Lewi Dea Tena 17

Chal bɛ dii wa

1Korowii berɔ ŋɔ Mosis be ŋɔ, 2“Kpɔ waa maa dɛ ba he be bola nɔ tɛ Arɔn ne o bibaala dɛ Israel tena bwa. 3Nomɛlbwa waa kpo nao, pee kɛɛ booh bela baa soɡa kɛɛ o dahara, 4dɛ o ta kpɔe ba n Dea Cheremibɔr la doonyoa, dɛ ba kpo ɛ saraha n sie tɛ mɛ naa, dɛ o fuɡe chal ta dɛ di bolchɔɡe. Maa naate laanee kure ja n nɛra nɛɛ kpa. 5Gɛɛ dɛɛ ba ɡela Israel tena baa kpoo kwaa dɛɛ ɛ saraha kpɔɡ bini taraken nɔ ɡel a ɛɛ. Bá kpɔa ba sɔfo be n Dea Cheremibɔr bela n sie ba ɛ deŋnesɔɔhna saraha tɛ mɛ. 6Sɔfo la tonaa, ó ɛ a chale merɛ men Korowii saraha kon la ta, n Dea Cheremibɔr doonyoa bela, dɛ́ fuh a noorare, ásɛ a sɔɔh do n som kohona. 7A ta chɛ kɛ Israel tena vɛh men Korowii toma, dɛ́ ka ɛ saraha tɛ voɡa dɛɛ toma. Gɛ Mmara nɔ chɛ kɛ á chɔ le tɛ ba ne ba naanar baa ka ba bwa.

8Berɛ ŋɔ ba be ŋɔ Israel te bɛlbwa kɛɛ hɔɔh bɛlbwa waa soɡe ba bini dɛɛ nyin ó ɛ saraha baa fuah, kɛɛ saraha te bɛlbwa, 9dɛ o ta a ne n Dea Cheremibɔr doonyoa balɛ ba ɛ saraha tɛ mɛ naa, a chɛ kɛ bá pere naate le o nɛra bini.

10Israel te, kɛɛ hɔɔh bɛlbwa waa soɡe he bini dɛɛ di ol chal la, n sie ɛɛ beɡre naate nɛɛ dɛ́ pero le o nɛra bini. 11Komɛlbwa o siwi aa lole la mkpa lɔ o chal ta, a waa n kpɔ tɛ heyaa kɛŋɔ hé kpɔ soŋe he wechɔɡa saraha kon ta la. Chal laanee bá kpɔ soŋe nɛn wechɔɡa dɛɛ tɛo wɛɛ dɔ mkpa.#Hib 9:22, 28 12A waa n ŋɔ he Israel tena ne nɛŋhɔɔhra baa soɡe he bini bɛlbwa bɛ chal di la.

13Israel te bɛlbwa kɛɛ hɔɔh bɛlbwa waa soɡe he bini dɛ la kpaah bɔr ka kpo ol, kɛɛ jumbie waa wera ne dii la, ó teŋe o baŋa o chal bwa le, dɛ́ ɛ teera tɔ a ta, 14dɛkalkɛ komɛlbwa mkpa lɔ o chal ta. A waa n ŋɔ Israel tena be ŋɔ bɛlbwa bɛ ol ne o chal di la. Nomɛlbwa waa ɛ ɡɛ la, mɛɛ pero le n nɛra bini.

15Nomɛlbwa waa ɛ bwɛɛlembie kɛɛ hɔɔh dɛ di ol waa sewa, kɛɛ kpɔɡ bini olchɔɡe aa lawɔ o ka kpɔ o kabora ba di la chɛ kɛŋɔ ó chɛɡɛ o laala dɛ́ sɔ ne. O kah doŋa ka tel jɔmɔra mɔɔ o doŋa la bwa le o nɛ. 16Kɛ dɛ naate ta o laala chɛɡɛ dɛ sɔ ne aa, wɛɛ dɔ a waa.”

Currently Selected:

Lewi Dea Tena 17: mzw

Highlight

Copy