Wiile 1
1
Jerusalam suna dii
1Na ɡɛ bwɛjen Jerusalam aa
chɔ pɛɛ,
dɛ nɛra fa su o ta ɡa!
Na ɡɛ waa bera do kɛ luhaah,
o waa do sum,
dɛ o fa lɛ sɔn
harɛre nɛra bini taeh!
Bwɛjen o fa aa do kɛ
haŋkooro la,
o berɛ yom taraken.
2Jwaana bwaa wɛɛ wi kohona,
siniire ɛɛ yɔɔro.
Harɛre nɛra baa
dɛ nyinu bwa chwao,
bɛlbwa toole dɛɛ larawe
o bwara kpa.
O daamanar leo tɛ,
dɛ bwa berɛ o dɔma taraken.
3Ba fiiɡi Juda tena baa lɔ
Jerusalam kohona,
dɛ laɡ ba laa ta
kaa bojaŋ harɛ ta.
Ba lɔ harɛfala ta,
ba ta bosɔɔhna bɛlbwa dɔe.
Ba dɔma bar ba cheme,
ba ta bɔr dɔe
dɛ́ le chwa kaa.
4Ŋwɛnɛre nɛra aa kpɔ a ta
kaa tomɛ Korowii Dea
ɛo surumm
kɛŋɔ nɛra aa dɛ wi ba
nɛn bɛl waa sewa ken,
dɛkalkɛ nomɛlbwa
aa a ta kpɔ
dɛ́ ba di tɔpejena
baa lea cheɡ la kpa.
Bitoli baa dɛ ɡo yela bwara
dɛ nyɛɡ bela,
asɛ ba sɔfore ɡe ɛɛ wi.
Bwɛjen Saayɔn doonyoo
chɔ pɛɛ,
wenaale kohona do o ta.
5O dɔma pɔ o nɛ, dɛɛ di kpeɡri.
Korowiirii ŋɔa o bwara nyɛɡ
o wechɔɡa aa kana
kohona la wa.
Ba lawɛ o bii bwa laa ta kaa
harɛfala ta o dɔma siwi ta.#Jer 52:27
6Jerusalam nyanyini bwa
tonɔ.
O koranar ɡwɛɡrɔ kɛŋɔ lɔr aa
kpo ola a ɡaaɡe nyin
kondikwaa dɛ́ di kahonɛ la
ken, a chwao le
nɛra baa dɛ kpaahna
dɛɛ nyina dɛ́ kpo la sie.
7Jerusalam tena lii ɡɛ saŋ
baa lɔ wenaale ta
dɛɛ ɡaaɡe, ne kondɛɛɡa
a yoɡ aa kpeɡa
ba faa dɔa la.
Ba dɔma aa baa yoo ba
dɛ pɔ ba nɛɛ la,
nomɛlbwa toole
dɛ́ won ba lɛɛ ba.
Ba dɔma nyiŋi ba chɔɡa la
dɛɛ mam ba.
8Jerusalam do kɛ nɛn
waa ɛ wechɔɡa kohona
dɛ kah doŋa ken.
Nomɛlbwa aa jirima kpɔe
dɛɛ tɛo kpa,
dɛkalkɛ ba na o sihiih
waa dia,
ne hima waa dɛ hime
dɛ laa sie berɛ.
9Bɛlbwa na wechɔɡa waa ɛa
dɛ kpɔ doŋa kah o te,
o ta waa aa dɛ ba o nɛɛ
chiɡa kerekere waa liire.
O chola waa chola la ɔma
kohona,
nomɛlbwa toole
dɛ́ larawe o bwara.
O ŋɔ, “N Naa Korowii,
sune n nɛ,
dɛkalkɛ n dɔma pɔ n nɛ,
dɛ kpɔ wenaale ba ta n nɛ.”
10Dɔma pa o laala
a yoɡ aa kpeɡa bwa kaa.
O ɡbabir na harɛre nɛra baa
wola Korowii tomɛ aa dɛ
jo Korowii Dea la bini,
bela Korowii fe aa wola
ban ŋwɛnɛ tɛɛ kɛ ba jo.
11Jerusalam tena bwa himo
dɛɛ nyin kondikwaa dɛ́ di.
Ba kpɔ ba laala
a yoɡ aa kpeɡa
dɛɛ charɛ kondikwa,
dɛ́ won so.
Dɛ ŋɔ, “N Naa Korowii,
nyiŋi dɛ́ na wenaale
yaa lɔ a ta taraken.”#Oba 1:12
12Jerusalam wio kɛ nɛn ken,
dɛ ŋɔ
nɛra baa teŋa
baa kaa be ŋɔ,
“Hé nyiŋ mɛ,
amɔ nomɛl ɡe lole
dɛɛ na n wenaale
nɔ dɔŋa aa?
Wenaale Korowii baah
aa dia kohona
o kpɔ ba ta n nɛɛ
saŋ nɔ ta nɔ.
13Korowii ɡelɔ nii le nyundua
dɛ ba jo n bini fuh n hoɡa.
O har mɛ bel dɛ ɡel
n chole harɛ,
asɛ dɛ ɡel mɛ bela,
n do weweele ta
tɔpere bɛlbwa.
14O na n wechɔɡa bwa,
dɛ boa a nyoa, dɛ vɔwa.
O kpɔa vɔwɛ n baŋa
a tɔɡre ɡel n ɡwɛɡre.
O kpɔ mɛ do n dɔma
ba kpeɡri aa ɡwaa mɛ
nɔn ta.
15Korowii vɛh n banyoola bwa,
dɛ ɡel laa tena
ba yo n bonɔɔna,
dɛ chɔɡ ba
kɛŋɔ ba yon tiɡri ɡrepo nɔna
dɛɛ kpɔ a nee la ken.
16A waa siniire ɛɛ yɔɔ mɛ
kohona la.
Nomɛlbwa aa won larawe
n bwara, bɛlbwa ɡe
aa won do mɛ ɡbemba.
N dɔma pɔ n nɛ,
n bii ta sidawa bɛlbwa dɔe
kpa.
17Jerusalam do kɛŋɔ nɛn
waa ta nɔn dɛɛ nyin nomɛl
ó ba chao,
kɛ nomɛlbwa toole
dɛ́ ba larawe o bwara.
Korowii do nɛra baa soɡa bar
Israel, asɛ ba ba yoo laa,
dɛɛ ɛo kɛŋɔ kondoŋ
bɛl ken.
18Korowii te waa toɡrɔ tɛ mɛ,
kɛ menee vɛh waa
waa do mɛ a ta.
Hé no n be,
he nɛra haa lɔ bobɛlbwa,
dɛ́ na wenaale maa lɔ o ta.
Ba lawɛ n bonɔɔna
ne toli bwa laa ta
kaa harɛfala ta.#Jer 12:1
19N yerɛ harɛre nɛra
n ne ba nyoa aa pɛa,
kɛ ba vɛh n chae.
Nomonome ne sɔfore
serewɔ chɔ bwɛjen la
fɔɡbaahna,
kondikwaa baa ka soŋe di
dɛ́ won so la wa.
20N Naa Korowii, na n suna
maa dɛ di, n loo kuu,
n bambile chɔɡ
n wechɔɡa wa.
Nɛŋkpoa lɔ fɔɡbaahna,
hale nɛra ɛɛ serewe
deremi ta.
21Ba no n wii maa dɛ wii,
kɛ nomɛlbwa toole
dɛ́ ba larawe n bwara.
N dɔma bwa no n wenaale wa,
asɛ ba sie lɛ kɛ haa kpɔa
ba ta n nɛ.
Gel tɔpere bɛl haa baɡɛ nyoa
o waa la ba,
ásɛ ba ɡe bwara nyɛɡ
kɛ n kwaa nɔ.
22Pa ba bolchɔɡe ba wechɔɡa
baa ɛa wa, dɛ́ tɛr ba deŋne
ɡɛ haa tɛr n deŋne
n wechɔɡa waa nɔ.
N hima kan kohona
n jum jah.”
Currently Selected:
Wiile 1: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
