Aesaya 42
42
Korowii bonɔɔ bɛl wa
1Korowii ŋɔ,
“N bonɔɔ maa leo dɛ tɛo kpeɡrii nɔ,
n sie lɛ o nɛɛ taeh.
Mɛɛ ɡeloo n Doma ba so o
nɛ, ásɛ o baɡle nɛra baa lɔ
harɛ ta bwa ɡe ɡɛ
n kasinteŋ ŋwɛnɛre aa doa.#Mat 12:18
2Waa waa bol dɛɛ nyɛɡ,
waa takpeɡ ɡee kpɔ
bol waa fɔɡbaahna.
3Nɛn do kɛŋɔ daa waa ɡwɛɛna
dɛɛ ba kui yaa,
waa ɡel o ku.
Dɛ o do kɛŋɔ kandea waa
dɛ lawɛ kɛlll la ɡe aa,
waa ɡel ó dime.
Wɛɛ ɡeloo nɛra bwa jemɛ
kasinteŋ la.
4Waa koh, waa ɡwɛɡre ɡe,
dɛ́ ka tel kɛŋɔ harɛ nɔ nɛra
bwa aa ba jemɛ kasinteŋ
ŋwɛnɛre la.
Nɛra baa lɔ bojaŋ harɛre ta
ɛɛ dɔ hwɛɡa
o webaɡla taa.”
5Korowii waa ta nyundua dɛ
paɡru, dɛ ta harɛ
ne kwaa aa lɔ o ta,
dɛ tɛ nɛra baa lɔ o ta hweera
ba dɔ mkpa la,
onee bola ŋɔ,
6“Men Korowiirii yerɛ,
dɛ tɛɛ kpeɡri ŋɔ
hɛɛ ɛ waa aa toɡra
harɛ nɔ ta.
He nɛɛ aa ba cheɡa
ásɛ n ne nɛwɛnyina bwa
fɔwɛ fɔo,
dɛ́ do kɛŋɔ kandea dɛ́
tɛ harɛre nɛra.
7Hɛɛ ɡeloo nyoŋa sibie pili,
ba won dɛɛ na,
ne banɔ la baa do ba dea,
ba do biro tenten ta.
8Menee Korowii, n sɔnee ɡɛ.
Maa ɡel nɛra kpɔ jirima aa
chɛ kɛ ba tɛ mɛ la tɛ
nomɛl, maa ɡel
bá kpɔ kpɛɛra aa chɛ
mɛ la tɛ voɡa.
9Na, webena maa bol a waa la
chiɡo, asɛ mɛɛ bol
anfala wa.
N ɡelɔ hɛɛ no a waa mɔɔ
a chiɡ.”
Korowii kpɛɛra yel
10Nɛra haa lɔ harɛ ta bwa,
hé ɡo yelfale kpɛɛ Korowii.
Nɛra haa dɛ ɛ toma mpo ta,
ne kwaa aa lɔ o ta bwa,
ne harɛ jaɡa nɛra bwa,
hé ɡo kpɛɛra yel tɛo!
11Nɛra haa soɡe pua hɛŋle ɡbo
harɛ bwɛɛre ta,
hé ɡo yela kpɛɛ Korowii!
Keda naanar,
bela bwa haa soɡa la,
hé ɡe ɡo kpɛɛra yela!
Sela tena,
hé le bwejena dor
dɛ́ kpɔ silɛɛ ɡo yela tɛo!
12Bojaŋ harɛre nɛra,
hé kpɔ jirima tɛo,
dɛ́ kpɛɛro.
13Korowii ɛɛ leo kɛŋɔ banyoo
o siwi aa swɛɛra,
o kpɔ takpeɡ kɔɡre
dɛɛ yerɛ laa tena,
dɛɛ yo o dɔma kpeɡri nɛ.
14Korowii ŋɔ,
“Maa mwaala ne biɡro,
n dɛ nyin waane dɛ́ ɛ,
kɛ n helɔ jeiih ken.
Taraken te, mɛɛ do lɔŋɔree
kɛŋɔ haah loltea
aa lɔɔ ken.
N eehnɔ, n hweera bwa pi.
15Mɛɛ chɔɡ bwejena ne
deŋɡarere bwaa,
dɛ́ ɡel a papooni
ne kpɔɡa hol,
dɛ́ ɡel moo ne taama
bwa hweeh
dɛ́ berɛ pua hɛŋle ɡbo harɛ.
16Mɛɛ tɔ nyoŋa siee,
dɛ́ kpɔ ba kpɔ ŋwɛnɛre
baa wola a ta jemɛ ta.
Mɛɛ ɡeloo biro baa lɔ o ta la
berɛ bochaah dɛ́ tɛɛ ba,
dɛ́ kwaa ŋwɛnɛre aa wola
were a chɔ harɛ.
Waa nɔɔ mɛɛ ba ɛɛ tɛɛ ba,
maa ban ta.
17Kɛ nɛra baa dɛ yarada voɡa,
dɛɛ yerɛ kwaa baa sɛah,
kɛɛ voɡa ba ‘naa’ la te,
mɛɛ vɛɛh baa
bá di sihiih kohona.”#Yel 97:7
Israel tena do kɛŋɔ nyoŋa ba deŋna taŋ
18Korowii ŋɔ,
“Hé nɛra haa taŋ deŋna,
hé no!
Nyoŋa ɡe, hé nyiŋi dɛ́ na!
19Umee nyoŋa kohona
kɛŋɔ n bonɔɔ nɔ,
kɛɛ dɛ taŋ deŋne kɛŋɔ n
torome maa tomɔ wɔ?
Umee nyoŋa kɛŋɔ onɔ la men
Korowii aa leo tɛ n te laɔ?
20Israel tena, waa haa kpɔ siwi
na warɔ taeh,
he ta sie a ta doe.
He dɔ deŋne dɛ́ no waa
kɛrɛdɛ,
kɛ haa deŋne cheɡ.”
21Korowii waa aa toɡra
nomanta, a su o siwi
kɛŋɔ ó ɡel o Mmarare
do kan dɛ́ dɔ jirima.
22Kɛ nɛra nɔ, ba dɔma kah
ba kwaa dɛ paa kaa,
dɛ laɡ ba do bɔɔne bini
dɛ tɔ ba do,
dɛ do ba deene ɡe.
Ba ɛ nɛra baa lɛ ba kwaa bwa
ba be, nomɛlbwa aa wola
toole dɛ́ lɛɛ ba.
23He bini bɛlbwa toole dɛ́ no
waa nɔ kɛɛ dɛ́ cheɡ deŋne
kɛrɛdɛ, dɛ́ jemɛ ɡɛ haa
dɛ ba ɛɛ saŋ bɛl aa?
24Umee kpɔ Israel tena do
nɛnchɔɡa nɔn ta
ba kah ba kwaa kaa lɔ?
Korowii baa ɛo wechɔɡa la
laa aa?
Ba vɛh o ŋwɛnɛre ta teŋa,
ba ta o Mmarare waa la
noɛ.
25A waa o ɡel o bandia waa
kana kohona ba ba nɛ,
dɛ ɡel ba na waa laa ta.
A do kɛ o mar nii bar Israel
harɛ ken, kɛ ba ta kpɔe
do ba nyu bini.
Nii la nyaa ba, kɛ ba ta
wobɛlbwa ɡe hwele
dɛ le a ta.
Currently Selected:
Aesaya 42: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
