Jeremia 50
50
Gɛ Korowii aa bol Babelɔn harɛ wa
1Korowii cheɡɛ men o keame Jeremia nɛɛ dɛ bol Babelɔn harɛ ne nɛra baa lɔ o ta waa ŋɔ,
2“Bol Babelɔn harɛ waa
baɡle harɛre nɛra bwa.
Ir fraŋkaa, á baɡle waa
aa dɛ ba!
Bɛ wobɛlbwa kpɔ sɔh,
ŋɔ, ‘Babelɔn dɛ́ ba paɡra.
Baa paɡre ba voɡ
Maadukuu,
ásɛ sihiih kpo Babelɔn
harɛ voɡa
aa ɛ kii kwaa la bwa.’
3Harɛ bɛl nɛra ɛɛ le
weekaŋle nyunduabɔree,
dɛ́ ba yo Babelɔn
harɛ tena,
ásɛ harɛ la bwa chɔ pɛɛ.
Nomɛlbwa aa kae
ba dɛ́ so o ta,
nɛra ne kondɛɛra bwa
dɛ́ ba chwae.”
4Korowii ŋɔ,
“Awola tɔpere la telo aa,
Israel ne Juda tena bwa
ɛɛ pɛo dɛɛ wi,
dɛɛ ɡaaɡe men Korowii
baa dɛ tom mɛ bɔr.#Ɛsr 8:21-23
5Baa bɔɔ Saayɔn ŋwɛnɛ waa,
dɛ́ kpɔ sie chaɡɛ bela kaa.
Baa kpɔ ba tenee ba pɛl
men Korowii,
ásɛ n ne ba fɔwɛ fɔo waa
do le saŋ bɛlbwa dɛɛ la,
baa wola o waa soh bwa.
6N nɛra do kɛŋɔ peera
a teɡra aa ɡela a
nyoɡre ken,
dɛ ɡel a do bwejena dor
dɛɛ ɡaaɡe.
A lɔ bwejena ne deŋɡarere ta
dɛɛ ɡaaɡe,
dɛ soh bela aa dɛ chɔ wa.
7Nomɛlbwa waa ka puu ba la
dɛ́ yoo ba.
Ba dɔma yon ŋɔ,
‘Ya ta bolchɔɡe dii,
dɛkalkɛ ba ɛ wechɔɡa dɛ jo
Korowii waa tɛɛ ba
kondikwaa la nɛ,
Korowii ba naawa fa aa
kpɔ ba hwɛɡa bwa
do o nɛɛ kohona la.’
8N nɛra Israel tena,
hé chwa le Babelɔn harɛ ta,
he bɛ ɡel nomɛl ba tɔ
he sie, hé tɔ sie le kaa.
9Mɛɛ do harɛre nɛra baa
pɛ nyoa dɛ do kpeɡrii
le weekaŋle nyunduabɔr,
bá bar Babelɔn tena
cheme, dɛ́ yoo ba,
dɛ́ pɔ ba nɛ.
Ba do kɛŋɔ kpaahna baa jemɛ
hɛma tae kɛrɛdɛ,
baa wola tae dɛɛ kur.
10Gɛɛ baa ba Babelɔn harɛ tena
yoi dɛ́ pa ba laala,
ásɛ bɛlbwa dɔ ɡɛ
waa dɛ nyin.
Men Korowiirii bola.”
11Korowii ŋɔ,
“Babelɔn harɛ tena,
he baa pa n nɛra laala
laa ta kaa,
asɛ he sie lɛ hɛɛ hɛɡre kɛŋɔ
nao waa dɛ tiɡri mea,
kɛɛ jaɡ-bala aa dɛ dooɡe
lɔŋɔre ken.
12Kɛ sihiih ɛɛ kpo he
bwɛjen Babelɔn tenaa,
harɛ baa lolɛ heya o ta la
ɛɛ di nchoo.
Babelɔn harɛ ɛɛ do jeɡaa
harɛre bwa binii,
dɛ́ berɛ pua hɛŋle ɡbo harɛ,
dɛ́ hol chɔ, nee kwara
aa wola o taa do.
13N bandia nomanta,
nomɛlbwa aa Babelɔn harɛ
ta soɡa ba,
wɛɛ berɛ dimɡbiaa,
ásɛ nɛra baa teŋa baa kaa
na, ba bambile teŋe
ba nyoa kpo.
14Nɛra haa jemɛ hɛma
tae bwa,
hé kpɔ he te dɛ́ ka bar
bwɛjen Babelɔn cheme.
Hé ta nɛra baa lɔ
o bini hɛma,
he bɛ ɡel ane ka,
dɛkalkɛ ba ɛ wechɔɡa
dɛ jo men Korowii nɛ.
15Hé pa mun ka yo bwɛjen
Babelɔn tena dɛɛ do
laa lɔŋɔre,
Babelɔn tena sɛoh dɛ ba
ba te ne harɛ,
ba dekpeɡa ne danjwɛɛre
bwa kuuɡo.
A ɛ kembɔr men Korowii
aa kpɔa dɛɛ tɛr ba deŋne,
bɛlbwa ɡe tɛr ba deŋne
bɔ kem.
Hé ɛɛ ba ɡɛ tenten
baa ɛ ba bala la.
16He bɛ ɡel ba du kwaa harɛ
la ta, kɛɛ dɛ komɛ kwa.
Hɔɔh bɛlbwa waa soɡe bela
ɛɛ ɔmɛ
laa tena baa ba yo harɛ la
nɛra laanee,
ásɛ dɛ bwa berɛ
kaa ba harɛre ta.
17Israel tena do kɛŋɔ kondɛɛra
nyujentena aa chwaa teŋɛ
a nɛɛ a peɡre ken.
Asiiria koojen do kɛ nyujente
dɛ lawɛ Israel tena,#2Ko 17:6
asɛ naate waa ka mun
paɡre Israel tena hoɡa
laanee Babelɔn Kooro
Nebukadnesa.”#2Ko 24:10
18Anomanta, Koranar Bwa Kooro, Israel tena aa dɛ tomɔ la ŋɔ,
“Mɛɛ tɛr Babelɔn kooro
deŋnee,
dɛ́ chɔɡ o harɛ ɡe,
ɡɛ maa tɛr Asiiria koojen
deŋne la.
19Kɛ mɛɛ berɔɔ lawɛ Israel
tena ba ba harɛ ta,
ásɛ ba baa di kondikwaa
aa lɔ Kaamɛl Bwejen
ne Basan harɛ ta.
Baa di kondikwaa ɡɛ bwa
baa dɛ nyin
Efrem ne Gelead
deŋɡarere ta.
20A ɡɛ saŋ ne awola tɔpere la,
baa nyiŋi waa aa ɡela
Israel tena di bolchɔɡee,
kɛ baa bolchɔɡe baa dia
bɛlbwaa na,
dɛ́ nyiŋi Juda tena ɡe
wechɔɡa
baa wobɛlbwaa na,
dɛkalkɛ mɛɛ kpɔ n nɛra
baa kaa la wechɔɡaa kɛ ba.
21Hé ir dɛ́ yo Merataim
ne Pɛkɔd tena.
Hé ti ba, ásɛ dɛ kpoo ba,
dɛ́ chɔɡ ba kwaraa.
Hé ɛ ɡɛ maa do heyaa bwa.
Men Korowiirii bola.
22Laa ɡbɔɡa ɡboo su harɛ la ta
bwa,
chɔɡa tenten ɡbɔɡaa
yaa no!
23Na Babelɔn o fa aa do kɛŋɔ
hamba, dɛɛ paɡre harɛ
nɔ bwa la aa kuuɡa ɡɛ!
Na ɡɛ harɛ la bwa aa chɔ pɛɛ,
asɛ harɛre nɛra bwa na ba
nyoa kpo.
24Babelɔn tena, n harɛ
heya bel, he ne ŋɔ he jemɛ
dɛ o lawɛ heya,
ba nyin he bɔr dɛ lawɛ heya,
dɛkalkɛ he vɛh men
Korowii waa la noe.
25Men Korowii pili dea n
dɔmkwa aa lɔ o bini,
dɛ pa n bandia dɔmkwaa le,
dɛkalkɛ men
Koranar Bwa Kooro
dɔ toma dɛɛ la ka ɛ
Babelɔn harɛ ta.
26Hé le bojaŋa dɛ́ ba yo
Babelɔn tena,
dɛ́ paɡre deene baa dɛ
cheɡ mea a bini,
dɛ́ boa a nyoa a daŋɛ,
dɛ́ chɔɡa kwaraa
he bɛ komɛlbwa ɡel.
27Hé kpoo ba laa tena bwa.
Babelɔn tena bwɛɛlɛ!
Ba deŋnetɛra tɔpere telo.”
28Nɛra baa chwaa le
Babelɔn harɛ dɛ ba
Jerusalam la dɛ bol ŋɔ,
Korowii baa dɛ tomɔ la
dɛ́ ba ba bɔ Babelɔn tena
kem, chɔɡa baa chɔɡ
Korowii Dea la wa.
29“Hé yerɛ nɛra baa jemɛ
hɛma tae bwa
bá ba yo Babelɔn tena.
Hé bar bwɛjen la cheme,
he bɛ ɡel bɛlbwa dɔ bɔr
chwa le.
Hé bɔ ba kem ɡɛ
ba we-ɛɛla aa doa,
ɡɛ baa kpɔa ɛ ba bala la,
dɛkalkɛ ba vɛh men Korowii,
Israel Nɛŋɡoroŋ la.
30Gɛ nomanta, baa kpoo
Babelɔn bonɔɔna
fɔɡbaahnaa,
ásɛ o laa tena bwa
ɡe serewe awola tɔpere.
Men Korowiirii bola.
31Babelɔn harɛ tena,
he ɛ mbarafo,
men Korowii,
Koranar Bwa Kooro
ne he dɔɔ.
Dɛkalkɛ he tɔpere telo
kɛŋɔ ń tɛr he deŋne.
32He harɛ nɛra baa dɛ ɛ
mbarafo la ɛɛ lɔ naa
dɛ́ chole, nomɛlbwa toole
dɛ́ cha heya he ir.
Mɛɛ ɡeloo ba fuh he bwɛjena,
ásɛ komɛlbwa aa bar
heyaa cheme ɡe fuh.”
33Waa Koranar Bwa Kooro aa dɛ bol laanee nɔ,
“Ba dɛ fiiɡi Israel
ne Juda tena.
Nɛra baa laɡ ba
dɛ tɔ ba ŋwɛnɛ,
dɛ ŋɔ baa ɡel ba kaa.
34Kɛ ba Lɛɛ la kpeɡri,
o sɔne Koranar Bwa Kooro.
Wɛɛ yoo kohona dɛ́ lɛɛ ba,
ásɛ ba dɔ bosɔɔhna
ba harɛ ta,
kɛ Babelɔn tena te,
ba bwaraa dɛɛ ba nyɛɡa.”
35Korowii ŋɔ,
“Hé ka yo Babelɔn tena!
Hé ka kpoo nɛra baa soɡe
Babelɔn, ne ba nomonome,
dɛ wejerema bwa!
36Hé ka kpoo keame
nyosonteŋna la.
Ba ɡɛnɔ kohona!
Hé ka kpoo ba banyoola.
Ɔmee kohona chole ba nɛ.
37Hé chɔɡ ba jaɡre ne kwaa
aa do kɛ torɔɡore la!
Hé ka kpoo laa tena
baa ba dɛ cha ba la bwa!
Hé na ɡɛ baa ɡwɛɡra!
Hé chɔɡ deene baa dɛ cheɡ
laala a yoɡ aa kpeɡa a bini.
Baa paa
kɛŋɔ laa ta kwaa kaa.
38Hwél che ba harɛ ta,
ásɛ o neerare bwa hweeh.
Voɡa aa lɔ harɛ la ta warɔ,
a kpɔ ɔmee kohona ba ta
harɛ la nɛra nɛɛ ba ɡɛn.
39Pua hɛŋle ɡbo harɛ olaa
dɛ́ ba so Babelɔn harɛ ta,
ásɛ kwiure#50:39 Kwiure nɔ ɛɛ wonoo che tɛ kwaa aa bea ne daa bii yaa wola won naa siwi ne. ɡe so bela.
Naanar baa ka ba bwa
aa belaa
ba so kpa saŋ bɛlbwa
dɛɛ la.
40Gɛ maa chɔɡ Sodom
ne Gomoora ne bwɛɛre
aa bara cheme la,
ɡɛɛ mɛɛ ba Babelɔn harɛ
chɔɡa, ásɛ nomɛlbwa
aa won so bela kpa.
Men Nemenɛ Korowiirii bola.
41Hé nyiŋi na! Laa tena
le weekaŋle nyunduabɔr
dɛɛ ba, harɛ o nɛra aa kana
o koranar warɛ
kpɔ ba te le harɛ jaɡa
dɛɛ ba ba yo laa.
42Ba kpoŋe tori ne lampeare,
ba nyu bini kpeɡri baa
wola nɛn nɛɛ sune.
Ba soɡe jaɡre ta a nakpale
ɛɛ si kɛŋɔ mpo nehɛma
aa dɛ ta ken.
Ba kpɔ ba te dɛɛ ba
ba yo Babelɔn tena.
43Babelɔn kooro no ba wa,
ɔmee ɡel o bwara yɔr.
Weweele ne bambiteŋa
ɡel o ɔmɛ kɛŋɔ
haah loltea aa lɔɔ ken.
44Gɛ nyujente yon le Jɔɔdan
Moo kɔr bini ba kaa
harɛdɛɛɡe ta ka di la,
ɡɛɛ men Korowii ɛɛ ba
Babelɔn tena doŋa le
ba harɛ ta.
Ásɛ nomoa maa leo la
tɔ ba sie dɛɛ nyiŋi ba nɛ.
Umee
bá won kpɔ maɡ mɛ nɔ?
Nomɛlbwa
aa won tɔŋle mɛ.
Kooro besoo dɛ́ won che
n sie nɔ?
45Anomanta, hé no bwɛjen
Babelɔn vɔrɔwa
men Korowii
aa dɛ vɔrɔwe wa.
Hale ba bii bwa, baa laɡ
ba laa taa kaa,
ásɛ ɔmee ne bambiteŋa
chole ba nɛ.
46Babelɔn harɛ baa paɡre
tonaa, harɛ ɛɛ jiɡruu,
ásɛ harɛre nɛra ɛɛ no
Babelɔn tena lɔŋɔre.”
Currently Selected:
Jeremia 50: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
