Aesaya 5
5
Daa koo bɛl yel
1Mɛɛ ɡo nɛn maa dɛ nyinu yelee.
Gɛ yel nɔ ɛ n chamenate,
ne o daa koo yel.
O para deŋɡare harɛdɛɛɡe
bɛl ta.#Mak 12:1#Yel 80:8-13
2O buɡli harɛ la, dɛ laa bwea
aa lɔ o ta bwa pa mɔɔ
dɛ nyin dadɛɛɡa chɔɔ o ta,
dɛ chiɡri jɛŋla baa so o ta
dɛɛ kpa koo la.
O komɛ bwe bɔɔ,
bela baa ba tiɡri a nɔna ta
a nee le.
Name o soɡo dɛɛ hwɛɡɛ kɛŋɔ
aa nɔnɛ nɔndɛɛɡaa,
kɛ a berɛ nɔnɛ nɔnchɔɡa.
3Nɛra haa lɔ Jerusalam
ne Juda harɛ ta,
hé nyiŋi n ne n daa nɔ wa
bini dɛ́ na.
4A fe ta ka waane n fee ɛ daa
la ta,
asɛ n ta wone ɛ kɛɛ?
N fe dɛ nyin kɛ a nɔnɛ
nɔndɛɛɡa,
aah bɔkwaa bera ɡel
a nɔnɛ nɔnchɔɡa nɔɔ?
5Mɛɛ ɡeloo he jemɛ ɡɛ maa
dɛ ba daa la ɛɛ.
Mɛɛ laa kwaa baa kpɔa keo
laanee pa,
ásɛ kwaa dia dɛ́ chɔɡa.
Mɛɛ kuuɡi danjwɛɛ
waa baro la ɡee,
ásɛ kwaa tiɡra do harɛ.
6Mɛɛ ɡeloo harɛ la chɔ pɛɛ
maa wola belaa parɛ kpa,
maa daa la kpalaa kɛ,
ásɛ sɔɔhne
ne jabalnadaŋɛ le bela.
Maa ɡel bwaala nɛ harɛ la ta
kpa.
7Koranar Bwa Kooroo dɔ daa
koo la,
asɛ koo la che tɛ Israel
tena.
Daa la cheɡɔɔ tɛ Juda tena,
banee daa waa chɔɔra o sie
lɛ a ta la.
O fe dɛ nyin kɛ baa ɛ waa
aa wera,
asɛ ba berɛ dɛɛ kpoo nɛra.
Dɛ o dɛ nyin kɛ baa ɛ
wedɛɛɡa ɡe,
kɛ nɛra baa dɛ fiɡ ba wii
wɛɛ no.
Wechɔɡa nɛra aa dɛ ɛ
8Hé bwɛɛlɛ, he banɔ la
haa yawɛ deremi
dɛɛ ja deremi ta,
dɛ berɛ yawɛ kooni
dɛɛ ja kooni ta,
dɛ ka tel kɛŋɔ bɔr aa wola
lee do tɛ he bala,
asɛ he ɡbo lɛ harɛ dɔɔh
dɛ so.
9Nemenɛ Korowii bol waa a chole n deŋna ta. O ŋɔ,
“Kpelaa, demjena ɛɛ che
dimɡbeenii,
deremi aa kana dɛ do wer
ɛɛ cheo
nɛn aa lee do dɛ́ so a bini.
10Daa katori fi nɔna,
ɡalɔŋre anue ɡbo senee
dɛɛ ba koo la ta lee,
ásɛ kuruware lafa kondwee
haa dua la,
hale kuruwa fi kwara,
haa dɔ.”
11Hé bwɛɛlɛ, he banɔ la haa
ira chɔmbibi dɛɛ ti sen,
he banɔ la haa dɛ were sen
mun ka tel kɛŋɔ haa dɛɛra.
12Hé dɛ di kondikonjena dɛɛ lɛ
he sie aa, he dɛ lɔ janjela
dɛɛ yiiɡi kwaa dɛɛ hoh
kalipere.
Kɛ Korowii we-ɛɛla te,
haa sie a ta do,
anɔ la waa dɛ ɛ,
haa on duu.
13He waa mun bɛ noe
nomanta,
baa lawɛ heyaa kaa
harɛfale bɛl taa,
dɛ kaa do heya.
Lɔr ɛɛ kpo he bini banɔ la
baa chɔ he nyoa bá serewe,
ásɛ dansaara haa ka la,
nyɔɡre kpo heyaa
he serewe.
14Lalabwɛɛ chɔɔ dɛɛ kpaa ba,
o doonyoa pilo che.
Jerusalam nomonjena ne
dansaara ba sie aa lɛa baa
do ɡbɔɡa la bwa ɛɛ jo
belaa.
15Anomanta, sihiih ɛɛ kpo
mbarafo tenaa,
dɛ́ ba nomɛlbwa ne harɛ.
16Nemenɛ Korowii ɛɛ bol waa
dɛ́ pa bole kasinteŋ ne,
dɛ́ che a ta dɛ́ baɡle o kan
waa doa.
Wɛɛ che waa aa toɡra taa,
dɛ́ baɡle ɡɛ waa do ɡoroŋ.
17Peera ɛɛ chwe kpɔɡa bwɛɛ la
dimɡbia taa.
Bela ɛɛ berɛ
pebiiri dibɔree.
18Hé bwɛɛlɛ, he banɔ la haa
cheɡɛ nyosone ŋwɛnɛ ta,
dɛ tɛɡre wechɔɡa dɛɛ teŋɛ
he nɛ,
he banɔ la haa kpɔ
he bokpeɡa dɛɛ ɛ
nyubinikpeɡ
kɛŋɔ baa do nao ɡboɡbii
dɛɛ tɛr la.
19Hé bwɛɛlɛ he banɔ la haa dɛ
bol ŋɔ,
“Korowii, ɛ warane
dɛ́ ɛ he toma ya na.
Israel Nɛŋɡoroŋ,
baɡle he ŋwɛnɛre ya jemɛ.”
20Hé bwɛɛlɛ, he banɔ la haa
dɛ yerɛ wechɔɡa wedɛɛɡa,
dɛ berɛ dɛɛ yerɛ wedɛɛɡa
wechɔɡa,
haa kpɔ biro berɛ bochaah,
dɛ kpɔ bochaah berɛ biro.
Hé kpɔ koŋkpela berɛ
kontora,
dɛ kpɔ kontora berɛ
koŋkpela.
21Hé bwɛɛlɛ, he banɔ la haa
dɛ lii he te wejerema,
dɛɛ lii kɛŋɔ he jemɛ
wobɛlbwa ɡa la.#Rom 12:16
22Hé bwɛɛlɛ, he banɔ la haa dɛ
yerɛ he te baala
sen nyɔe ta,
he baah su haa wola sen
baa kpɔa koo
dɔŋa nyɔe ɔmɛ la.
23Hé bwɛɛlɛ, he banɔ la
wechɔɡ-ɛɛra aa dɛ yawɛ
heyaa sen hɛɛ ta ba,
dɛ́ yon pa bolsom te
bolchɔɡe la.
24Anomanta, ɡɛ ninlao yon
piɡri lawɛ jaaɡesɛɛh
dɛ́ fuah,
kɛɛ dɛ yon fuh kpɔɡhola la,
ɡɛɛ he ɡe ɛɛ ba tona
kɛŋɔ kpɔɡa lune yon pɔh
a fee ɡe hol,
peu kpɔa kaa
kɛŋɔ tutuɡ ken,
dɛkalkɛ he vɛh Nemenɛ
Korowii Mmara la,
dɛ lii Israel Nɛŋɡoroŋ waa
waa kpɔa baɡle heyaa la
wepuu.
25Anɔ bwa ɡelɔ Korowii baah
di o nɛra nɛ,
o ir nɔn dɛ́ tɛr ba deŋne.
Bwejena ɛɛ jiɡruu,
ásɛ nɛra baa serewe la lala
chɔ fɔɡbaahna
kɛŋɔ haahra ken.
Anɔ bwa habɔɔ o baah aa
sɔɔh,
o nɔn waa ira
dɛ́ tɛr ba deŋne la
ɡe ta cheɡɛ ɡɛ.
26Korowii ɡɔɔ o fraŋkaa dɛ yerɛ
nɛra le bojaŋ harɛre ta.
O foolɔ yerɛ o nɛra baa lɔ
harɛ jaɡa.
Hé na! Ba chwao dɛɛ ba
wɔrɔbe nɛ.#Mma 28:49
27Ba bini bɛlbwa aa koh,
kɛɛ baa lɔ nakpalaa.
Dom aa bɛlbwa chuɡli,
baa dom ɡe chɔ.
Kirisore baa vɔrɔwa áa foo,
ásɛ naŋɡaware baa doa ɡe
áa kɛɛ.
28Ba hɛma nyɛɡre,
ba harɛ ba tori dɛɛ ba tae.
Jaɡre baa soɡe a ta la
nafikokore kpeɡri
kɛŋɔ kwɛrboɔ ken.
Kwaa aa do kɛŋɔ torɔɡore
nakpale dɛ
kile kohona kɛŋɔ
kawulewule ken.
29Ba ɡbɔɡa do kɛŋɔ nyujentena
aa dɛ si.
Gɛ nyujente lawɛ ol dɛ́ yon
tuuɡu dɛɛ kaa dɛɛ kɔɡre la,
ɡɛɛ ba lawɛ n nɛra dɛɛ kaa,
dɛɛ ɛ, nomɛlbwa aa wola
won lɛɛ ba.
30Gɛ tɔpere la telaa,
baa do ɡbɔɡaa,
dɛ́ ba jo Israel harɛ bwa
kɛŋɔ mpo yon dɛɛ si la ken.
Dɛ he nyiŋi harɛ la aa,
hɛɛ nao kɛŋɔ bɔr biro ásɛ
sibeɡra chole
nomɛlbwa nɛ,
ásɛ biro tɔ bochaah ta.
Currently Selected:
Aesaya 5: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
