Aesaya 41
41
Korowii waa dɛ cha Israel tena
1Korowii ŋɔ,
“Harɛre nɛra, hé hel dɛ́
no n be!#Hab 2:20
Harɛre nɛra, hé nyin
bokpeɡfala,
dɛ́ ba bol he wa!
Ya bwa cheme kɔɔto
ásɛ bɛlbwa bol o wa.
2Umee le nɛn le wee leebɔr ɔ?
Umee tɛo kpeɡri o won yo
lɛ harɛre
dɛ pɔ a koranar nɛɔ?
O kpɔ o tokobi dɛ kpoo ba,
dɛ kpɔ o to ne hɛma
ba peɡre,
kɛŋɔ peu aa taa dɛ kpɔ
tutuɡ ne haahra kaa la.
3O dɛ ti ba, dɛ́ doŋ ba dɛɛ kaa,
wobɛlbwa aa wola on ha.
O ɡbaŋre, a do kɛŋɔ o
nakpale aa harɛ leɡe ken.
4Umee ɛ waa nɔ dɛ ɡel
a maɡre,
kɛŋɔ waa yerɛ nɛra ne ba
naanar ne ba ɡe naanar le
mumpar bá ɛ o toma ɔ?
Men Korowii maa lole
le mumpar la, menee ɛa,
menee dɛɛ ba nɛra baa ka
mun ɡe nɛɛ jae.#Mma 32:39; Wep 1:8
5Nɛra baa lɔ ekwie harɛre
ta naa dɛ ɔmɛ,
hale banɔ la baa lɔ
harɛ jaɡa
bwara ɛɛ sa
ba suuh tel dɛ ba,
6bɛlbwa ɛɛ cha o dɔŋ,
ásɛ dɛ yon ŋɔ o be ŋɔ,
‘Che kiŋkiŋ!’
7Nɛn waa dɛ sɛh kwa
dɛ́ do nɛn
waa jemɛ suuɡaswɛm kpɔe
dɛ ɛ o bwara ɡbemba.
Nɛn waa lɔ suuɡaswɛm
dɛɛ pɛ dɛ ɛo voɡ la,
dɛ́ do onɔ la waa dɛ loɡa
o bwara ɡe ɡbemba.
O ŋɔ o be ŋɔ o ɛ wa, dɛ kpaa
dadowɛre do voɡ la ta,
o bɛ chole.
8Kɛ he te, Israel tena haa ɛ
n bonɔɔna,
Jekɔb naanar maa le heya,
n dam Abraham dwee,#1Pi 2:9
9harɛ jaɡa lee n kpɔ heyaa le,
o jaɡaa n yerɛ heyaa le,
dɛ ŋɔ, ‘N bonɔɔnaa heya.’
N le heyaa tɛ n te,
n ta heyaa tae.
10Anomanta, he bɛ ɔmɛ,
n ja he nɛ.
He bɛ ɡel he bambile chɔɡ,
menee Korowii haa
dɛ tom mɛ.
Mɛɛ tɛ heyaa bokpeɡaa,
dɛ́ cha heya.
Mɛɛ kpɔ nɔnee tɔ he nɛ,
dɛ́ lɛ heya.
11Nɛra ba baah aa di he
nɛɛ kohona la bwa,
sihiih ɛɛ kpo baa ba
baŋa ɡole.
Nɛra baa ŋɔ bá yo heyaa la,
ɛɛ serewoo dɛ́ tonɛ.
12Hɛɛ ɡaaɡe he dɔma bɔree,
kɛ haa ban na.
Nɛra baa kpɔ yoi pu heyaa
ɛɛ serewoo.
13Menee Korowii
haa dɛ tom mɛ,
mɛɛ tɛ heyaa bokpeɡa.
N dɛ ŋɔ he be ŋɔ, ‘He bɛ ɔmɛ,
mɛɛ cha heyaa.’ ”
14Korowii ŋɔ, “Israel tena,
haa kanɛ, haa kpeɡe.
He bɛ ɔmɛ, mɛɛ cha heyaa.
Men Israel Nɛŋɡoroŋ
maa ɛ he Lɛɛ laanee ŋɔa.
15Hé na, mɛɛ ɛ heyaa kɛŋɔ
kon baa kpɔa dɛɛ erɛ boyu
onfale o do nyɛɡre,
ásɛ he kuuɡi bwejaŋa
dɛ́ paɡra, dɛ́ bur
deŋɡarere kɛŋɔ tutuɡ ken.
16Hɛɛ palaa ásɛ peu kpɔa kaa,
peujen lɔa merɛ.
Kɛ he te sie ɛɛ lɛ Korowii nɛɛ,
ásɛ dɛ kpɛɛ men
Israel Nɛŋɡoroŋ la.
17Nyaara ne banɔ la ba waa
aa suma ɛɛ ba nyin nee dɛ́
nyɔ kahonɛ ba lobi hol,
men Korowii ɛɛ no
ba wesoŋaa tɛɛ ba.
Menee Israel tena ɛɛ tomɛ,
maa ban ta.
18Mɛɛ ɡeloo nee palɛ le
bwejena aa hola dor,
dɛ́ ɡel fɛlembɔɔne bule ne.
Mɛɛ beɡre pua hɛŋle ɡbo
harɛɛ ó ɛ kataŋa,
dɛ́ ɡel harɛ
waa do kpakee bule ne.
19Mɛɛ ɡeloo peleme ne akaasia
ne mɛtel ne ɔleve daa
le pua hɛŋle ɡbo harɛ ta.
Mɛɛ ɡeloo kɔr bini daa le
harɛ waa wola were tɛ
komɛlbwa ta,
20ásɛ nomɛlbwa na dɛ́ lii
dɛ́ no a mun
kɛŋɔ men Korowiirii ɛa,
dɛ́ jemɛ kɛŋɔ
Israel Nɛŋɡoroŋ laanee taa.”
21Korowii, Israel tena kooro la
ŋɔ, “Hé kpɔ he waa ba,
dɛ́ ba baɡle ɡɛ aa ɛa
he kon do som.
22Hé ba he voɡa ne
á baɡle waa aa dɛ ba chiɡa
kerekere,
ásɛ dɛ a baa chiɡ aa ya jemɛ,
dɛ́ baɡle waa aa chiɡa saŋ la,
ásɛ ya nyiŋi a bini dɛ́ no
a mun.
23Hé ɡel a baɡle yaa waa aa lɔ
le kerekere,
ásɛ ya jemɛ kɛ a ɛ
voɡa kpela.
Hé ɡel á ɛ waa aa
ɛ wedɛɛɡa kɛɛ wechɔɡa
ásɛ ya bwara yɔr ya ɔmɛ.
24Voɡa la ta komɛlbwa ɛɛ,
asɛ a we-ɛɛla ɡe ɛ wepuu.
N kii nɛra baa dɛ toma
la ne ba voɡa.
25N le nomɛl o le weekaŋle
nyunduabɔr. Wee leebɔree
o so dɛɛ tom mɛ.
Wɛɛ tiɡri koranar nɛɛ kɛŋɔ
demamaa yon dɛɛ ɡbɛr teera,
kɛɛ vimamaa yon
dɛɛ charame choh la.
26He bini ume voɡee bola bil
wubwa kɛŋɔ waa nɔ ɛɛ
chiɡuu ásɛ ya jemɛ
kɛŋɔ o dɛ bol kasinteŋ ɔ?
Voɡ bɛlbwa toole
dɛ bol ɡɛ waa nɔ.
Nomɛlbwa ta an noɛ
le he be bwa.
27Men Korowiirii tɔ sie bol
amanesoma la Jerusalam
tena be.
Men tomɛ torome ŋɔ
ó ka bol ba be.
28N nyiŋi voɡa la bini,
dɛ a bɛlbwa toole
dɛ́ won baɡle waa la,
a bɛlbwa toole
dɛ́ won chaŋe waa la.
29Na, a bwa ɛ neɡra!
A we-ɛɛla bwa ɛ pɛɛpɛɛ.
A do kɛŋɔ peu ken,
komɛlbwa toole a be.”
Currently Selected:
Aesaya 41: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
