Wiile 2
2
Korowii tɛr Jerusalam tena deŋne
1Na ɡɛ Korowii aa kpɔ
o bandia ba bɔle
bwɛjen Saayɔn ta kɛŋɔ
bam, dɛ tɛr o nɛra deŋne.
O le nyundua taɡɛ Israel
wer ta harɛ.
O ta o natiɡribɔr waa ɛ
o Dea la ɡba
waa dawɛ o bandia
tɔpere la ta.
2O chɔɡ Juda harɛ
bwɛɛre bwa
o ta bɛlbwa nɛɛ sune,
dɛ chɔɡ dekpeɡa aa lɔ harɛ la
ta bwa bandia ne.
O ɡelɔ sihiih kpo koranar
ne ba harɛre.
3O cheɡɛ o bandia kohona ta,
dɛ sɔɔh Israel
nɛŋkpeɡa nyoa.
Gɛ saŋ ba dɔma aa ba
ba nɛɛ la,
o berɛ habɔɔ kpo ba,
o ta ban chae.
O baah di Israel tena nɛɛ
kohona,
o chɔɡ ba kɛŋɔ nii yon fuh
dɛ chɔɡ komɛlbwa la.
4O do kɛŋɔ dɔm waa harɛ
o to pa ba nɛ,
dɛ kpoo nɛra ba sie aa
dɛ lɛ ba nɛ
dɛɛ nyin ba kohona.
O bandia kohona la ba
Jerusalam tena nɛ.
5Korowii do kɛŋɔ dɔm dɛ
ba chɔɡ Israel harɛ.
O ɡelɔ o dekpeɡa ne
kooderemi
bwa berɛ dimɡbeeni,
dɛ kpɔ wii ne suna dii
aa wola jaɡa dɔe
ba ta Juda tena nɛ.
6O kuuɡi o Dea baa dɛ tomɔ
o bini burbur ken,
dɛ ɡel tɔpejena baa lea cheɡ
a do ɡoroŋ,
ne Ona Tɔpera bwa
ba a jaɡa.
Kooroo yoo, sɔfoo yoo
ba bwa nyɔ o danana ne.
7Korowii vɛh kon baa ɛ saraha
dɛɛ tɛo ta, dɛ ɡel o Dea
waa do ɡoroŋ la.
O ɡelɔ dɔma ba kuuɡi
kooderemi danjwɛɛre.
Dɔma la do silɛɛ lɔŋɔre bela
ba fa aa dɛ tomɛ,
kɛŋɔ tɔpejen baa lea cheɡ
tɔpere bɛl ta ken.
8Korowii siwi beɡrɔ kɛŋɔ
Saayɔn danjwɛɛ kuuɡi.
O maɡɔ cheɡ kɛŋɔ
ó chɔɡo kwaraa.
Danjwɛɛre la do
kɛŋɔ nɛra aa dɛ wi ken,
a ta bokpeɡa bɛlbwa
dɔe kpa.
9Bwɛjen la doonyojena choɡlo
dɛ huɡe harɛ,
bune baa kpɔa dɛɛ kaɡra
ɡe kuuɡi dɛ chɔɡ.
Ba lawɛ o koranar ne
nomonjena bwa laa ta
kaa harɛfala ta.
Sɔfore aa nɛra Korowii
waa baɡle,
asɛ Korowii keamere ɡe aa
won wepila na
dɛɛ le Korowii be kpa.
10Jerusalam banjeni helɔ
dɛ so harɛ jeiih ken,
ba ɛ teera do ba nyuune ta
dɛ kpɔ lweyale tɔ,
a baɡle kɛ ba dɛ di suna.
Bitoli ɡe ɡure nyuune
su harɛ.
11N wio kohona n sie bwa
ɛɛ wee mɛ,
n loo ɡe ku.
N di suna dɛ ba koh,
n nɛra chɔɡa baa chɔɡa
wa, dɛkalkɛ bechale
ne bechasɔɔhne bwa
ɡwɛɡrɔ chɔ bwɛjen la
fɔɡbaahna.
12Lɔr ne nyɔɡre ɡelɔ ba wi
dɛɛ yerɛ ba nyare,
dɛɛ choɡli bwɛɛ la
fɔɡbaahna
kɛŋɔ baa do ba bola ken,
dɛ serewe dawɛ ba nyare
nɔɔra ta.
13Akwe! Ee,
Jerusalam maa dɛ nyini
kohona, ɛrɛɛ ń bol he waɔ?
Ɛrɛɛ mɛɛ ba wona larawe
he bwara ɔ?
Nomɛlbwa ta he wenaale nɔ
dɔŋa nae bwa.
He wenaale nɔ bini luŋri
kɛŋɔ mpo vil ken,
he ta hwɛɡa bɛlbwa dɔe.
14Wepila he keamere aa naa
dɛɛ baɡle la ɛ nyosone,
ba webaɡla la neɡre, ba ta
ɡelɛ he jemɛ he wechɔɡa,
ásɛ he charɛ he we-ɛɛla,
ba bɛ hen lawɛ kaa
harɛfala ta.#Jer 5:31
15Bwɛjen Jerusalam,
nɛra baa teŋa baa
kaa nyiŋi dɛɛ mamɛ.
Ba viiɡi nyuune dɛɛ mamɛ,
chɔɡa haa chɔɡa waa
dɛ ŋɔ,
“Akwe, bwɛjen Jerusalam
waa wera kohona,
asɛ harɛre nɛra bwa sie
fa ɛɛ lɛ o nɛɛ laanee nɔ naa?”#2We 29:8
16He dɔma bwa dɛ mamɛ
dɛɛ muɡli he baah.
Ba mile nyoo dɛɛ pwee ŋɔ,
“Ya wono chɔɡo!
Tɔpere yaa
dɛ kpa laanee fini!”
17Korowii teŋɛ o nyobaɡa ta,
dɛ ɛ waa o fa aa vɔrɔwa bil
ŋɔ wɛɛ ɛo la.
O chɔɡe, o ta he nɛɛ sune,
dɛ ɡel he dɔma pɔ he nɛ,
dɛɛ di he loro,
he chɔɡa la wa.
18Bwɛjen Jerusalam,
wi yerɛ Korowii.
He danjwɛɛre do kɛŋɔ nɛn
o lole bɛl aa sewa
wɛɛ wiu ken.
Gel siniire ɛɛ yɔɔre
chɔɔ ne jwaana
kɛŋɔ nenapale,
bɛ suna dii ne wii ɡel.
19Ir jwaana bɛlbwa dɛ́ɛ wi,
dɛ́ɛ yerɛ Korowii ó chae.
Pili he bambile dɛ́ɛ
soŋo ó sune he bii nɛ,
bechale lɔr aa kpo ba
ba serewe chɔ
fɔɡbaahna la wa.
20N Naa Korowii, nyiŋi na.
Umee he ɛ ken bwa nɔ?
A chɛ kɛ haahna chwe
ba bii baa dɛ nyin
ba ola aa?
A chɛ kɛ bá kpoo sɔfore
ne Korowii keamere
he Dea la bini naa?
21Bechale ne nomonome bwa
serewɔ chɔ fɔɡbaahna,
ya dɔma kpoo bonɔɔna
ne toli laa ta.
He ta ba nɛɛ sune dɛ kpoo ba
awola he baah aa dia la.
22N Naa Korowii,
he ta nɔn yerɛ nɛra cheme
kɛŋɔ kondikonjena dii
tɔpere, asɛ ɔmee kohona
bar mɛ cheme.
Awola he baah aa dia la,
nomɛlbwa ta wone chwa
kɛɛ dɛ le a nyoa.
Dɔma kpoo n bii maa dɛɛ ba,
dɛɛ nyin ba kohona.
Currently Selected:
Wiile 2: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
