Wiile 4
4
Jerusalam aa paɡra habɔɔ
1Na ɡɛ ya suuɡaswɛm sie aa chɔɡa,
suuɡaswɛm tenten o fa aa
dɛ nyɛɡle kohona la,
o ta berɛ do ɡɛ kpa.
Korowii Dea bwedɛɛɡa
a yoɡ aa kpeɡa,
peɡrɔ dɛ chɔ fɔɡbaahna.
2Na ɡɛ bwɛjen Saayɔn
bonɔɔna ba fa aa do kɛŋɔ
suuɡaswɛm a yoɡ
aa kpeɡa aa doa,
kɛ taraken, ba berɔ do kɛŋɔ
vii baa kpɔ choh mao ken.
3Kalampoŋa ɡba jemɛ ɡɛ waa
ɔr o bie
dɛ́ nyiŋi o nɛɛ ó kpeɡ.
Kɛ n nɛra Jerusalam tena
nyu bini kpeɡri ba bii nɛɛ,
kɛŋɔ taataa ken.#4:3 Nɛra dɛ lii kɛŋɔ taataa aa a bii waa dawɛ.
4Ba ɡelɔ nyɔɡre ne lɔr
kpo bechasɔɔhne
baa serewe.
Bechale ɡaaɡɔ
dɛɛ soŋe kondikwa,
kɛ nomɛlbwa aa ban tɛ.
5Nɛra ba fa aa dɔ
kondikondɛɛɡa dɛɛ di la,
lɔr kpo ba
ba serewe chɔ fɔɡbaahna.
Banɔ la baa dɛ di yɛɛ ɡe
kam kompuɡreri puldoa
dɛɛ di.
6N nɛra deŋnetɛra ɡwaa
Sodom tena Korowii
aa ɡela ba chɔɡa piɡ ba,
nomɛlbwa
aa wola wone lɛɛ ba la.
7Jerusalam sitɔɔla waa fa do
chasee kɛŋɔ yabi
aa toa ken.
Ba fa dɔ bwadabii
dɛ dɔ bokpeɡa,
dɛ je ɡe kohona.
8Kɛ taraken ba serewɔ chɔ
fɔɡbaahna
baa wola ban jemɛ.
Ba bwadabii holɔ kɛŋɔ da,
dɛ marɛ ba hoɡa.
9Banɔ la baa sewɛ laa ta la,
bɔ banɔ la lɔr aa kpoo ba.
Kondikwa bɛ toole
waa lɔr kpoo ba.
10Wenaale aa chiɡ
n nɛra nɛɛ nɔ,
a ba wedoŋa kohona
ne taeh,
hale haahna
baa dɔ tedoma
tɛ ba bii daa ba ola chwe.
11Korowii baah diu kohona,
asɛ o choŋi nii dɛ fuh
Saayɔn bwa dɛɛboo ken.
12Harɛre koranar, kɛɛ
harɛ nɔ ta nɛn bɛlbwa,
ta liire kɛŋɔ dɔma ɛɛ won
kpɔ Jerusalam doonyojena
ta jo o bini.
13Kɛ a ɡɛ waa nɔ wono chiɡ,
dɛkalkɛ a cheɡɛ Korowii
keamere ne o sɔfore
wechɔɡa ta,
nɛra baa wola wechɔɡa
bɛlbwa ɛɛ serewe.
14A ɡɛ keamere ne sɔfore la
dɛ ɡaaɡe fɔɡbaahna
kɛŋɔ nyoŋa ken.
Nɛra aa cheɡɛ ba nɛɛ
ba serewe,
ba chale do ba nɛɛ la
ɡelɔ ba kah doŋa,
anomanta, nomɛlbwa
aa won leɡ ba.
15Asɛ nɛra la nyɛɡ ba nɛɛ ŋɔ,
“Hé le ya be kaa!
Hé kah doŋa!
He bɛ yaa leɡe!”
Gɛɛ baa ba harɛre ta doe
dɛɛ ɡaaɡe,
nomɛlbwa
aa wola won lɛɛ ba.
16Korowii ɡbabirii lɔ ba peɡre,
o laa sie kpɔ ba nɛ.
Nɛra aa sɔfore duu,
baa nomonome ɡe kpɔe
dɛɛ ɛ wobɛlbwa.
17Ya ta sie nyiŋi ŋɔ
ya ken ɛɛ dɔ chae,
dɛ ba kahonɛ.
Ya cheɡɛ ya dejaŋa ta nyiŋi
kɛŋɔ, yaa dɔ harɛ bɛl nɛraa
bá ba lɛ yaa le
ya dɔma nɔn ta kahonɛ.
18Ya dɔma dɛ nyiŋi ya vala
bwa bini,
a ɡel yaa won fɔɡbaahna
kwaaraa valɛ.
Ya tɔpere telo tonɛ,
a ka tamaa ken ya serewe.
19Ba ɡbaŋre ɡwaa kɛŋɔ kee yon
le nyundua la ken,
dɛ ba tɔ ya nɛ.
Ba ti yaa bwejena dor,
dɛ ka sɔh dɛɛ kpaah yaa
pua hɛŋle ɡbo harɛ ta.
20Ba lawɛ kooro Korowii aa leo
tɛ yaa. Ya liiro kɛŋɔ o nɛɛ
yá che dɛ́ dɔ mkpa.
Onee ya yarada kɛŋɔ wɛɛ lɛ
yaa le nomɛlbwa waa ba lɔ
tɔ ya nɛɛ la be.#2We 35:25
21Edom ne Us tena,
hé hɛɡre dɛ́ ɡel he sie lɛ.
He ɡe chɔɡa dɛ ba,
hɛɛ yɛɛɡoo mumɡbal ne,
ásɛ sihiih kpo heya.
22Saayɔn tena dɔ deŋnetɛra
ba wechɔɡa wa,
Korowii aa ɡel ba lawɛ
heyaa laa ta
kaa bojaŋ harɛfale ta kpa.
Kɛ he Edom tena te,
wɛɛ tɛr he deŋnee,
dɛ́ le he nyubinikpeɡ
we-ɛɛla ne baŋ.
Currently Selected:
Wiile 4: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
