Joel 2
2
Tontombɛ aa wara wa
1Hé hoh bɛla kohona Saayɔn,
Korowii bwe waa do ɡoroŋ la ta.
Hé nɛra haa lɔ harɛ ta bwa
hé ɡel he bwara ɛɛ chel,
Tɔpere Korowii aa lea cheɡ
la dɛ ba, o telo tonɛ.
2Bɔr dɛ ba bira a ɡɛ saŋ,
ásɛ baama tɔ bobɛlbwa.
Tontombɛ ɛɛ wuruu ba tɔ
bwejena ta, kɛŋɔ laa tena
baa kpeɡa kohona ken.
A dɔŋa ta chiɡe bwa,
aa chiɡ saŋ bɛlbwa ɡe bwa.
3A dɛ chɔɡ kwaa kɛŋɔ nii
yon fuh kwaa dɛ chɔɡa la.
Harɛ waa chɔ a sie do kɛ
Korowii bodɛɛɡe Eden ken,
asɛ pua hɛŋle ɡbo harɛ
chɔ a habɔɔ,
komɛlbwa
aa won chwa le a be.
4A mar do kɛŋɔ jaɡre ken,
dɛ chwa dɛɛ jah kɛŋɔ
jaɡre baa dɛ la ane laa.
5A ɡbɔɡa do
kɛŋɔ torɔɡore sii ken,
dɛ ɡah dɛɛ ɡale bwejena,
a kena ɛɛ si kɛŋɔ nii aa
dɛ fuh kpɔɡ ɛɛ parame la.
A do kɛŋɔ laa tena
baa kpeɡa kohona,
dɛ kpɔ ba te
dɛɛ la ka yo laa ken.
6A dɛ ba naa, dɛ ɔmee chole
harɛre nɛra bwa nɛ,
ásɛ bɛlbwa bambile ɛɛ
teŋe.
7A dɛ yo kɛŋɔ laa tena
aa dɛ yo nɛra ken,
dɛɛ teeh danjwɛɛre.
A bwa dɛ teŋɛ dɔŋa nɛ,
aa berɛ dɛɛ le a ŋwɛnɛ ta.
8Aa dɔŋa taɡɛ,
bɛlbwa pa sie dɛɛ kaa.
A dɛ jo bela waa kpeɡa dɛ́ le,
wobɛlbwa aa wola an ɛ.
9A iro kpɔ bwɛjen la
danjwɛɛre ta
dɛ ka jo deene bini,
kɛŋɔ ŋwɛɛra yon kpɔ
tokorore ta
dɛɛ jo deene bini la.
10A dɛ ba naa, dɛ harɛ dɛ jiɡri,
nyundua ɡe ɛɛ yiiɡi.
Biro dɛ tɔ wee ne korobie ta,
weweela ɡe
aa won chaah kpa.
11Korowii tɔ o laa tena sie
dɛ nyɛɡ,
a do kɛŋɔ bwaala
aa kɔra ken,
o laa tena la ta nyoa dɔe,
ba ɛ banyoola dɛɛ no
o deŋna wa.
Tɔpere Korowii aa lea cheɡ la
ɔma kohona.
Umee dɛ́ won che
a nyoa ɔ?#Mal 3:2
Liire chara wa
12Korowii ŋɔ, “A ta mun kae,
hé charɛ he liire,
dɛ́ kpɔ he bambile bwa
tɛ mɛ, dɛ́ vɔwɛ nyoa
dɛɛ wi kohona.#Mma 4:30
13He bɛ he laala kɛɛ á baɡle
he suna dii,
hé ɡel he suna dii baɡle
kɛ he bambile chɔɡɔ.”
Hé charɛ he liire dɛ́ berɛ ba
Korowii haa dɛ tomɔ be,
o bambile too
dɛ dɔ tedoma tɛ nɛn.
O baah aa di warawara,
o nyina ta jaɡa dɔe.
O kpɔ nɛra wechɔɡa
dɛɛ kɛ ba saŋ bɛlbwa,
waa wola ba deŋne tɛr.
14O ken ɛɛ na ya sumii
dɛ́ charɛ o liire,
dɛ́ swee yaa andɛɛɡa,
ásɛ ya dɔ mea
ne sen kohona
dɛ́ kpɔ ba ɛ sarahare tɛo.
15Hé hoh bɛla Saayɔn Bwejen
ta, dɛ́ boa nɛra nyoa,
bá vɔwɛ nyoa á baɡle
kɛ ba dɛ di suna.
16Hé boa nɛra la nyoa,
dɛ́ laa ba doŋa kpɔ ba nɛ.
Hé boa nomonome nyoa,
dɛ́ yerɛ bechale
bá ba cheme,
hale bechasɔɔhne
baa dɛ ɔr.
Hanfale ne o jaa le ba dea
baa soɡe o bini ba.
17Hé sɔfore haa dɛ tomɛ
Korowii
o Dea doonyoa ne
saraha kon baah ta la,
hé wi dɛ́ soŋo ŋɔ,
“Ya Naa Korowii, sune yan
yaa ɛ he nɛra nɛ,
bɛ ɡel harɛ nɛra bane
mamɛ yaa
dɛ́ ŋɔ, ‘Leperaa Korowii
haa dɛ tomɔ la dɔɔ?’ ”
Korowii berɔ ɡel harɛ la do som
18Anee ɡela Korowii sie ba
o nɛra nɛ,
dɛ sune ba nɛ harɛ la ta.
19Korowii chaŋ ba ŋɔ,
“Mɛɛ tɛ heyaa mea ne
senfala ne ɔleve noo
kohonaa a maɡre he ne.
Maa ɡel harɛre ta nɛra
mamɛ heyaa kpa.
20Mɛɛ doŋi tontombɛ
aa do kɛŋɔ laa tena,
dɛ le weekaŋle nyunduabɔr
laanee le he be,
dɛ́ taɡɛ ane ka ta
pua hɛŋle ɡbo harɛ ta,
ásɛ dɛ taɡɛ anla aa tɔ sie
la ka ta Yar Mpo ta.
Anɔ la aa lɔ habɔɔ ɡe,
n taɡa
ka ta Mɛdetereenea Mpo ta.
Aa serewoo dɛ́ pɔh,
ásɛ a sɔɔh kaa nyundua.”
Kasinteŋ, Korowii ɛ wejena.
21Harɛ, bɛ ɔmɛ,
ɡel he sie lɛ he hɛɡre.
Kasinteŋ, Korowii ɛ wejena.
22Kpɔɡ bini ola, he bɛ ɔmɛ,
ola dibɔra kpɔɡa dɛ moɡɛ.
Daa ɡe ɛɛ nɔnɛ,
fiɡ ne ɡrepo nɔna ɡe warɛ.
23Saayɔn tena, hé ɡel he sie lɛ,
hɛɛ hɛɡre Korowii
haa dɛ tomɛ nɛ
yoo bwaala ne bwaala loɡla
waa tɛ heya kɛrɛdɛ wa.
O ɡelɔ bwaala nɛ heyaa
kohona.
24Mea lɔbɔra bwa ɛɛ su meaa,
ásɛ ɔleve noo ne senfala
su vɛɛhna dɛ́ɛ ta.
25Korowii berɔ ŋɔ,
“Mɛɛ bɔ heyaa kwaa tontombɛ
la aa baa chɔɡ la kemee,
anɔ la aa wara ne anjeɡre la,
ne ane ɡe aa bera teŋɛ
dɛ ba di,
asɛ ane ɡe kapa ka mun ba
dɛ ba di a kabora la.
Men Korowiirii
kpɔ tontombɛ aa do kɛŋɔ
laa tena nɔ ba ta he nɛ.
26Hɛɛ dɔ kondikwa kohonaa
di dɛ́ vaɡre,
ásɛ dɛ kpɛɛ Korowii
haa dɛ tomɔ la,
o ɛ nyokpowaa tɛ heya,
sihiih aa n nɛraa kpo kpa.
27Anee dɛ́ ɡel he jemɛ kɛ
n ja he nɛɛ Israel harɛ,
menee Korowii
haa dɛ tom mɛ,
nomɛlbwa toole kpa.
Sihiih aa n nɛraa kpo bwa.”
Tɔpere Korowii aa lea cheɡ
28Korowii berɔ ŋɔ,
“A habɔɔ la, mɛɛ tɛ
nɛra bwa soo siwii
n Doma la kohonaa, #Aes 32:15
ásɛ he bibaala ne bihaahna
bwa bol n waa aa dɛ ba
chiɡa kerekere la,
ásɛ he bonɔɔna na chaahna,
ásɛ he banjeni dee deera. #Weɛ 2:17-21
29Gɛ saŋ la, mɛɛ ɡeloo n
Doma ba so n bonɔɔna ne
toli bwa nɛ.
30Mɛɛ ɛ nyokpowaa nyundua
ne harɛ taa,
ásɛ nɛra na chal
ne nii ne ninchuu kohona.
31Wee dɛ ba bira,
ásɛ korobie swɛɛ
kɛŋɔ chal ken,
mɔɔ Korowii Tɔpejen waa
do ɔma la ba.
32Ásɛ nomɛlbwa waa wi
yerɛ men Korowii la,
mɛɛ lɛo.
Saayɔn Bwejen ne Jerusalam
taa nɛra ɛɛ ba ba nyu dɔe,
ɡɛ men Korowii
aa bola ŋɔ,
‘Ba bini bane ɛɛ chwao
le Jerusalam,
kɛ banɔ la maa lee ba
tɛ n te la ɛɛ dɔ ba nyuu.’ ”
Currently Selected:
Joel 2: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
