Aesaya 45
45
1Korowii le Saeros ŋɔ ó ɛ kooro, dɛ leo ŋɔ
ó pɔ harɛre nɛra nɛ.
O leo ŋɔ ó yo harɛre,
dɛ́ pɔ ba koranar nɛɛ
dɛ lɛ́ ba kpeɡri ba be.
Korowiirii dɛ́ ya bwɛjena
doonyoone ɡbeni tɛo.
O ŋɔ Saeros be ŋɔ,#Ɛsr 1:2
2“Mɛɛ tɔ he siee,
dɛ́ bur bwejena
ne deŋɡarere.
Mɛɛ paɡre ayaawa ɡberjenaa,
dɛ́ kuuɡi bune baa kpɔa
kaɡra la ɡe.
3Mɛɛ tɛɛ kondɔɔh aa sɔah
nɛra aa wola an na,
ásɛ he jemɛ kɛŋɔ menee
Korowii Israel tena
aa dɛ tom mɛ,
n yerɛ he sɔn.
4N bonɔɔnaa Israel tena n lee
ba tɛ n te nomanta,
n le he Saeros cheɡ
dɛ tɛɛ jirima kohona,
a lole kɛ dɛ haa men jemɛ.
5Menee Korowii, Dɔɔ bɛlbwa
toole kpa, nemenɛ n ɡbo.
Haa men jemɛ,
kɛ mɛɛ tɛɛ kpeɡrii.
6N ɛ ɡɛ, ásɛ le wee leebɔr kaa
o cholibɔr,
nomɛlbwa jemɛ kɛŋɔ
menee Korowii.
N habɔɔ, Dɔɔ bɛlbwa
toole kpa, nemenɛ n ɡbo.
7Menee ta bochaah
ne biro bwa,
menee dɛɛ tɛ bosɔɔhna,
dɛ berɛ dɛɛ ba sibeɡra
ɡe ne.
Men Korowii,
menee ɛ anɔ bwa.
8Mɛɛ ɡeloo wa aa toɡra le
nyundua
ba harɛ ta kɛ bwaala ken,
ásɛ waa aa wera
ne kasinteŋ do le,
Men Korowiirii ta a bwa.”
9Nɛn o ne Korowii waa tao
la aa dɛ yo la, ó bwɛɛlɛ!
Naate do kɛŋɔ vii ken.
Choh ɛɛ won ŋɔ mamaa
be ŋɔ waa o toma jemaa?
Vii ɛɛ won bɔɔ mamaa
waa aa bala o mao wa aa?#Aes 64:8; Rom 9:20
10Gɛɛ a do, nɛn waa ŋɔ o
nya ne o mɛɛ be ŋɔ,
“Ɛrɛɛ he lol mɛ
dɛ ɡel n do ken?”
11Korowii, Israel Nɛŋɡoroŋ
waa ta ba, dɛ́ jemɛ waa
aa chiɡ kerekere la ŋɔ,
“He ta ŋwɛnɛ dɔe kɛŋɔ,
hé bɔɔ mɛ n bii wa,
kɛɛ dɛ́ baɡ mɛ ɡɛ maa ɛ.
12Menee ta harɛ, dɛ ta
nɛwɛnyina do o ta.
N kpeɡrii n kpɔ baŋre
nyundua kɛŋɔ yal,
dɛ kpɔ wee ne korobie
dɛ weweela cheɡ
a chebɔra.
13Mɛɛ che toɡra n wa aa toɡra
taa, dɛ́ ɡel Saeros ir
dɛɛ ɛ waa aa toɡra
ne anɔ la maa dɛ nyin.
Mɛɛ kwaa o ŋwɛnɛree
a do wer.
Onee dɛ́ ba kwaa ma
n bwɛjen Jerusalam,
dɛ́ lɛ n nɛra baa laɡ ba
laa ta kaa harɛfala ta la.
Waa ɛ dɛ́ lɛ komɛl le nɛn be.
Men Nemenɛ Korowiirii
ŋɔa.”
14Korowii ŋɔ Israel tena be ŋɔ,
“Ijipt ne Itiopia harɛre kondɔɔh
kwaa ɛɛ ɛ he kwaa,
ásɛ Seba baala baa kpeɡa
kohona berɛ he yoma.
Baa do ba jɔɡrɔree,
ba teŋɛ he nɛ.
Baa ɡuŋi heyaa harɛɛ,
dɛ́ sɛh ŋɔ,
‘Korowii teŋɛ he nɛɛ kpela.
Dɔɔ bɛlbwa toole.’ ”
15Korowii Israel tena aa dɛ
tomɔ wɛɛ lɛɛ ba la,
o ɛ Korowii waa kpɔ o te
dɛɛ sɔh.
16Sihiih ɛɛ kpo
nɛra baa cheɡ voɡaa.
Ba bwa ɛɛ pɛo di ncho.
17Kɛ Israel tena te, Korowii
ɛɛ lɛɛ baa saŋ bɛlbwa.
Baa sihiih di,
saŋ bɛlbwa bwa.
18Korowiirii ta nyundua onee
Korowii, dɛ berɛ ta harɛ
ɡe o che kiŋkiŋ.
O ta harɛ tae o chɔ pɛɛpɛɛ,
kɛ o tao ŋɔ nɛra so o ta.
O ŋɔ, “Menee Korowii, Dɔɔ
bɛlbwa toole kpa.
19N ta wobɛlbwa bolɛ sɔh,
kɛɛ dɛ che biro ta bol waa
harɛ nɔ ta bobɛlbwa.
N ta Israel tena be ŋɔe ŋɔ,
‘Hé nyin n bɔr pɛɛpɛɛ.’
Menee Korowii,
Kasinteŋ ɡboo n bwa,
waa aa wera dɛ toɡre
ɡboo mɛɛ bol.”
20Korowii ŋɔ,
“Harɛre nɛra haa chwaa
le laa ta kaa la, hé berɛ ba.
Nɛra baa kpɔ daa berɛ voɡa
dɛ kpoŋa
dɛɛ valɛ la aa waane jemɛ.
Ba kpɔ wesoŋa dɛɛ bil
voɡa aa wola won lɛɛ
ba sie.
21Hé cheme, dɛ́ bol he waa
kɔɔto, ásɛ nɛra
baa kpɔ waa daɡ ba la
le jina dɛ́ kpɔ liire.
Umee bol waa aa chiɡa
taraken nɔ bil wubwa nɔ?
Umee le saŋ la bwa dɛ
bola ɔ?
Men Korowii maa ɛ he Lɛɛ la
laa aa? Dɔɔ bɛlbwa toole.
22Harɛre nɛra bwa,
hé ba n be, dɛ́ ba dɔ
he nyu.
N ɡboo Korowii,
Dɔɔ bɛlbwa toole kpa.
23N ŋwɛɛ n ɡbaɡba,
maa nentanee ta
dɛ́ berɛ kpɛla.
N nyoa wobol bɛlbwa
toɡrɔ.
Nomɛlbwa ɛɛ ɡuŋ mɛ harɛɛ,
ásɛ dɛ che n sɔn ta ŋwɛɛ
kɛŋɔ ba Dɔɔree men.#Rom 14:11; Fel 2:10
24Baa bol n waa ŋɔ,
‘O ɡbo bee waa aa toɡra
ne kpeɡri do.’
Banɔ la ba baah aa di
n nɛɛ la bwa,
ɛɛ berɔɔ ba n be sihiih ne.
25Men Korowii ɛɛ ɡeloo Jekɔb
naanar bwa waa toɡre,
ásɛ ba kpɛɛ mɛ.”
Currently Selected:
Aesaya 45: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
