Lewi Dea Tena 19
19
Goroŋ doe ne waa aa toɡra Mmarare
1Korowii bol Mosis be ja ŋɔ, 2ó ŋɔ Israel tena la bwa be ŋɔ, “Hé do ɡoroŋ, dɛkalkɛ men Korowii haa dɛ tom mɛ la, n do ɡoroŋ.
3He bini bɛlbwa chɛ kɛ wɛ́ɛ duu o nya ne o mɛɛ, ásɛ dɛɛ di n Ona Tɔpera maa kpɔa tɛ heyaa la. Menee Korowii haa dɛ tom mɛ la.
4He bɛ he liire charɛ dɛ́ kaa tomɛ voɡa kɛɛ dɛ́ kpɔ bune ɛ voɡa dɛɛ toma. Menee Korowii haa dɛ tom mɛ la.
5Hé ɛ deŋnesɔɔhna saraha dɛɛ ba n tɛɛ yaa, he ɛa ŋwɛnɛ aa chɛa ta, ásɛ a do wer tɛ mɛ ń lɛ. 6Awola tenten haa kpo ol la ne tɔɔ aa per o ta laanee o do wer ne dii. Kɛ dɛ o pera kao ba le tɔpetooro wee ta naa, a chɛ kɛ bá fuuh. 7Nomɛlbwa waa di ol la tɔpetooro wee la, maa o saraha waa ɛa tɛ mɛ laanee lɛ. A ɛ waa maa kia. 8Nomɛlbwa waa di ɡɛ ol la chɛ kɛ bá tɛr o deŋne, dɛkalkɛ o chɔɡ kwaa aa do ɡoroŋ dɛ tɛ men Korowii. A chɛ kɛ ba pere naate le o nɛra bini.
9He dɛ komɛ he koo kondikwaa aa, he bɛ anɔ la aa lɔ koo nyoa tenten la komɛ. Hɛ́ɛ berɛ anɔ la aa leera la ɡe pa dɛɛ ja.#Mma 24:19; Rut 2:2 10Hɛ́ɛ berɛ he daa kooni nɔna aa ka mun lee kɛɛ a taa ka daa ta la ta dalwe dɛ́ tɔɔra. Hé ɡela tɛ nɛŋhɔɔhra ne nyaara he ne baa soɡa la. Menee Korowii haa dɛ tom mɛ la.
11He bɛ dɛɛ ŋwɛ.
He bɛ nyosone dɛɛ teŋe.
He bɛ dɔŋa dɛɛ neɡre.
12He bɛ n sɔn kpɔ dɛɛ ŋwɛɛ waa aa ɛ nyosone, dɛ́ chɔɡ men Korowii haa dɛ tom mɛ sɔndɛɛɡe la. Men Korowiirii bola.
13Hɛ́ɛ berɛ he dɔŋa faahra, kɛɛ dɛ́ ŋwɛo.
He bɛ ɡel nɛn ɛ he toma ásɛ he di o kem tɔɔ per a ta.#Mma 24:14-15
14Hɛ́ɛ ɔmɛ men Korowii haa dɛ tom mɛ, dɛ bɛ amumu taah kɛɛ dɛ́ kpɔ komɛl bil nyoŋe sie ó lɔ na dɛ́ chole.
15Hé nyiŋi dɛɛ pa waa bole aŋwɛnɛ ta. Naate ɛ nyaaraa, he bɛ o nɛɛ sune, he bɛ suuɡa te ɡe siebɔr nyiŋi. Kpɔ kasinteŋ pa he dɔŋ bole.#Kaa 23:3; Mma 16:19
16He bɛ he dɔŋa waa kpɔ ɡaaɡe dɛ́ teŋe nyosone dɛɛ dawɛ ba nɛ.
Dɛ seo nyoa he dɔŋ che naa, bɛ on chɔɡ. Men Korowiirii bola.
17Dɛ́ɛ berɛ he dɔŋ haeh. La o be ka diu kasinteŋ, ásɛ o wechɔɡa bɛ he nɛɛ dawɛ.
18Bɛ he dɔŋ wechɔɡa waa ɛa la kpɔ do he bambile bini dɛ́ ɡe bɔɔ a kem. Hɛ́ɛ nyin dɔŋa kɛ he ɡbaɡba. Men Korowiirii bola.#Mat 19:19; Mak 12:31; Rom 13:9
19Hɛ́ɛ teŋɛ n waa maa kpɔa tɛ heyaa la ta.
He bɛ ɡel he kondɛɛra aa wola siwi beŋkpoŋ ɛɛ jwee dɔŋa.
He bɛ kondwee aa wola siwi beŋkpoŋ ɛɛ pɛ du harɛ beŋkpoŋ ta.
He bɛ yal baa kpɔ jisepondɛɛɡe ne pee pona sɔh la tɔ.
20Baa bɛlbwa lawɛ yomhaah baa lawɔ tɛ baa waa wola o bwara waa ɛɛ mɔɔ ka chɔ, dɛ ba ta o nyu kem bɔe o dɔ o te mɔɔ naa, a chɛ kɛ bá tɛr ba deŋne. Ba bɛ ban kpo dɛkalkɛ haah la ta ɛ nɛndɔɔle. 21Baa la te, a chɛ kɛ ó lawɛ pebal ba n Dea Cheremibɔr la doonyoa, dɛ́ kpɔ ba ɛ bolchɔɡe dii saraha tɛ mɛ. 22Sɔfo la kpɔ pebal la, dɛ́ soŋe naate wechɔɡa waa ɛa tɛo n sie, ásɛ n kpɔ kɛo.
23He baa tel Keenan harɛ ta dɛ du daa aa dɛ nɔnɛ aa, bene atoro aa tɔ sie la chɛ kɛŋɔ hé ki a nɔna bɛlbwa aa nɔnɛ la. A ta chɛ kɛŋɔ hé di daa la nɔn bɛlbwa a ɡɛ bene atoro nɔ ta, dɛkalkɛ aa were tɛ heyaa kɛŋɔ hé dia. 24Bennaarɛ ta la, dɛ a bwa wer dɛ ɛ men Korowii kwa, hé kpɔ ɛ saraha kpɛɛ n sɔndɛɛɡe la. 25Dɛ he dɔ ŋwɛnɛ name, dɛ́ di daa la nɔna bennue te la ta. Gɛɛ aa ba ɛɛ he daa won nɔnɛ kohona tɛ heya. Menee Korowii haa dɛ tom mɛ la.
26He bɛ ol ne o chal di.
Hɛ́ɛ berɛ he te kpɔe dɛ do voɡra kɛɛ sɔm we-ɛɛla soo siwi bɛlbwa ta.
27He bɛ he nyu keŋkeŋna kɛɛ he tampona dɛɛ kuu.
28He bɛ lala waa koh, dɛ́ mɔne he bwara kɛɛ dɛ́ do he bwadabii ɡwine. Men Korowiirii bola.
29He bɛ he bihaahna chɔɡ baa bɔ jwamane. He dɛ ɛɛ ba ɡɛ naa, aa bu harɛ la bwaa, dɛ́ ɡel chɔɡre warɛ o ta.
30Hɛ́ɛ di n Ona Tɔpera la, ásɛ dɛ ɡel duure do bela haa dɛ tom mɛ la. Men Korowiirii bola.
31Hɛ́ɛ berɛ nɛra baa dɔ daabii ba ne lala ɛɛ bol waa be la. He dɛ ɛ ɡɛ naa, dɛ he kpɔ doŋa dɛɛ kah he te. Menee Korowii haa dɛ tom mɛ la.
32Hé kpɔ jirima dɛɛ tɛ nɛra baa hwɛɛhra, ásɛ dɛɛ duu ba, dɛ́ɛ duu men Korowii haa dɛ́ tom mɛ ɡe. Men Korowiirii bola.
33Hɛ́ɛ berɛ nɛŋhɔɔhra baa soɡe he harɛ ta hɔhɔrɔwa dɛɛ ɛ. 34Hɛ́ɛ ɛɛ ba kɛŋɔ he bala Israel tena, dɛ́ɛ nyin ba wa kɛŋɔ he ɡbaɡba. He na kɛŋɔ he ɡbabir fa ɛ hɔɔhra Ijipt harɛ ta ka. Menee Korowii haa dɛ tom mɛ la.
35He bɛ nɛra dɛɛ faah kwaa maɡa ta. 36Hé kpɔ kwaa aa chɛ kɛŋɔ hé kpɔ maɡɛ kwaa maɡɛ ɡɛ a bɛlbwa aa chɛa. Menee Korowii haa dɛ tom mɛ n kpɔ heyaa le Ijipt harɛ ta ba la.
37Hɛ́ɛ teŋɛ me Mmarare ne waa maa dɛ́ do heyaa bwa ta. Men Korowiirii bola.”
Currently Selected:
Lewi Dea Tena 19: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
