Joel 3
3
Korowii ɛɛ bol harɛre nɛra waa dɛ́ pa bole
1Korowii ŋɔ,
“Saŋ maa lea cheɡ la telo aa,
mɛɛ ɡeloo Juda harɛ
ne Jerusalam tena
wobɛlbwa berɛ do wer tɛɛ ba.
2Mɛɛ boa harɛre nɛra nyoa
dɛ́ ba bane Jehosafat#3:2 Jehosafat munii Korowii bole pae.
Fɛlembɔjen bini.
Belaa mɛɛ ba ń ba bol ba waa
dɛ́ pa bole,
waa bwa baa kpɔa ɛ n nɛra
Israel tena la,
dɛkalkɛ ba lɔ ba peɡre
harɛre nɛra bini
dɛ bɔne n harɛ.
3Ba ta bie n nɛra nɛ,
dɛ́ jemɛ nɛra baa dɔ
bá ɛ ba yoma, ba yoɡ
ba bibaala ne bihaahna,
dɛ kpɔ ba suuɡa bɔ
hanjwamanere ne sen kem.
4Nɛra haa lɔ bwɛjena Taaya ne Sidon dɛ harɛre aa lɔ Filisti bwa, bɔkwa waa n ne he dɔɔ? He dɛ bɔ mɛ waane maa ɛ heyaa kem kɛɛ? Dɛ kemee hɛɛ bɔ mɛ tenaa, mɛɛ ɡeloo a berɛ ba ɡure he nyu ta warane.#Emɔ 1:9-10 5Hé kpɔ n suuɡapoŋa ne suuɡaswɛm dɛ n kondɛɛɡa kaa ka cheɡ he voɡa deene bini. 6He lawɛ Juda harɛ ne Jerusalam tena le ba harɛ ta kaa bojaŋ harɛ ta, dɛ ka yoɡ ba tɛ Grik tena.
7N dɛ ba n laɡ ba le harɛre haa yoɡ ba tɛ la ta, ásɛ waa haa ɛɛ ba la ɡure he nyu ta. 8Mɛɛ yoɡ he bibaala ne bihaahnaa tɛ Juda harɛ ta tena, ásɛ ba ɡe yoɡ ba tɛ Seba tena baa soɡe bojaŋ harɛ ta la.” Korowiirii bola.
9“Hé bol harɛre nɛra be ŋɔ,
bá kpɔ ba te dɛ́ ka yo laa!
Bá yerɛ banyoola la bwa,
dɛ́ boa laa tena la
bwa nyoa bá ba yo!
10Hé kpɔ he para loɡɛ tokobie
dɛ́ beɡre he ɡoori lampeare.
Asɛ nɛra baa ɡwɛɡra ɡe ŋɔ,
‘Ya bwara kpeɡri!’#Mae 4:3
11Harɛre aa bara cheme
bwa nɛra, hé le ba
ka boa nyoa warane
fɛlembɔjen la bini.”
N Naa Korowii,
ba he banyoola ne
dɛ́ ba yoo ba.
12Harɛre ta nɛra bwa ir nyu ne,
dɛ́ ba kaa
Jehosafat Fɛlembɔjen la bini.
Belaa men Korowii ɛɛ ba bala
dɛ́ ba so,
dɛ́ bol harɛre nɛra baa bara
cheme bwa waa dɛ́ pa bole.
13Ba nyu bini kpeɡri kohona.
Teŋ ba ta kɛŋɔ mea koma
saŋ ba yon teŋni a daa la.
Tiɡri ba nɛɛ kɛŋɔ ba yon
tiɡri ɡrepo nɔna ta,
ka tel kɛŋɔ
a nee yon su kwa,
hale dɛɛ ta la.
14Nɛra kaɡboŋa
baa wola nyoa dɔe,
lɔ Jehosafat Fɛlembɔjen bini.
Dɛkalkɛ, Tɔpere Korowii
aa lea cheɡ la telo tonɛ,
fɛlembɔjen la bini.
15Korobie ne wee aa lɔ,
ásɛ bɔr bir,
weweela ɡe aa chaah kpa.#Mat 24:29
16Korowii ɛɛ kɔroo
le Saayɔn Bwejen ta,
o taa do kɛŋɔ
bwaala aa dɛ kɔɡre ken,
o le Jerusalam dɛɛ ba,
nyundua ne harɛ ɛɛ jiɡri.
Korowii ɛɛ doo kɛŋɔ
danjwɛkpeɡ ken,
ásɛ o nɛra chwa kaa marɔ.
Korowii ɛɛ swee o nɛra andɛɛɡaa
17“Anee dɛɛ ba ɡela
he jemɛ kɛŋɔ men Korowii
haa dɛ tom mɛ,
n soɡe n Saayɔn Bwejen
waa do ɡoroŋ la ta.
Jerusalam ɛ bwɛjen maa
lea cheɡ o do ɡoroŋ,
nɛŋhɔɔhra aa won ba yo
dɛ́ pɔ n nɛra nɛɛ kpa.
18Saŋ la telo aa, daa kooni ɛɛ
warɔɔ dɛ́ tɔ bwejena ta,
nae warɛ do
deŋɡarere bwa ta,
ásɛ Juda harɛ
nenabɔɔne bwa ɡe su ne.
Nenapale bɛl ɛɛ palɔɔ
le Korowii Dea
dɛ́ kaa Akaasia Fɛlembɔjen ta,
dɛ́ sɔɔh bela harɛ la bwa.
19Ijipt harɛ dɛ ba pɛɛ chɔe,
ásɛ Edom harɛ berɛ
pua hɛŋle ɡbo harɛ,
yoi baa kaa yo Juda harɛ
ta tena,
dɛ kpoo nɛra baa wola
wechɔɡa ɛɛ la wa.
20Nɛra ɛɛ so Juda ne Jerusalam
harɛ saŋ bɛlbwaa,
ka tel naanar
baa ka ba bwa saŋ.
21Nɛra baa kpoora maa wola
kpɔe kɛ ba la,
mɛɛ kpɔɔ kɛ ba,
ásɛ dɛ ka so
Saayɔn Bwejen ta.”
Currently Selected:
Joel 3: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
