Aesaya 55
55
Korowii dɛ yerɛ nɛra nyɔɡre aa dɛ kpo ba
1Korowii ŋɔ, “Hé banɔ la
nyɔɡre aa dɛ kpo
heyaa la,
nee lole, hé ba nyɔ!#Jɔn 7:37
He ta suuɡa dɔe yaa,
hé ba, hɛɛ dɔ kondikwaa di
pɛɛpɛɛ!
Sen ne na-elnee lole,
suuɡa ne laa
baa yawa, yoɡ ɡe toole
a ta!
2Bɔkwa waa hɛɛ chɔɡ
suuɡa kwaa aa wola
kondikwaa ɛɛ ta,
dɛɛ koh kwaa aa wola vaɡɛ
ta nɔɔ?
Hé cheɡ deŋne kɛrɛdɛ dɛɛ no
waa maa dɛ baɡle heya,
ásɛ dɛ dɔ
kondikondɛɛɡa di.#Jɔn 6:27
3Hé cheɡ deŋne, dɛ́ ba n be,
hé no n be,
ásɛ dɛ dɔ mkpa.
N ne hɛɛ fɔwɛ fɔwee o do le
saŋ bɛlbwa dɛɛ la,
ɡɛ maa baɡɛ Devid
nyoa ŋɔ, mɛɛ dɛɛ nyin
o waa kasinteŋ nee la.
4Menee ɛo harɛre nɛra sitɔɔ
ne nomoa, ásɛ a che
o nɛɛ ń baɡle n kpeɡri.
5Kpelaa, hɛɛ yerɛ harɛre nɛra
baa wola hen jemɛɛ,
bá ba he be,
harɛre nɛra haa wola ban
jemɛ ɡe ɛɛ chwao
ba he be.
Men Israel Nɛŋɡoroŋ
haa dɛ tom mɛ nomanta,
baa ba he bee,
jirima
maa ɡela he dɔ la wa.”
6Hé nyin Korowii bɔr
saŋ haa nao nɔ ta,
hé yerɔ, taraken
waa bɛne heyaa nɔ.
7Nɛnchɔɡe ɡel wechɔɡa ɛɛ,
dɛ́ charɛ o liire,
dɛ́ berɛ ba Korowii yaa
dɛ tomɔ be.
O dɛ sune nɛn nɛ,
dɛ kpɔ wechɔɡa dɛɛ kɛ
o bambile bwa ne.
8Korowii ŋɔ,
“Waa haa dɛ lii laa mɛɛ lii,
he we-ɛɛla dɔŋa laa mɛɛ ɛ.#Jer 29:10
9Gɛ harɛ ne nyundua baah aa
jaŋa la,
ɡɛɛ n we-ɛɛla ne n
liire ɡwaa he kwa.
10N waa la do kɛ bwaala ne
mɛn yon le
nyundua dɛ pweh harɛ la
ken.
A ɡelɔ kwaa baa dua won ɛɛ,
nɛra dɔ kondikwaa di,
dɛ́ dɔ a dwee ɡe du.
11Gɛɛ waa aa le n nyoa ɛɛ
ba ɛɛ.
Maa bol
á berɛ ba n be pɛɛpɛɛ,
nemenɛ waa maa dɛ nyin
la bwa aa ɛa ka tonɛ.
12Silɛɛ nee hɛɛ ba Babelɔn lee,
bosɔɔhna nee baa
ba he sie tɔe
le he ne bwɛjen la ta.
Bwejena ne deŋɡarere
bwa ɛɛ nao dɛɛ ɡo yela,
daa bwa ɡe lɔ kpaŋa.
13Bela sɔɔhne aa lole la,
dajaŋa ɛɛ le a buɡ taa,
ásɛ jabalnadaŋɛre
le dadɛɛɡa buɡ ta.
Gɛ waa nɔ ɛɛ ɡeloo
Korowii dɔ sɔn kohona,
dɛ́ chɔ saŋ bɛlbwa dɛɛ lii
waa men Korowii aa ɛa.”
Currently Selected:
Aesaya 55: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
