Jeremia 49
49
Gɛ Korowii aa bol Amɔn tena wa
1Gɛ Korowii aa bol Amɔn tena waa laanee nɔ.
“Baala toole Israel harɛ
ta kpa, dɛ́ kpɔ harɛ la ɛ ba
kapɛrɛ kon kɛɛ?
Ɛrɛɛ nɛra baa dɛ tomɛ
voɡ Molɛk berɛ ba lɛ Gad
dea harɛ dɛ so o ta nɔɔ?
2Kɛ tɔpera ane dɛ ba,
ásɛ n ɡel nɛra baa lɔ
Amɔn harɛ bwɛjen Raba no
laa lɔŋɔre.
Bwɛjen la ɛɛ paɡroo
dɛ́ berɛ dimɡbia,
ásɛ o bwɛjeɡre
aa baro bwa ɡe fuh.
Belaa Israel tena ɛɛ ba
banɔ la ba fa aa doŋ ba le
ba harɛ ta la doŋa le.
Men Korowiirii bola.
3Hɛsbɔn tena, hé do lɔŋɔre
bwɛjen Ai chɔɡa wa.
Nɛra haa lɔ bwɛjen Raba,
hé ɡe wi!
Hé kpɔ lweyale tɔ dɛɛ wi,
dɛɛ chwa bobɛlbwa
yalayala ken,
dɛkalkɛ baa kpɔ he
voɡ Molɛk
ne o kerekpoŋra,
dɛ nomonome bwaa
kaa bojaŋ harɛfale ta.
4He nɛra he wa aa wola
kasinteŋ dɔe,
ɛrɛɛ hɛɛ ɛ mbarafo he
fɛlembɔjena aa do wer
kohona waɔ?
He kpɔ he hwɛɡa do
he kondɔɔh ta dɛ ŋɔ,
‘Nomɛlbwa aa won ba
yo yaa.’ ”
5Korowii,
Koranar Bwa Kooro ŋɔ,
“Mɛɛ ɡeloo
nɛra baa bar heyaa cheme
kpɔ ɔmee kohona ba ta
he nɛ.
Baa doŋi he bwaa le,
bɛlbwa aa kae ba
dɛ́ boa nɛra baa koh laa
waa chwa la nyoa.
6Kɛ a habɔɔ la, mɛɛ berɔ ɡel
Amɔn tena wobɛlbwa berɛ
do wer tɛɛ ba.
Men Korowiirii bola.”
Gɛ Korowii aa bol Edom tena wa
7Gɛ Koranar Bwa Kooro aa dɛ bol Edom tena wa laanee nɔ.
“Wejerema toole Teman waa
lɔ Edom harɛ ta kpa aa?
Nɛra toole
dɛ́ won ja nɛra kpa kɛɛ?
Ba wejema bwa ɛ pɛɛpɛɛ aa?
8Bwɛjen Dedan tena,
hé laa berɛ dɛ́ chwa!
Hé ka sɔh bwebɔɔne
aa luŋa bini,
n dɛ ba Esɔ naanar chɔɡa,
dɛkalkɛ tɔpere telo kɛ
ń tɛr ba deŋne.
9Nɛra dɛ chaa ɡrepo nɔna aa,
ba dɛ ɡel tama a daa ta.
Dɛ ŋwɛɛra balɔ jwaana aa,
anɔ la baa dɛ nyin ɡbo
laa ba yon kpɔ kaa laa?
10Mɛɛ laa komɛlbwa Esɔ
naanar aa dɔa lɛ ba be,
dɛ́ ɡel bela baa sɔah
chɔ baŋ,
nɛra bwa ɛɛ na baa,
baa wola sɔɔhbɔraa dɔ kpa.
Ba bii ne lolanar, dɛ ba
bala bwa ɛɛ serewoo,
ba bini beŋkpoŋ kwara
aa wola ka.
11Hé ɡel he bilalbii
waa do n nɔn ta,
mɛɛ kpɔ nɔnee tɔ ba nɛ.
He luhaahna ɡe bwa ɛɛ won
kpɔ ba hwɛɡa bwa do n nɛ.”
12Waa Korowii aa dɛ bol laanee nɔ. “Dɛ nɛra baa wola chɛɛ kɛŋɔ ń tɛr ba deŋne nyɔ n danana nee aa, ɛrɛɛ maa wola won tɛr he deŋne ɔ? Haa won le deŋnetɛra la nyoa, a chɛ kɛ hé nyɔ n danana ne. 13N ŋwɛɛ n ɡbaɡba kɛŋɔ bwɛjen Bosra ɛɛ paɡroo dɛ́ berɛ dimɡbia, ásɛ dɛ berɛ kon nɛra aa na dɛɛ mamɛ, dɛɛ taahno ba bambile teŋe kohona. Bwɛɛre aa baro bwa ɡe ɛɛ chɔɡoo kwaraa saŋ bɛlbwa dɛɛ la. Men Korowiirii bola.”
14Men Jeremia no Edom waa
le Korowii be o ŋɔ,
“N tomɛ torome bɛl
harɛre nɛra be ŋɔ,
‘Hé boa he nyoa
dɛ́ ir ka yo Edom tena!
Hé ir ka yoo ba laa!
15Mɛɛ ɡeloo he nɛra ɡwɛɡre
harɛre nɛra bwa bini,
ásɛ ba haeh,
dɛɛ nyiŋi he nyubaah.
16He mbarafo neɡre
heya kohona,
he dɛ lii kɛ nomɛlbwa
dɛ́ ɔmɛ heya,
he dɛ neɡre he te.
He soɡe bɔɔne bini
bwejena dor.
A lole kɛ he soŋnibɔr
lɔ nyundua,
kɛŋɔ kee yon
ka sɔh o kɔr nyundujaɡla la,
kɛ mɛɛ ɡeloo he le bela
le harɛ.’#Oba 1:3-4
17Edom harɛ dɛ ba kon
waa do ɔma bera,
ásɛ nɛra baa teŋa
baa kaa na,
dɛ́ ɔmɛ ba nyoa kpo,
o nɛra bola baa do ba wa.
18Gɛ maa chɔɡ Sodom
ne Gomoora ne bwɛɛre
aa bara cheme la,
ɡɛɛ mɛɛ ba Edom harɛ
chɔɡa, ásɛ nomɛlbwa
aa won so bela kpa.
Men Nemenɛ Korowiirii bola.
19Gɛ nyujente yon le Jɔɔdan
Moo kɔr bini ba kaa
harɛdɛɛɡe ta ka di la,
ɡɛɛ men Korowii ɛɛ ba Edom
tena doŋa le ba harɛ ta.
Ásɛ nomoa maa leo la
tɔ ba sie dɛɛ nyiŋi ba nɛ.
Umee bá won kpɔ
maɡ mɛ nɔ?
Nomɛlbwa aa won tɔŋle mɛ.
Kooro besoo
dɛ́ won che n sie nɔ?
20Anomanta,
hé no Edom tena
vɔrɔwa men Korowii
aa dɛ vɔrɔwe wa,
ne ɡɛ maa dɛ nyin
n ɛ bwɛjen Teman tena.
Hale ba bii bwa, baa laɡ
ba laa taa kaa,
ásɛ ɔmee ne bambiteŋa
chole ba nɛ.
21Edom harɛ baa paɡre tonaa,
harɛ ɛɛ jiɡruu
ásɛ harɛre nɛra ɛɛ no
Edom tena lɔŋɔre,
hale dɛ ka le Mposwɛm ta.
22Hé na, dɔma dɛ́ ba ba yo
Bosra tena, kɛŋɔ kee yon
le nyundua dɛ́ paɡri kena
dɛ́ ba ta jal la ken.
Awola tɔpere la,
Edom banyoola
ɛɛ ɔmɔɔ kohona,
kɛŋɔ haah loltea
aa lɔɔ la ken.”
Gɛ Korowii aa bol Damaskɔs tena wa
23Korowii bol bwɛjen Damaskɔs tena waa dɛ ŋɔ,
“Bwɛjena Hamat ne Aapad
tena liire chɔɡɔ,
dɛkalkɛ ba ta
amanesoma noɛ.
Ba bambile dɛ wure
kɛŋɔ mpo nehɛma aa taa
dɛɛ kaa bobɛlbwa ken.
24Damaskɔs tena ɡwɛɡrɔ,
ba kpɔ ɔmee chwa kaa,
asɛ bochela ne weweele
su ba bwa,
kɛŋɔ haah loltea aa
lɔɔ la ken.
25Ba chwao ɡel bwɛjen o sɔn
fa aa lea,
bwɛɛ men Korowii sie aa
dɛ lɛ o ta kohona.
26Awola tɔpere la,
Damaskɔs bonɔɔna
ɛɛ serewoo chɔ fɔɡbaahna,
ásɛ ba kpoo o laa tena bwa.
Men Koranar Bwa Kooroo bola.
27Mɛɛ do nii
Damaskɔs danjwɛɛre taa,
ásɛ a fuh Kooro Bɛn Hadad
koodem dekpeɡa.”
Gɛ Korowii aa bol Keda ne Hasɔ tena wa
28Korowii bol Keda dea tena ne Hasɔ harɛre Babelɔn Kooro Nebukadnesa aa yoa dɛ pɔ ba nɛɛ la waa ŋɔ,
“Hé ir, dɛ́ ka yo Keda tena,
dɛ́ kpoo nɛra baa soɡe
pua hɛŋle ɡbo harɛ ta
wee leebɔr.
29Hé kpɔ ba tɛnte deene
ne a pateesanre,
dɛ ba peera bwa kaa,
hale ba laala
ne nyoɡmare bwa.
Ásɛ dɛ ŋɔ ba be ŋɔ,
‘Ɔmee kohona bar heyaa
cheme!’
30Hasɔ tena,
hé chwa le warane kaa.
Hé chwa ka sɔh bwebɔɔne
aa luŋa bini.
Babelɔn Kooro Nebukadnesa
dɛ́ vɔrɔwe he vɔrɔwa.
31Hé ir ka yo harɛ o nɛra
aa dɛ lii kɛ ba soɡe
bosɔɔhna ta la.
Ba bwɛjen ta doonyojena
kɛɛ bune baa kpɔa
dɛɛ kara dɔe,
komɛlbwa toole dɛɛ tɔ ba
ɡbemɡbe.
32Baa lawɛ ba nyoɡmare
ne kondɛɛra aa wara
kɛŋɔ laa ta kwaa kaa.
Mɛɛ lɔ nɛra baa lɔ bojaŋa
laanee peɡre,
dɛ́ kpɔ wenaale ba ta
ba nɛɛ
le harɛ nɔ ta bobɛlbwa.
33Bwɛjen Hasɔ ɛɛ berɛ
kalampoŋare soŋnibɔree,
dɛ́ ɛ pua hɛŋle ɡbo harɛ
saŋ bɛlbwa dɛɛ la.
Nomɛlbwa aa wola won so
bela kpa.
Men Korowiirii bola.”
Gɛ Korowii aa bol Elam harɛ wa
34Korowii bol Elam harɛ waa men maa ɛ o keame Jeremia be, a ta biɡre Juda Kooro Sedekia di kora.
35Koranar Bwa Kooro ŋɔ,
“Mɛɛ kpoo nɛra baa jemɛ
hɛma tae,
dɛ ɡel Elam harɛ
do kpeɡri la bwaa.
36Mɛɛ ɡeloo dɔma
le harɛ nɔ ta bobɛlbwa
dɛ́ ba yo Elam tena laa,
dɛ́ lɔ ba peɡre bobɛlbwa,
harɛ bɛlbwa aa ka
baa wola belaa do.
37Mɛɛ kpoo Elam tenaa
ba dɔma baa dɛ nyin ba
dɛ́ kpoo sie.
Mɛɛ kpɔ n bandia kohonaa
ba ta ba nɛ,
dɛ́ ɡel laa tena ti ba
ka tel kɛŋɔ ba bwa
aa serewa.
Men Korowiirii bola.
38Mɛɛ kpoo ba koranar
ne nomonomee,
dɛ́ ba cheɡ n kora bela
dɛɛ nyiŋi ba nɛ.
39Kɛ a habɔɔ la,
mɛɛ berɔ ɡel Elam tena
wobɛlbwa do wer tɛɛ ba.
Men Korowiirii bola.”
Currently Selected:
Jeremia 49: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
