Aesaya 56
56
Harɛre nɛra bwa ɛɛ jao ɛ Korowii nɛra
1Korowii ŋɔ o nɛra be ŋɔ,
“Hɛɛ bol waa aŋwɛnɛ ta
dɛɛ ɛ waa aa toɡra.
Lɛɛ maa dɛ ba
ba lɛ heyaa la telo.
Nɛra ɛɛ nao ɡɛ n waa
aa toɡra.
2Naate waa dɛ ɛ waa nɔ
dɛ lawa kpoŋe kɛrɛdɛ,
dɛɛ di Ona Tɔpere
waa wola on chɔɡ,
dɛ lawɛ o te waa wola
wechɔɡa ɛ la, o na som.”
3Dɛ nɛŋhɔɔh kpɔ o te ja
Korowii nɛra nɛɛ aa,
o bɛ ŋɔ,
“Korowii aa men lɛ ja
o nɛra baa dɛ tomɔ nɛ.”
Nomɛlbwa baa fɔɡɛ o lur ɡe
bɛ ŋɔ, “N te heo.”
4Waa Korowii aa dɛ bol
ɡɛ nɛra la be laanee kɛŋɔ,
“Dɛ nɛra baa fɔɡɛ ba lure dɛ
di n Ona Tɔpere la,
dɛɛ ɛ waa aa dɛ su n siwi,
dɛɛ di kasinteŋ
n fɔo la ta naa,
5baa dɔ komɛl waa ɡwaa
bibaala ne bihaahnaa.
Mɛɛ ɡeloo ba sɔn ka n Dea,
dɛ́ do le saŋ bɛlbwa,
bá kpɔ dɛɛ liiru.”
6Korowii ŋɔ nɛŋhɔɔhra
baa kpɔ ba te ba pɛlo,
asɛ dɛɛ tomɔ, dɛɛ nyinu
dɛɛ yerɛ o sɔn,
dɛɛ di Ona Tɔpere baa wola
on chɔɡ,
dɛ lawɛ o fɔo la bini
kiŋkiŋ la be ŋɔ,
7“Mɛɛ la he ne Saayɔn Bwejen
waa do ɡoroŋ taa,
dɛ́ tɛ heyaa silɛɛ
n soŋebɔr bela.
N siwi ɛɛ su kwaa baa fuah
ɛ saraha dɛɛ tɛ mɛ
n saraha kon ta laanee
dɛ́ lɛa,
dɛkalkɛŋɔ baa yerɛ n Dea
Korowii soŋebɔree tɛ
harɛre nɛra bwa.”#Mak 11:17
8Nemenɛ Korowii waa tɔ
Israel tena sie dɛ le ba ne
bojaŋ harɛfale ta la ŋɔ,
“N ta ɛɛ ba bane ɡe nee,
ba ba ja ba nɛ.”#Jɔn 10:16
Korowii pwah Israel nomonome
9Korowii ŋɔ, “Harɛre
nɛra haa ɛ he te
kɛŋɔ kpɔɡ bini ola,
hé ba dɛ́ ba chɔɡ
n nɛra Israel tena.
10Nomonome baa ɛ
sitɔɔla dɛɛ daah
n nɛra Israel tena la,
ba do kɛŋɔ nyoŋa ken,
baa waa mun no.
Ba do kɛŋɔ nyootena aa wola
won wor dɛ chɔ dɛɛ dee
ɡbo, dɛɛ nyin chɔe.
11Ba do kɛŋɔ nyootena aa
dɛ di kwaa kohona
aa wola vaɡɛ bwa.
Ba do kɛ peteɡra baa wola
waa mun no.
Bɛlbwa dɛ ɛ anɔ la aa
dɛ su o siwi,
ne waa aa le tɔnɔ tɛo.
12Ba yon ŋɔ dɔŋa be ŋɔ,
‘Hé ɡel ya nyin sen nyɔ!
Hé ɡel ya nyɔ seŋkpeɡa dɛ́ dɛɛ.
Ásɛ kere ɡe yá ɛ ɡɛ ja,
á ɡwaa fini kwara.’ ”
Currently Selected:
Aesaya 56: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
