛnjen kɛɛ mɛnwee la. Dɛ́ɛ lii kɛŋɔ o ɛ he nya.

15Bɛ he bie haah lawɛ chɔ. A chɛ kɛ he jemɛ kɛ he helaa. Aa were kɛ he lawɔ chɔ.

16Bɛ he nime kɛɛ he dɔɔ haah lawɛ chɔ, a ɛ sihihwaa tɛ he dɔɔ kɛɛ nime la.

17Bɛ haah nyin dɛ berɛ ka nyin o bie ɡe. Dɛɛ berɛ o bibaa bihaah, kɛɛ o bihaah ɡe bihaah nyina. Ba ɛ haah la lolanar tenten. A ɛ wedoŋa.

18Dɛ he haah ta soɡe le o ta sewɛ mɔɔ naa, dɛɛ berɛ o nime kɛɛ nahaah moe dɛ́ ja o nɛ dɛ́ lawɔ chɔ, a ba ɡɛ naa, baa toŋroo.

19Bɛ haah lawɛ chɔ o bochɔɡa saŋ. Gɛ saŋ dɛ o ta lɔ doŋa ta.

20Bɛ he dɔŋ haah lawɛ chɔ dɛ́ kpɔ doŋa kah he bwa.

21Bɛ he bie bɛlbwa lawɛ tɛ bá kpo ɛ saraha tɛ voɡ Molɛk. Dɛɛ berɛ men Korowii haa dɛ tom mɛ nɔ sɔn chɔɡ ɡɛ. Men Korowiirii bola.#2We 28:3

22Bɛ he bandɔŋ lawɛ chɔ baa ne haah. A ɛ waa baa kia.#Rom 1:27

23Baa bɛlbwa bɛ ol lawɛ chɔ dɛ́ kpɔ doŋa kah o te. Haah bɛlbwa ɡe ta chɛ kɛ o ne ol chɔ baa ne haah, a ɛ waa aa wola were kɛ nɛn ɛ.

24He bɛ he te kpɔ do ɡɛ waa nɔ bɛlbwa ta dɛ́ kah doŋa. Gɛɛ nɛra baa soɡe harɛ maa dɛ ba kpɔe tɛ heyaa nɔ ta ɛ, asɛ dɛ kah doŋa mɛɛ ba ba doŋa le o ta la. 25Ba we-ɛɛla chɔɡ harɛ la ɡba o doŋ dɛ ba deŋnetɛra ne o ta asɛ o lee ba tɛ. 26Hɛ́ɛ teŋɛ me Mmarare ne n waa maa dɛ do heyaa la bwa ta. Hé ne nɛŋhɔɔhra bwa baa soɡe he bini ta chɛ kɛ he teŋɛ waa baa kia nɔ ta dɛɛ ɛa, 27dɛkalkɛ ɡɛɛ nɛra baa tɔ sie ba so harɛ nɔ ta la we-ɛɛla chɔɡ harɛ la o doŋ la. 28Hé ɡe baa chɔɡ harɛ la aa, wɛɛ le heyaa tɛ ɡɛ waa le nɛra baa tɔ he sie tɛ la.

29Nomɛlbwa waa ɛ ɡɛ waa nɔ bini bɛlbwa baa kia nɔ la chɛ kɛ bá pero le o nɛra bini. 30Hɛɛ ɛ waa maa dɛ nyin, dɛ bɛ nɛra baa tɔ sie ba so harɛ nɔ ta la we-ɛɛla maa kia la ta teŋɛ, dɛ́ kpɔ doŋa kah he te. Menee Korowii haa dɛ tom mɛ la.”

Currently Selected:

Lewi Dea Tena 18: mzw

Highlight

Copy